Acts 9

Soliu komopa'a i gelehe huto ka lamana'a komopa'agu li molo'ehina

To Soliu Hu'mamofihi boana'a aitoga komopa'ani emite mino hetofa hi'ahana enoho fililube luto lusiga lu'ehina. Ya huloto sipi mono nohi kaba bo'a nohinalo bu'ehina. Ai ana kaga lu emigo sipi mono noto kaba bouba fayahi mone Yuta bona'i mono nonuga gehesa hi'ahananamagi Tamasiko hepato bite neminanamagitoga go'ehina. Ya huloto ya'mana fayahi Solihi emi'ehina. Ana fayanugu ma luto go'ehina. Enali Sipi Bomofihi Kapo mana'alo mege'i nemalalana bo hiti ana'i hiti Soliu bu enogolotomo ai enele'mo naga ito Yelusale enele'moto alibe.

Soliu kapo moloto buloto Tamasiko hepa kasito heneti leba notago kokulumaluguti libi tegina moneuba fi besa lolito oto le'mo bego hu'ehina. Ya higo Soliu melugu limito koloto nogo'a moneuba ma luto noligo keheli'ehina: Solio, Solio. Kai henabe luto negene mane ito nonahane? Ya ligo Soliu loka ho'ehina: Sipi Bo, kai kiyigabe? Nani negene mane ito nonahata Yesuitomo yabe, luto ana nogouba lu'ehina. Ya luto luloto ma luto lu emi'ehina: Kai ho tito hepalugu tibo. Alihi bo moneuba ya'ma suhi hubo luto lu kimilina'mu yabe. To enali Soli hiti moneka mege'i e'ahanamagi i gofa mehise analo'na lolo hite ho ti mebilete kaga nesi'a enabagaguti mone meli'ahana. Enali kaga nogo'a kehelinaya bona'i mone huto hago bu mege'ahana yabe. Soliu meluguti ho tiloto bu'a i gili hu'ehina ana'ina nesi'a mone bu mego'ehina yabe. Ya higo mege'i melete ana bona'magi yato lite Tamasiko hepalugu ti'ahana yabe. Loegi monegi kanagu bu'a i gili mehigo ya'mana kana'aluga nagami'i hiti nose'na hiti mo sito mino'ehina yabe.

10 Hu'mamofitoga komopa'a emito minolata hina bo mone Tamasiko hepalugu mino'ehina gi'a Ananiasi. To bamulugu Sipi Bouba: Ananiasio luto kehe i'ehina. Ya ligo Ananiasiu lu emi'ehina: Sipi Bo, nani ma nohube. 11 Ya luto nogolo noligo Sipi Bouba lu emi'ehina: Kai ho tiloto Fotogo Kapo yabe lite gi'a helata nehana kapolo bubo. Ya huloto Yutasihi noha'agu Tasasi hepato bo gi'a Soliu yabe luto ni'ina bouba nunumu huto nohinogo bu galata'mu yabe. 12 To bamulugu bo mone gi'a Ananiasiu yaha'a bu'alo meko higo ana bu'a aku'i i gili hilube'mu bu go'ehibe. Sipi Bouba ya luto lu emi'ehina yabe. 13 Ya ligo Ananiasiu ka'alo nona'a lu emi'ehina: Sipi Bo, babu bona'magi ya'ma bomofihi kaga'a nelago nokeheluna bo nohibe. Kai boanaka Yelusale'i enegene mane ise bati mehina suhi babu luto ya'mana bouba li huto nohibe lago nokeheluna yabe. 14 Sipi mono noto kaba bouba kaga lu etoto ho lifigo Tamasiko hepalugu kaitoga kigi ho kimite neminana ai naga ito enele'moto bilube luto maga yatai noabe. 15 Ya ligo Sipi Bouba lu emi'ehina: Kai bubo. Ai nanitoga komopa'a nimilina bo le'mo ho ti'ohuna ai nani nigi'ni liloto fegutoga bona'i to enikibina bona'i hiti to Isilaeli bona'i asaga'i enalitoga lu yege homofa'na hilina'mu yabe. 16 To nani kumu luto asaga gabu gise'na li gufalo molomo bilinamofihi nani'ni lepiluna'mu yabe luto Hu'mau lu'ehina.

