Luke 10

Yesu 70 bo'a lili'na'alo enoho lifi'ehina

1Alihi Yesu 70 bo'a enele'mo ho tito loemo loemo hepato fato fatolo enoho lifila, enoho lifila higo enali kohe tete nebinogo ai alihi bilube'mu hu'ehina. 2Ai ma luto lu epi'ehina: Babu nose'na foyagu uya'i loto mupa ito ninaya ana nose'na li nupa hilana bona'a loe'asi nehabe. Ya hu'ehinagi lenali bite foya Afo'afihi numuna hi etenogo ai foya'agu ete lili'na lite nose'na'a li nupa hilana bona'i enele'mo babu lilibe lu'ehina yabe. 3Lenali bilo. Nani lenali'i sipisipi yaga ikele'a legi huto lopi kalamagihi folagaha'anigu lenoho lufube. 4Lenali efaha gu'ifi gukete gutinifi to lenigigusagu sutinifi melise nebite kapogu lenofo talana bona'i kiya yogokololuguti ka lu meepilete bilata hilo Yesu lu'ehina. 5To lenali nohi monelugu tilune'mu nehitemo yata'a meti'ehite ma lite lilete tilo: Ma nonugu enali enipagu fuluna agoya'a mineno. 6To fulu bo mone gufaluga bati hu'ehilina bo ana nonuga nohilina lenali kaga le'mo bati hite lu emite be netigite fulunatini lenalitogati emilo. To ana bona'i komopa mehana bohoya kagago nelana bona'mo nehinogomo lenali fulunatini i behe huto aku'i lenalitoga alina'mu yabe. 7Lenali ana nonugu legese hite minete nose'na lepi'ahanana nete minalo. Hena'mugope lili'nalo bouba lili'nalo mina'a lilube'mu hilina yabe. To lenali nohi fato fatolugu tila limila mehilo. 8To hepa'i moneto nebinogo ana hepato bona'magi lenele'mo hepalugu melete noha'aniluga lenele'mete nebinogomo lenali nose'na guna ite lepilana nose'nasigo nalo lu'ehina. 9Lenali yana hepato enebesi'ehilina bona'i enele'mo ye kelete ma lite lu epilo: Hu'mamofihi Kapo'a hokolo hilina kana'a anasi lenalitoga a'o leba notabe lite lu epilo. 10To lenali mone hepato bite tilune'mu nehinogo ana hepato bona'magi lenele'mo noha'aniluga melete nose'na melepinogomo lenali bite ana hepa'mofihi kapolo ho ti'ehite ma lite lilo: 11Lenali hepatinigu mumusopauba ligigusagu minana aku'i ana hepatinilo li fopo nohune. Ya'ma lenemegesa hu epite ya nohutagi lenali ka mone'ya kehelilo, Hu'mamofihi Kapo'a anasi lenugufalo o leba notabe lite ana hepato bona'i lu epilo. 12To nani lu nolepuna, ya'ma Hu'mau asaga bona'magihi kaga loko hilina yupahi Sotomu hepa'i ginaga fi noepito to hepa'mofihi bona'i lenele'mo bati mehilanamagi kumu ginaga fi meepilina'mu yabe.

Komopa'ani i gelehe mehi'ahana hepa'i

Mt 11:20-24

13Ke, Kolasini bona'ise. Ke, lenali Betesaita bona'ise. Lenalitoga amuya lili'na nohunana enali koyapa'i Taiya bona'i hiti Saitoni bona'i hiti enalitoga li huto hutita enali mele'isi melugu mino laba hite gebona gukete li hekelete lahi enugufalo felete eniginaga foipana'animu'i finogo nehinogo ya bu goto foipana'animu'i nehabe luto huto hulata nohibe. Lenali komopatini i gelehe hilanamo meni'inagihe. 14Hu'mau bona'i kaga loko hilina yupahi ai Taiya bona'i hiti Saitoni bona'i hiti enalitoga ginaga fi epito lenalitoga sipi keta hu etago ginaga fi melepilibe. 15To lenali Kapaneami bona'ise. Lenalitini kokulumalugu lele'mo saga hilune lite ya'iya tilafihe? Logo hepalugu limilana'mu yabe.

