Galatians 2

Aposolo bona'i luga'amagi Poluhi lili'na'amu kehelite mele'ahana

Ya hulago kufu kana'a 14 nobigo ya'ma Banabasi hiti le'ali Yelusale hepatoga aku'i i behe huto bulototi'a Taitasihi ya'ma le'moto buto moneka bu'ohuta. Yamofihi fa'mene ya mebu'ohube. Hu'mau ka'a lu hokolo huto lu nimi'ehinalo ya'mu bu'ohuna yabe. Ya'ma fegutoga bona'i ka lamana'a ya'ma lu huto huto lu epilata nohuna ka ya'ma mono kalo enigihiti bo enali'anisigo li nupa hite suguna nehago beto hu epi'ohuna yabe. Nani ya'ma foya'a kohe toto lito mino'ohuna'a to aku'i yatai lito nominana'a yamofihi fa'menena lolo hu lalibe luto nani foya'nimu buto beto epi'ohuna yabe. Ya hulago enali ya'ma Taitasi Giliki bo nohinaya yana'mu Hu'mamofihi kaga kehelise bo ya'ma Yuta bo lolo hilibe luto gufa'alo laga huse'na'a hiti minalibe lu memolo ete'ahana yabe. Aku'i ema afetoga bona'i luga'a enali minete fagalo bo ya'ma ete folagahatigu suguna'i nehetite mine'ahanamagi enali ya suhi huto gufa'a laga hu etalune lite li'ahabe. Lali Kilisitotoga buto molo emiloto minoto li mele'ahana kamofihi nagalugu memino'ohutamo ni'ibe. Enali yamofihi hapa'a bu galune lite nelite keya ka lu laga huto lu'ehinamofihi kele kele'i panana'a ana suhi hite kagagu lele'mo malalune lite kofohi kapo o'ehina. Enali ya bomagi lali'i lele'mo afetoga malalune lite nelago lali ka lamana'amofihi hapa'amu kaba hu lepolo'ohuta ya'ma ka lamana'auba lenalitoga buto le'mo amuya malalibe luto ka'ani he'mito kana'a mone'ya hiti mege'i memolo'ohutamo ni'ibe.

Ya higo enali mono kaba bona'magi mone fato ka hiti memele'ahana yabe. Enali lusi kaba bona'i mine'ahafi ya memine'ahafi nani keheli bati mehube. To ya nehafi menehafi kehelugo fa'menena ni'ibe. To Hu'mau ai bona'magihi enugufa'anigo bu goloto enele'mo ho tila limila menohibe. Komopa'ani bu goloto ya nohibe. Ya huto ni'inaya nani Yelusale hepatoga buna yupahi ya'ma mono ka kaba bona'i enali kosaba ka mone lu menimi'ahana yabe. Enali ma lite keheli'ehite: Hu'mau ai Pitahi ya'ma Yuta bona'i enalitoga ka lamana'a lu huto huto lu epilibe luto lu eto'ehinamo ana suhi huto nani ya'ma fegutoga bona'i enalitoga ka lamana'a lu huto huto lu epilane luto lu neto'ehina, enali ya'ma keheli'ahana yabe. Pitau ai Hu'mamofihi amuyalo ya'ma Yuta bona'magihi aposolo lolo hu'ehina. Ana suko huto nani ya'ma Hu'mamofihi amuyalo fegutoga bona'magihi aposolo lolo hu'ohuna. Ya hulago Yemesiugo Pitaugo Yoniugo mono'mofihi enikibina bo nehafihe lite keheli'ahana yamagi Hu'mau pa sose foya'alo le'mo hetofa hu'ehibe lite nani kumu ya lite keheli'ahana. Kehelilete lalalutifu yabe lite Banabasi hiti le'eyanugu li'ahana. Ya hilete lenali fegutoga bona'magitoga Hu'mamofihi foya nelinogo laliti Yuta bona'magitoga nelinogo huto minalune lite lu mele'ahana. 10 Enumuhi meni'ina bona'i enali limite nehana'a i pebisa meho epolose enehe'malane lite nelite ya'ma kaga'asigo lu nimi'ahana. To ana foya emasana amuya moloto li'ohube luto kehelito nohunalo nohube.