17 Ya luto lulago Ananiasiu buloto ana nonuga tiloto Solihi gufalo yahi li'ehina. Ya huloto ya'ma luto lu'ehina: Solio nalalu'niga. Sipi Bouba noho lifigo noobe. Maga nooto kapogu bu go'ahata bo Yesu ai'a yabe. Kai kubuka aku'i i gili nohinogo Sikalafu'i kaitoga limilibe luto nani'i noho lifi'ehibe. 18 Ya noligo ana'asilo mele'isi Solihi bu'aguti faya'i ili'a legitana limo noigo bu'a aku'i i gili higo asaga'na bu go'ehina. Ya higo ai ho tito analo nagami'i folo'ehina yabe. 19 Ya huloto alihi nose'na nolago amuya'a ai aku'i li'ehina yabe.

Soliu kaga mana'a Tamasikosi lu yege ho'ehina

Soliu nesi'a kana Yesuhi mege'i melelata bona'i hiti Tamasiko mino'ehina.
20 Soliu mono nohi ni'inaga bu bebe soloto Yesu kumu ma luto lu epi'ehina: Yesu ai Hu'mamofihi Pana'a nohibe. 21 Ya higo asaga bona'i enali Solihi kaga'a kehelite minana otopa helete sumi ka lite ai loka hago ai loka he'ahana. Yesuhi gi'a ya'ma lite Yelusale nehago ya'mana bouba enoho fili'ehinamo ni'ifi fato bo nohibe? Ai ana supo huto bona'i magati naga ito sipi mono noto kaba bo nohinalo enele'moto bilube'mu nohifi hena nohibe?

22 Ya lite lana Soliu lu yege ho epina kagauba amuya molo'ehina. Ya higo Yuta bona'i luga'a Tamasiko hepalugu neminanamagi kaga'a lina kehelilete topa he'ahana. To Yesu bo mana'i Mesiau nohibe luto lu epina kagauba amuya molo'ehina'mu enali Solihi nona'a lu meemi'ahana yabe.

23 Babu kana'a minelete Yuta bona'magi Solihi ho fililune lite kaga li nupa hite minete lu keheli'ahana yabe. 24 Ya hago Soliu ana kaga'ani akeheli'ehina yabe. Enali Yuta bona'magi ute etehi Solihi ho fililune lite hepato kapo nila nila hu'ehinalo gimi gi baga ilata hi'ahana yabe. 25 Ya hilata hago Solihi mege'i melelata hana pana'amagi mone folugu'i safegu le'mo melelete le'mete limite hepato bihu gegisa mone hokolo hu'ehina kapolo nagato fulu fulu hite he'mi etago fegutoga limi'ehina yabe.

Soliu Yelusale hepalugu mino'ehina

26 Soliu Yelusale hepatoga buloto Yesuhi mege'i melelata bona'i hiti i kalalube'mu hu'ehina. Ya nohigo enali Yesuhi mege'i menomalana bo nohibe lite koli hi ete'ahana. 27 Ya hago Banabasiu oto he'moto aposolo bona'i nehanalo le'moto bu'ehina. Banabasiu Solitoga Sipi Bouba kapogu bulo hu'ehina hiti to Sipi Bouba kaga lu emi'ehinamofihi hapa'a lu hokolo hu epi'ehina. To ana huto Soliu Tamasiko hepatoga asaga kaga Yesu kumu amuya luto lu yege ho epi'ehinamofi hiti Banabasiu lu epi'ehina. 28 Ya hulago Soliu aposolo bona'i hiti moneka minoto Yelusale kegi'a Yesuhi ka lamana'a lu yege amuya he'ahana. 29 Yuta bona'i Giliki nogo nehana bona'i hiti Soliu kaga lu noepito enali hiti kenasabo bi'ahana. Ya nohigo enali ho fililune lilete hi'ahana. 30 Ya hago enali Yesuhi mege'i nemalana bona'magi kehelilete Solihi le'mete Sisalia hepato limilete Tasasi ho lifi he'migo bu'ehina.

