Hebrews 3

Yesuhi gi'auba Mosehi be ligi'ehina

Ya hu'ehina'mu mono bo nalalu'nigita, kokulumagu naga'i lolo hilabe luto Hu'mau elesa molo lepi'ehina. Lenali keheli emilata nohutamofihi mono ka leli'ali bo to mamufa gi emilata bo sipi'a Hu'mau ho lifi'ehina bo, Yesuhi bu go bati hite bu ge'ehilo. Hu'mau ana foya lilibe luto le'mo ho tito lu eto'ehinalo ai'a ya'ma Moseu Hu'mamofihi yagapana'amagitoga minoto Hu'mau lu'ehinalo minose suhi huto foya afo'afu lolo huto minoto lubuto bilatanamofihi foya amuya moloto mino lito buto mino'ehinamo ni'ibe. Nohi gilata nohina bomofihi gi'auba nopofihi gi'a be ligi'ehigo ana bomu'i bona'magi gi'a liyafa hilabe. Ana suhi huto Yesuhi gi'auba Mosehi be ligigo Yesuhi fana meha'a hofa to'ehina'mu yabe. To nohi ya'ma li huto hulatamofihi ya'ma bona'magita gilata nohuta ni'inaya akeheli'ohune. To ana'ina silaga'i li huto hulata'a ya'ma Hu'mau ai'a lolo hu'ehina yabe. Moseu ai Hu'mamofihi noha'a legi lolo hite nehana bonatoga minoto Hu'mau lu'ehinalo agoya hu emito foya amuya moloto lito minoto Hu'mamofihi ka'a alihi lu huto hilinaga lu yege ho'ehinamo ni'ibe. Ya huto mino'ehinaya Kilisitou ai ya'ma pana'auba Hu'mamofihi noha'alo lolo hi tegi hite mine'ahana bona'magihi kaba nohu epoloto Hu'mau lu'ehinalo foya amuya moloto lilata nohibe. Noha'aya lali ya'ma nohune. To yamofihi fa'mene'mu meni'ibe. Ana'ina le'mo babahi hu leto'ehina yana'mu luto ka'a li pili koto agoya hu emito minoto komopatigu bati nohinogo keheli emito mino lito nobinogo kanati su nehenogomo ya'ma Hu'mamofihi noha'a lolo huto nohune luto lilune.

Hu'mamofihi minoba minoba hepato bu nehetiluta ka'a

Ya hu'ehina'mu Sikalafu'uba lu'ehina ka'a ya'ma mono bukugu ma lite keye'ahana:

  • Yatai ya'ma lenali Hu'mamofihi nogo'a
  • keheli'ehilanamo,
  • ya'ma fa'mene ka meto Isilaeli bona'i
  • enali ipakafa helete siko hite
  • Hu'mamofihi mi'i melete nehana
  • ya suhi hite komopatini fi hekini lenogo
  • meminalo.
  • Tatatinigi enali analo
  • kufu kana'a 40 nobigo
  • ana'ina lolo huto moloto hu'ohunamofihi
  • be gelata hi'ahanamo ni'inaya
  • kegeiyo hi netete
  • nimi'i nama'i mele nete'ahanamo ni'ibe.
  • 10 
  • To nani yana'mu ka epekito
  • enali kumu ma luto
  • lu epolo'ohunamo ni'ibe.
  • Enali kana'amu kana'amu negi nagi
  • enegekesa kehelilata hi'ahanamo nehabe.
  • Enali nani kapo bu go bebe sete
  • bu galana'a mehi'ahanamo ni'ibe.
  • 11 
  • Nani ka epekito ma luto lu laga huto
  • lu'ohunamo ni'ibe.
  • Enali minoba minoba nohuna hepato
  • bilune'mu menehana yagi
  • nani hiti meminalana'mu yabe.
  • 12 Nalalu'nimagita, lenalitogati mono komopatini go'nupa ginogo minete mono ka keheli he'mite minoba minoba huse bo, Hu'mamofihi lenemegesa hi emi lalagi kaba hite minalo. 13 Ya nehite kana'amu kana'amu to kanati fa'mene ni'inogo foipanamofihi fi taga hi etete mi'i ma'i mololatanamofihi lenalitogati bo mone'mofihi amukele li etenogo komopa'a li hekini lo lalibe lite ai ekesa linogo ai ekesa linogo hite le'mo hetofa hite minalabe. 14 Lali asaga'i hapi fito keheliya ise'na ya'ma to fifa ilata nohuta li gehesalo nehetilutamofihi ya'ma Kilisitohi agoyana'a guna moloto li pili koto nominota bona'i lolo huto nohilune.

    15 Kaga mone hiti mono bukugu ma luto ni'ibe:

    • Lenali yatai
    • Hu'mamofihi nogo'a keheli'ehilanamo
    • yamofihi lenali koyapa'i
    • Hu'mamofihi ipakafa helete
    • kegeiyo hi'ahana.
    • Ya suhi hite
    • komopatini fi hekini lolenogo
    • ya mehilo.

    16 Yamofihi hiya bona'magi Hu'mamofihi nogo'a keheli he'mite hega helata hi'ahana? Moseu enele'mo ko hetago Iyipi metogati e'ahana bona'magi asaga'i enali'ani ya hi'ahanamo ni'ibe. 17 Kiyi'afi kumu Hu'mau kehelito ka epekigo kufu 40 bu'ehinamo ni'ibe? Yamofihi foipana lolo hilete fa'mene ka meto fili gehesa hi'ahana enali kumu ya'ma suhi lolo hu'ehinamo ni'ibe. 18 Ya hulago kiyi'afi kumu Hu'mau kehelito lu laga hu'ehina ka'a ma luto molo'ehinamo ni'ibe? Minoba minoba huse hepato bu menehetilana'mu yabe. Yamofihi ka'a keheli he'mite kegeiyo hilata hi'ahana enali kumu ya luto lu'ehina. 19 Ya luto lu'ehina'mu ma luto keheli'ohune. Enali Hu'mamofihi ka'alo keheli he'mite aitoga agoya hu meemi'ahana enali kumu yabe luto minoba minoba huse hepatoga bu meneheti'ahanamo ni'ibe.

    Copyright information for `BEF