Acts 7

Sitifeniu mono kanisolemagi enubulo kaga lu hokolo hu'ehina

Sipi mono noto kaba bouba Sitifenihi loka ho'ehina: Enali ma'naka nelafihe? Ya luto loka hago Sitifeniu lu emi'ehina: Nogo'nigita afo'nigita kehelilo. Hu'mau fana meha'a hiti bouba koyapa'i tatatifu Abalahau Halani hepato mebu'ohuto Mesopotamia hepato minana kana'aluga nehetito bulo hu'ehina. Ya huloto ma luto lu emi'ehina: Kai meka hiti to kogokagi afokagi he'mi epololoto nani me'i mone kelepilube'mu nohunalo bubo. Ya luto lu emigo Abalahau Kalitia me'i he'miloto Halani buto mino'ehina. Alihi Abalahahi afo'afu fililago yatai ma nehana hepato Hu'mau le'mo molo'ehina yabe. Hu'mau: Kaika me'i yabe luto Abalahahi nesi'a loko huto melepi'ehina yabe. Alihi ma me'i kiminogo'ni li'ehitogo yagapanaka ana hite huto alihi hilanamagi mana me'i molo lilana'mu yabe luto Hu'mau lu emi'ehina. Abalahahi yagapana'a memine'ahana kana'alo ya'mana kaga Hu'mau lu molo eto'ehina yabe. Hu'mau ma luto lu'ehina: Yagapanaka naga'i fato bona'magi melugu minalana'mu yabe. Ya hi'ehinogo me'i hapa'a bona'magi kai yagapanaka koko kako pana'ani enele'moloto hilenogo 400 kufu'a bilina'mu yabe. Ya hilenogo alihi nani ya'mana bona'i kai yagapanaka enele'mo koko kako'ani lolo hi'ahana bona'i nani ka foya li epoloto osahi epilube. To liha'a kai yagapanakamagi ya'mana me'i he'milete bilabe. Ya hilete enali alihi elete ma'asi ni'ina meto ete nani'i komopa'ani nimite nunumu nama lilabe luto Hu'mau lu'ehina yabe. Ya luto luloto Hu'mau enugufa laga huse'mofihi mone'na kaga Abalahatoga molo'ehina. To alihi minoto Abalahau pana'a Isakahi ketoloto ai nayahi mone kegi'a su hoto mone kegi'ati loegi monegi leheko malana kana'a minoloto gufa'a laga hu eto'ehina. Isakau ai Yakopuhi afo'afu, to Yakopu 12 tatatigi afo'anifu minoto ana huto enugufa'anilo laga hu epolo'ehina.

Enali tatatigi Yosefehi ipakafa helete fato bona'i le'mo neepite efahi li'ahana yabe. Ya hago Iyipi metoga le'mete bi'ahana. To Hu'mau ai hiti moneka mino'ehina. 10 Ya huto asaga ketana aitoga huto hu'ehina. Aitoga fuluna emito ka keheliya ise'na kibina bo Felo ai okaba'alo bulo emi'ehina. Ya higo Iyipi gamani bomagihi kaba bo'ani hiti to ai noha'agu asaga fe'noha'alo hiti kaba gimi gilibe luto Felou Yosefehi le'mo molo'ehina ho ti'ehina. 11 Ya hulago Iyipi me kegi'a hiti Kena me kegi'a hiti nose'na minigigo sipi kau'na he'ahana. To enali tatatigi nose'na nalanana'mu sa sa hi'ahana. 12 Yamu'i Iyipi melugu nose'na ni'ibe lite lana kaga Yakopu keheliloto tatatigi enoho lifigo yata'a yupahi ana hepato neheti'ahana. 13 Alihi aku'i ana hite nebago Yosefeu go'agihi kaga lu hokolo huto nani Yosefeita lu epi'ehina. To ya nohigo Felou Yosefehi naga'a ana yupahi bu enogo'ehina yabe. 14 Yosefeu afo'afu Yakoputoga kaga moloto kai hiti to asaga naga'i Iyipi alo luto ligo bi'ahana. Enali 75 boana'i e'ahana. 15 Ya luto kaga malago Yakopu Iyipi melugu limito minoto anaga fili'ehina. To tatatigi hiti ana hite ana melugu fili'ahana yabe. 16 To alihi enali felisa'ani Sekeme hepatoga lite bite koyapa'i Abalahau mone me'i nesi'a Hemoho pana'amofitoti mina fi'ehina melugu mulilugu keli he'ahana.

