Hebrews 12

Hu'ma lali afotifu nohibe

Keheli ule'ale huse'namofihi hapa'a li huto hi'ahana bona'i samahi tite sopopo suhi hite minete lele'mo bego bego hi'ahanamo ni'inagihe, yamofihi fifa ilata nehana bona'magi hololu lilata nehanamagihi hapa'ani'mu kehelito minoto keta'a hiti nasana ya'ma gololo tito li he'milune. To foipanamofihi hapa'auba lugufalo naga'i gi'ehina hiti li toba hoto li he'milune. Ya hulototi kapo lelepi'ehina analo kosele'i melehenogo hololu luto fotogo huto bilunagihe. Ya nohutoti keheli ule'ale huse'nati'mu lele'mo kohe tolatana to yanamofihi legeya'a li huto hulata bo, Yesu ya'ma babeyafa'amofihi suhi huto minoto aigo'isi bu go bati huloto hololu luto buto minalune. Ai gelo bise'na ya'ma o nehetibe luto lu'ohunamo yamofihi keheliloto li pigi bise'na fela'amofihi gupisalo ti'ehina'mu keheligo fa'menena lolo higo malipu yafalo sipi keke'i lu'ehina. Ya huloto Hu'mau nohina sekele mamu'a hiti kefa hisalo yahi lamaga'aga tito mino'ehina yabe.

Foipa nasana lilata bona'i kegeiyo hite ita bi'ahana enali ya suhi hi emigo ai keheli he'mito amuya molo'ehina. Lenali ai kumu keheli emite kosele'i meleneheno. Komopatini hekini lo laligi ai'i li pili kalo. Lenali foipanauba lenele'mo ho kalube'mu nohinogo amuya melete luba nehago lenugufatini laga hago golahi mele'isi mehu'ehibe. Mineme bite minelata nasana yamofihi mino'ehinamo ni'ibe. To Hu'mau panana'ni yabe luto luloto amuyatini lito lenele'mo amuya moloto ka'a mone lu lepi'ehinamo ya'ma lenegekesu ho'ehifiye? Ya. Ka'a ma luto lu'ehina:

  • Pana'ni kai'i
  • Sipi Bouba kele'mo bati hilube luto
  • ka kemekinogomo
  • osahi kimilina'mu kehelitogo
  • sibina mehino.
  • To foipa nasana'mu ka kemekinogomo
  • komopaka hekini meleno.
  • Sipi Bo ai komopa'a epilata nohina bona'i
  • asaga'naloga hima muhi fi epoloto
  • enele'mo bati hulata nohibe.
  • To ai yagapana'a lamana'a
  • enele'mo molo'ehina
  • silaga panana'amagihi segi osahi epito
  • enele'mo fotogo hulata nohibe.
  • Sipi Bouba osahi lepilenogomo kosele'i melenehenogo amuyatini gulu mefeno. Hu'mau bu gago ai panala'i pana'i lolo hinogo lenele'mo bati hilube'mu ya suhi lolo hu lepololata nohibe. To bo moneubafi moneuba pana'a osahi emito le'mo bebe salina'a huto ni'ifihe? Enele'mo bati hulatana ya'ma bonatoga silaga'i ya suhi hilata nehanabe. To Hu'mau ai ana suhi huto yagapana'a silaga'i enele'mo bati hulata nohinabe, lenali'i ya'ma ya mehu lepelenogo minalana ya'ma panala'a pana'a lolo hite meminalana'mu yagi ya'ma kapolo a'mofihi pana'i yabe luto lu lepalalina'mu yabe. To mone lilugi, metoga afotigi enali ya'ma segi osahi lahago lali kegeiyo mehuse enele'mo hofa toto agoya hu epi'ohutamo ni'ibe. To komopati afotifihi ya'ma ai maha'aga limito nohuto ya'ma bati hilube'mu nohibe. Ya hulototi mino hetofa hilinaga mino moloto minaluta'mu yabe. 10 Afotigi enali'ani enegekesa keheli'ahanalo ya'ma fuku kana tupa'asi nobigo osahi limite lele'mo fotogo hite minelata hi'ahanaya, Hu'mau ai'a ya'ma ana'ina legeya'a li huto hu limilibe luto to ai'a bebe sose'na ni'inalo ya'ma molo emilabe luto ya hu letalube'mu nohibe. 11 Osahi limito lele'mo bati hulata nasana ya'ma huto hulenogomo kana'a kehelinogo laga menohigo keke'i luse'na'a hiti lolo hulata nohibe. To aliha'aga ya'ma mino bati hulata'nagu minolata nohutamofihi legeya'a ya'ma i tili tele huto lalitoga fulunamofihi nasana huto hilina'mu yagi to hapati lamana'a lolo hulata nohibe.

