Ephesians 1

Oho, Efeso bona'ise. Lenali Hu'mamofihi naga'ise. Lenali Sipi Boti Yesu Kilisitotoga ule'ale hite neminana bona'ise. Nehafihe? Nani Poluita Hu'mamofihi kaga'a lu molo'ehina'mu ya'ma Yesu Kilisitohi aposolo bo lolo hu'ohunamofita fayahi ya'ma koyoto nolepube. Afotifu Hu'ma to Sipi Boti Yesu Kilisitohi aitogati lenehe'mose'na to fuluna'a lenalitoga minomo tito minalibe.

Kilisitotoga mino heputa'mu mono lusa fato fato'mofihi molo leto'ehina

Sipi Boti Yesu Kilisitohi afo'afu Hu'ma ai lele'mo fulu huto kokulumaguti mono lusa fato fato'mofihi Kilisitotoga buto mino hepina'mu yabe luto limi'ehina yabe. Limina'mu yabe luto fokehi lilune. Ai ya'ma koyapa kana me'mofihi ana'ina huto mehu'ehigo nani naga'i lolo hilabe luto lele'mo'ehibe. To lali kumu yabe luto Kilisitou ho lifinogo lele'mo eto hinogo foipanati meminenogo to sibina mone laliti meni'igo gobisalo minalabe luto lele'mo'ehina yabe. Ya hite kehelite minalana'mu yabe to Hu'mau lali kumu ginaga fito Yesu Kilisito ai'a yagapana'a lele'mo lolo hilibe luto mehi limi'ehina yabe. Ya'ma hilube luto laga'a besigo fokeha'a li'ehina yabe. Hu'mau ya huto keke nolu letoto ai'a bita hu'ehina pana'a ho lifigo oto lali bati mehina bona'magita lele'mo lamana hu'ehibe. Ya huto hetofana hu'ehina'mu fokeha'a lilata nohune.

Kilisitou aiya golaha'atu mina fi letoto foipana nagaluguti gulu ho letalibe luto foipanati li he'mi letalibe luto fili'ehinamo ni'ibe. Ya'mu Hu'mau lalitoga mehi limise'na'a sipi nohina keheli'ohune. To ai'a keheliya ito ya'mamofihi legekesa lu hokolo hu leto'ehina to ya huto ai'a suguna huto molo'ehina ka alihi Kilisitou le'mo huto hilina'a komopa'aguti ma luto lu hokolo hu leto'ehina. 10 Alihi kana'a huto hulenogo Kilisitou ana'ina asaga'i kokulumagu nehanamagi to melugu nehanamagi li nupa napa huto lataha'a lolo hilibe luto ai hiti moneko'na hite minalabe luto lu'ehina.

11 To silaga'i ya'ma Hu'mau komopa'atu keheliloto lu molo'ehinalo lilata nohibe. Ai'a koyapa kana'a ekesa kehelito lu molo'ehinalo Kilisito hiti moneko'na minalabe luto lele'mo'ehibe. 12 To ya'mu lali Yuta bona'i kohe toto Kilisito kumu agoya hu emito geba huto minota bona'magita lali Hu'mamofihi hetofa gi'a liyafa huto minalune.

13 To lenali ana suhi hite ka lamana'a Kilisitou lenubuto bilata bo nohina ka kehelite Kilisitohi keheli ule'ale hite agoya eminogo Hu'mau nani bona'ni minalabe luto ai'a Hetofa Sikalafu'amo lepi'ehina yabe. Koyapa'i lu molo'ehina suhi huto lepi'ehina ni'inagihe. 14 To hena'mube? Hu'mau bona'magi yaga osahi lalu'anigi epilata nehana suhi huto ai Sikalafu'i limilata nohina yabe. To hena'mube? Ai'a bona'amagi alihi epilube luto molo'ehina'a lali'i ana huto liluta kehelilune luto yabe. To Hu'mau foipana nagaluguti pa so letoloto ai'a bona'a lele'malina keheliluna luto ai'a Sikalafu'i limilata nohina ni'ibe. Ya'mu Hu'mamofihi gi'a liyafa huto fokehi hoto minalune.

Polu Hu'mamofitoga nunumu lu'ehina

15 To ya nohigo nani lenali Sipi Boti Yesu kumu keheli ule'ale hite agoya emilata nemina, to Hu'mamofihi bona'i asagatoga lenemehi epite minelata nehana ka keheliloto lenali kumu luto Hu'mamofitoga fokehi hoba hoba nohuna ya'ma menohe'mube. Lenali kumu yabe luto Hu'mamofitoga lulata nohuna ni'ibe. 17 To Hu'mau Yesu Kilisito Sipi Botimofihi afo'afu, fana meha'a hiti afotifu, ai mehi lepito lenegekesa le'mo hokolo hinogo to Hu'mamofihi hapa'a lu lepilenogo lenali keheliya ite Hu'mamofihi hapa'a keheli fotogo hite ya hilabe luto loka nohobe. 18 To lenegekesa yigise'namofihi li hokolo hulenogo Hu'ma hiti alihi mine bati hilana hapa'a kehelilabe luto, to lenali panana'a alihi lepilube luto lu molo'ehina'a kehelilabe luto, loka nohobe. 19 To aitoga agoya hu emi'ohutana bona'magita lalitoga ai amuya'a sipina'auba foya lilata nohina kehelilabe luto, Hu'mamofitoga loka nohobe. 20 Ana amuya'a sipinauba Kilisitou fili'ehinaguti le'mo ho tiloto kokulumagu le'moto tito Hu'mamofihi lamaga'aga le'mo malago mino'ehinamo ni'ibe. Ya'mana amuya'a lali komopatigu ni'ina kehelilabe luto Hu'mamofihi loka nohobe. 21 Kilisitou Hu'mamofihi lamaga'aga nohuto enikibina bo'anifi gamani bofi kaba bofi to amuya bo'anifi enali asaga'i enebe ligito ai moneko'i sipi bo'ani nominabe. To ma melugu nehana enikibina bofi to alihi huto hilina enikibina bofi ai Kilisitou enebe ligito nohigo ai gi'a mino amuya moloto napa huto mino'ehinamo ni'ibe. 22 To Hu'mau asaga'na Kilisitohi maha'alugu li nupa huto molo epoloto ai Hu'mamofihi keheli'ohuta bona'magihi kaba boti minalibe luto latahati le'mo lolo hu'ehina yabe. 23 To lali Hu'mamofihi bona'magita gumita'a lolo huto nohuto gufa'a lolo hu baga nouta yabe. Ya huto ni'inaya to ai'a silaga'na lolo baga ilata bo nohibe.

Copyright information for `BEF