Acts 4

Pitaugo Yoniugo kaba bomagi enubulo ka foya li etete'ahana

Pitaugo Yoniugo etali sipi mono nonugu boana'i kaga lu epite neha'igo sipi mono noto kaba bo hiti to kimi bomagihi kaba bo'ani hiti to Satusi bona'i enali analo e'ahana. Yesu fili'ehinagati aku'i ho ti'ehina ana suhi lite asaga filise bona'i aku'i ho tilana'mu yabe lite boana'i lu epite neha'ina'mu enali enitaluga logo bi'ehina yabe. Ya hilete enali etayato lite naga ite sinihi agilube'mu nohigo nonuga etele'me mele'ahana yabe. Ya hana enali babu boana'i etali ka'atiti akeheli bati hilete liyafa hite mege'i mele'ahana. Enali ya'mana boana'i asaga'i 5,000 yabe.

Yago eteha'a kaba bo'ani hiti babafi bona'i hiti to keya kaga lu neepina bo hiti enali asaga'i Yelusale li gehesa hi'ahana. Enali sipi mono bona'i enikibina Anasiu, to Kaiyafasiu hiti, to Yoniu to Alekasatau yagi asaga'i sipi kaba enikibina bo naga'i li monekolugu ete li nupa he su he'ahana. Enali enubulo Pitanogo Yoninogo etele'mo ho tilete ma lite etoloka he'ahana: Letali hena hite li huto neha'ibe? Hena huse amuyana li'ehite li huto neha'ibe? To letali kiyi'afihi gi helete ya'mana suhi li huto neha'ibe? Ya lite etoloka hago Pitatoga Sikalafu'uba bai tolago ai ma luto lu epi'ehina: Lenali Isilaeli bona'magi kaba bo'anise. To olopa babafi bona'ise. Le'ali bo mone gigusa'a sibina hu'ehina yatai le'mo bati hu'ohu'inamofihi le'oloka helete ya'mana bo hena huto bati hu'ehifi lite keheli bati hilune'mu nehabe. 10 Ya hiletemo lenali asaga'i hiti to Isilaeli naga'i hiti ya'manana keheli bebe salo. Yesu Kilisitou Nasalete Bo ai gi'alo ma bomofihi gufa'a amuya moloto bati hu'ehibe. Ya higo ai folagahatinigu yatai lenubulo ho ti'ehibe. Lenali Yesuhi malipu yafalo hago fili'ehinamoya Hu'mau aku'i kene keliguti le'mo ho ti'ehibe. 11 Yesuhi ai kumu luto mono bukulugu ma luto ni'ina yabe:

  • Efaha nohi gilata bomagita
  • laga melepesina efahuba
  • aliha'a sipi huto huto
  • hetofa amuya efahi lolo hulata nohibe.

12 Bo mone fato'i nohinauba melehe'malina'mu yabe. Yesu ai'asigoko lele'mo lubuto bilata bo nohibe. To asaga hepa'i ni'inalogati mone gihiti bo fato'i lubuto biloto lele'malibe luto Hu'mau le'mo huto mehu'ehina yabe.

13 Pitaugo Yoniugo etali koli mehise amuya melete kaga lu yege ha'ina enali bu ge'ahana. To etali babafi bomale'i memina'ina fa'mene bole neha'ibe lite kanisole bomagi akeheli'ahana. Ya'mu lite enali kaba kanisole bomagi enekesa yigi babu lilete ma lite akeheli'ahana, koyapa'i etali Yesuhi mege'i melete moneka mine'ahana yabe. 14 To etali gufa'a le'mo bati hi'aha'ina bo hiti moneka ho tite nehago be gelete ya'mu lite enali kanisole bomagi etali la'ina kaga'atitilo nona'a mone meli'ahana yabe. 15 Ya hilete enali kanisole bomagi nonugati etele'mo fegutoga he'migo nelimi'igo enali'ani musi musi ka ma lite li'ahana: 16 Ma bole hena hu etatalune? Asaga Yelusale bona'magi etali topa ho'ehinanamo ya'ma sipi foya mone li huto huto hi'aha'inamofihi kaga'a akeheli su he'ahanamofihi lali bahane mehaluta'mu yabe. 17 Ya'mu luto etali ya'mana kaga fato fato hepatoga boana'magihi lu epimofa'na mehiliyo, to letali Yesuhi gi'a aku aku'i mone'a hiti helete boana'i kaga lu meepiliyo luto etegekesa bilune li'ahana. 18 Ya lite kaga lu kehelilete Pitanogo Yoninogo aku'i nonuga kehe ite etele'mete tilete ma lite lu etimi'ahana: Letali aku aku'i Yesuhi gi'a helete ai gi'alo boana'i enelepilata lu meepiliyo lite etegekesa bi'ahana yabe.

