Luke 15

Sipisipi yaga fenene hu'ehinamofihi bame ka'a

Mt 18:12-14

1Mone yupahi takisi nelina bona'i hiti to ka'i leli nehana bona'i hiti Yesu nohinalo ete ai kaga'a linalo kehelite mine'ahana yabe. 2Ya nehago Felosi bona'i to keya ka tisa bo bu gelete gulu gulu bite ma lite Yesuhi ka emeki'ahana: Ma bouba ai foipa bona'i hiti enele'mo bati huto enali hiti nose'na nolata nohibe. 3Ya lite lana kaga'ani Yesu akeheliloto bame ka mone ma luto lu epi'ehina yabe.

4Lenali bonatini moneuba sipisipi yaga'a babu lite 100 nehago to mone fenene hinogo, hena nohibe? Sipisipi yaga'a yege yege'na holupa hepatoga enehe'mito ya'ma fenene hu'ehinamofihi buto sa sa nohibe. 5To sa sa huto bu goba bu goba huto'a to etafa huloto fokehi nolito nu nokibe. 6Ya huloto kofito buto to hepatoga nehetiloto'a falu'agi hiti to bona'agi kehe noibe. To neenogo ma luto lu epibe: Sipisipi yaga'ni fenene hu'ehinana huto higo le'moto oto lenali hiti nani hiti legelo bilunagihe. Ya lu'ehina kilihe'i yabe. 7To nani ana huto ma luto lu nolepube. Foipa bo moneuba foipa hapa'a he'mito to komopa'a i gelehe hinogomo ifo muya nehanamagi kokulumalugu gofana hite enegelo bilana'mu yabe. To bona'i yege yege'namagi hapa'ani bati'na ni'ina to komopa'ani i gelehe mehise nehinogomo, enali kumu kokulumalugu yege nesi'a filabe. To foipa bouba, ai foipa hapa'a he'mito, to komopa'a i gelehe hinogomo, lusina hite enegelo bilana'mu yabe. Yesu ya luto lu epi'ehina yabe.

Moni efahi nimigi'ehina

8To mone hiti ni'igi a'i moneuba siliba efaha'a 10 molo'ehina. To mone fenene hinogo, hena nohibe? Ai libi'mo fulu kulu tiloto lito buto noha'a asaga'i lito sa sa nohibe. 9To sa sa huba huba hulago alihi efaha'a huto hinogomo, gi'a'agi hiti bona'agi kehe ito ago ma nolibe: Lenali nanilo li nupa hitemo legelo bilune. Efaha'ni fenene higo, yatai bu goto nolube. Ya lu'ehina kilihe'i yabe. 10To nani ana huto, ma luto lu nolepube. Foipa bouba sibi hapa'a he'mito to komopa'a i gelehe hinogomo, Hu'mamofihi agelomagi ya'ma bomofi kumu yege filana'mu yabe.

