Hebrews 4

To ya'ma minoba minoba hepato bu nehetilabe luto Hu'mau lu leto'ehinamo ni'ibe. Yamofihi kaga'a lu molo'ehinana su mehalube'mu hibe. Ya'mu lenalitogati kegi'a moneubafi moneuba ana kapogu buto tele bi haya kolo lalibe luto lelesati linagi kaba hu bati hilo luto nolune. To ka lamana'a enali'i lu epi'ehina'ago huto lali'i lu limi'ehibe. To enali ya'ma ka'a kehelilete komopa'anigu li memalago limito keheli ule'ale hite memino'ehina to enalitoga futu'ago mino'ehina yabe. Lali ka lamana'a keheli amuya moloto keheli'ohuta'amagita minoba minoba hepatoga bu nehetilata nohuto Hu'ma hiti lali hiti analo fuli nominone. Ya hu'ehina'mu Hu'mamofihi ka'a keheli he'milata nehana'mu yabe luto ai ma luto lu'ehina:

  • Nani enali'i ka epekito lu laga huto
  • ma luto ka molo'ohuna.
  • Enali ya'ma minoba minoba huse hepatoga
  • bu nehetite
  • nani hiti meminalana'mu yabe.

Yamofihi metoga hapi fito ana'ina hiti silaga'i lolo huto lili'na'a su holoto mino lito buto minoto alihi sibigopa anamofihi ka'a lu'ehina.
Ya hu'ehina kana'a 7 yupapo bu nobe ligigo yalo'i mono bukugu kaga mone ma huto ni'ibe:Hu'mau ai'a ana'ina silaga'i lolo su holoto kana'a nayahi lugaga loemo heleko malago basu bi'ehina. Yana higo ifoga ya'ma ma luto aku lu'ehina:Enali ya'ma minoba minoba huse hepatoga bu nehetite nani hiti meminalana'mu yabe. Bona'i mone'amagi kohe tete ka lamana'a kehelite Hu'mamofihi minoba minoba hepatoga mebi'ahana. Henabe lutobe? Enali ana ka'amofihi keheli amuya memele'ahana. Ya hite, Hu'ma hiti analo fuli memine'ahana. To mone'amagi kehelite aitoga agoya hu emite nohinalo bite ai hiti fuli mine'ahana yabe. Ya hu'ehina'mu yatai yupahi Hu'mau ya'ma bu nehetiluta kana'a aku'i molo'ehina. Ana kana'mu Hu'mau yatama kana bulago Tebitihi bagaguti lu'ehina ka'a ma luto mono bukugu lu moloto lu'ehina:

  • Lenali yatai ya'ma Hu'mamofihi nogo'a
  • kehelilanamo yamofihi
  • komopatini fi hekini lose
  • meminalo.

To koyapa'i Yosua Hu'mamofihi boana'magihi enele'moto minoba minoba nasanamofihi hepa'amofihi legeya'a li huto hu epolo'ehinalo ni'itita, Hu'mau alihi kana'alo basu bise'na moneko kumu melitita'mu yabe. Ya hu'ehina'mu ma luto nokehelune. Hu'mamofihi bona naga'a lali minoba minoba huto minose'namofihi fuli'a mone fa'mene ni'igi ana huto koyapa'i Hu'mamofihi kana 7 yanagu basu bito mino'ehinamofihi bona'amagita ana huto mino'ohuta 10 Hu'mau foya li su holoto mino basu bi'ehina ana suhi hite bona'i mone'amagi enali lili'na'ani li su hete'ani Hu'mamofihi minoba minoba huse'nalo mine malalana ya'ma Hu'ma hiti enali hiti mine'ahana yabe. 11 To lalitogati moneuba amuya memolose foipana nasanamofi kumu luto bona'i koyapa'i ka'a pelesa ite Hu'mamofihi minoba minobanamofihi hepatoga mebilune'mu enipakafa enehese kapolo bi'ahanamo analo'i bu lalunigi minoba minoba hepatoga bilune luto amuya malalune.

12 To Hu'mamofihi ka'a ya'ma amuya moloto mino kosaba'na huto minalina'mu yabe. To emita'i mone baga'a megesa'aga to okaba'aga heta pita huto ya'ma be ligito ni'ibe. Anatu laga humo limito lemehi komopati to felisati apilifati hiti i loko hulata nohibe. Ya huloto komopatitu kehelilatana to keheli laga hulatana yanamofihi hapa'a li huto hulata nohibe. 13 To ana'ina li huto hu'ehina ya'ma moneubafi moneubafi Hu'mamofihi bulo ya'ma suguna'i nasana mone meni'ibe. Ai bulo melugu kokulumagu ana'ina silaga'i sa gi'ahanagu meni'ina to li hokolo huse'i ni'ibe. To mone yupahi lali asaga'i li lolo hulata nohutamofihi hapa'a yanamofihi Hu'mamofitoga tito ai bulo lu eminogoti ka foya li letalina'mu yabe.

Yesu lali'i sipi mamufa gi letolata bo nohibe

14 Yana'mu lali mamufa gi letolata bo sipi'a tito mino'ehina moneka nohuta bo Yesu Hu'mamofihi pana'a aisigo ya'ma kokulumagu Hu'mamofihi maha'aluga tito nohibe. To ana suhi huto nohu letana ni'inaya mono ka'a lulata nohuta yamofihi li pili koto lubuto bilatanamofihi ka'a keheli ule'ale huto mino lito buto minalune. 15 To mamufa gilata bo sipi boti ai kumu keta lebesigo ya nohutogo komopati lapa bise'namofihi kehelito lali'i bu logoto menohe'mi letabe. Lalitoga limi'i lama'i moloto lito nohinamofihi huto hulata nohina ana suhi huto aitoga mi'i ma'i moloto lito fato fato'mofihi huto hu'ehinamo ni'inaya aitoga foipana mone'a meni'inamo ni'ibe. Yana'mu ai lali kumu ginaga filata nohibe. 16 Ya hu'ehina'mu lali Hu'mamofihi kefa hisalo tubuto yalo lelesa meligo lehe'mose'na'a ni'igo tito babahi hinogo nehetilune. Ya nohinogoti keta huse nasana moneubafi moneubafi oto logobisalo neminenogomo Hu'mau ai'a lali kumu ginaga fi limilina'mu to lehe'malina'mu komopa'atu molo leto'ehina ya'mu luto nohinogo ana'asi lele'mo bati hilibe.

Copyright information for `BEF