Colossians 1

Oho, Kolose hepato boana'ise. Nehafihe? Lenali Hu'mamofihi naga'i nehana bona'ise. Lenali lali hiti Yesu Kilisitohi naga'i moneko babeyafa huto koguna noito nominota bona'ise. Hu'ma afotifihi fuluna'a hiti hetofana hu lepalalina'a lenalitoga mineno. Nani Hu'mau nele'mo ho ti'ehina bo Yesu Kilisitohi aposolo bo Poluita ma fayahi nokoyobe. To logonati Timoti hiti fayahi nokoyo'ibe.

Hu'mamofitoga lofokehi luse'na

Le'ali asaga yupahi lenali kumu Hu'mamofihi loka noho'ina kanagu Hu'mamofihi fokeha'a nolu'ibe. Ai Sipi Boti Yesu Kilisitohi afo'afu nohinagihe. To lenali Yesu Kilisitohi keheli ule'ale hite agoya hu emi'ahanana'mu to Hu'mamofihi bonatoga asaga'i leniginaga fite kaba nehanana'mu kehelilototi'a Hu'mamofihi fokehi nolu'ibe. To lenali Hu'mamofihi hetofa kaga, ya'ma ka lamana'a lenalitoga kohe toto o'ehina kanaguti Hu'mamofihi bati hina'a kokulumaga molo lepolo'ehina'a alihi lilune lite bu mege'ahana'mu geba hite neminabe. Ana ka lamana'auba lenali keheli'ahana kagauba buto asaga melugu bonatoga nehetito i futili huto enele'mo bati nohina yabe. Ana kaga hapa'a ma ni'ina. Hu'mau foipa bona'magihi enele'mo bati hulata bo nohibe. Lenali yata'a kehelite komopatini i gelehe hi'ahana supo hite fato fato bona'magi yatai ana hite hetofa kaga'a kehelite neminago Hu'mau lusa gi epololata nohibe. Lalalutifu gi'a Epafalasiu le'ali hiti Yesuhi lili'na hetofa huto nolina bo to Hu'mamofihi kagamo yata'a lu lepi'ehina bouba yatai lalitoga nehetito Hu'mamofihi Sikalafu'auba enele'mo fulu hu'ehigo enali koguna ite minete ai kaba hinogo ai kaba hinogo hilata hite neminana yabe luto lenali kumu ya lu le'emi'ehina.

To kehelilototi'a yalo Hu'mamofihi lenali kumu loka hoto minolata nohu'ibe. Ai lu keheli'ehinanamofihi lenelepilibe luto loka noho'ibe. To ai Sikalafu'uba lenele'mo eto hinogo bati hite to keheliya ise'natini asaga'i hokolo hilibe luto loka noho'ibe. 10 To yalo lenali asaga yupahi aitoga minete hetofana hite neminenogomo Sipi Boti ai lenofokehi lilina'mu yabe. Ya'ma le'ali loka noho'ibe. To lenali asaga yupahi Hu'mamofihi lagamo keheliba keheliba hite minete, to bona'i enehe'malata ya'ma hetofa lili'natini fato fato'i yamofihi legeya'a babu luto hilina ya hinogomo Hu'mamofihi hapa'a keheli bati hilete hetofana suhi hite minete ya hilabe luto loka noho'ibe. 11 To Hu'mamofihi amuya'a lenalitoga huto hinogo yanauba amuya molo lepalalina to lenifi taga huse'na huto nohinogomo kosele'i mehese aitoga ule'ale hite minalabe luto luloto to Hu'mau komopatinigu sabiyana lolo hu lepalalibe luto loka noho'ibe. 12 Lenali asaga yupahi Hu'mamofihi gepohi lite bati huse ka lu emite enegelo bilata nehilo. Ai afotifu lele'mo bati hu'ehigo ai'a fana tose kapo'a huto hulenogomo anagu minete ai'a bona'a hiti bati hu'ehinana'a fato fato'na lilune. 13 Ai Satahi amuya'amofi hiti metepuhi hu'ehina kapo'aguti lele'mo kefefe huto lubuto bi'ehina. To ai'a pana'a gi moneko pana'amofihi kapogo lele'mo molo'ehina yabe. 14 To ai'a pana'auba Yesu golaha'aloti lalimo mina fito foipanati i pa so leto'ehina bo nohibe.