Pana'i fenene hu'ehina

11Yesu ka mone hiti lu'ehina: Bo moneuba pana'i loemo eteketo'ehina. 12To nehite gona'auba afo'afihi lu emi'ehina: Apaobe. Alihi nimilata nasana yatai nimibo. Ya luto ligo afo'atitifu ana'ina'a kita huto fuku luto etimi'ehibe. 13To ya hulago gona'auba kana loemofi mone'afi minoto aku'i ana'ina'a li gu ito kofiloto foto hepatoga buto mino'ehibe. Ana hepatoga nohuto'a foipa hapa'a huto mino'ehina. 14To efaha'a asaga'na ana hapa'alo he'miba he'miba huto mele'isi su ho'ehibe. To ana hepato sibi kana'a ni'igo nose'na fenene hu'ehina yabe. Ya higo ana pana'mo efaha'a menina kene'i nohuto kau'na ho'ehibe. 15Kau'na nohoto buto ana hepato bona'mo mone'a hiti mino'ehibe. To ya'ma bouba ana pana'mo ho lifigo yaga hepatoga buto yaga maya epilata huto mino'ehina yabe. 16To bona'magi nose'na meemise nehago yagamagihi nose'na nalube luto ekesa kehelito anana bati huto natita'mu yabe. 17To alihi ekesa'a hokolo higo ma luto lu'ehibe: Ke. Afo'nifihi lili'nalo bona'magi henaki'a nose'na nelete mone'a nehe'mibe? Asaga'i ya nehanagi to nani kau'na gofa nonahago mana hepatoga nofulube. 18Ma hilube. Ho tito'ni buto afo'nifuloga buto ma lu emilube: Ke. Afo'nigabe. Nani Hu'mamofi kumu to kai kumu foipana hu'ohuna yabe. 19Ya hu'ohunagi kai yatai pana'ni yabe, luto nigi mehalata'mu yabe. Lili'na panaka nele'malata'mu yabe. 20Ya luto ho tiloto kapo moloto afo'afuloga bibe.

To foto'i noago afo'afu bu goto sipi ginaga nofigo hololu luto buto nu kito soso hu eto'ehibe.
21To pana'auba ma luto lu'ehibe: Ke. Afo'niga, nani Hu'ma kumu to kai kumu foipana hu'ohunagi kai yatai pana'ni yabe, luto nigi mehalata'mu yabe. 22Ya ligo afo'afu lili'nalo bona'a kehe ito ma luto lu epi'ehina: Me'me hite bite laga hina kata lite ete hepi etalo. To sahi yaha'alo bilina'a, to su'mo gigusa'alo bilina'a lite ete emilo. 23To bulumaka yaga nose'na emi'ohuta yaga bite keye lite laita hilo. Lofokehi hilutagihe. 24Ya'ma pana'nimo fili'ehina legita minoto aku'i nohibe. To fenene huto minoto yatai aku'i huto hu'ehibe. Ya ligo enali hapi fite nose'na nenete enegelo nebite mine'ahana yabe.

25To olopa pana'a foyagati noago enali nama nelite to melekehi neite nehago kehelito, 26lili'nalo pana'i mone'amofihi kehe igo ago ma loka ho'ehibe: Enali henabe lite ya nehabe? 27To ai ma lu emi'ehibe: Kogonaka a'oto nohibe. To afokafu pana'ni bati huto nohibe, luto yege nofito bulumaka yaga'a nose'na emi'ohutana keye lu'ehibe. 28Ya ligo olopa pana'uba ipa'agu logo bigo okaba huto anagu metise nohuto fegutoga siko huto mino'ehina. Ya hu'ehina'mu afo'afu limito: Atibo, atibo, ligo, 29ana pana'uba afo'afitoga ma lu emi'ehibe: Abo. Kaika lili'nakalo foya kana babu luto mino'ohuna yabe. To kaikamo kehelito minoto'ni akili mehu'ohunagihe. To kaimo meme yaga mone, lagaso'asi mone, menimise mino'ahata yabe. Nafalu'nifu hiti noloto yege fitita'mu yabe. Menimise mino'ahatagihe. 30To aku'i ya'ma panaka kapo ana'mo hiti efahaka he'mi su ho'ehina pana'mo ai ago bulumaka yagaka nose'na emi'ohutana ai kumu keye lu'ahatagihe. 31Ya ligo afo'afu ma lu emi'ehibe: Pana'ni. Kai hiti asaga yupahi nohu'ibe. To ana'ina'ni asaga'i kai'naka ni'inagi yege pana'ni nohatagihe. 32To ya'ma kogonaka fili'ehina legita minoto yatai nohibe. To fenene huto minoto yatai huto hu'ehibe. Ya hu'ehinana'mu lali bati huto yege fito lofokehi nolune, luto lu'ehina. Yesu ya lu epi'ehina kilihe'i yabe.

Copyright information for `BEF