Ephesians 4

Sikalafu'uba lele'mo hepi'ehinalo minalune

To ya higo nani Sipi Bomofi kumu luto naga nonugu nohunamofita lenegekesa lito lu lepilube. Hu'mau lamana hite minalabe luto lenele'mo'ehinamofihi hapa'a mege'i melete lamana hite minete lite hilo. Ya nehite komopatini lelite limite fulunagu minete agoya hite minete mineme bite kosele'i melepehenogo komopatini epite ai he'mago ai he'mago hite minalo. To fulunamofihi naga'atu mu tifi lepolo'ehinamo ni'ibe. Ya'mu ya hite, naga'i laga hu lalagi ai kaba hu etenogo ai kaba hu etenogo hite nehinogo Hu'mamofihi Sikalafu'uba lenele'mo moneko'na hu'ehina suhi hite minalo. Henabe lutobe? Lali ka'a kehelito nominotamagita Kilisitohi gufa'a tegi huto moneko'na alolo hu'ohutagihe. To ana huto Hu'mamofihi Sikalafu'uba moneko'na nohinagihe. To lali'i Hu'mau alihi hetofa suhi Kilisito tegi huto lele'mo lolo hilibe luto lele'mo'ehinamomu'i moneko huto lofokehi lito bu mego'ohuta fa'mene geba nohutagihe. Sipi Boti moneko'i nohinagihe. To mono ka keheli amuya moloto mege'i mololata hiluta ka moneko'i ni'inagi to Kilisito kumu yabe luto nagami'i fololata nohutana moneko'i ni'inagihe. To lali asaga bona'magita afotifu Hu'ma moneko'i nohinagihe. Ai'asigo mone'na silaga'namofihi Sipi Bo kibina bo minoto nohinagihe. Ai ya huto silaga'na kaba hulata nohibe. To asaga hepatoga hiti to asaga'namofihi komopagu moneko kumu minolata nohina. To asaga'nagu minoto lili'na'a lilata nohinagihe.

Kilisitou ai kehelito li limilana legege huto lali moneko monekotoga ai'a lehe'mose'na'a limilata nohuto foya'a guna moloto limi'ehinamo ni'ibe. Yamofi kumu ya'ma mono bukugu ka fayahi mone ma luto ni'ibe:

  • Ai ifoga notito naga nonugu nehana'a
  • enele'moto ti'ehinamo ni'ibe.
  • To ya huloto
  • bona'magihi hetofana fato fato'na
  • li epi'ehinamo ni'ibe.

Ifoga ti'ehinamofihi hapa'a ya'ma kaga henana ni'ibe? Ai me'mofihi komopa'agu limi'ehinaguti i behe huto ti'ehinamo ni'ibe. 10 To ai limi'ehina bo to aku'i i behe huto kokuluma kokuluma'i be ligito ti'ehina bo moneko'i nohuto yamofihi asaga melugu to kokulumagu mino baga ilube luto ti'ehinamo ni'ibe. 11 To hetofana limi'ehinamofihi hapa'a ma ni'ibe. Kilisitou lehe'mose'na'a fato fato'na limi'ehina ni'ibe. Lali luga'a aposolo lele'mo molo'ehinamo ni'ibe. To luga'a ai ka'a lu yege holata bo, to luga'a ya'ma ai'a ka leli'ali bo, to luga'a babafi minete ya'ma ka lamana'a lu ha'i fise bo, to luga'a mono kaba bo, lele'mo molo'ehinamo ni'ibe. Ana fato fato lili'nalo lehe'mose'na'a limi'ehina ni'ibe. To hena'mube? Lali Hu'mamofihi bona'a nohutamagita lili'natilo lele'mo amuya nohutamagita lele'mo hofa to su halibe luto yabe. 13 Ya humo humo hutoti mono ka mege'i malaluta'mu keheli moneko'i huto to Hu'mamofihi pana'amofihi hapa'a keheli bati huse'nati moneko'na lolo hinogo hulototi Kilisitohi bona'a hofa toto olopa hilutagihe. 14 Lali ya huto lagaso yagapana'i tegina meminose amuya moloto nohinogoti limi'i melelata bo enali faga faga li liminogo faga faga kamofihi yasi'auba lele'mo miyalo malo hinogo miyalo i ke'malupi malo i ke'malupi lu liluta hu laligi. Enali'i bona'i luga'amagihi enimi'i melete enele'mo keheli sibina nehana yabe. To laliya lele'mo keheli sibina hi lalabe. 15 Aku'i lali liginaga fi epito Hu'mamofihi kaga ma'naka luto ai lu eminogo ai lu eminogo hutoti ai latahati lolo huto nohina bo Kilisitotoga mino kikipa holototi fato fato suhi huto aitoga hofa talune. 16 Lali ya huto aitoga hepito minenogo ai kaba hu noletabe. To lali gumita'a fato fato nekisa'a moneko moneko nominenogo, ai fato fato nagatu lele'mo hepilago moneko gufa'a lolo huto nominone. To lali ya huto nohutogo fato fato nekisa'a lili'na'a li bati bati hulata nohigo ai ginaga fi emigo ai ginaga fi emigo huto nohigo gufa'a asaga'i moneko huto amuya moloto hofa notabe.