16Yesu koko panana'amagihi ma luto lu epolo'ehina: Bo moneuba katini keheli lepilinaya nani'ni ka keheli nimilibe. To bo moneuba megesa hu lepilinaya nani'i megesa hu nimilina'mu yabe. To bo moneuba nani'i megesa hu nimilina aiya noho lifi'ehina Bomofihi ya'ma Hu'mamofihi megesa hu emilina'mu yabe.

70 lili'nalo bo hepatoga e nupa hi'ahana

17To 70 bo'a Yesu enoho lifito lili'na epina enofokehenaguti aku'i ete li nupa hi'ahana. Ya hilete enali ma li'ahana: Sipi Bo, kai kigika nohonogo foipa felemagi hiti labaga liyafa hite ka keheli limibe li'ahana. 18Yesu lu epi'ehina: Satahi bu nogogo kopisi'na legi huto kokulumaluguti limo noibe. 19Kehelilo. Osifa gufalo fito kakamuke'magi luba nehana yagakafamagihi ibe lilika ibe hite nebite ana hite fatehatinimagihi asaga amuya'ani li gofa halabe luto nani amuya lepi'ohube. To ana'ina moneuba lenugufa li sibina mehilina'mu yabe. 20Ya hu'ehina lenali lenegelo bite foipa felemagi kagati keheli limibe lila o'e luto'ni ya nasanamofi kumu lenegelo mebibo. Lenagitini Hu'mamofihi kokulumalugu fayahi ge'ahana yanana'mu lenegelo bilo, luto Yesu lu epi'ehina.

Yesu gelo biloto Hu'mamofihi fokehi ho'ehina

Mt 11:25-27; 13:16-17

21Ana yupahi Sikalafu'uba Yesutoga bai tago gelo biloto ma lu'ehina: Oho. Afo'niga, kokuluma'i hiti me'i hiti sipi kaba bo'a. Kai enegekesa keheli bati hi'ahanamagihi kaika suguna ka lu hokolo mehu epolo'ahata ni'inaya to enali enegekesa keheli bati mehinamagihi alu hokolo hu epolo'ahata ni'igo kofokehi nolube. O'yo Afo'niga, kaika lu'ahatalo ana suhi ana suhi huto bati huto hulata nohibe.

22Nani Afo'nifu asaga'na nani nayanuguko molo'ehibe. Bo moneuba Hu'mamofihi Pana'a nohibe luto mekeheli'ehina. Afo'nifu aisigo keheli'ehibe. To bo moneuba Hu'mamofihi ai nohibe luto mekeheli'ehinagi Pana'a aisigo keheli'ohuto ai Pana'auba Afo'afihi enelepito kaga lu epina bona'i enali ana hite Hu'ma nohibe lite kehelilata nehabe lu'ehina.

23To Yesu koko panana'a nehanaga i behe huto okaba hu epiloto sumi ka enekesa luga ma luto lu epi'ehina: Lenali ya'ma huto hu'ehinana bu ge'ahana bona'i enegelo bilo. 24To hena'mube? Enali koyapa lu huto huto bona'i hiti to gihiti bona'i enali kumu lu nolepube. Lenali bu gela to lenekesagu kehelila nehanana ana huto lekesagu kehelila to lubutiguti bu galune lite helebe helebe hanaya enali mekehelila to bu megalana suhi habe lu'ehina.

Samalia bouba fateha'a le'mo bati hu'ehina

25Keya ka keheli bati huse bo moneuba Yesuhi mi'i malalube luto Yesu nohinalo tiloto ma lu'ehina: Tisao, nani hena huloto'ni mino kosaba hepa'i lilube? luto loka ho'ehina. 26Ya ligo Yesu ma luto ana bo loka ho'ehina: Mono ka fayahi ge'ahanagu henabe luto ni'ibe? To hena huto lu gelehe huto leka solata nohane? 27Ana bouba loka hanalo ma luto lu'ehina: Sipi Bo, Hu'makafu yabe to kai lutumopaka asaga'i ai'i emi su hobo to kemehaka asaga'i ai emi su hobo to amuyaka asaga'i ai emi su hobo to kehelise'naka emi su hobo. To kaika kugufakamofihi nohata'a huto kalalukafihi le'mo laga hubo. 28Yesu ana bomofihi ma luto lu emi'ehina: Kai kagauba fotogo hinaga lane ya hatagi kai ana lata suhi buto huloto mino bati hilane lu eto'ehina yabe.

