Colossians 2

To nani lenali'i to Leotisea hepatoga bona kumu to nokaba'ni bu mege'ahana bona kumu lusi lili'na noluna nekehelifiye? To ana lili'na henabe luto nolube? Enali ai he'menogo ai he'menogo hite koguna ite nehite ai ginaga fi eminogo ai ginaga fi eminogo minalabe luto foya nolube. Ana huto enali Hu'mamofihi komopa'a keheli fe lite loe lae mehise minalabe luto to Hu'mamofihi suguna ka l'emo huto hu'ehinana'a hapa'a kehelilabe luto foya nolube. To ana suguna ka hapa'a henana ni'ibe? Yesu Kilisito bo yabe. Ai Hu'mamofihi kehelise'na'amofihi biha'a nohibe. Hu'mamofihi kehelise'na'a fala kito ni'inaya ai Yesu lu hokolo hu lepololenogomo ai'a hetofa hetofa ka'a asaga'i kehelilabe.

Ya hu'ehinagi lenali mone fato bouba faga faga luto lu epilenogo mekehelilo. Mone fulu huto luto laga hina ka luto lu nolepinogo lenemegesa hi emilo. Nani lenali hiti moneka nohuto Kilisitohi keheli ule'ale hite komopatini molo emite amuya melete nehana nokehelube. Nani fotoga nohunaya aku komopa'ni lenalitoga nomoloto nokehelube.

Kilisitotoga molo emite hetofana hu lepalalina'mu yabe

Lenali Yesu Kilisito kibina boti minalibe lite aitoga komopatini mele'ahana suhi hite aitoga hepite asaga yegegu minalo. Lenali yaga legi hite minete aitoga lufusatini limite bati hite tiba tiba hite amuya yafa lolo hilo. To Hu'mamofihi kaga yata'a lu lenelepi'ohunana amuya melete keheli emiba emiba hite minalo. To Hu'mamofitoga lenegelo bite komopatinigu sabiyana bai tenogo minalo.

To fato bona'magi kehelise'natini le'mo sibina hilune'mu nehanagi enemege'i memalalo. Enali Yesu Kilisitohi ka lu melenelepise enali'ani enekesa kehelite to ma melugu nehana bona'magihi hapa'ani anasi kehelite mono'i li sibina hite ka lu lepilabe. Yesuhi kaga mekehelise nehite faga faga lite lu lenelepilanamo kaba hu bati hilo. To lenali nekehelibe. Kilisitohi komopa'agu Hu'mamofihi meha'a bai toto nominabe. To ai asaga kibina bomagihi kibina bo'ani to kaba bo'ani kokulumagufi melugufi nehanana ai enebe ligilata nohigo lenali to ai hiti moneka nehite lenemehatini bai toto bati huto ni'igo mine bati bati nehana yabe.

11 To lenali Kilisitotoga elago ai lenugufatini laga mehuse komopatinigu foipa hapatini amuya'a laga hu he'mi lepolo'ehina. Ya nohuto enugufa laga nehana suhi huto komopatinigu hu lepolo'ehina. 12 To nagami folose nehana hapa'a henana ni'ibe? Mana ni'ibe. Lenali nagami'i nefelete Kilisito hiti fililete keligu limilete aku ai hiti ho netibe. Foipa hapatinimu'i fililete ai hetofa hapa'amu aku'i ho tite minalune'mu hite nagami'i fele'ahana yabe. Hapa'a ya huto ni'ibe. Hu'mamofihi amuya'auba Kilisitohi fili'ehinaguti le'mo ho ti'ehina supo huto lenali lenele'mo ho ti'ehibe. To henabe luto lenele'mo ho ti'ehibe? Lenali aitoga agoya hu emi'ahanamo'mu yabe. 13 Lenali koyapa Moseu keya ka lu'ehina kamofihi mekehelise fegutoga bona'i minete foipa faipa hapatini hilata hi'ahanaya Hu'mamofitoga filise'nalo mine'ahana yabe. Yalo Hu'mau Kilisitohi le'mo ho ti'ehina suhi huto lenele'mo ye ko'ehina. Hu'mau foipanati asaga'i li he'mi leto'ehinagihe. 14 Ai foipanati li he'mi leto'ohuto'a to lali asaga keya ka mege'i memolose sibina hu'ohutana fayahi go'ehina ya'ma ka foya melilube luto fi sibi huloto Yesuhi hiti malipu yafalo nili ho'ehina ni'inagihe. 15 Ya nohuto Satahi ka lepekilina'a ka foyagu lenele'mo malalina'a laga hu'ehibe. Kilisitou malipu yafalo fililoto foipanatini li he'mi nolepoloto Sataha naga'i enele'mo laba hu'ehigo fateha'a fi lehe toto nebago yatai asaga bona'i Hu'mamofihi amuya bo nohibe lite kehelilabe luto enelepi'ehina.

