Acts 6

Nagahi mone kegi'a su hoto mone kegi'ati loemo heleko malago bomagi aposolo bona'i enehe'me'ahana

Ya'mana kana'alo ka lamana'a mege'i malana bona'i luga'a babu lite ete ikele'ahana. To luga'a ka lamana'a mege'i malana bona'magi Giliki nogo nehanamagi enali luga'a Hibulu nogo nehanamagi ka epeki'ahana. Ma lite li'ahana: Lenali asaga yupahi nose'na'ani meni'ina boana'i enehe'melata nehanaya to keto ana'i enemegesa hu epite menehe'melata nehabe. Ya lago 12 aposolo bomagi luga'a boana'i enemege'i malana kehe i nupa hilete ma lite lu epi'ahana: Lali Hu'mamofihi kaga'a lu epise'na he'miloto boana'magi nose'na guna ito epimofa'na hiluta bati mehilina'mu yabe. Nigibo nagabose. Lenali nayahi mone kegi'a su hago mone kegi'ati loemo heleko melenogo lenali folagahatiniguti enele'mo ho tilo. Enalitoga Sikalafu'uba bai tago kaga keheli bati hi'ahago boana'magi enali kumuko nelilana bo yabe. Ya hilete ya'mana bo enele'mo melenogo ya'mana lili'na kaba hite lilabe. Ya hinogo laliti nunumu huse'na hiti to boana'i kaga lu yege hose'namofihi lili'na'asigo li eto huto lito bilune. Asaga boana'magi aposolo bona'magi lu huto hana kalo enegelo bi'ahana. Ya hilete Sitifenitoga Sikalafu'uba bai tana bo le'mo ho ti'ahana. To Filipiu yagi Polokolu yagi Nikeno yagi Timoni yagi Pamenasiu yagi to Nikolasiu ai Atioki hepatogati fegutoga bo Yuta bona'magi mono kagamofitoga komopa'a molo'ehina bo hiti enele'mo ho ti'ahana yabe. Enali ya'mana bo li nupa hite ete aposolo bona'magi naga'magi enubulo ho tigo enali ana bomagihi enugufalo enayahi li saga hite melelete nunumu hi epelete lusana epi'ahana lusa gi epele'ahana.

To Hu'mamofihi kaga fato fato hepato leli'ali hago bu baga i'ehina. Ya higo babu boana'i luga'a hiti Yelusale hepatogati komopa'ani i gelehe hite Hu'ma kaga'a liyafa hi'ahana. To enali sipi mono noto kaba bona'i luga'a babu lite ana hite komopa'ani i gelehe hite ka lamana'a mege'i mele'ahana yabe.

Yuta bona'magi Sitifenihi ka foya li ete'ahana

Sitifenitoga Hu'mau Sikalafu'a emilago amuya sipi liloto boana'magihi folagaha'anigu babeyafana fato fato'i li huto hu'ehina. Ya nohigo luga'a bomagi ho tilete ai kaga'a pelesa i'ahana. Ya'mana bona'i enali Yuta bona'i fato mono ka nekehelina bo, enali fato mono'ani Lali Foyati yabe lite gi'a helata nehabe. To enali Sailini hepatoti yagi Alekasatilia yagi, to mone'amagi Silisia yagi to Esia, asaga ya'ma hepatogati ete li nupa hite nehana bomagi yabe. 10 Sikalafu'uba kaga bati hina'ago Sitifenihi lu bagalo malago ana bomagi lana kaga'aniuba ai kaga'a be meligi'ehina yabe. 11 Ya hilete ya'mana bona'magi bati mehina suhi li huto hilete fato bona'i mone'amagihi enekesa bigo enali ma lite li'ahana: Ai Mosenogo Hu'manogo etigi holoto kiya yokolo ka lu etoto'ehibe. 12 Enali ya lite lana kagauba asaga boana'i to keya ka enelepilata bo hiti to olopa napa bo enali enipaluga lu boyogo fi'ahana. Ya hago enali Sitifenitoga bite yato lite le'mete bite mono kanisole bona'magitoga le'mete bi'ahana. 13 To enali faga faga lu melete ka foya li etalana bona'i luga'a enele'mo mele'ahana. Ya'mana bomagi ma lite li'ahana: Asaga yupahi ya'ma bouba suguna mono nohatimofi hiti to Moseu keya ka li'ehinamofi kumu luto kaga lu sibina hulata nohina yabe. 14 Lali keheli'ohunogo ma luto lu'ehina yabe: Yesu Nasalete bouba ya'ma hepa'i sipi mono nohi tele bito li foipa loloto koyapa'i Moseu limigo ana suhi lilata nohuta ai li nohe'mito fato suhi lepiluna'mu yabe lu'ehibe. 15 Ya lago asaga bona'i kanisolelugu mine'ahanamagi Sitifenihi bulu'i he'ahana. Ya nehago Sitifenihi okaba'a agelomofihi suhi lito i besa lo'ehina yabe.

Copyright information for `BEF