17 Hu'mamofihi kana alo ya'mana li huto hilube'mu hilina, yata'a Abalahatoga yama li huto hilube'mu nohube ligo keheli'ehina supomofihi kana'a yatai ahuto hilube'mu nohibe. Isilaeli naga'i hofa telete sipi hite Iyipi melugu pulu tite babu nelabe. 18 Alihi kibina bo Iyipi melugu huto huloto kaba hu'ehinauba Yosefehi gi'a mekeheli'ehina yabe. 19 Ya'ma kibina bouba ai bonati enele'mo bati mehu'ehina yabe. Ai bati mehina suhi tatatigitoga li huto huloto fitu fo epoloto amuya kaga ma luto lu epi'ehina: Yagapanatini nonugati he'mite fegutoga enele'mo melenogo enali fililabe. 20 Ya hina kanaluga Mosehi ito'afu keto'ehina. Ai hetofa pana'i nohigo Hu'ma laga'a besi'ehina. Ito'afugo afo'afugo fala kite nonuga kaba hi eta'igo ikahi loegi monegi bu fili'ehina. 21 Alihi le'mo fegu telago Felohi pa'auba le'moto buto ai'a pana'a legi huto kaba hu eto'ehina. 22 To Moseu Iyipi bona'magihi keheliya ise'namo ya'ma asaga kaga keheli su hose sukulugu buloto amuya kaga noluto lili'na amuya moloto nolito sipi bo huto huloto mino'ehina.

23 Alihi Mosehi kufu'a 40 bulago Isilaeli bona'i lalu'agihi buto bu enagalube luto ekesa keheliloto bu'ehina. 24 Iyipi bo moneuba Isilaeli bomofihi kaga lube sibina hube nohu etago bu goloto Isilaeli bomofitoga moloto Iyipi bo nona'a emito ho fili'ehina yabe. 25 Mosehi ai naga'amagi ma lite enekesa kehelilafi luto ai keheli'ehina yabe. Ya'ma bouba Iyipi bona'magi enayanuguti lele'mo lubuto bilifi lite keheli bebe salafi luto keheli'ehina. Enali keheli bebe mese'ahana yabe. 26 Nohi koto ete kaga Moseu ana huto Isilaeli bo loemo luba neha'igo bu etogo'ehina. Ai ana bole etele'mo baba ilube'mu huloto ma luto lu etimi'ehina: Nalalu'nile'ita letali moneko naga'mo neha'ina letali letugufagu hena luba neha'ibe? 27 Ya noligo ai gona'a nohana bouba Mosehi le'mo felu holoto ma luto lu emi'ehina: Kuyu'afu lu ketago kai kabati'a minoto le'ali kaga loko hilube'mu nohane? 28 To yago Iyipi bo mone ho fili'ahata ana supo luto yatai nani'i nahalube'mu nolapihe? 29 Ai ya luto lina kaga Moseu keheliloto koli huto Mitia melugu buto minoloto anaga liha'a liloto pana'a loemo eteketo'ehina yabe.

