Galatians 1

1Poluita nani aposolo bo nohugo ya'ma bo moneuba noho melifi'ehina yabe. To bona'magi lili'naga meli nete'ahana yabe. Yesu Kilisito to aimo fili'ehinaguti le'mo ho ti'ehina bouba, afotifu Hu'ma ya'ma ai'a kaga'alo aposolo lolo hu'ohuna yabe. 2To nani nalalu'nigihi luga'a maga nehana'a enali hiti moneka nohutoti ya'ma Yesuhi naga'a Galesia metoga minete bi'ahana bona'i lenali fayahi ya'ma koyoto nolepunagihe.

3Afotifu, Hu'mau to Sipi Boti Yesu Kilisito aitogati lehe'mose'na hiti fuluna'a hiti lenalitoga minomo tito mineno.

4Yesu ai afotifu Hu'ma ai kaga'alo ya'ma ho tilina kana'alo foipanauba lele'mo sibina nohinogo gulu ho letalina'mu yabe luto lali foipanati'mu yabe luto ya'ma ai'a gufa'a h'emi'ehina yabe. 5Ya hu'ehina'mu Hu'mamofihi gi'amu fokehi liba liba huto mino lito buto minalibe. Ma'naka.

Ka lamana'a fato'i mone meni'ibe

6Lenali ya'ma Kilisitohi lehe'mose nasanagu molo emilabe luto elesa molo epi'ehina bomofitoga mino hepi bati hite meminese lenemegesa hi emilete fato monolugu ya'ma bite lenegekesa melete kehelilata nehabe. Nani ya'mu ya'ma nehana'amu topa hoto oho luto nolu lepolobe. 7Ka lamana'a ya'ma fato fato ka meni'inaya fa'mene bona'i luga'amagi Kilisitohi ka'a ya'ma li sibina hilupi lite fato mono ka lu lepite komopatini li sibi sibi hite yamofihi suhi hilata nehabe. 8Nanifi to kokulumaguti agelo moneubafi ka lamana'a afeha'alo lu lepiluta logo hepalugu naga'i lolo hiluta'aloko ni'ibe. 9Ya'ma kaga koyapa'i lu'ohuta ana'ago aku'i nolube. Mone'amagi ya'ma ka lamana'a afeha'alo lu melepi'ahanamo lu sibi hite fato'mofihi lolo hite lu lepilana ya'ma logo hepalugu naga'i lolo hilana'mu yabe luto aku'i ya'ma nolube.

10Ka noluna ya'ma bona'magi bu gete laga'a kehelilabe luto nolufihe? O'e. Hu'mau ai'a bu genogo bati hilibe luto ya'ma nolube. Nani ya'ma bona'magi nani kumu kehelinogo tilibe luto foya ya'ma nolufihe? O'e, to nani bona'magi nani kumu laga epesilina'mu sa sa nohufiye? O'e, Ya'ma hutita Kilisitohi kele kele bo'a lolo huto meminotita'mu yabe.

Polu aposolo lolo hu'ehinamofihi hapa'a

11Nalalu'nigita nani ya'ma kaga lu lepilugi kehelilo. Ka lamana'a lu lepi'ohunamo yamofihi bona'magi enegekesa kehelite yamofihi li huto hi'ahana meni'ibe. 12To melugu bona'magitogati meli'ohube. To bona'magi menelepi'ahana. Yesu Kilisitou ai'asigo lu hokolo huto huto lu nimi'ehinamo ni'ibe.

13Nani koyapa'i Yuta bo nohuto lali folagahatigu minoto ana'ina lolo huto moloto hu'ohuna'a alu lepugo keheli'ahabe. Nani ya'ma komopa'ni ule'ale huto Yesuhi ka'a keheli'ahana bona'i kalana'i molo epoloto enahalube luto enoho lifi he'mito enele'mo sibina sabana hu'ohunamo ni'ibe. 14Yuta yagapana'i nafalu'nigihi enebe ligito ito'nigihi afo'nigihi to tatatigihi ka'ani ya'ma limi lalibe luto ana kauba amuya moloto minalibe luto luloto ya'ma amuya moloto ya hulata hu'ohunamo ni'ibe.

15Ya hulata hu'ohunamoya Hu'mau ai'a ya'ma afeha'aga ito'nifihi ipagu nohugo bu goloto mehi nimito nele'mo eto huloto ai'a foya'a lilube luto elesa molo nimi'ehinamo ni'ibe. 16Elesa molo nimi'ehina ya'ma keheligo tigo ka'a ya'ma fegutoga bona'i enalitoga ka lamana'a lu yege hoto ya'ma luto lu hofa talane luto pana'amofihi hapa'a lu huto huto nelepi'ehina. To ya hu'ehinaya ana kagamu'i ya'ma nani fato'i lu nimilo luto bona'magihi suhi lolo huto loka meho epolo'ohunamo ni'ibe. 17To Yelusale hepatoga aposolo kohe tete lolo hite mine'ahana'a bu enagalube kagamu'i enoloka halube luto meti'ohunamo ni'ibe. Anaga mebuse ka me'i mone Alebia metoga fotoga buto minoto i behe huto Tamasiko hepatoga buto neheti'ohuna. 18Nehetito nohugo yalo kufu kana loebe monebe nobigo Pitahi bu galube luto Yelusale hepatoga nehetugo ai hiti loe salelegu mino'ohu'ina yabe. 19Ya huto nohu'igo aposolo bo luga'a bu meenogobe. Sipi Bomofihi gona'a Yemesihi ya'ma aigo bu go'ohuna yabe. Yana bona'magi aposolo nele'mo ho meti'ahanagi Hu'mau ai'ago nele'mo ho ti'ehina. 20To ya'ma nolunaya mone faga menolube. Ya'ma fayahi nokoyona Hu'mamofihi bulo lama'naka luto fayahi nokoyobe.

21Yelusale hepatoga ya huto minoloto'ni ya'ma Silia metoga to Silisia metoga ya'ma buto mino'ohuna yabe. 22To Yutia melugu Yesuhi pana'alobo'a ya'ma nogokabalo bu mege'ahana yabe. 23Enali ya'ma bona'i luga'amagi kag'a lago ya'ma lite keheli'ahana: Kalana'i molo letoto lohoto ho lifi'ehina Yesuhi ka li sibina hilube luto hu'ehina bomo aku'i i gelehe huto bona'i ya'ma Yesuhi ka lamana'a lu noepibe. 24Ya lite lilete ya'ma hapa'a kehelite nani kumu yabe lite Hu'mamofitoga fokehi hete enegelo hi'ahanamo ni'ibe.

Copyright information for `BEF