Galatians 5

Tafa'a nagalugu meminalutamofihi ka'a

Naga'i melepinogo minalabe luto Kilisitou ai'a gulu ho leto'ehinamo ni'ibe. Ya hu'ehina'mu bona'i luga'amagihi enali Mosehi keya kamofihi nagalugu aku'i lenele'mo melenogo kele kele'i hi etalabe lite nelinogomo o'e lite amuya malalo.

Nani Poluita lu lepilugi kehelilo. Lenali keya kagamu'i lugufa laga huto minalune lite keheli epilana ya hite, Kilisitohi lenehe'mose'nauba lenalitoga fa'menena lolo hilina'mu yabe. To aku'i lenelepi bati hilugi kehelilo. Mone'amagi enali keya kagamomu'i enugufa laga hilanamagi enali keya kamofihi mege mege'i hite melete foya'a lelite bilana'mu mone kegi'a he'milete sibina hilana'mu yabe. Lenali luga'amagi keya ka kehelinogo foipanati meminenogo Hu'mamofihi bulo lamana bona'i nohune lite nelana lenali Kilisito hiti hepite mu tifi'ahanamofihi laga hilete nehago aitogati lenehe'mose'na'a nehe'mibe. To lali ya'ma Hu'mamofihi Sikalafu'mofihi keheli ule'ale hu'ohuta'mu yabe luto foipanati meminenogo Hu'mau lele'mo bati hu'ehina bona'i minalune luto yamofihi agoya hu etoto minolata nohune. Yesu Kilisitotoga buto i hepito minaluta ya'ma lugufa laga huse'na to lugufa laga mehuse'na li nupa napa huto mone'na legeya'a meni'ina futu'a yabe luto lilune. Keheli ule'ale hulatanamofihi fayaha'a komopatigu minelenogo komopati bona'i asagatoga malaluta'muko legeya'a yabe lilune'mu hune.

Lenali mono'mofihi kapo'a bati hite lelite nebinogo moneuba hena huto kapo fi hekini lo lepalago ka lamana'amu henabe lite lenemegesa hi emi'ahanamo ni'ibe? Hu'mau elesa molo lepi'ehina bouba ai'amofihi lenogo'na hoto ya suhi mehu lepolo'ehinamo ni'ibe. Enali kaga lilanana'ani ma luto ni'ibe: Mone yisiti nesi'auba palau'a nose'nagu limiloto nominago beleti nose'na yeye bito hofa toloto baga ilina'mu yabe. 10 To lenali nanitoga bilabe luto kehelugo keta mehigo lu nolepube. Sipi Bomofitoga hepilata'mu yabe luto Hu'mamofihi fuluna'a lenugufaga ni'ilina'mu nani nokeheluna suhi huto lenali kehelilana yamofihi buto so kilune luto nokehelube. To lenele'mo sibi hulata nohina bo ai yisitiu nose'nagu minalina suhi huto ya'ma foipana'amofihi nona'a lilina'mu yabe.

11 Nalalu'nigita, nani bona'magihi enugufalo Hu'mamofihi keya kamofihi laga huse'na keya'a hiti minalabe luto fi lehe toto bu'ohuna ni'itita kalana'i lenugufalo minalibe luto lu epito minotita ya'ma Yesuhi malipu yafalo fili'ehina yamofihi ka'a lu nolepuna'mu mu lenipa hulata nohinamofihi su hatita'mu yabe. 12 To lenele'mo sibina hilata nehana enali'ani enugufa'ani asaga'i hobe laga hibe hite minalana ni'inaya nani negelo bilube.

13 Nalalu'nigita, anamofihi nagalugu mone meminalabe luto elesa molo lepi'ehinamo ni'ibe. To nagalugu meminana'mu yabe lite lenugufamofihi bita hulata nohina nasanamofihi kele kele'i mehi etalo. Komopatini epilete ai he'menogo ai he'menogo hite minalabe. 14 Moseu keya ka lu'ehina ka'a li nupa huto hapa'a mone'mofihi ma huto ni'ibe:Kaika'mu kehelilata nohata ya suhi huto kalalukagi kumu kehelito komopaka epilane. 15 Lenali ma he'mise. Yagamagi suhi lite ai heni etago ai heni etago hite asaga'i sibina hi lalabe luto kaba hu bati hilo luto lenegekesa nolube.

Tafa komopatimofihi legeya'a hiti to Sikalafu'mofihi legeya'a hiti

16 Mone ma luto nolube. Lenali fana meha'a hiti Hu'mamofihi Sikalafu'uba lilina ka lilina ka hite melete hilo. Ya hilete tafa komopatiniuba ana'ina'mu bita hulata nohina nasanamofihi foya'a melilo. 17 Tafa komopatini ya'ma laga'auba Sikalafu'mofihi lu baga lu emilata nohibe. To Sikalafu'mofihi nasanauba tafa komopatimofihi ana huto lu baga lu emilata nohibe. Ya hilete etali luba sabo hite mina'igo lenali ana'ina lolo hite melete hilune lite babahi hite mele'isi ya mehabe. 18 Sikalafu'uba lenele'mo lolo hu'ehigo Moseu keya ka lu'ehinauba ya'ma kibina botini lolo mehilina'mu yabe.

19 Tafa komopatinimofihi foya'a ya'ma suguna nasana ni'igopa ahuto hulata nohibe. Ma huto hulata nohinamo ni'ibe. Moko lise nasana to foipa nasana hiti asaga kolotana'a lugufamofihi buya hulata nasana yabe. 20 To faga lugefa nasanamofihi fokehi holatana, nalisanauba komopa'ani li sibi hulatana, fatehe bona tegi hilata nehana to gulu gulu bilata nehanana luba sabo hulatana, siko hulatana, enali'ani keheligo tigo amuya melelata, to loko hite mine luga luga nehite minelata nasana. 21 To enipakafa enehete enele'mo laba hilatana to bia nagamito nete minelata nehana, nose'na li goli fite hiti ne su helatana to ana'ina luga'a ya suhi hite lilata nehana ya'ma nasana'mu koyapa'i alu lepi'ohunamo ni'ibe. To ya'ma aku'i yatai lenegekesa lito lu nolepunagihe. Ana foipana lilana'a enali Hu'mamofihi kapo'agu bi mefalalana'mu yabe.

22 To Sikalafu'mofihi legeya'a ma suhi huto hulata nohibe. Mehi lepito komopatini lepilata nohina, lenegelo bise'na hulata nehana, mino fulu huse'na, kosele'i melenohose bati huto minose'na, lenele'mo bati hulatana, komopatini lamana hite minolata, foyagu agoya emilata nohuto Hu'mamofihi kaga'a mone kegi'a mehe'milata, 23 legeso huto limito minolatana lenugufamofihi laga lepesise'na kaba hilata nasana yanamo ni'ibe. 24 To Yesu Kilisitohi naga'i lali tafa komopatimofihi bita hulata nasana to foipana'mu enuluhaya ilatamofihi aho filigo fa'menena lolo hu'ehinamo ni'ibe. 25 Sikalafu'mofihi amuya'alo minoto lito nohutaya ya'mu Sikalafu'mofihi kapoloko mege'i moloto bilune. 26 Lugufa'uba hofa toloto ai fitu fenogo ai fitu fenogo nehinogoti bona'magihi komopa'anigu sibina hilina nasana melilune. To siko ai hu etenogo ai hu etenogo yanamu'i ya mehilune.

Copyright information for `BEF