30 To 40 kufu kana bulago agelo moneuba Sainai kosa lebato ka me'i ni'inalo nohigo bulo hu'ehina. Agelouba logo guluya meha'agu ufeha'a hiti yafa lagaso'agu mino'ehina. 31 Moseu ana logo guluya meha'a bu goloto topa holoto hena suhi nolifi luto bu go bati hilube'mu ana'asilo bu leba to'ehina. Ya huloto Hu'mamofihi nogo'a keheli'ehina: 32 Nani tatakamagihi tata'anifita yabe. Abalahagi Isakagi to Yakopugi Hu'ma'anifita nohube. Ya luto ligo Moseu afoya iloto lesa'a ligo ana logo guluya meha'a bu megose mino'ehina. 33 Ya nohigo Sipi Bo lu emi'ehina: Ho ti'ahata me'iya lamana'a ni'inagi kigigu bi'ahata suka kisi he'mibo. 34 Nani bona'ni Iyipi nehanamagi asaga enagabu lili'na nelina abu enogo'ohube. Enali usegi asegi ite yibi nama nelana nani akeheliloto enele'mo enubuto bilube luto alimi'ohube. Yatai kai ho titogo Iyipi koho lifinogo'ni bilane.

35 Ya'mana Mosehi Isilaeli bona'magihi enemegesa hu emi'ahana yabe. Kuyu'afu kele'mo ho tigo kaba hu letoto kagati loko hilube'mu nohane? Enali ya lite loka he'ahana. Ya'mana bouba kaba bo'anifi to enehe'mose bo yabe luto Hu'mau ho lifi'ehina yabe. Ufeha'a hiti yafa lagaso'agu agelouba logo guluya meha'agu bu go'ehinana ya'ma kene'uba Mosehi he'mo'ehina. 36 Ai Iyipi hepatogati enele'moto nobuto babeyafana hiti topa hose'na hiti Iyipi melugufi Safa Nagami beletogafi to ka melugu hiti 40 kufugu li huto hu'ehina. 37 Ya'mana Moseu ma luto Isilaeli bona'a lu epi'ehina: Nani nele'mo huto hu'ehina bameto suhi huto li moloto kaga lu yege hose bo lenali folagahatiniguti le'mo ho tilina'mu yabe lu'ehina. 38 Ya'mana bouba Isilaeli bona'i ka melugu ai hiti li nupa hi'ahana. Ai tatatigi hiti to agelouba Sainai kosagu Moseu hiti kaga li'ahana yabe. Hu'mamofihi kaga'a minoba minoba huse'mofihi liloto ya'ma lalitoga lu limi'ehina bo nohibe.

39 To tatatigi kaga'a keheli he'mi'ahana. Ya hilete enali Mosehi le'mo felu hete fato le'mo nemelete Iyipi melugu aku i behe hite bilune'mu hi'ahana. 40 Ya hilete Alonihi ma lite lu emi'ahana: Ana'ina meha'a mone lolo hu letetogo ai ya'mananauba kohe toto lele'moto bilibe. Moseu Iyipi hepatogati lele'moto o'ehina bo ai henana hu bufalo molo'ehifi lali mekeheli etone. 41 Ya lite lilete yafatu bulumaka yaga nala'amofihi meha'a lolo hite melelete lokiya fi emilete anana lolo hana'mu lite nose'na gete melekehi i'ahana yabe. 42 Ya nehago Hu'mau enemegesa hu epiloto enali kokulumalugu ikahi sonofitoga komopa'ani emite minalabe'mu he'mi epolo'ehina yabe. To kaga lu yege hose bomagihi mono bukugu fayahi ge'ahana ma luto ni'ina:

  • Isilaeli bona'ise.
  • Ka melugu nani kumu lite
  • yagakafa hete lokiya fi menimi'ahana
  • kana'a kufu 40 yupahi yabe.
43 
  • Lenali Molokihi yege noha'a kofilete
  • to sonofi'i meha'a Lefani
  • ya'mananamofitoga komopatini epilune lite
  • meha'a lolo hi'ahana yabe.
  • Ya'mu nani foto metoga Bebiloni kegi'a
  • lenoho lifi he'milube.
  • 44 Koyapa'i tatatigi ka melugu minana yupahi komopa'ani emi'ahana yege nohi Hu'mamofihi bulo mino'ehina. To Hu'mau Mosehi ya suhi lito ana yege nohi gibo luto faya'a lepi'ehina suhi lite gi'ahana yabe. 45 Alihi tatatigi Yosua hiti fato bona'magi me'i lilune'mu e'ahana. Ya hago tatatigi enubulo Hu'mau me'i hapa bona'i enoho lifi he'mi'ehina. Ya'mana kana'aluga ana yege nohi lite bite malago anaga ni'igo Tebitiu huto hu'ehina yabe. 46 Hu'mau Tebitihi bita hu'ehinatoga fuluna emito ai kumu'i keheli bati hu eto lago Yakopu Hu'mamofihi mono noha'a mone gi etalube luto Hu'mamofitoga nunumu huto loka ho'ehina. 47 Ya lu'ehina ya'mana nohi Solomoniu gi eto'ehina yabe.

