Galatians 4

Mone ma luto lilugi kehelilo. Pana'i lagaso'asiuba ai afo'afu fililenogo asaga yogo fe'nohi li nupa huto lilina pana'uba ai lagaso'asi nohinogo fa'mene enali kele kele pana'i kaba nehana tegi huto kaba nehi etabe. Lagaso'asi nohinogo go'agi afo'agi enali yogo fe'noha'a kaba hi etalana'mu yabe. To afo'afu kana'a molo'ehinaya tupa hulenogo aku'i lilina'mu yabe. Ana suhi ya huto lali koyapa'i Hu'mamofihi kagu olopa bona'magi suhi huto meminose melugu bona'magi lu laga hi'ahana ka mege'i mololata hu'ohuta yabe. Ya hulago aliha'a ya'ma kana'a molo'ehina ya'ma su nohago Hu'mau pana'a ho lifigo limito melugu o'ehina yabe. Ana pana'mofihi ito'afu melugu a'i yabe. To ana pana'uba huto huloto ai Mosehi keya kamofihi agoya hu etoto mino'ehina. Mino'ehina'mu lali ya'ma keya ka lu'ehina kamofihi nagaluguti gulu ho letelenogo Hu'mau lele'mo aitoga malalibe luto hu'ehinamo ni'igo lali Hu'mamofihi pana'a huto hilune'mu hune.

To lenali Hu'mamofihi pana'i lolo hite nehana yabe luto Hu'mau pana'amofihi Sikalafu'uba komopatigu ho lifigo limi'ehina. Limito nohigo lali Hu'mamofi kumu: Oho, Apaobe lulata huto nominone. Ya hu'ehina'mu lenali kele kele'i yagapana'i lolo hite nehanagopa Hu'mamofihi pana'a nehabe. To ai panana'a nehabe luto Hu'mamofihi mehi emise'namofihi ai felisa nasanamofihi afo'afu bo lolo huto neminabe.

Polu Galesia bona kumu keke'i lu epolo'ehina

Fegutoga bona'i lenali koyapa'i Hu'mamofi kumu keheliya meise faga faga lugefamofihi nasana kele kele'i hi epite minete nagalugu minete agoya hi epelete mine'ahana yabe. To yatai lenali Hu'mamofihi hapa'a bu go fotogo nehabe. Ya'mu ya'ma luto lu nolepube. Lama'naka. Hu'mau lenali'i bu lenogoto nohibe. Ya higo fa'menena gusunupa'a meni'ina felisa meni'ina yamofihi henabe luto aku'i lenogobisa emite ya'ma felemagihi nasana'mu agoya nehi etete neminabe? 10 Ya hite nehite, Hu'mau kehelinogo bati hilibe lite fato fato yupahi kanalo to ikahi o boloto filito hu'ehina nohina kanalo to melekehi kufugu kanalo to lenekesa keheli keheli nehite fuli minelata nehana yabe. 11 Foya'nimofihi legeya'a lenalitoga huto mehinogo fenene hilibe luto kehelugo aku'i keta gofa nohibe.

12 Nalalu'nigita, nani buka tito lilugi. Nani lenali suhi huto Moseu keya ka lu'ehina kamofihi nagaluguti nele'mo ho tigo ho tito nohube. Lenali nani suhi ya'ma bu go bati hite bu gete lilo. Lenalitoga mino lito nobugo lenali laga mehina nasana lolo mehi nete'ahanamo ni'ibe. 13 Lenali keheli'ahabe. Nani koyapa'i keke'i luse'na nebesilago yata'a hapi huto ka lamana'a lu lepi'ohunamo ni'inagihe. 14 To nugufa'nigu bati mehigo keta lepesi tegi hu'ehinaya nani fa'mene kosele'i melenoho'ehinamo ni'ibe. To mu lenipa hu'ehinamo ni'ibe. Lenali bu negete Hu'mamofihi agelo'a le'malana suhi hite nebe tigite nele'me'ahabe. To ana huto Yesu Kilisitohi le'malana suhi hite nele'me'ahabe. 15 Ke, kana'a ya yupahi lenegelo sipi bite mine'ahanamo ya'ma yatai hiyaga nobibe? Lenali hapatini'mu lama'naka luto ma lu lepilugi kehelilo. Lenali lenubu he lilune lite lilenogomo fa'mene he lite nani'i nele'mo bati hite kimilune nelite lite fa'mene nimitita'mu mine'ahana yabe. 16 To yatai kana'amofihi ka lamana'a lu nolepuna'mu yamofihi fatehe bonatini lolo nohufiye?

