Hebrews 7

Melekisitekiu Hu'mamofihi mamufa gi emilata bo yabe

To Melekisitekiu ai ya'ma Seleme hepatoga gihiti bo to Hu'mamofihi sipi bomofihi ai mamufa gilata bo mino'ehina. Abalahau ai fato hepato buto enigihiti bona'magihi kalana'i moloto enoho logo'ehinalo i behe huto noago Melekisitekiu ai buto kapolo fo tula hoto Abalahahi be tigito lusa gi eto'ehina. Ya hu etolago Abalahau lubaguti bauna nasana leka soto guna mololoto nayahi loemo su hola hola higo molo'ehinaguti moneko moneko lito Melekisitekihi emi'ehina. Ya'ma Melekisitekihi gi'amofihi hapa'a lali katiguti ya'ma gihiti bo bebe sose'namofihi afo'afu mino'ehina. To Seleme hepa'mofihi gihiti bo mino'ehina hapa'a lali katiguti ya'ma fulu huse'namofihi afo'afu nohina yabe. Melekisitekihi ito'afugo afo'afugo mine'aha'inaya etigi'atiti mekeheli'ohune. Ai'a enigiko enagako bona'a asaga'i fenene hu'ehigo mekeheli'ohune. Enali hapa'animu sa sa hite li huto mehi'ahanamo ni'ibe. Ai minoto lito hu'ehinaya, ito'afu keto'ehina kana to minoto fili'ehina kana'a ya'ma mekeheli'ohune. Ai Hu'mamofihi pana'a legi huto mamufa gilata nohina bo molo emito minomo buto mino'ehina nohibe.

Sipi gihiti bo nohinagi kehelilo. Melekisitekiu ya'ma gihiti bo lolo huto nohigo bahalotifu legeya'a Abalahau ai minomo tito mino'ehina, aiya lubaguti bauna nasana lamana'aloga leka soto guna mololoto yogo fe'nohi nayahi su hola hola huto ni'inaguti Melekisitekihi moneko moneko li emi'ehina yabe. To Libaihi yagapana'a luga'amagi mamufa gilata bona'i minalabe luto lu epolo'ehina. Enali hiti boana'i enalalu'anigi hiti koguna ite Abalahahi naga'i moneko koguna lolo hi'ahanamo ni'inaya enalitogati ana'ina luga'a huto hu'ehinaguti nayahi su hola hola higo ni'inaguti moneko moneko lila lila hilabe lite li'ahana ka'a li nupa hite nelite yamofihi lu laga hi epelete li'ahana. To Melekisitekiu ai ya'ma Libaihi li gehesaguti huto hu emi'ehina bouba ya'ma Abalahahi ana'ina'a silaga'i nayahi su hola hola higo ni'inaguti ya'ma moneko moneko'i li'ehina. Ya huloto'a Hu'mau lu eto'ehina nasana le'mo hetofa higo li keheli'ehina bo Abalahahi ya'ma lusa gito molo eto'ehina. To mineme tite nehana'a enali limite mine'ahanamagihi lusa gi epelelata nehana'mu yamofihi enebe ligi'ahana. Mone kegi'a ya'ma kuguhi koyo emilata nehana bona'i enali mineme bite fililana yamagi bona'magihi yogo fe'noha'ani nayahi su hola hola higo ni'inaguti moneko moneko'i lilata nehabe. To mone kegi'a ana nasana moneko moneko li'ehina bo Melekisitekiu ya'ma minoba minoba nohina bo yabe lite mono bukugu fayahi keye'ahanamo ni'ibe. Yata'a Libai ana kanaguai huto huto mehu'ehinaya, tata'afihi Abalahau nohigo Melekisitekiu fo tumala neha'igo Abalahau yogo fe'nohi li emi'ehina. Ana yupahi Libai tata'afihi gufa'agu ana suhi huto mino'ehina. To ai bonatogati yogo fe'nohi nayahi su hola hola higo ni'inaguti ana'ina moneko moneko'i lilata nehana bona'magihi bahalo'anifu nohuto Abalahahi meha'aga nohuto fe'nohi ana'ina ya'ma Melekisitekihi li emi'ehina.

11 Libaihi yagapana'a enali mamufa gilata foyamofihi kaba'alo ya'ma Hu'mau ai'a Moseu keya ka lu'ehina ka'a ya'ma Isilaeli bona'i epi'ehinaya anamofihi mamufa gilata nehana bomagi enali kapo bili'ahana yanauba buto i segito minaluta nasana li huto hitita aliha'a lokiya fi emilata bo mone fato'mofihi Melekisitekihi li nupa hi'ahanaguti henabe

luto huto hitine? Yesu huto huloto ai'a Alonihi babeyafa suhi huto memino'ehina. Ai Melekisitekihi li nupa hi'ahanaguti oto huto hu'ehinamo ni'ibe.
12 Ya'ma mamufa gilata foya li'ahana yamofihi tafa'a enele'mo kosaba'i huto mone li huto hulenogo ana tafa'amofihi ka'a keya ka lu'ehina'a ana suhi huto topa nehenogo fato'mofihi kosaba ka mone huto hilina'mu yabe. 13 To keya ka lu'ehina kauba Sipi Botimofitoga buto lilago ai lokiya fi emilata nehana sipi mono nonugu foyamofihi ya'ma Libaihi tata'agitoga li epele'ahana enali li nupa hi'ahanaguti huto mehu'ehina. Sipi Botiu ya'ma li nupa moneguti huto hu'ehina ya'ma ana li nupa hi'ahanaguti moneuba mamufa gilata sipi mono nonugu foya'a lilata menohina ni'ibe. 14 Sipi Boti ai koyapa bo Yutaha naga'aluguti huto hu'ehina yamofihi akeheli su hoto keheli'ohune. To Yutaha naga'magi enali mamufa gi emilata foya lilabe luto ya'ma Moseu fayahi koyoto melu'ehinamo ni'ibe.

