Hebrews 5

Melugu bona'i enalitogati mamufa gilata bona'mofihi le'mo ho ti'ehinauba Hu'mamofihi lili'na'a liloto to bona'i enele'mo eto hu'ehina. Ai asaga bona'magitoga enali kumu yabe luto Hu'mamofitoga huto hu emiloto foipana'animofihi nasanalo lokiya fi emilabe luto enele'mo molo'ehina. Ana mamufa gilata bo ai'a hapa'a mone amuya memolose nohigo fato bona'magi kaga mekehelilata to foipana lilata nehanamagihi fulu huto ginaga fi epite agoya hu epilata nohibe. Ya nohuto ai amuya memalalina'mu yabe luto bona'magihi foipana'mu to ai'a foipana'mu hiti Hu'mamofitoga lokiya fi emilibe. Foya tito mino'ehinamofihi bo mone'i ai komopa'aguti kagalo ana foya lilube lutomo meni'ibe. Mamufa gilata bo mone'mofihi Hu'mau kehe ito le'mo eto higo foya'a ya'ma lu emilenogo bati huto lilina'mu yabe. Alonihi ya'ma koyapa'i Hu'mau kehe ito ema'alo anamofihi lolo hu eto'ehinamo ni'ibe.

To Kilisitou ai ana suhi huto ai'amo keheligo tigo yamofihi mamufa gilata bo sipi bo lolo mehu'ehinamo ni'ibe. Yamofihi Hu'mau ma luto lu emigo lolo hu'ehinamo ni'ibe:

  • Kai ya'ma pana'nimo nohane.
  • Nani yamofihi yatai ya'ma
  • kele'mo huto nohube.

To kaga mone'a hiti ma luto lu emi'ehina:

  • Kai ya'ma Melekisitekihi babeyafa huto
  • mamufa gi emilata bo nagaluguti
  • huto hilata minomo buto
  • foto'i moloto minalane.

Yesu ai metoga mino'ehina kana'alo Hu'mamofihi kehe sipi igo bu nogoya nolimigo sipi nogo moloto buka tito ya'ma fili'ehinaguti le'mo gelehe higo yamofihi buto bise bo, Hu'mamofihi amuya moloto loka ho'ehina yabe. Ya higo Hu'mamofihi maha'aluga limito mino'ehina'mu luto to agoya hu emise'namu Hu'mau keheli emi'ehina. Ai Hu'mamofihi pana'a nohinaya fa'mene ya'ma keke'i luse'na keheliloto keheliya ise'namofihi hapa'a keheliya ito agoya hu emi'ehina. Ya huloto bu segito mino'ehina bo lolo huto ai ka'a keheli emi'ahana silaga bonatoga enali'i enubuto bise'namofihi nekisa'a meni'inamofihi afo'anifu lolo hu'ehina. 10 Ai ya'ma lali'i mamufa gi limilata nohina bo, sipi bo Melekisiteki ai'a nagatogati babeyafa huto minalibe luto Hu'mau lu yege ho eto'ehina yabe.

Mono ka he'mi lalabe luto lipoti lu nolimibe

11 Yamofihi ka'a babu luto ni'inaya lenali lenegekesa legeso hite kehelilatanamofihi tupa'asi nehinogo lu lepilube luto keheli'ohuna komopatini keta nohibe. 12 Lenali kana'a yatama mono ka kehelite biba biba hite minatita luga'a fi lehe tete giyaka giyaka lite li epitita bati hitine. To ya'amagihi lenali mono'mofihi hapi fise'na'alo ya'ma aku'i lu lepilatanamofitoga mine mele'ahabe. Lenali komopatinimofihi nose'na amuya'a hiti menalana'a hite minalana legegeto nehabe. 13 Ya'ma fono ka ni'inaya olopa bona'magi amuya'a hiti nose'na nenanaya amihi nelata nehana'a enali inapuhi nehabe. Nehabe luto lu epalalutaya ya'amagihi mino fu lite minose'namofihi hapa'a ya'mu mone keheli fotogo menehabe. 14 Nose'na amuya melete yamofihi olopa bona'magi enali nasana ni'ibe. Enegekesa komopa'ani hokolo higo foipanamofihi bati'namofihi hapa'a keheli bebe sete nehana enali nasana ya ni'ibe.

Copyright information for `BEF