James 3

Kenetufatimofihi hapa'a

Nalalu'nigitabe. Lenalitogati bona'i babu lite ka lu enelepise bo lolo mehino. Hena'mube? Lali tisa foyalo bo ya'ma alihi kanagu lalitoga ka foya hofa talina'mu yabe, luto a'nokehelune. Lali asaga'i sibina hulata nohune. Luga'amagi enali kagagu sibina mehilana ana bona'i lusiga bati hite mineme bite minalana'mu yabe. Enabaga'ani kaba hilana yamagi enugufalo ana'ina asaga'i fa'mene kaba hilanamo ni'ibe. Hosi yagamagihi enugufa li gelehe hite bilune'mu enabaga komopa'agu mone aeoniloti lolo hite mele epelete kefe hi'ahago kaga kehelilata nehabe. To ana huto hege nagamilugu boti ana'ina sipi ni'inaya to yasi sipi'nauba fitu fo lito lelito to bulata nohinaya lito olata bouba osaha'atu siti'a molose'na'alo le'mo bati huto melenogo li miyaga maga huto bilina'mu yabe. Ana suhi huto kenetufati ya'ma ana'ina nesi'asi ni'inaya ana'ina nesi nesi huto liluta'a mehune luto le'mo napa napa hulata nohibe.

Logo lo tunufa'a lagaso'a yauba i kulu tiloto fi'i loto kifi legeya'a asaga'i lo su holata nohibe.
Ana huto kenetufati ya'ma logo legi huto ni'ibe, lugufamofihi nasanaguti ya'ma metoga nasana foipana asaga'naloga nogosuhi ni'ibe. Kenetufatiuba lugufa komopati li sibina hu su holatanamo ni'ibe. Logo lo tunufa'uba i kulu tito yafa legeya'a kifi lo su ho'ehinamo ni'ina, ya suhi huto logo hepaluguti metoga bona'i asaga'naloga kenetufati li gelehe galaha hago kagati lu sibina huto analoti luto moloto nohuta nasana ya'ma sibina holito nobibe. Yaga nose'na to yafalugu kafa'nama to osifa'i to nagamilugu faya'i fato fato'mofihi silaga'i enele'mo melete enegekesa li'ehilinamo ni'ibe. To enele'mo melete enegekesa li'ahanaya kenetufati ya'ma bo moneuba ekesa melilube'mu nohibe. Kenetufatiuba ya'ma ana'ina sibina'a le'mo gelehe galaha huto fa'mene mone minalina'a mehibe. Kenetufati ya'ma nasana foipa nalisa'a fililata nasana ni'ibe. Kenetufatiuba ya'ma Sipi Bo afotifihi fokehi holata nohune. To Hu'mau ai'asi suhi huto enele'mo huto hu'ehina bona'i ya'ma kenetufatitu huli ka epekilata gumi'i molo enoholata nohune. 10 Ana kenetufati monekotu enofokehi lilata nohune. To li gelehe huto huli ka lu epololata nohune. Nalalu'nigita, ya'ma laga mehina suhi ni'ibe. 11 Nagami'i ipi opohi monekoluguti ya'ma nolata nagami'i hiti to ekesa nagami'i hiti limilata nohifihe? O'e, bati mehu'ehina. 12 To kayabe'uba i gelehe huto nahabolo legeya'a golo limilifihe? To igofa'uba ya'ma i gelehe huto kayabe'i legeya'a golo limilifihe? To hege nagamiluguti nonota nagami'i mone huto hilifihe? Ya huto huto mehilina'mu yabe.

Kokulumaluguti keheliya ilatana

13 Folagahatiniguti bo moneuba keheliya ise bo to asaga hapa'a keheli su ho'ehina bo nohilina ai agoya bo minoto hapa'a lamana'a li huto hilinamofihi keheli'ehilina yamofihi hapa'a li huto hilina'mu yabe. 14 Komopatinigu lenipakafa ai hago ai hago hite siko hite minalana to fe'nohatini guna ite meepilana, ya'ma faga hiti li lalagi lenugufa lelite tite lali keheliya i'ohune lite melilo. 15 Ana kehelise nasana kokulumaluguti melimi'ehibe. Noto noto bona'magitogati huto nohigo mega lugufatu lilata nohune. Foipa feleuba ya'ma ana huto hite ana'ina lilo luto lohoka nohigo tafa lemehatitu lilata nohune. 16 Komopatinigu ipakafa ai hago ai hago hite siko nehite fe'nohi li usisi gilana foipana'a hiti minalana ya'ma bona'i sibi sibi hite aku'i ete ana'ina sibina asaga'i li sibina sabana hilana'mu yabe. 17 Kokulumaluguti keheliya ise'na limilina yauba hapi fito komopati gulu gulu linogo minoto agoya bonako minototi fulunamofihi hapa'a lilata nohune. To fato bona'i bu enogoloto ginaga fise'na epiloto enele'mo lamana huto yamofihi legeya'a babu luto li huto hu leto'ehina ya huloto ligitagahi huto kenetufati loe lae hinogo faga faga luto meliluta'mu yabe. 18 Bona'i ya'ma baba i epolose bonako minoto fuluna'amofihi legeya'a yege yege'i li huto hilube'mu nohibe. To ya'ma fuluna'amofihi legeya'a ya'ma bebe sose hapa'a ni'inagu ni'ibe.

Copyright information for `BEF