Kilisitohi hapa'a ka

15 Hu'mamofihi lali bu mego'ohuta bo nohinaya aku'i ai'a pana'a Kilisito ai Hu'ma legi huto moneko'i nohina bo yabe. Ai koyapa kanagu Hu'mau asaga'na lolo mehu'ehina kanagu mino'ehina bo to asaga'na lolo hu'ehinamofihi Yesu ai be ligi'ehina bo nohibe. 16 To Hu'mau le'mo ho ti'ehina bo, Yesu ai kokulumalugu nasana to melugu nasana asaga'na to ya'ma lali bu nogotana hiti bu megotana hiti yege yege'i lolo hu'ehina yabe. To ai agelo bo fato fato'i enele'mo huto huloto kapo'anigu enele'mo nomoloto to kibina bona'ani hiti sipi kaba bona'ani hiti to gamani bona'i hiti ya'ma lolo huto enele'mo ho ti'ehina. To ya'ma asaga melugu mine'ahananamo Yesu to Hu'mau hiti lili'na neli'igo asaga'na lolo hu'ehina yabe. To ya'mu asaga'na ai'na'a ni'ina'mu yabe. 17 Ai koyapa koyapa'i mino'ehina bo nohibe. Asaga'na huto mehina kanagu ai mino lito mino'ehina to ai'a kaba nohigo asaga'na aitoga hepito asaga'namofihi hapa'a bati bati huto mino'ehina yabe. 18 To asaga bona'magita Hu'mamofihi ka'a mege'i moloto nohuta lali gufa'a nohutogo to ai Yesu latahatiga nohuto kaba nohibe. Ai Kilisitohi naga'i lele'mo huto hu'ehina bo yabe. To ai kohe toto fili'ehinaguti ho ti'ohuto alihi ho tilana bona'magi ai mege'i melete ho tilabe. Ya huta ni'inogo ai'asigo asaga'na kohe toto be ligi'ehina bo nohibe. Ka hapa'a ya huto ni'ibe. 19 Hu'mau pana'niloga nemeha'ni mino baga noibe luto lu kehelito ligo ya'ma Hu'mamofihi hapa'a moneko legege hu'ehina bo nohibe. 20 Ya higo ai pana'a, Yesu malipu yafalo nofilito golaha'alo asaga sibina hi'ahanana i pa soto Hu'mamofihi le'mo fulu hu'ehigo yatai kokulumalugu nasana asaga'i to melugu nasana asaga'i aitoga minalibe luto golaha'a he'mi'ehina yabe.

21 To lenali koyapa lenegekesa foipa yigisetini'mu to lenipagu sibina hilata hise'natini'mu Hu'mamofihi fateha'a lolo hi'ahana bona'i foto'i mine'ahago lenele'mo bati hulago ete lalu'agita nehana yabe. Yesu ai Hu'mamofihi gobisalo lenele'mo molo'ehina yabe. To hiya hutobe? Lenali kumu yabe luto gufa'a he'mito malipu yafalo fili'ehina. Ya hu'ehinagi Hu'mau mone ka lepekilina'a meni'igo bu'alo ho tite neminabe. Yatai foipa bona'i menehana fotogo bona'i to bebe sose bona'magita neminabe. 23 To lenali yatai amuya melete Yesutoga minete komopatini emite minete ka lamana'amofihi yata'a keheli ule'ale hi'ahana kamu'i li pili kete ya'ma legeya'a huto hilinamofihi geba hite kehelise'natini mopo mopo mehilata nohigo ya hite minalo. Ya'ma nani Poluita, ka lamana'a nasanamofihi kele kele bo nohuna, asaga bona'i melugu neminanamofihi ya'ma nani ka lu yege holata nohunamofihi, ya'ma kehelilo.

Polu mono foya nolinamofihi ka'a

24 To nani lenalitoti nagabu foya ko nofunanamu'i nipa'ni sibina mehuse fokehi nolube. Hena'mube? Lali Kilisitohi gufa'a nohuta bona'magi kumu gabu foya kofilina mone'a ni'ina nani he'moto kofinogo su halibe luto nohuna yabe. 25 Hu'mau nani Kilisitohi naga'i nehana bona'magihi koko pana'ani nele'mo'ohuto'a noho lifigo buto lenali Yuta gegisaguti fegutoga nehana bonatoga buto Hu'mamofihi suguna ka lu lepilube'mu hunogo keheli bai talana'mu yabe. 26 Ana suguna ka koyapa bona'magihi lu meepise mino'ehinaya to yatai lali aitoga komopati nobina bona'magi kumu lu hokolo hu noletabe. To lenali fegutoga bona'i aitoga neminamagi kumu lu hokolo hu lepalalibe. Ana suguna ka henana ni'ibe? Ma ni'ibe. Kilisitou lenali komopatinigu nominenogomo lenali Hu'mamofihi fana meha'agu minalabe. 28 Hapa'a ya huto ni'inagi le'ali Kilisito kumu luto kaga lu yege hoto leli huto buto asaga bona'i lu epilata nohu'ibe. Le'ali amuya moloto asaga bona'i lipoti epiloto to asaga kaga lu hokolo hu noepito hulata nohu'ibe. Hena'mube? Enali Kilisitotoga mino hepite bati nehinogo Hu'mamofihi bulo enele'moto bilu'ibe luto nohu'ibe. 29 To nani ana lili'nalo amuya moloto liba liba nohube. Komopa'nigu Kilisitohi amuya'auba nehe'mago ana lili'na nolube.

Copyright information for `BEF