17 Ya'ma faga mono ka lu lepilata nehana bona'magi lenele'mo netibe. To ya'ma nehana lenele'mo bati hilabe menehabe. Le'mo kela ho tila hilenogo nani kumu sibina hi netete enali'ani enigi'ani le'mo saga hilune lite amuya melete nehabe. 18 Ana'ina lamana'amu yabe luto lenofokehi holata nohuta ya'ma bati hutomo ni'ibe. Lenalitoga buto minona yupahifi ya'mago meni'ibe. Kana'amu kana'amu lolo hilata nehinogo bati hilube'mu hibe. 19 Panana'nimagita, nani lenali kumu luto keke'i luse aku'i nokehelube. Ana'magi yagapana'i ketalune'mu nehite keke'i lilata nehana, ya suhi huto keke'i luse'na sipi aku'i nokehelube. Kilisitohi babeyafa'a suhi huto lenalitoga huto hilibe luto lenali kumu kehelugo keta nebesilata nohibe. 20 Lenalitoga mele'isi buto lenogobisalo fato fato suhi huto kaga lepilube luto kehelilata nohuto lenali kumu negekesa yigi yigi nohube.

Hegago Selago etali keya'mofihi kaga

21 Moseu keya ka lu'ehinamofihi agoya hu etalune lite lilata nehanamagita, lenoloka nohenogo lu nimilabe. Lenali keya ka lu'ehinamofihi fayaha'a nasana leka sete keheli fotogo mehafihe? 22 Yagu'ya ma lite keyete mele'ahanamo ni'ibe: Abalahahi ai pana'a loemo eteketo'ehina. Mone'i ya'ma kele kele pa'auba keto'ehina. To mone ya'ma mina fi emi'ahana a'uba keto'ehina. 23 To kele kele a'uba keto'ehina yamofihi fa'mene huto hu'ehina. To mina fi emi'ehina a'uba keto'ehina ya'ma Hu'mamofihi bulo lu emi'ehina ka'alo ya'ma keto'ehina. 24 To ya ka'amofihi komopa'agu nekisa'a mone ma luto ni'ibe: Ana ate loemo etali Hu'mau lu mu tifise ka'a loemo yamofihi babeyafa'a lolo hi'aha'ina. Lu mu tifisemofihi kaga'a mone ya'ma Sainai kosaguti lu huto hu'ehina yamofihi komopa'agu nehana bona'magi enali keya ka lu'ehinamofihi kele kele'i hi etete neminabe. Yamofihi suhi huto kele kele a'i Hegahi yagapana'a lolo hi'ahana. 25 To Alebia metoga Sainai kosamofi kumu Hegahi kosa yabe lite lilata nehabe. To Hegau ai Yelusale hepatoga fa'mene metoga mino'ehina anamofihi babeyafa'a nohibe. Yelusale hepa'i ya'ma Moseu keya ka lu'ehinamofihi megusa'a lolo hite nehana bona'magihi koto hepa'animo ni'ibe. 26 To kokulumagu Yelusale hepa'mofihi ni'ina yauba mina fite emi'ahana a'i Selau ai suhi huto yamofihi ni'ibe. Yalo'i minete lite nehana bona'i ya'ma keya kamofihi nagalugu menehabe. Ya hu'ehina'mu ana hepa'uba itotifu lolo hu'ehibe. 27 Ya hu'ehina'mu mono bukugu fayahi mone Sela kumu ma lite keye'ahanamo ni'ibe:

  • Namopa a'uba yagapana'i hiti huto
  • meketose mino'ahata,
  • kai komopakagu bati huto kehelibo.
  • Kai kagabu'i ginogo
  • yagapana'i meketose mino'ahata
  • keke'i meluse kaika kegelo bito minobo.
  • Hena'mube?
  • Ai baha'auba he'mi eto'ehina a'uba
  • yagapana'i ketalina'mu yabe.
  • Yagapana'i babu luto huto hilenogo
  • ai bo hiti nohina a'mofihi
  • be ligilina'mu yabe,

ya luto ligo keye'ahana yabe.

28 Nalalu'nigita, lali Abalahahi pana'a Isakaha supo huto Hu'mau lepi'ehina ka'alo huto hu'ohune. 29 Fa'mene huto hu'ehinauba Hu'mamofihi Sikalafu'mofihi ka'alo huto hu'ehina bomofihi ya'ma kalana'i mele etete luba ka li emi'ahana. Ana suhi yata'isi ya'ma huto hulago keya ka lu'ehina kamofihi mege mege hite foya nelina bona'magi kalana'i mele letelata nehabe. 30 To ya hu'ehinaya mono bukugu ka'a hena hena huto ni'ibe? Kele kele a'mo hiti ai pana'a hiti etali'i etoho lifi he'minogo bi'ino. Kele kele a'mofihi pana'auba yogo fe'nohi aitoga li memalalibe. Mina fite li emi'ahana a'mofihi pana'auba ai'asigo lilibe, lite keye'ahanamo ni'ibe. 31 Yana'mu nalalu'nigita, lali ya'ma kele kele a'mofihi yagapana'i menohune. Mina fite emi'ahana a'mofihi yagapana'a nohutaya. Hu'mamofihi Sikalafu'mofihi fe'nohi nasana'a lilutamo ni'ina'mu yabe.

Copyright information for `BEF