    Lipoti lu limi'ehina ka

    12 Ya hu'ehina'mu lenali komopatini haya kolo'ehina lenigi lenayahi kakite kalune'mu nehana ya suhi hite ate ate mehise amuya melete mineno. 13 Mono'mofihi kapogu bilune'mu nehitemo lenigi sibina hu'ehina'a mine'ahana sibina hu su ho laligi aku'i molo emilenogo bati huto ye kolenogo Hu'mamofihi kapogu le'mo fotogo hilete humofa'na hilo.

    14 Lenali bona'i asaga'i enali hiti koguna ite minalune lite nelite to komopatini hepinogo mino eto hite minalune litemo amuya malalo. Komopa'ani kolo tago nehilana'amagi enali Sipi Bomofihi be megalana'mu yabe. 15 Lenalitogati bo mone Hu'mamofihi lehe'mose'na li he'mito i behe huto bu laligi kaba hite minalo. Ya nehite komopatinigu ekesa'namofihi foipana moneuba leneme'na leneme'na bito lulata nohina ya suhi huto komopatinimofihi ekesa'nauba sipi hulenogo bona'i yege yege'magihi komopa'ani haya kolo laligi kaba hi epelelete minalo. 16 Ya nehite lenalitogati moneubafi moneuba Isau bu'ehina kapolo mone mebilibe. Mokolo bona'i enali mino eto hite meminalata to metoga bona'i mone'amagi mono kagaloga mege'i memalalata ya suhi huto meminalune lite kaba hu bati hilo. Ya'ma Isau ai moneko nose'namu yabe luto ema'aga yege'a nohinalo alihi huto hu emilina felisa fe'nohi yama he'mi'ehinamo ni'ibe. 17 Lenali ai hapa'a akeheli'ahabe. Ai alihi afo'afitogati lusa gise'na lilube luto noligo afo'afu o'e lu etago ana'ina lolo hu'ehinamofihi hena huto su halibe luto kehelito ya'ma sibina hu'ehinamofi kumu komopa'a i behe huto ana lusa kapolo sa sa huloto aku meni'igo yibi hafili huto mino'ehinamo ni'ibe.

    18 Koyapa'i Isilaeli bona'i le'mo ya suhi hite Sainai kosalo li gehe lilata nehana beleha'aga ana suhi hite meabe. To fi'mo moneuba analo sipi logo loto guluya meha'agu ya'ma to sinihi metepu ginagu to yasi linagu yamofihi komopa'agu bu mefele'ahanamo ni'ibe. 19 Lenali Sainai kosaguti pikuli fi'ahana to nogo sipi mone molo'ehina mekeheli'ahana ni'ibe. Keheli'ahanamagi ya'ma ka'a mone'a hiti mekehelilune lite buka buka tite amuya melete mine'ahanamo ni'ibe. 20 Ya'ma nogouba ma luto lu laga huto lu epi'ehinamo ya'ma keheligo keta epesi'ehina:Bona'i luga'a enali enayatu kosalo bako nehinogomo lenali efa kosatu enoho fililabe. To yagamagi asaga'i ana suhi hite lolo hi epalalabe. 21 Ana nasana ya'ma koli huse'na'a hiti sipi huto nohigo Moseu ya'ma bu goloto:Nani yanamofi kumu nelesa'ni noligo afoya foya noube, luto lu'ehina yabe.