16 To ya hu'ehigo lenali nose'na menose'na'mu to sipi yupahifi mono fuli yupapofi yana'mu to yuhufa ikapo o nebelenogo yana'mu hiti kaga melete ka lepekilana meni'ibe. Ya'mu mekehelilo. Ana fato bouba ya suhi huto hu lepolo'ehinagomo bati mehu'ehibe. 17 Ya'mana samapaha'a legi huto fa'menena ni'ibe. Ya'mana alihi Hu'mamofihi kapo'agu minese hapa'a meni'ibe. Anamofihi lusi hapa'a ai Kilisitou nohibe. 18 To bona'i mone'amagi enali'ani enegekesa yigi yigi nehanana to bamu'i bu neganana lusi mono ka ni'ibe lite, lali lenebe ligi'ohuta nohune lite liyafa hite neminabe. Faga nelina bona'i nehabe. Enali enugufa'ani le'mo sibina nehite'ani to agelomagihi Hu'ma tegi hite nehabe lite enali'ani enegekesa yigise'na'ani liyafa nehana yabe. Ya bati mehina yabe. Enalimoya lenalitoga ete ana suhi hite minalo lite ka lepekinogomo enemege'i memalalo. Enali komopatiniguti sabiyanatini lu he'mi lepalalana'mu yabe. 19 Enali Kilisitotoga hepite meneminabe. Ai latahati nohinogo lali gumita'a nohuta hupa'atu to go'nuna'atu hiti li hepito ai hiti moneko'na nohuto Hu'mau lu molo'ehina suhi luto hofa notone. To enalimoya Kilisito latahatigati i pa sete he'mi'ahana bona'i nehabe.

Yesu fililoto aku aho ti'ehinamo lenali foipanatini'mu filite kosaba minose'na ni'ibe

20 To lenalimoya ma melugu bona'magihi hapa'aniguti ali gulufe su he'ahana. Kilisitou hiti ana hapamu'i afili'ahana yabe. Ya hi'ahanaya lenali ya'ma melugu bona'magi hapa'ani henabe lite aku'i mege'i nemalabe? 21 Nose'na henamo'mu mone ya'ma kayahi melibo lite to mone ya'ma mo sibo lite to mone ya'ma kayatu bako mehubo lite nelana, lenali henabe lutobe keheli'ahana? 22 To ya'ma nose'na hiti ana'ina hiti asaga'i minoba minoba hilina nasana ni'ifiye? O'e. Su halina'a fa'menena ni'ibe. To enali ya'ma nemalana ka ana huto fa'mene bona'magihi kaga anasi ni'ina yabe. Kilisitohi kaga meni'ibe. 23 Ana, ya'ma kaga'ani agelomagihi liyafa hilo lite to lenugufa le'mo laba hilo nelana kaga hetofa ka legi huto ni'ibe lite mone'amagi kehelilanaya ana kagauba lenugufa le'mo bati mehilina'mu yabe. Ya'ma kagauba lenubuto bilina'a meni'inagi lenali ya'ma mekehelise minalo.

Copyright information for `BEF