Galatians 3

Keya ka hiti to Hu'mau kaga molo'ehina'a hiti

Oho, Galesia bona'ise. Negi nagi'a lenali ya'ma ki'afu lenele'mo gopa napa hu'ehigo Kilisitohi ka lamana'alo ahe'mi'ahabe? Nani Yesu Kilisitohi malipu yafalo hago fili'ehinamofihi babeyafa'a lolo huto lu lepi'ohugo lenubutu bu go akutete bu ge'ahanamo ni'ina. Henabe luto aitogati he'mi'ahabe? Nasana mone kumu lenoloka halube. Kehelite lu nimilo. Lenali Hu'mamofihi Sikalafu'a hiya hite li'ahabe? Moseu keya ka lu'ehinana kehelite lilete li'ahana ni'ifihe? O'e, ya'ma meni'ibe. To Kilisitohi ka keheli bati hilete lenemehi emilete li'ahanamo ni'ibe. Hena'mu negi nete mine'ahana ni'ibe? Hu'mamofihi Sikalafu'mofihi kapo'alo hapi hite lelite tite bi'ahanamo yabe. Ya'ma yatai he'mite tafa kapomogu bite nehetilafihe? Lenalitoga kalana'i meletago huto hu'ehina nasana asaga'i ya suhi huto lenugupisalo ti'ehinamo fa'mene ni'ifihe? Ya huto meni'ibe luto nekesa nokehelube. Hu'mau ai'a Sikalafu'a molo lepolola to amuya nasana lenalitoga topa hose'na huto hula nohina bouba henabe luto ya nohibe. Keya ka keheliya ite mege'i melelago lenele'mo bati hulata nohifihe? To Kilisitohi ka lamana'a keheliya ite agoya hu emilago lenele'mo hetofa hulata nohinamo ni'ifihe? O'yo, ya'ma ni'ibe.

Mono kagu Abalahahi hapa'a ya'ma lite fayahi keye'ahanamo ni'ibe:Ai Hu'mamofihi agoya hu emito minago ya'mu lama'naka luto bati hina bo yabe luto lu molo eto'ehina. Ya'mu ma lite kehelilo. Hu'mamofihi agoya hu emilata nehana'a enalisigo ya'ma Abalahahi panana'a lamana'a nehabe. Fegutoga bona'i enali Hu'mamofihi agoya hu emilenogo yamofihi foipana'ani li he'mi epalalibe. Koyapa'i mono bukugu Hu'mau ai'a Abalahahi ka lamana'a lu emi'ehina ya'ma lite kehelite mono kagu fayahi ma lite keye'ahanamo ni'ibe:Kai agoya hu nimi'ahatalo lusa gi keto'ohuna ya'ma melugu bona'i asagatoga li su halube'mu hibe. Ya'ma Abalahau keheli ule'ale huto agoya hu emilata hu'ehina hetofa kapogu giyaka ito bu'ehina. To enali ana hite Hu'mamofitoga agoya hu emilata ana kapoloko ite bilana'a enali lusa'agu bi falalabe.

10 To Moseu keya ka lu'ehina kagagu bi felelete ai mege mege nehana bona'i enali gumi'ani tinago salafa'a minalana'mu yabe. Hena'mube? Yamofihi mono bukugu ya'ma lite fayahi keye'ahanamo ni'ibe:Moseu keya ka lu'ehina kaga yege yege'na ni'inagi yamofihi mone nesi kegi'a mege'i memelese he'milana'a enali gumi'uba ho epalalibe. 11 Bona'i mone'amagi Moseu keya ka lu'ehina kagagu bite i hepilete nehago ya'ma Hu'mau enele'mo bati hilina'a ya huto meni'ibe. Yamofihi hapa'a ahuto hu'ehibe. Yamofihi mono bukugu kaga mone ma luto ni'ibe:Hu'mamofihi keheli ule'ale huto agoya hu emilago le'mo bati hu'ehina bouba ai minoba minoba huse'na'a lilina'mu yabe. 12 To keya ka mege'i malalata nehana Hu'mamofihi keheli ule'ale hite agoya hu emilata nehanalo enele'mo bati hilina'a meni'ibe. Enali keya ka mege'i malalata nehanamagi ana kaga lu'ehinana'a mone nesi'a mehe'mise asaga'i hu baga ilana bona'magi ana nehanalo minoba minoba huse'na lilana'mu yabe. To ya mehilanamagi enali gumi'ani tilina'mu yabe luto keya kagu ni'ibe.

13 Ya huto ni'inaya keya kamomu'i lalitoga gumi'i ho'ehina'a kilisitou ai gupisa'alo li'ehina yabe. Ya huto keya kamofihi gumi'mofihi nagaluguti gulu ho leto'ehina yabe. Ananamomu'i mono bukugu ma luto ni'ina:Yafalo halana bomofitoga gumi'i tilibe. To Kilisitou ai lali kumu luto malipu yafalo fililoto ya'ma gumi'iloti lubuto bi'ehinagihe. 14 To ai henabe luto ya huto fili'ehibe? Hu'mau Abalahahi lusa gi emito ka molo'ehina'a ya'ma fegutoga bonatoga hiti li huto hilibe luto yabe. To lali Yesu Kilisitohi keheli ule'ale huto aitoga agoya hu emiluta bona'i nohune luto Hu'mau ai Sikalafu'i epilube luto lu molo'ehina'mu yam'a keheliloto lilune'mu hune.