19 Ya lite lago Pitaugo Yoniugo ma lite kanisole bomagihi ka'anilo lu epi'aha'ina: Lenalitini loko hite hiya kagauba Hu'mamofihi bulo bati hilifi lite kehelilo. Lenali kagamofihi mege'i malalu'ifi to Hu'mamofihi mege'i malalu'ifi lenaligo kehelilo lite li'aha'ina yabe. 20 To le'ali kaga lu yege hose'nati'a mehe'milu'ina'mu yabe. Asaga'na le'ubulo huto higo bu go'ohu'inanamofihifi to le'ekesatu'i keheli'ohu'ina le'ali lu yege homofa'na hilu'ina'mu yabe. 21 Ya lite la'igo enali kanisole bona'magi amuya melete kaga lu etetelete etele'mo he'mi'ahana. Enali naga'i etimilana kaga li huto mehi'ahana yabe. Hena'mugope asaga boana'magi huto hu enubulo molo'ehinamofi kumu lite Hu'mamofitogago enegelo bi emite gi'a liyafa hana'mu yabe. 22 To Pitaugo Yoniugo topa ho'ehinamo sipi lili'na li huto hite le'mo bati hi'aha'ina bo ai koyapa bo kufu'a 40 li he'mi'ehina bo yabe.

Enali Hu'mamofitoga amuya'a lilune lite nunumu hi'ahana

23 Pitanogo Yoninogo etele'mo he'mina ana kana'asilo etalalu'atitigi nehanaga bilete asaga kaga kanisole bona'magi lu etete'ahana enali'i beto hu epi'aha'ina yabe. 24 Ya hila'igo enali asaga'i akehelilete komopa'ani monetoga melelete ma lite Hu'mamofitoga nunumu hi'ahana: Sipi Bo, kai kokuluma hiti me'i hiti to hege nagami'i hiti to asaga'na sigina mehinanalo ni'ina kaika lolo hu'ahata yabe. 25 Koyapa'i Sikalafu kagu kaga mone ma luto Tebitiu ai koko panaka lali tatatifihi bagalo lu'ahata yabe:

  • Enali fegutoga bona'i henabe lite
  • enitaluga logo bilata nohigo,
  • lali nagatimagi sibi sibi enekesa
  • fato fato'i neyigibe?
26 
  • Enali enikibina bo asaga
  • noto noto hepatogati ho ti baga
  • to sipi bo hepato hepato mino baga i'ahana
  • to ti su helete
  • Sipi Bo Hu'ma hiti to Mesia'afi hiti
  • enemegesa hu etimite
  • etele'mo melugu malalune lite
  • ho ti baga ilana'mu yabe.
  • 27 Ya'ma Tebitiu koyapa'i ya lu'ehinagi to lusiga ma'naka luto Helotiugo Ponitiasi Pailati hiti enali fato naga'a hiti to Isilaeli bona'i enali Yesuhi le'mo melugu malalune lite moneko ma hepalugu li nupa hi'ahana, ya'ma koko panaka mana'a koyapa'i le'mo molo'ahata yabe. 28 Enali asaga'i monekolugu li nupa hilete asaga'na koyapa'i li huto hilabe luto amuya kaga lu'ahata ai anana huto hilina'mu yabe. 29 Oho, Sipi Bo, amuya kaga asaga'i li'ahanamofito kai yatai kehelibo, ya huloto lali kai koko pananaka lehe'mobo. Ya hu'ehitogo lali amuya moloto koli mehuse kai kagaka lu yege ho ketalune. 30 To kai kayahaka li saga huloto enebesise bona'i enele'mo bati nohuto to topa hose'na fato fato'i to sipi lili'na koko panaka hetofa'a Yesuhi ai gi'alo li huto hubo. 31 Enali ya hite nunumu ahilago li nupa hite nehana nonugu imima'i li'ehina. Ya huloto enali to Sikalafu'uba tito bai tolago enali Hu'mamofihi kaga'a lu yege homofa'na hi'ahana yabe.

    Hu'mamofitoga komopa'ani emite minana bona'i enali koguna ite mine'ahana

    32 Hu'mamofitoga komopa'ani emite minana bona'i enali moneko kaga liyafa hite mine'ahana. To bo moneuba ai fe'noha'alo bu goloto nani'ni nasana'ni ni'ibe luto melu'ehina. Asaga fe'noha'a enali asaga'i nehanamagi enali'na hiti li baga i'ehina. 33 Enali aposolo naga'magi Sipi Bo Yesu fili'ehinagati aku'i ho ti'ehinamofihi kaga'a lu yege nehago ana ka'aniuba amuya sipi molo'ehina yabe. Ya hago Hu'mau fuluna enalitoga epi baga ito hetofa lu epolo'ehina yabe. 34 Bo mone enali folagaha'aniguti nose'namu fito fe'noha'amu sa mehu'ehina yabe. Enali me'ani hiti to noha'ani hiti ni'inamagi fato bona'i efaloti neepite enali ana efahi lite bite, 35 aposolo naga'magihi epigo enali guna ite enemeto enemeto hite epilata hi'ahana yabe.

    36 Ya hite minanagu bo mone mino'ehina ai gi'a Yosefe. Enali aposolo naga'magi Banabasio lite fato gi mele'ahana. Ya'mana gimofihi hapa'aya ma luto ni'ibe, ai amuya kaga lu epito enekesa bilata bo yabe. Ai Libai nagaluguti Saipalasi hepato bo yabe. 37 To ai'a me'a nesi'a fato bomofihi noemito efahi liloto ana efahi lito buto aposolo naga'magihi epi'ehina yabe.

    Copyright information for `BEF