Ephesians 5

Fi besa lenogo minalune

Lenali Hu'mamofihi yagapana'a laga besi'ehinana'a lolo hite nehanagi ai babeyafalo minalo. Ya nehite asaga bona kumu leniginaga fite minalo. Kilisito ai ana huto lali kumu yabe luto ginaga fito gufa'a sibi he'mi'ehina yamofihi Hu'mamofihi kuguhi koyo eminogo Hu'mau tu'a keheligo bati hu'ehinagihe.

To lenali'i moko huse'na to ai'i gumina folose'na to ananamo'mu yokolo ka luse'na to fato bomofihi nasana'a liba liba hilube luto lenipa huse'na lenali folagahatinigu huto mehino. To ananamo'mu kaga lumofa'na mehilo. To kolo tana ka yagi, negi nagi ka yagi, to kiya yokolo ka laga mehinana'a yagi lilana'ya laga mehilube'mu hibe. Hu'mamofitoga fokehi lite minalo. Lenali ya'ma ka kehelite minalo. Moko lilata bona'i to anananamo'mu enipagu hilina bona'i enali Kilisitohi to Hu'mamofihi kapolo minete lite metilana'mu yabe. To ana huto enali fato bomofihi nasana'a lilube luto enipagu hilina bona'i enali ana hite ana kapolo metilana'mu yabe. To hena'mube? Enali Hu'mamofitoga enemehi meemise ma melugu nasanatoga enemehi emilata lugefa nasana suhi huto mege'i melelata nehana bati mehibe.

To bona'i luga'amagi fi taga hi lepalalabe lite faga faga lite lu nelepinogo ka'ani mekehelilo. Foipa nasana yamofihi hite minelata nehananamu'i enali'i Hu'mamofihi keheli meemi'ahana bona'i enalitoga Hu'mamofihi ita bise'na huto hilina'mu yabe. Ya'mu lenali bona'i ya hana'a hiti mino hepite meminalo. Lenali koyapa'i enali suhi hite metepugu mine'ahanamo ni'ibe. Yatai ya'ma Sipi Bomofitoga nehepite fana mehatini hiti lolo hite nehabe. Ya'mu fana mehenamofihi legeya'a lolo hite yanamofihi babeyafalo minalabe. Fana mehenamofihi legeya lamana'a ya huto hulata nohibe. Komopatini lamana'a hiti minose'na to fotogo huto minolatana to ka lamana'a lulatana yabe. 10 Ya'ma ana'ina lolo hilune luto lilana ya'ma Sipi Bouba kehelinogo bati hilina'muko sa hilo. 11 Luga'amagi metepunagu to futu'a lolo nehinogomo enali hiti mino mehepilo. Lenali ya'ma ananamofihi'ya li fana tete li hokolo hi etalo. 12 Ana'ina suguna'i hite nehanana yamofihi enubuya hulatana ni'inagihe. Yamofihi kaga melilune. 13 To huto hulata nasana yauba fana nototo asaga'namofihi okaba'a le'mo huto nohinana ni'ibe. To ya'ma le'mo huto hu'ehinamofihi lusi hapa'a fana mehena hiti'na lolo nohigo bu galune. 14 Yamofihi mono ka mone ma huto ni'inamo ni'ibe:

  • Lenubu'i ke'ahana bona'i
  • lenali ho tilo.
  • Fili'ahanaguti aho tilo.
  • Kilisitou
  • ya'ma fi besa lo lepalalube'mu hibe.

15 Ya'mu lenali minete ho hite hilana ka ya'ma kaba lamana'a hite minalo. To negi nagi nete meminalo. Keheli fe hite yanagu minalo. 16 Yatai ya'ma kanagu foipa nasanamofihi li fulugu bi'ehinamo ni'inagihe. Ya'mu ana'ina lamana'a lilata kana'a huto hu lepilinamo ya'mu lenebe meligino. Kana'a fa'menena lolo hu lalibe luto yabe. 17 Ka mekehelise bona'i lolo hite meminese Sipi Bouba foyaka lu lepolo'ehinamo yamofihi bu go bebe sete bu gete minalo.

