Luke 13

Bo moneuba foipana'a li mehe'milina ai fililina'mu

Ana kanalo bona'i luga'a mine'ahanamagi Galili bona'i luga'amagi Hu'mamofitoga lokiya fi emite Pailatihi bomagi enehe'ahana kaga Yesuhi lu emi'ahana. Ya nelago Yesu ka'anilo ma luto lu epi'ehina: Lenali nekehelina ya'mana Galili bona'i ya hite filina'mu enali asaga Galili bona'i enehete sipi foipa bona'i nehabe lite lenekesa neyigifihe? O'e. Nani lu nolepunaya lenali foipanatini li mehe'milana lenali asaga'i enali hi'ahana suhi lite fili su halana'mu yabe. To ma 18 bona'i Siloami hepalugu yatama nohuba i tele bito limito enoho gehesa koyapa'i hu'ehinamoba lenali nekehelina asaga Yelusale boana'i enehete foipa bona'i nehafihe? O'e. Nani lu nolepunaya, lenali foipanatini li mehe'milana lenali asaga'i enali hi'ahana suhi hite fili su halana'mu yabe, luto Yesu lu epi'ehina.

Nemuya legeya meho'ehinamofihi bame ka'a

To Yesu bame ka mone ma luto lu epi'ehina: Bo moneuba nemuya yafa foya'agu hekolo'ehina yabe. Mone yupahi legeya'a ho'ehifi luto buto bu ganamo meho'ehigo bu go'ehina yabe. Ya huloto foya kaba bo'amofihi ma luto lu emi'ehina: Kehelibo. Yatai loegi monegi kufu kanalo oto nemuya legeya'a lo'ehifi luto bu nogonamo ana yafalo legeya'a meho'ehibe. Kai ya'mu mana yafa hetigitogo limino. Henabe luto fa'mene tiba tiba huto ni'ito me'i nogoya'a no su halibe? Foya kaba bo'auba ma luto sipi bo'a lu emi'ehina: Sipi bo, kai yatai kufugu mone'a he'mitogo ni'inogo nani ana yafa hapa'agu ke'muya kifiloto kifi'na pata sito foba hu'ehilina ana hapa'alo molo bego hilube. Ya hu'ehinogo mone kufu kanagu legeya'a halifi bu goloto menohenogomo kai ana yafa hetigilane, luto foya kaba bo'auba sipi bo'amofihi lu emi'ehina yabe.

Yesu fuli kana'agu falame a'i le'mo ye ko'ehina

10 Mone fuli yupahi Yesu mono nonugu minoto bona'i mono ka lu enelepi'ehina. 11 Ya hinalo a'i mone foipa feleuba besise'na le'mo gufalo malago 18 kufu'a mino'ehina a'i mino'ehina. Ana a'i asaga yupahi koli'ali huto ho tito humofa'na mehuse minolata nohina a'i yabe. 12 Yesu ana a'i bu goloto kehe i emito ma luto lu'ehina: A'ise, kai kebesise'naka ali nohe'mi ketobe. 13 Ya luloto Yesu ana a'mofihi gufalo yahi ligo analo mele'isi besise'na he'mi etago ana a'i ho ti fefe luloto Hu'mamofihi gi'a li saga huto fokehi ho'ehina yabe. 14 To mono noto kaba hu'ehina bouba ya huto Yesu ana a'i fuli yupahi le'mo bati hina'mu luto ipagu logo lo'ehina. Ya higo ma luto asaga boana'i lu epi'ehina: Lili'na lise kana'a loegi loegi loegi yupahi minolata nohune. To lenali lenebesise'natini li he'mi lepalalabe litemo lili'na lilata nohuta kanalo elata hilo. Ya huto lepesi'ehinogomo fuli kanagu mealo luto, mono nohi kaba bouba lu'ehina yabe. 15 Ya ligo Yesu ka'alo ma luto lu emi'ehina: Lenali fagalo bona'i yabe. Fuli kana'alo lenali asaga'i toki yagatini naga i'ahanati gulu fete enele'mete bite nagami'i epilata nehana yabe. 16 Ya hu'ehina yatai ma a'i Abalahahi tata'afu yabe. To Satau kufu kanagu 18 le'mo naga i'ehina yabe. Ya hu'ehina fuli kanalo nani ana naga'i ya li gulu noho etobe luto Yesu lu'ehina yabe. 17 Ya luto Yesu lulago Yesuhi ka'auba fateha'a bona'i enubuya sipi higo lipite nehago luga'amagi asaga Yesu Yesu hetofana hinana'mu lite enegelo bite mine'ahana.

Hu'mamofihi Kapo'a henana suhi huto ni'ibe?

Mt 13:31-32; Mk 4:30-32

18 Yesu lu'ehina: Hu'mamofihi Kapo'a hena suhi luto ni'ibe lu'ehina? Henana hiti etele'mo legege hilube? 19 Ai nose'na mone'mofihi kitili legeya'a legi huto ni'ibe. Bo moneuba ana yafa legeya'a lito buto foya'agu he kofolenogo anana hofa toto yafa legi huto tilenogo ana yafa musa'alo namamagi noha'ani gilata nehabe, luto Yesu lu'ehina.

