Hebrews 1

Hu'mau pana'amofihi baga'a le'mo babahi higo ka lamana'a lu limi'ehina

Hu'mau ai koyapa'i mono ka loli'ali bo enabaga le'mo babahi hu epalago enali enigiko enagakomagihi ka'a fato fato'mofihi kapo'a fato fato'mofihi lu epite biba biba hi'ahana. To kana'a su halube'mu nohinogo ya'ma kana yatai pana'amofihi baga'a le'mo babahi higo ai ka legeya'a lu huto huto lu limi'ehina. Pana'a ai asaga melugu nasanamofihi afo'afu lolo huto minalibe luto lu eto'ehina bomofihi ai yanuguko mololago yamofihi silaga nasana huto hu'ehina. Hu'mamofihi fana meha'amofihi sekele mamu'a hiti fuluna'a aitoga fi besa lo'ehinamo ni'ibe. To Hu'mau minoto lito hu'ehinamofihi legege hu'ehinamofihi aitoga ni'ina yanamofihi amuya'alo molo kehelito lulata nohina kaga'a yauba melugu kokulumagu ana'ina silaga'i le'mo hetofa hulata nohibe. Ai'a ya'ma foipanati nokala hu letolata nohina foya'a li su hoto ifoga gihiti bo amuya'a hiti enebe ligi'ehina bo Hu'ma ai nohinalo lamaga'aga buto mino moloto mino'ehina yabe.

Pana'auba agelo enebe ligi'ehinamofihi ka'a

Ai buto minoto agelo enebe ligi su ho'ehina yamofihi legegeto ya'ma Hu'mau emi'ehina gi'auba agelomagihi enigi'ani be ligito tigo mino'ehina gi'a li'ehina. Ya hu'ehina'mu Hu'mau ka mone pana'a lu'ehina ya'ma agelo mone'mofihi ma luto kaga lu emi'ehinamo meni'igo pana'a aisigo kumu ma luto lu emi'ehinaya fayahi keye'ahana:

  • Kai ya'ma pana'ni nohatagihe.
  • Nani'ni ya'ma yata'isi
  • kele'mo huto hu'ohube.

To agelo mone'mofihi ma luto meemi'ehina:

  • Nani ya'ma afo'afita lolo huto
  • nohunagihe.
  • To ai ya'ma pana'ni lolo huto minalibe.

Mone ya'ma minoto kohe toto pana'a ho lifinogo melugu limilube'mu nohigo pana'amofihi kaga'a ma luto lu'ehina:

  • Hu'mamofihi agelo bona'a enali asaga'i
  • lipi emite foke ka li emilabe.

To Hu'mau agelo bona'magi kumu ma luto lu'ehinamo ni'ibe:

  • Hu'mau ligo
  • ai agelo bona'magihi babeyafalo
  • li gelehe higo
  • yasi enemehi lolo hite nehabe.
  • To agelo'a
  • ya'ma koko pana'amagihi enemehi
  • li gelehe higo
  • logo guluya mepofihi enemehi lite
  • lolo hite nehabe.

To ya hu'ehinaya pana'amu ya'ma ma luto lu'ehinamo fayahi keye'ahanamo ni'ibe:

  • Oho, Hu'mao. Kai kefa hisa amuya'a hiti
  • ya'ma minomo buto minalina'mu yabe.
  • To enali amuya'amofihi fatusa'a
  • lito minoto
  • enali foya hapa'alo le'mo fotogo huto
  • kaba hulata nohane.
  • ai ya'ma lamana kamofihi
  • kibita hulata nohibe.
  • To ana'ina foipanamofi kumu
  • fatehi lolo hu etolata nohane.
  • Ya hu'ehina'mu
  • Hu'mau, afokafu, kele'mo ho ti'ehinagi
  • to gelo bise'namofihi
  • kimi'ehinauba kalalukafihi
  • enebe ligi'ehigo
  • hofa tose'naka sipi huto hu'ehinagihe.
  • 10 Mone'ya Hu'mau ma luto lu'ehina ni'ibe:

    • Sipi Bo, kai koyapa'i lili'na kana'agu
    • asaga'i yata'a me'i hiti
    • anagu neminana hiti lolo hu'ahata.
    • To kokuluma hiti anagu neminana hiti
    • kayahakatu lolo hu etolata nohane.
    11 
  • Me'mo hiti kokuluma hiti
  • asaga ana'ina'mu fa'mene minete
  • alipo fenene hilana'mu yabe.
  • Aku kaika mino amuya moloto
  • minalube'mu hane.
  • Enali ya'ma i kololo bilata gukete
  • ya suhi lolo hite minete
  • tafa lalune'mu habe.
  • 12 
  • I kololo bilata gukete
  • ya suhi lolo hite nehinogo
  • kaika ya'ma gololo ti'ahanamofihi
  • li kakito moloto
  • kosaba'na li lolo hilube'mu hane.
  • Kaika nohatanamofihi ana suko huto
  • tafa melose minalube'mu hane.
  • To kufu kanaka ya'ma mino lito buto
  • mele'isi su mehalina'mu yabe.
  • 13 Hu'mau ai'a pana'amofihi lu emi'ehina ka'a ya'ma agelo mone'i ai ya'ma luto lu emilina'a meni'ibe:

    • Kai oto
    • lamaga'niga mino lito buto nohitogo
    • fatehaka enele'mo tulu hinogo
    • kigigusa'aluga minalana'mu yabe.

    14 Ya luto agelomagihi lu meepi'ehinamo ni'ibe. Agelo silaga'i enali meha'a hiti Hu'mamofihi kele kele'a nehanaya bona'i enubuto bilatanamagihi enehe'mete enele'mo bati hilabe luto Hu'mau enoho nolifibe.

    Copyright information for `BEF