    48 Kaga lu yege helata bona'i moneuba ma luto lu'ehina'a huto Hu'ma kokulumalugu minolata bouba enali bona'magi gise nonugu menominagihe luto ma lu'ehina:

    49 
    • Sipi Bouba lu'ehina:
    • Kokuluma'i goto hepa'ni yabe,
    • to melugu nani nigigusa iluna'mu yabe.
    • Lenali hena huse nohi gi netalana ni'ibe?
    • Nani mino nabasu biluna hepa'niba
    • hiya'a ni'ibe?
    50 
  • Ya'mana asaga'na nani'ni nayanugati
  • lolo mehu'ohunanamo ni'ifihe?
  • 51 Lenali kegeiyo bona'i. Lenali kaga mana'a Hu'mau molo'ehina li komopatinigu melete meminana bona'i yabe. Lenali asaga'i tatatinigi hi'ahana ana supo lite nehabe. Asaga yupahi lenali Sikalafu'i le'mo he'milata nehabe. 52 Koyapa'i kaga lu yege hose bo minana mone kiyi'afihi le'mo sibina mehi'ahana ni'ibe? Lamana bo'a, Yesu yabe, alinamofihi kaga'a lu yege hete koyapa'i e'ahana bo enoho fili su he'ahabe. To yatai halune'mu hana bomagi enayanugu lenali malago ya'mana bo aho fili'ahabe. 53 Hu'mau keya ka'a agelomofihi yato malago limi'ehina lenalitini ana kaga li'ahanamofihi mege'i melete komopatinigu li menemalabe luto Sitifeniu ka epeki'ehina yabe.

    Sitifenihi efaha osatu i fili'ahana

    54 Ya luto kaga enali kehelilete enipagu logo bigo enabagalo heni kofilete Sitifenihi sipi ipakafa he'ahana. 55 Ya nehago Sikalafu'uba Sitifenitoga bai tolago kokulumatoga bu golago ti'ehina. Ai Hu'mamofihi fana mehena'agu Yesu yahi lamaga'aga nohigo bu go'ehina. 56 Ya huloto Sitifeniu lu epi'ehina: Bu galo. Kokuluma'i i hokolo nohigo Hu'mamofihi yahi lamaga'aga koyapa'i Kokulumaguti limi'ehina Bo nohigo bu nogobe. 57 Ya luto noligo enali enegekesa'ani fi hekini lelete ho tite kehe sipi ite ahi kala kala melelete Sitifenihi bite nu ki saga hi'ahana. 58 Ya hilete hepaluguti fegutoga le'mo melelete efaha osahi hapi fite gufalo he'mi mele'ahana. Enali yata'a Sitifenihi faga lube molobe hi ete'ahana bona'magi gukete'ani kisite neheya kola bo mone gi'a Soliu yabe luto nohina bomofihi metoga mele'ahana. 59 Ya hilete efaha osahi Sitifenihi gufalo ite mine'ahana. To Sitifeniu ma luto nunumu hu'ehina: Sipi Bo Yesu, kai nemeha'ni libo. 60 Ya noluto ai lapusa noto minoloto mone'a hiti kehe sipi iloto ma luto lu'ehina: Sipi Bo, enali ya'ma li huto nehana foipana'ani'mu luto kekesa mekehelibe. Sitifeniu ya luto luloto ana'asilo fili'ehina yabe. Ya hite, Sitifenihi hanana'mu Soliu keheligo gufaluga bati hu'ehina yabe.

    Copyright information for `BEF