18 Bai nagami'i nete negi nagi menalo. Ya'ma komopatini le'mo sibina hilinagi he'milo. To Hu'mamofihi Sikalafu'uba ai komopatinigu mino bai tenogo minalo. 19 To kaga ai lu emigo ai lu emigo hilata nehite Hu'mamofihi fokehi hete ya hite i'emi a'emi nama mono nama ai lu eminogo ai lu eminogo hite komopatinigu Sipi Bomofihi fokehi lite nama lite lenegelo biba biba hite minalo. 20 Ya nehite Sipi Boti Yesu Kilisito gi'a liyafa hite kana'amu kana'amu silaga'namu Hu'ma afotifihi fokehi hete minalo.

Bo alobole etali hapa'atitimofihi ka

21 Lenali Kilisito kumu keheli emite minete ai agoya hu emigo ai agoya hu emigo hite minalo.

22 Ana'i lenali bahatinimagihi agoya hu epite minalana yauba Sipi Bomofihi agoya hu emi'ahana ya lolo hilina'mu yabe. 23 Kilisitou ai bona'magita latahati lolo huto minoto lele'mo nupa huto kaba hu letoto nohina suhi luto bona'magi liha'ani kaba hilabe. To Kilisitou lali ya'ma gufa'a nohutogo ai'asigoko lubuto bilata bo nohibe. 24 Ya'mu Hu'mamofihi naga'i lali'i Kilisitohi agoya hu emilata nohunogo ana suhi hite ana'i enali baha'animagihi agoya hu epilata hilabe.

25 Bona'i lenali lihatinimagihi komopatini epilo. Kilisitou ai lali ka'a nokeheluta bona'magita komopa'a lepito lali kumu luto gufa'a katiya'i huto fili'ehina suhi hite komopatini epilo. 26 Kilisitou henabe luto gufa'a he'mito fili'ehibe? Ya'ma lali gufa'a nohuta bona'magita ai ka'aloti nagami okala hu letoto lele'mo eto huloto Hu'mamofihi bulo nugufa'ni lele'moto tilina kanagu bati huto, kolo tanana hiti to mone sibina sabana hinana hiti meni'igo gulu gulu luto lamana'a huto minalune lutomo ni'ibe. 28 To bona'i lenali lenalitini komopatini'mu leniginaga filata kaba nehanamo ni'ibe. Ana suhi hite, lihatinimagihi leniginaga finogo komopatini epilo. Liha'amo ginaga finogo komopa'a emilata bo ai'a gufa ginaga filata nohinagihe. 29 To hiya bona'magi enugufa'ani'mu luba nehi etana nehabe? Menehabe. Lali bona'magita lugufati kaba hiluta lamana huto nose'na emito minose'na nominone. Lali Kilisitohi gufa'a nohuta'mu luto ai'a bona'a ana suhi huto kaba hu letolata nohibe. 31 Ya hu'ehina'mu mono bukugu ka mone ma luto ni'ibe:Bo moneuba ito'afinogo afo'afinogo he'mi etotoloto liha'amofitoga buto i ke'moto etali'atiti etugufa'atiti keheli emite minete moneko'na lolo hite minala'ibe. 32 To ana kamofihi hapa'a fala ki mino'ehina yamofihi Kilisitohi to bona'a lali kumu yabe luto nani nekesa ya'ma nokehelube. 33 Ya hu'ehinaya ya'mu bona'i lenali silagatoga yamofihi lenugufatini'mu kehelilata nehana ya suhi hite lihatinimagi kumu kehelite leniginaga fi epilo. To ana'i lenali silaga'i ya'ma bahatinimagihi enigi'ani le'mo saga hite minalo.

Copyright information for `BEF