Acts 8

Soliu Yesutoga komopa'ani molo emi'ahanamagi enahalube'mu nohube lu'ehina

1Ya'mana kana'aloti fato bona'magi hapi fite Yelusale hepalugu Yesutoga komopa'ani molo emite neminana boana'i enegene mane ite neenahago tili tele hite Yutia kegi'a nebago Samalia kegi'a nebago hi'ahana yabe. Ya hana 12'a aposolo bona'i Yelusale analo mine'ahana yabe. 2Hapa'ani bati hina bona'i Hu'mamofihi ka'amofihi mege'i nemalana bona'magi Sitifenihi sipi yibi nama nehi etete le'mo keli he'ahana yabe.

3Soliu ai amuya mololoto Yesuhi bona'magihi le'mo sibina hilube'mu nohube luto lu'ehina. Bona'magi noha'aniluga tiloto limiloto nohuto Yesutoga komopa'ani emite minana bona'i kefefe ho lito limi limi fegutoga huloto bo hiti ana'i hiti nagalugu enele'mo molo'ehina yabe.

Ka lamana'a Samalia kegi'a lu yege he'ahana

4Enali Yesutoga komopa'ani emi'ahanamagi tili tele hite bite minela minela hi'ahana hepatoga ka lamana'a lu yege he'ahana. 5Filipiu sipi hepa'i monelugu Samalia limiloto ka lamana'a boana'i enubulo lu yege nohoto Mesiahi gi ho'ehina yabe. 6Ana hepato bona'i enali li nupa hilete ka'a enegekesa hokolo hite nekehelite babeyafana li huto hina hiti bu ge'ahana yabe. 7Babu bona'magiluguti foipa felemagi sipi kehe ilete leheko limi'ahana yabe. To bona'i enugufa'ani ketipa'i fili'ehinafi to enigigusa sibina hu'ehinafi ya'ma bona'i Filipiu enele'mo bati hu'ehina. 8Ya huto li huto hu'ehinana ya'mana hepato bona'magi bu gelete lusi enegelo bi'ahana.

9Ya'mana hepalugu bo mone mino'ehina gi'a Simoni ai yatama yupahi nalisana li huto nohigo Samalia bona'magi bu gelete topa hilata enelesa lu'ehina. Ai nani nikibina bo nohube, lulata hu'ehina yabe. 10To asaga bona'i enigi hiti to enigi meni'ina hiti enali amuya melete Simonihi ka'a keheli emi'ahana. Ya hilete enali ya lite li'ahana: Ya'ma bouba aitoga Hu'ma sipi amuyana emi'ehina bo nohibe lite lilata hi'ahana. 11Enali amuya melete ana bomofihi ka'a mege'i mele'ahana. Hena'mugope? Babu yupahi nalisana li huto hina yanamofihi bu gelete babeyafana suhi huto ni'ibe lite enelesa lu'ehina yabe. 12To Filipiu Hu'mamofihi kapo'amu luto ka lamana'a lu noepito to Yesuhi gi'a ho epina kagamofihi komopa'anigu li melelete bo hiti ana'i hiti nagami'i fele'ahana. 13Simoniu ai hiti komopa i gelehe huto nagami fololoto Filipi hiti moneka mine'aha'ina. Ai topa hose'na hiti to babeyafana fato fato'i Filipiu li huto hina Simoniu bu goloto ekesa yigi babu lu'ehina yabe.

14Enali aposolo naga'i luga'a Yelusale hepatoga mine'ahanamagi Samalia bona'magi Hu'mamofihi mono ka'a li tokolo habe lago keheli'ahana. Ya hilete Pitanogo Yoninogo ana hepato etoho lifi mele'ahana. 15Etali ana hepato henetilete Sikalafu'i ana bona'magi lilabe luto nunumu hi'aha'ibe. 16Enali Yesuhi gi'aloko nagami'i fele he'migo Sikalafu'uba enalitoga melimi'ehina'mu lite yabe. 17To Pitaugo Yoniugo etayaha'atiti enali lataha'anilo mala'igo Sikalafu'i enalitoga limi'ehina.

18To Simoniu etali etayahatiti lataha'anilo mala'igo Sikalafu'i lina bu go'ehina. Ya huloto Simoniu moni efahi etalitoga lito buloto ma luto lu'ehina: 19Letali ya'ma amuyana nani'i nimiliyo. Ya hi'inogo nani ana suhi huto nayaha'ni bona'i lataha'anilo melenogo'ni Sikalafu'i lilabe luto etimi'ehina. 20Ya noligo Pitau lu emi'ehina: Kai hiti efahaka hiti lito logo kapogu bubo. Henabe luto efahakatu Hu'mamofihi amuyana mina filane? 21Lili'nati mone'a ya'mana ma'naka luto kai nasanaka meni'ibe. Kai komopaka Hu'mamofihi bulo'i bebe soto meni'ibe. 22Foipa faipa kekesa nokehelitana he'miloto komopaka i gelehe huto Hu'mamofitoga nunumu hitogo ya'ma kekesa noyigitamofihi Hu'mau li he'mi ketalibe. 23Kai komopakagu luba huse'na bati mehinamofihi babu lito ni'igo foipanauba kele'mo naga i'ehibe, Pitau lu'ehina. 24Ya ligo Simoniu ka'alo nona'a lu etimi'ehina: Letali Sipi Bomofitoga numuna hu nete'inogo ai nehe'malibe. Ya hi'inogo asaga'na nela'inamofihi huto mehu netalibe.