    22 Lenali kosa ya legi huto ni'igopa, lenali Yiona kosagu bite mehi mino lito minolata bo, Hu'mau ai nohi hepa'aga kokulumalugu Yelusale hepa tegi huto ni'ina hepato ime ime neheti'ahabe. Ya nehite agelo leka sete leka so su mehose suhi hite samahi tite nehana, 23 to ai yagapana'a lamana'a enigi'ani kokulumalugu koyo molo'ehina'a enali enegelo bite li nupa hite minanalo bu neheti'ahabe. Ya nehite asaga bona'i hapa'animu foipana'animu guna molo epalalina bo, Hu'mau nohinalo ime ime neheti'ahana. To lamana hite mine'ahana bona'i buto i segito minolata'nagu enele'mo molo'ehina'a enali suhi hite molo emi'ahanamo ni'ibe. 24 To lu mu tifise'namofihi ka'a kosaba'i li huto huloto folagahatigu nohina bo, Yesutoga abu neheti'ahabe. To koyapa'i Ebelihi golaha'auba ya'ma meluguti Ebeliu ho fili'ehinamofihi foipana'mu pa salibe luto lu'ehina. Ya huto ni'igopa, Yesuhi ai'a golaha'auba fepa kopa i'ehina yanauba lelito tito ana'ina legeya'amu fifa ito kehe ilata nohina yalo bu neheti'ahabe.

    25 Lenali ka'a lu lepilata nohina ya'ma keheli mehe'mise kaba hite minalo. Koyapa'i Moseu ya'ma metoga minoto Hu'mamofihi ka'a mone lu epigo ka futu'a yabe lite he'mi ete'ahana bona'i enalitoga ana'ina enoho fililabe noligo koli'a hiti huto hu epi'ehinamo ni'ibe. Ya hu'ehinago yatai ya'ma kokulumagu minoto ka'a lipoti lu nolimina bo ai ya'ma lemegesa hu emitoti hena hena hinogoti lemehi mebinogo minalune? 26 Koyapa'i nogo'a ya'ma Moseu mino'ehina kana'agu me'i mopo mopo hu'ehina. Ya hulago nogo'a mone yatai lubutilo ma luto lu nolimibe:Nani minoto me'i ya'ma aku'i le'mo mopo hiluna'mu yabe. To ya nohinogo kokuluma hiti ya'ma moneko kumu le'mo mopo hiluna'mu yabe, luto Hu'mau lu'ehina. 27 Ya'maaku'i le'mo mopo hiluna'mu yabeluto lu'ehina yamofihi ana'ina li huto hu'ehina ya'ma le'mo mopo huloto le'mo gehe lilube luto lu'ehina. Le'mo bati hulenogo ule'ale huse'nalo lemehi emito minolata'na mopo mehilina nasana ya'ma huto huloto mino lito buto minalina'mu yabe.

    28 Ya hilinagi lali Hu'mamofihi kapo'a lilune'mu nohutamofi kumu mopo mopo mehilina minoba minoba nasana lalitoga minalibe. Yana'mu lali Hu'mamofihi fokehi halutagihe. Ya huloto bita nohina'alo mege'i moloto aitoga legelo lagalo bito amuya'a hiti legeso huto agoya hu emino. Ya nohinogo ai'a kehelito bu go laga hinogo bati hulenogo agoya hu emito minalune. 29 Ya'ma hena'mube? Hu'ma, afotifu yabe. Ai'a ya huto lo su holata logo'a hiti nohina bo, ai'a nohibe.

    Copyright information for `BEF