29Ya noligo ana keya kaga kehelise bouba ai'a gi'a le'mo bati hilube'mu Yesuhi ma luto loka ho'ehina: Kiyi'afu nani nalalu'nifu nohibe? luto Yesuhi loka ho'ehina yabe. 30Yesu ma luto lu'ehina: Bo moneuba Yelusale hepatogati Yeliko hepatoga bilube'mu nohuto nomobigo, guminalo bona'magi kofohi melelete ana bo osahi ho emite to kata'a li hete he'mi etete bifa higo, ai anaga fililube'mu nohuto mino'ehina yabe. 31To ana kapolo mono kaba bo moneuba mekehelise nomobuto ana bomo bu gopa, kapo muya beletoga i pebisa ho etoto buto ya huto foto'i nohuto be ligibe. 32To ana huto mone Libai naga'aluguti o'ehina bo ai hiti mono bo nohinaya ana hepatoga nehetito he'ahana bomofihi bu goloto ana'asi kapo beletoga buto be ligito bufa hu'ehina. 33To aku'i fateha bo moneuba Samalia kegi'a nohina bouba ai kapo nomoloto anaga oloto bu gopa mele'isi keke'i nolu etabe. 34Keke'i nolu etoto buto gufa'a gitigi'ehinalo lusa gi etoto bai nagami'i hiti ueli hiti nofoloto sa gi eto'ehina yabe. To ya huloto nu kito le'mo saga huto toki yaga'amofihi megesa'alo le'mo mololoto ya huto buto bo nohi alana bona'i nekana nopogu le'moto ti'ehina. Ana nonugu kaba huto mino'ehina yabe. 35Koloto etehi efaha'a loemo leka soto noho bomo noemito ma luto lu emi'ehina: Ya'ma bomofihi kaba hu etoto minobo. To efahi bati mehinogomo nani aluna yupahi mone'a hiti kimilunagihe. 36Yesu, ya'ma bame ka lu epi su hoto ya'ma babafi bomofihi ma luto loka ho'ehibe: Guminalo bona'magi ana bomo hago, to fililube'mu nohigo loe yagi mone yagi bomagi bite bu ge'ahabe. To hiya bouba bona'amofihi supo huto kaba hu eto'ehibe? Lu nimibo. 37To ai: Ginaga fi eto'ehina bouba yabe ligo, Yesu: Kai buto ana supo huto minobo luto lu emi'ehina yabe.

Yesu Matanogo Malianogo bu etogo'ehina

38Yesu koko panana'a hiti kapo melete bilete hepa'i moneto nehetigo a'i mone gi'a, Mata yabe, luto nohina a'uba Yesuhi noha'aluga le'moto bu'ehina yabe. 39Matahi gona'a pa'i mone mino'ehina, gi'a Malia, ai Yesu nohina meha'asilo oto minoto Yesuhi kaga'a keheliba keheliba huto mino'ehina yabe. 40Ya nohigo Matau aisigo nose'na laita hula to fato lili'na lila ya hula nohigo kosele hago Matau Yesuhi ma luto lu emi'ehina: Sipi Bo, asaga lili'na Maliau he'mito nani'igo nimigo noluna kai nani'i kegekesa yigi menonimipihe? Kai Maliahi le'mo he'mitogo ai oto nani'i nehe'malibe, luto Matau lu'ehina yabe. 41Ya noligo Yesu ka lu emito lu'ehina: Matao, Matao. Kaiya kekesa yigiba yigiba silaga'namu'i nohuto kipakagu keta hulata nohane. 42Ya'ma nohata ni'igo moneko'nasiya anasi ni'ibe. To Maliau ai eto'ehina suhi nohina yabe. Ai ya'ma ka lamana'a kehelilata nohina ni'igo mone li he'mi etalina'a meni'ibe.

Copyright information for `BEF