25Alihi etali bu ge'aha'inanamofihi kaga'a hiti Hu'mamofihi kaga'a hiti lu epi su helete etali i behe hite Yelusale kapo melete bi'aha'ina. Etali kapo melete nebite Samalia fato fato hepato ka lamana'a lu epime lu epime bi'aha'ina yabe.

Filipiu Itiopia gamani bo ka lamana'a lu emi'ehina

26Hu'mamofihi agelo'auba Filipihi ma luto lu emi'ehina: Kai ho tito Yelusaleti bu'ehina kapolo giyaka lito yofo'i mobuloto Gasa hepatoga limibo. Ya'mana kapo ka melugu bu'ehina kapo yabe. 27Ya luto lu emilago Filipiu ho tito nobuto ana kapolo Itiopia bo mone nobigo bu go'ehina. Ai kaba bo Itiopia melugu Katesihi kibina a'mofihi asaga fe'noha'alo kaba hulata bo. Ya'mana bouba Yelusale oto mono ka nokehelina yabe. 28Ya nohinati ai kale legi hu'ehinagu hosi yaga kefefe higo minoloto i behe huto kapoga bu'ehina. Ya nohuto koyapa kaga lu yege holata bo Aisaiyaha buku leka somo bu'ehina. 29Ya higo Sikalafu'uba Filipihi ma luto lu emi'ehina: Kai ana bo nobinalo buto gufalo li letogo moneka biliyo. 30Ya ligo Filipiu hololu luto buto ana bo nobina lebato buloto kehelina Aisaiyau kaga lu yege holata bomofihi leka somo bu'ehina. To Filipiu ana bo loka ho'ehina: Leka nosata bukumofihi kaga hapa'aba keheli'ahapihe? 31To ana bouba Filipihi kaga'alo nona'a lu'ehina: Bo moneuba kaga hapa'a kehelise'na lu menimi'ehinogomo hiya'a huto nani'ni keheliluna ni'ibe? Ya luto luloto Filipihi kehe igo yaga kefefe hu'ehina kalegu Filipiu tito moneka minete bi'aha'ina. 32Hu'mamofihi kaga'a hupamone'i ana bouba leka so'ehina ma luto ni'ina yabe:

  • Ai sipisipi yaga suhi huto
  • ho fililune'mu nehana'a hite
  • le'mete e'ahana yabe.
  • Ai sipisipi yaga nala'a supomofihi oka'a
  • laga nehi etago
  • legeso huto koyone ito nominana'a huto
  • ai ya'mana bouba ana suhi lito
  • kaga nesi'a mone melu'ehibe.
33
  • Bona'magi enemege'i emi'ahana.
  • To enali le'mo melugu melelete
  • bebe mesana suhi lite
  • ka foya emi'ahana yabe.
  • Ai boana'amagihi hapa'ani
  • hiya bouba lu yege halina ni'ibe?
  • Ma melugu minose'na'a su hago
  • aku aku'i maga menohibe.
  • 34Ya'ma gamani bouba Filipihi ma luto loka ho'ehina: Kaga lu yege holata bouba kiyi'afi kumu ya'ma kaga nolibe? To ai'a kaga nolifi to fato bomofihi kaga nolibe? 35Ya luto loka holago Filipiu hapi fito kaga lu'ehina: Ai ya'mana hupamone mono kagaguti hapi fito luto buto Yesuhi kaga bebe sosemofihi ni'inalo molo emito lu emi'ehina. 36Etali kapo melete bite nagami'i mone ni'inalo heneti'aha'ina. Ya hilete ana gamani bouba Filipihi lu emi'ehina: Bu gobo, nagami'i ma ni'ibe. Nagami folose kapo'ni henanauba hekini lo neto'ehibe? 37Ya luto ligo Filipiu lu emi'ehina: Ka lamana'amofihi komopakagu li malalata nagami'i falalata'mu habe. Luto ligo nani komopa'nigu li molo'ohube. Yesu Mesiau Hu'mamofihi Pana'a lamana'a nohibe luto komopa'nigu keheli mana hu'ohube luto ana bouba lu'ehina. 38Ya luto luloto ai ana gamani bouba hosi yaga'a le'mo laba higo ho ti'ehigo Filipi hiti ana gamani bo hiti moneka heleko melugu melelete nagamilugu limi'aha'ina. Ya hilete Filipiu ana bo mono nagami'i folo eto'ehina yabe. 39Ya hilete nagamiluguti fa'mene kugutatoga neti'igo Hu'mamofihi Sikalafu'auba Filipihi le'mo minigi'ehina. Ya higo gamani bouba Filipihi aku aku'i bu mego'ehina. Ai ya huloto gelo bimo bimo hepa'aga nobina kapo kiyaka lito bufa hu'ehina yabe. 40To Filipiu Asitoti hepalugu huto hu'ehina. Ai hepato hepato bula ola huto ka lamana'a lu yege homofa'na hu'ehina. Ya huloto alihi Sisalia hepalugu heneti'ehina yabe.

    Copyright information for `BEF