Atioki hepato Polu Pitahi ka emeki'ehina ka'a

11 To Pitau ai Atioki hepatoga olago ai mone bati mehina suhi huto higo nani bu go bati huloto li gehesa nehago asaga bona'magihi bulo ka emeki'ohuna yabe. 12 Kohe toto ya'ma fegutoga bona'i Hu'mamofihi ka'a kehelise'namagi hiti Pitagi hiti nose'na monekoluguti nelago aliha'a ya'ma Yuta bona'i mone luga'a Yemesiu enoho lifi'ehina'amagi elago bu enogoloto enali kumu luto lesa'a lu'ehina. Lesa noligo fegutoga bonatoga nose'na menose mo sito enali'i he'mi epolo'ehina. Fegutoga bona'i enali hiti enugufa laga mehuse'na minalibe lite lu mele'ahana bona enali kumu lesa lu'ehina. 13 Ya huloto buto lelito ola lelito bula nohigo Yuta bona'i luga'a lalu'agi ana suhi hite kenetufa'ani loe hiti bona'magihi suhi lite Pitahi le'mo laga hina'a hago Banabasiu enalitoga molo emito enali suhi huto lesa lu'ehina. 14 Ya hite minete ka lamana'amofihi kapogu fotogo hite mebago bu enogoloto'ni ya'ma bona'i luga'a enali enogobisalo ya'ma Pitahi ya luto lu emi'ohuna: Kai ya'ma Yuta bomo nohataya Yuta bona'i lolo huto moloto yanagu mebane. Fegutoga bona'i enali lolo hite melete nehananagu nobane. To kai henabe luto ya'ma fegutoga bona'i enali Yuta bona'i lolo hite melelete nehananagu bilabe luto lu laga hu'ahana? Ya bati mehu'ehibe luto ka emeki'ohuna yabe.

Yuta bona'i hiti fegutoga bona'i hiti keheli ule'ale hi'ahana'mu yabe luto enubuto bilata nohibe

15 Lali ya'ma fegutoga bona'i sibigopa minelata nehana bona'i huto mehune. Yuta bona'i huto hu'ohutaya, 16 yama luto kehelilata nohune. Moseu keya ka lu'ehina ya ema keheliya iloto foya'a lelito buto minenogoti foipanati su halina'a meni'ibe. Yesu Kilisito kumu yabe luto keheli ule'ale huto foipanati meminenogo komopatigu le'mo bati hu'ehinogo minalune'mu hune. Ya luto keheliloto keya ka lu'ehina ka'amofihi foya'a lito buto minenogo foipanati meminenogo minalune luto Yesu Kilisito kumu keheli emi'ohune. Keya ka lu'ehina kamofihi mege'i melelata nehanaya Hu'mau enele'mo lamana hilina'a ya'ma meni'ibe. 17 To lali Yuta bona'magita Kilisitotoga buto i hepiloto foipanati su halibe luto nohutaya fegutoga bona'i tegi huto foipa nasana lilata nohutogo yana'mu henabe luto lilune? Kilisito ya'ma foipana lilo luto lele'mo bati hulata bo nohifihe? Ya luto meni'ibe. 18 To nani tatatifu Moseu lu'ehina kaga yata'a kehelise amuyamofihi le'mo laba huto he'mito Kilisitohi kagalo mege'i nomolona bomofita aku'i i gelehe huto Mosehi kaga mege'i malalo linogo nani kumu keheligo lama'naka luto foipa bo nohibe lite lilana'mu yabe. 19 To ya'ma keya ka lu laga huto lu'ehina kamofihi nagalugu mone memino'ohunaya keya kamu'i fili'ehina bo tegi huto lolo huto ana kamofihi nagalugu menominobe. Hu'mamofi kumu yabe luto minalube luto ho ti'ohunamo ni'ibe. Nani anamofihi foipana lilata nohuna'mu Kilisito hiti malipu yafalo fili'ehina moneka le'ehe'ahana lolo hu'ehinaya. 20 Ya hu'ohunaya yatai ya'ma minoto lito nohuna ya'ma nani'nigo minoto lito mehube. Kilisitou komopa'nigu minoto lito nohigo nugufaloti minoto lito nohuna. Ya'ma Hu'mamofihi pana'amu keheli ule'ale huto minolatana nohuto minoto lito nohube. Ai ya'ma komopa'a nanitoga mololoto minoto lito hina'a nani kumu yabe luto gufa'a he'miloto fili'ehinamo ni'ibe. 21 Yesu nofilito Hu'mamofihi lehe'mose'na'a nele'mo hetofa hu'ehinamo ni'igo ya'ma li sibina huto he'miluna'a meni'ibe. Lu laga huto lu'ehina ka'a ema'alo keheliloto foipanati meminago Hu'mamofitoga lele'mo lamana higo mino'ehinalo ni'itita ya'ma Kilisitou ai'a fili'ehina'a fa'menena lolo hitine.

Copyright information for `BEF