Lali Kilisitohi bona'magita mino kosaba lemehi lilune

17 Yamofihi nani Sipi Bomofihi bulo lenegekesa lito lu nolepube. Hu'mamofihi ka'a mekehelilata boana'i enali enegekesa kehelilata nehana bati mehina fa'menena kehelilata nehabe. Enali tegi lolo hite meminalo. 18 Enali ya'ma komopa'ani enegekesa hokolo mehigo negi nagi nete komopa'ani hekini lolago fa'mene mine'ahana. Enali Hu'mau lele'mo bati huse'na'amofihi melise nehite enegekesa sibina higo mine'ahabe. 19 To komopa'ani fi hekini lo'ehigo ana'ina foipa faipanamofihi komopa'agu minete moko huse'na fato fato'mofi kumu enibita higo kosele'i meenehenogo enubuya mehinogo lolo hilata nehabe.

20 Lali Kilisitohi hapa'a lu nolepito lenali ya'ma suhi hite minalabe luto melepi'ohutamo ni'ibe. 21 Lali Kilisito kumu ma'naka luto lu lepi'ohuto ni'ibe. To lenali ai'a mege'i nemalana bona'i nehitetini Yesu lamana huto nominana hapa'a lusiga luto keheli'ahanamo ni'ibe. 22 Tafa lenemehi hite minete lite hago to lenugufa yauba faga hite luto lenimi'i mololata hu'ehinamo ni'igo lenali koyapa komopatinimofihi sibina hi'ahana. Ya hu'ehinagi tafa komopatini he'milo. 23 To komopatini lenegekesa kehelise'natini le'mo kosaba hinogo mineno. 24 To kosaba lenemehi li hepite minalo. Hu'mamofihi eto'ehina mehi to fotogo hu'ehina mehi tegi hite kosaba lenemehi hepite lolo hilo.

25 To ya higo lenali faga faga lilata hapatini he'milo. To lali asaga'i hepito Kilisitohi gufa'a lolo hu'ohutamo ni'inaya ya'mu kaga lamana kago ai lu eminogo ai lu eminogo hite minalo. 26 To lenipakafa lenehenogo foipana li lalabe lite mele'isi he'mite su halo. Lenipakafa lenehenogo mineba mineba hite nehinogo yege liminogo bati mehibe. 27 Satahi ya'ma kapo hekini lo etalo. 28 To gumina lilata hi'ahana bona'i lenali he'milete lenigigusa lenayatu amuya melete foya lite nose'natini f'enohatini li huto hite enumuhi menina bona'i enehe'mete leniginaga fi epite amuyatini hiti minalo. 29 Huli ka mone lenabagaguti mone melilo. Kaga lamana'a lite ai he'menogo ai he'menogo hilana kapomo sa hi lepalalana ka linogo enali katini kehelilana bona'i luga'a keheli bati hinogo enele'mo bati hilanagihe. 30 Hu'mamofihi Sikalafu'a le'mo ipagu sibina mehilo, yamofihi lenigiki ka lite le'mo felu kalu mehalo. Hena'mube? Hu'mau alihi kana napa'a huto hulenogomo lenalimoya gulu hoto fi hetofa hu letalibe luto Sikalafu'a yaga osahi tegi huto lepi'ehina ni'ibe. 31 Lenali enipakafa hose'na hiti to kenasabo bise'na hiti to enemegeka lite ya'ma asaga'i keheli he'milo. To luba lenegekesa mehino. 32 Lenali komopatini fulu hinogo ai ginaga fi emigo ai ginaga fi emigo hite minalo. Hu'mau ai'a Kilisito kumu yabe luto foipanatini li he'mi lepolo'ehinamo ni'igo lenali ana suhi hite foipanatini ai li he'mi etenogo ai li he'mi etenogo ihe'ma ahe'ma hite minalo.

Copyright information for `BEF