Keya ka hiti to Hu'mau kaga lu molo'ehina hiti

15 Nalalu'nigita, nani babeyafa'a moneto lu moloto lilugi kehelilo. Bona'i loemale'i etali ana'ina mone kumu lite lu mu tifite fayahi kayala'ina etali moneuba lito ligofa hoto gupisalo ka mone molo emito loka hoto fayahi kayalina'a meni'ibe. 16 To yana'mu Hu'mau ya'ma Abalaha to panana'a lenele'mo hetofa hilube luto mu tifito limito lu'ehinamo ya'ma panana'a asaga kumu melu'ehinamo ni'ibe. Moneko'i Kilisito kumu lu'ehinamo ni'ibe. 17 Nani ya lu lepi'ohuna ka hapa'a ya'ma nolube. Hu'mau koyapa'i mono fe'nohi kumu lu mu tifito lenele'mo hetofa hilube luto lu molo leto'ehinamo ni'ibe. Ya hulago aliha'a kufu kana 430 nobigo Moseu keya ka lu'ehina ka'a huto hu'ehina. To keya ka lu'ehina ka'a aliha'auba Hu'mau lu leto'ehina ka'amofihi be meligilina'mu yabe. Ya'ma yata'a lu molo'ehina ka fenene mehilube'mu hibe. 18 Hu'mamofihi mono lusamofihi lubuto bise'na'a ya'ma keya kaguti ni'itita yamofihi Hu'mau kaga lu leto'ehina kagaguti melutita'mu yabe. Ya hu'ehina'a ya'ma meni'ibe. Hu'mau henabe luto Abalaha lusa gi eto'ehibe? Abalahau keya ka kehelito mege'i molo'ehinalo ni'ifi? O'e, ai Hu'mau lu molo eto'ehina ka'alo yabe. To lali lubuto bise'na'a lilutana ana huto ai lu molo leto'ehina ka'alo ni'ibe.

19 Yamofihi ya'ma keya ka lu'ehina ka'a ya'ma hena'mube? Lu laga hu'ehina'mu ana'ina foipana lolo hulata nohutamofihi hapa'a lu huto hilibe luto nolelepigo Hu'mau molo'ehinamo ni'ibe. To molo lito buto minoto yamofihi lele'mo hetofa hilibe luto lu eto'ehina bo Abalahahi pana'a Yesu Kilisito huto hulenogo keya kamofihi kana su halibe luto lu'ehinamo ni'ibe. To keya ka lu'ehina ka'amo ya'ma agelo luga'amagi kokulumaluguti limite folagahatigu nohina bo Mosehi yanugu melelago lu limi'ehinamo ni'ibe. 20 To Hu'mau Abalahatoga ya'ma lusamofihi kaga molo'ehina'mu ai'asigo molo emi'ehina. Agelo bona'magihi ya'ma epilago enali lite epi'ahanamo ya'ma meni'ibe. To folaganugu minana bo meni'ibe. Hu'mau ai'a moneko'i nohina bo ai'ago ya'ma lusamofihi kaga lubuto bise'na'a limi'ehina yabe.

Moseu keya ka'a huto hilinamofihi hapa'a

21 To Moseu keya ka lu'ehina kauba ya'ma Hu'mau lu limito molo'ehina ka'a be ligilifihe? Ya huto meni'ibe. Keya kauba lali le'mo amuya moloto minolata nohuta nasana ni'itita yamofihi lama'naka luto keya ka lu'ehina kauba foipanati li he'mi letenogo Hu'mamofihi bulo lamana bona'i nehabe luto ligo minaluta kapoti huto hitine. 22 Ya hu'ohutaya lali melugu bona'magita asaga'i foipanamofihi amuya nagalugu nohutogo yamofihi hapa'a mono bukuguti li huto hite mele'ahanamo ni'ibe. Ya hulago yana'mu ya'ma Yesu Kilisito kumu luto keheli ule'ale huto agoya hu emutogo lenubuto bilube luto lu molo leto'ehina yamofihi legeya'a liluta ahuto ni'ibe.

23 Yuta bona'i lali koyapa'i ya'ma lali Yesu Kilisitotoga keheli ule'ale huto agoya hu emise kapo huto mehigo keya ka lu'ehina kauba naga'i limigo nagalugu mino lito buto nobutogo keheli ule'ale huse'namofihi kauba huto hu lamana hu'ehina. 24 To keya ka yauba kaba hu letoto lele'mo bebe sose kapo lolo hulago nohutogo Kilisitotoga lele'mo malago ya'ma alihi Yesutoga agoya hu emito Hu'mamofitoga lele'mo lamana higo minaluta'mu yabe. 25 Lali agoya hu emise'namofihi kapo'a huto higo analo nobunogo keya kamofihi kaba'alo menominune.

26 To lenali ya'ma Yesu Kilisito kumu keheli ule'ale huto agoya hu emuta'mu yabe lite yata'isi asaga'i Hu'mamofihi yagapana'a lolo hite nehabe. 27 Mono nagami'i felelete Kilisitotoga molo emi'ahana silaga'i Kilisitohi legegeto suhi molo emite hepi'ahana. 28 To ya hu'ehina'mu Yuta bona'i nehana to fegutoga bona'i nehana, kele kele'i yagapana'i lolo hite tina'a limina'a hite mine'ahana, fa'menego minelata hi'ahana boana'i fato hite minelata hi'ahana. Yamofihi su ho'ehigo yatai lenali asaga'i Yesu Kilisitotoga bite hepite moneko koguna lolo hi'ahabe. 29 Lenali Kilisitohi naga'i lolo hi'ahana ni'inogomo yana'mu Abalahahi panana'a lolo hite nehite Abalahahi yogo fe'nohi Hu'mau molo etalube luto lu eto'ehina ya'ma asaga'magita lenali'na lolo hilube'mu hibe.

Copyright information for `BEF