20 Aku'i Yesu enoloka ho'ehina: Henana hiti Hu'mamofihi Kapo'a li legege hilube? 21 A'i moneuba beleti nose'na lolo nohuto yisiti ana fala'ualugu he'mi lago ana beleti hofa toto yeye bito notina suhi huto Hu'mamofihi Kapo'a sipi huto hilinamo ni'ibe, luto Yesu lu'ehina.

Lagaso kasihi

Mt 7:13-14, 21-23

22 To Yesu sipi hepa'ifi lagaso hepa'ifi ninalo bula ola huto boana'i mono kaga lu epimo lu epimo Yelusale hepatoga bilube'mu hu'ehina yabe. 23 Ya nohigo bo moneuba ma luto Yesuhi lu emi'ehina: Sipi bo, Hu'mau bona'i loe'asi enele'malina ni'ifihe? Ya luto loka hago Yesu ma luto lu epi'ehina: 24 Lenali felisatini li amuya melete minalana Hu'mamofihi hepatoga bilana kapogu kitili'a folo hokolo hite bilana'mu yabe. Nani lu nolepube. Asaga bona'i ana hite ana kapogu folo hokolo hite tilune'mu hilanaya folo hokolo hite metilana'mu yabe. 25 Alihi nohi afo'afu ho tiloto kafe li hekini lolenogo lenali fegutoga ho tilete nehite kasito begele begele hiba hiba nehite: Kafe sigi letobo, nelinogo nohi afo'afu ma luto lilina'mu yabe: Lenali hiya'agati neana bona'i nehabe? Nani lenali'i mekeheli lepolo'ohuna bona'i nehabe luto lilina'mu yabe. 26 Nohi afo'afu ya nolinogo lenali aku'i ma lite lu emilana'mu yabe: Kai lali'i hiti nose'na noloto hepatigu mono ka lu limi'ahatamo yabe lite lilana'mu yabe. 27 Ya nelinogo nohi afo'afu aku'i ma luto lu lepilina'mu yabe: Lenali hiya'agati e'ahafi nani mekeheli lepolo'ohube. Lenali foipa hise fagalo bona'i bifa hilo, luto nohi afo'afu lilina'mu yabe. 28 To Abalahau Isakau Yakopu to asaga lu yege hose bona'i Hu'mamofihi hepa'alo nehinogo lenali bu gelete lenali fegutoga minalana'mu yabe. Ya nehinogo lenali sipi yibi hite lenabaga yogo'alo heni heni hite minalana'mu yabe. 29 To boana'i yege notinagatifi yege limi nofalanagatifi to luga luga yofo kegi'atifi li nupa hi su helete Hu'mamofihi hepa'alo minete nose'na nete minalana'mu yabe. 30 Yatai bona'i alihi neana enali yata'a neenogo to bona'i yata'a yatai neana enali alihi alana'mu yabe, luto Yesu lu epi'ehina.

Yesu Yelusale hepa kumu ginaga fi'ehina

Mt 23:37-39

31 Ana yupahi Felosi bona'i luga'amagi ete ma lite Yesuhi lu emi'ahana: Helotiu kahalube'mu nohinagi kai ma hepa'i he'mito foto'i fatoga bubo, lite lu emi'ahana. 32 Yesu ka'anilo ma luto lu epi'ehina: Lenali bite ya'ma lopi kalamofihi lu emilo: Nani foipa fele enoho lifi he'mila to bona'i enele'mo bati hula huto yatai nohuna to yago aku'i ana hiluna'mu yabe. Ya huloto yege loebe monebe nehinogo lili'na'ni su haluna'mu yabe. 33 Ya hu'ehina yatai hiti yago hiti to ologo hiti nani kapo moloto Yelusale hepato biluna'mu yabe. Hena'mugope bo mone hete enali fato hepato memalabe. Enali Yelusale hepatoko he fili melelata hi'ahana ni'ibe.

34 Ke, Yelusale naga'ise. Yelusale naga'ise. Lenali lu yege hose bona'i enehela to Hu'mau enoho lifigo kaitoga elata hana bona'i efa kosahi he'mi melete enehelata habe. Henaki yupahi nani kele'mo namanuga asaga yupahi malalube. To kokole ito'afu nala'a enele'mo koke'na'aluga mololata nohibe ya suhi luto yabe. To lenali he'mi netenogo lenali'i lenele'mo namanuga memalaluna'a habe. 35 Yatai Hu'mau ya'mu'i kehelito hepatini ahe'mi su ho'ehibe. Nani lu nolepube. Lenali nani'i bu menegese nehite alihi Sipi Bomofihi gi'alo noana bomofihi lenegelo bi emilana'mu yabe, luto Yesu lu epi'ehina yabe.

Copyright information for `BEF