31 Ya hulago Yutia kegi'afi Galili kegi'afi Samalia kegi'afi Yesutoga komopa'ani mele'ahana bona'magi fuluna agoyanaguti bati hite mine'ahana. Ya hago bona'i luga'a babu lite huto hilete enalitoga ete ikele'ahana. Ya hilete enali Sipi Bomofihi mege'i melete minago Sikalafu'uba enele'mo amuya molo'ehina yabe.

Pitau Eniasihi le'mo bati hu'ehina

32 Pitau asaga hepatoga bu baga iloto mone yupahi Hu'mamofihi bona'a Lita hepato neminana enebe tilube'mu bu'ehina. 33 Ya huloto bo mone'mofihi gi'a Eniasiu yabe luto nohinamofihi bu go'ehina. To ai ana bo gi yahi foipa lo'ehigo kapo memolose sipa'aloko koloto nominago kufu'a nayahi mone kegi'a su hoto mone kegi'ati loegi monegi heleko molo'ehina yabe. 34 Pitau lu emi'ehina: Eniasio. Yesu Kilisito yatai kele'mo bati nohibe. Kai ho tito nebelusaka tili huto tege hubo. Ya noligo Eniasiu ko'ehinaloti mele'isi ho ti'ehina yabe. 35 Ya hinana asaga Lita bona'i hiti to Seloni bona'i hiti be gelete komopa'ani i gelehe hite Hu'mamofitoga emi'ahana yabe.

36 Yopa hepato Hu'mamofitoga komopa'a moloto nominana a'i mone mino'ehina. Ai gi'a Tabita ana gi'amofihi hapa'a Giliki kaguti Tokasi. Ai asaga yupahi enumuhi meni'ina bona'i enehe'moto enele'mo bati hulata nohina a'i yabe. 37 Ya'mana kana'asilo besise'na gufalo tigo fili'ehina. Ya higo enali nagami ke etete gufa'a sese hi etelete nonugu ifo hasagu he'mi ete'ahana yabe. 38 To Lita hepa'i Yopa hepa lebato mino'ehina. Ya hu'ehigo enali Yesutoga komopa'ani melete neminana bona'magi Pitau ya huto Yopa hepatoga noabe lana'a kehelilete bo loemaletoga kaga ma lite melete etoho lifi'ahana: Ke, kai hololu luto mele'isi lalitoga obo. 39 Ya lite lana kaga keheliloto Pitau ho tiloto enemege'i moneka bi'ahana. Ai ana hepatoga henetilago nohi ifo hasagu le'mete ti'ahana. Ya hago asaga keto ana'magi yibi hilete Pitahi ete le'mo bego hilete Tokasiu nohuto lolo huto epi'ehina gukete li lepi'ahana. 40 Ya hago Pitau asaga bona'i ana hasaguti enele'mo fegu toloto lapusa nohi filoto nunumu hu'ehina. Ya huloto ai ana a'mofihi i behe huto bu goloto ma luto lu'ehina: Tabitao, kai ho tibo. Ya noligo bu i gili huto Pitahi bu goloto sipaloti ho tito analo mino'ehibe. 41 Ya nohigo Pitau buto he'moto yato lito le'mo saga hu'ehina. Ya huloto keto ana'i nehanalo le'moto buto enelepi'ehina. 42 Ya hu'ehinamofihi kaga'a lu yege hago asaga Yopa kegi'a bu baga igo babu boana'magi Hu'mamofitoga komopa'ani melete mine'ahana yabe. 43 Pitau Yopa hepalugu bo moneuba yaga gufa'atu gukete hetilata nohina gi'a Simoni hiti ai noha'agu babu kana mino'ehina yabe.

Copyright information for `BEF