Yesu Melekisitekihi babeyafalo hu'ehinamofihi ka'a

15 To mone hiti anokehelune. Mamufa gilatamofihi yuhufa hapa'a mone fato'na ma huto hu'ehibe. Mamufa gilata bo mone Yesu ai'a Melekisitekihi babeyafa suhi huto huto hu'ehina. 16 Ai'a gufatu huto hu'ehibe lite ka'a li melete li'ahana to lu laga hi'ahana hiti ya'ma ana babeyafalo mamufa gilata bo lolo mehu'ehibe. Ai mino lito buse'na mehi emito amuya'a hiti mamufa gilata bo mino'ehina ni'ibe. 17 Ai kumu mono bukugu ka'a ma lite fayahi keye'ahanamo ni'ibe:Kai ya'ma Melekisitekihi babeyafa huto mamufa gi emilata bo nagaluguti huto hilata minomo buto foto'i moloto minalane, lite keye'ahana yabe. 18 Ya hu'ehina'mu ya'ma lu laga hite li'ahana kaga koyapa'i li'ahanamofihi amuya'a meni'inalo legeya'a mone huto mehu'ehina yabe lite le'mo kosaba hi'ahana. 19 Moseu keya ka lu'ehina kauba buto li hetofa hinogo minaluta nasana li huto holito mebu'ehina. To yanamofihi be liginogo fifa ilatana kosabaluguti manuhi epilatanamofihi lamana'a li huto hu'ehina yauba manuhi limigo Hu'mamofihi okaba'aga lebato bulata nohune.

20 To ka mone hiti ma ni'ibe. Kosaba mamufa gilatana yauba Yesutoga huto hu'ehina ya'ma Hu'mau le'mo huto:Kai mino lito buse mamufa gilata bo nohane, luto lu moloto emi'ehina. Yata'a kohe tete mamufa gilata hi'ahana bona'i enali li hetofa hite Hu'mau lu molo'ehina ka melise fa'mene mamufa gilata bona'i lolo hite mine'ahana yabe. 21 Kosaba'i ya'ma ule'ale huto ka lu mololata nasana ifo'aga Yesuhi ai'a mamufa gi emilata bo lamana'a lolo huto nohibe. Ai fayaha ka'a Hu'mau lu molo emi'ehina ma luto ni'ibe:

  • Sipi Bouba amuya moloto
  • lu laga huto lu'ehina ka'a
  • ya'ma mehe'milina'mu yabe.
  • Kai mamufa gi emilata bo
  • minomo buto
  • amuya moloto minalatagihe.

22 Hapa'a ya suhi huto ni'igo Yesu ai'a ya'ma lu mu tifisemofihi ka'a legeya'amofihi yafa lapusa'a lolo hu'ehina.

23 To hapa'a mone hiti ni'ibe. Koyapa mamufa gilata bo enali ya'ma foya molo emite lilune'mu filite bi bi nehago yamofihi ni'igi babu bomagi lelite bite mine'ahana. 24 Ya hi'ahanaya kosaba'i ya'ma Yesu ule'ale huto minoba minoba huto minose bo nohibe luto mamufa gilata foya yamofihi molo etoto oba oba huto nominabe. 25 Ya hu'ehina'mu minoba minoba huto nominana bouba ya'ma kana'amu kana'amu lali kumu yabe luto Hu'mamofitoga buka tilata nohinaya ai'a lubuto bise foya Yesuhi foya'amu luto Hu'mamofihi bulo bulata nohuta bo bati huto lamana'agu lele'mo moloto lili'nagu lele'mo hetofa hulata nohibe.

26 Yesu ya'ma lali'i mamufa gi leto'ehina bo sipi'a nohinagi lele'mo bati hulata nohina bo nokehelune. Ai pa sose foipana meni'ina komopa'a fi fana tago lamana bo ai foipana nasana lilata bo enali tegi huto menohibe. Laga huto pa solata nohina bo Hu'mau le'mo saga hu'ehigo kokuluma ifo'alo be ligi su hoto nominana bo minalina'a huto minolago bati huto ni'ibe. 27 Ai ya'ma mamufa gilata bo tafa'a enali tegi huto meni'ibe. Ai foipana'a hiti meni'igo kana'amu kana'amu kohe toto ai'a foipana'amu yabe luto mamufa gi emilatamofihi alihi bona'magihi foipana'animu kuguhi koyo emilata nohinamo ya'ma meni'ibe. Ai'a komopa'a hiti gufa'a hiti ya'ma li hetofa hu etoto kuguhi moneko'i ya'ma koyo emigo buto su ho'ehina. 28 Moseu keya ka lu'ehina ka'alo ya'ma bomagihi komopa'ani mone bati mehu'ehina bo enali mamufa gilata bona'i minalabe luto lu epoloto enele'mo ho ti'ehinaya, Moseu keya ka lu'ehina kamofihi gupisalo ya'ma Hu'mau le'mo amuya moloto lu laga hulata nohina kaga'a yauba ai'a pana'a ya'ma bu segito hetofa huto nominana bo minomo buto mino yatama huto minalina'mu yabe.

Copyright information for `BEF