Luke 18

Keto a'i hiti kaga loko huse bomofi hiti bame ka'atiti

To kosele meenehenogo ute etehi nunumu hilana bame ka Yesu lu epito ma luto lu epi'ehina: Kaga loko hulata bo hepa'i moneto mino'ehina ai ana bouba Hu'mamofihi koli'a mehula to asaga bona'i agoya hu meepi'ehina yabe. Ana hepato keto a'i mone mino'ehina ai asaga yupahi kaga loko hulata bo nohinalo ma luto oto buka tito lu emilata hu'ehina: Fateha'niuba nani'i nele'mo sibina hilube'mu nohinagi kai ka foyagu nobinogomo nehe'mobo, lu'ehina yabe. Kaga loko nohina bouba yata'a ana eto a'i mehe'malube'mu hu'ehina alihi ma luto ekesa yigito lu'ehina yabe: Nani Hu'mamofihi koli'a menohu etona ana huto bona'i enele'mo bati menohuna yabe. Ya hu'ehina ma keto a'i ai kosele lili'na nimilina suhi nohibe. Ya hinogo nani ka foyagu le'mo nemelenogomo mana a'i he'malube. To mone ya huto mehe'maluna ai asaga yupahi oba oba nanitoga hinogo nugufa'ni nagabu gito kosele'ni nahalibe, lu'ehina yabe. To Yesu lu'ehina: Bati mehina suhi luto kaga loko hulata nohina bomofihi kaga'a kehelilo. Ana suhi huto Hu'mau boana'a enele'mo eto hu'ehina enali asaga utehi etehi aitoga kehe ite lehe'malibe lite lilata nehana meenehe'malina ni'ifihe? Hu'mau tala tele huto enehe'malina ni'ifihe? Nani lu nolepube, Hu'mau hololu luto enehe'malina'mu yabe. Ya hu'ehina Kokulumaguti limi'ehina Bouba aku'i alina yupahi ma melugu bona'i aitoga enipa molo emite keheli ule'ale hite nehinogo alina ni'ifi, ya mehilanabe?

Felosi bona'i hiti takisi lilata nohina bo hiti bame ka'a

Bona'i luga'amagi lali bati bona'i nohune lite enali'ani enugufamofihi fokehi nehite to fato bona'momu'i enali bati mehana bona'i nehabe lite lilata nehana'mu Yesu ma bame ka lu'ehina: 10 Bo loemo nunumu hilu'ibe'mu mono nonugu ti'aha'ina yabe. Mone Felosi bo yagi to mone bo takisi lilata nohina bo yabe. 11 Ai Felosi bouba ho tiloto faha'alo buto ho tito nohuto ma luto nunumu komopa'agu hu'ehina: O Hu'mao, nani bona'i luga'amagi suhi huto menohube ya'mu nani kegepohi nolube. Bona'i gumina felete to bo alobo loko hila ya hila nehana bomagihi suhi huto naniya menohube. Ana huto ya'ma bo ai takisi lilata nohina bo legi huto menohube. 12 Asaga lili'na kanagu loe yupapo nose'na mo sito menose nominoto'ni to nose'nafi to fe'noha'ni leka soloto teni'a huto nohinogomo loko huto mone'a kaitoga mololata nohuna yabe, luto lu'ehina yabe. 13 To takisi lilata bo fato'i ho tito minoloto kokulumatoga bu go saga huto bu megose melugu lipito bu goloto minoto yahi gofa holoto ma luto nunumu lu'ehina: O Hu'mao, nani foipa bo kai kiginaga fi nimibo. 14 Yesu lu'ehina: Nani lu nolepube, takisi lilata bo ai Hu'mamofihi ipa'a emi'ehinamofihi ai ya'ma lamana bo yabe luto ligo noha'aga nobibe. Ya hu'ehina to ya'ma fato bo ai bati mehu'ehibe. To bo moneuba gi'a li saga hilube'mu lilina Hu'mau le'mo melugu nomoloto ni'ibe. To bo moneuba agoya huse to gi'a laba hilina Hu'mau fokehi hoto gi'a li saga hilina'mu yabe, luto Yesu lu'ehina yabe.

Yesu lagaso yagapana'i lusa gi epolo'ehina

Mt 19:13-15; Mk 10:13-16

15 Bona'i luga'amagi Yesu yaha'atu yagapana'i lagaso meso'ani lusa gi epalalibe lite enele'me e'ahana yabe. Ye nehago Yesuhi koko pana'amagi bu gelete ka'ani epeki'ahana. 16 Ya nehago Yesu ana yagapana'i: Alo, luto kehe i bufalo molo'ehina. Yagapana'i lenali he'mi epelenogo nanitoga eno. Lenali enele'mo memalalo. Hu'mamofihi Kapo'a ana huto ya'ma yagapana'magina hiti ni'ibe. 17 Nani lusiga luto lu nolepube. Bo moneuba yagapana'magi Hu'mamofitoga agoya hu emise nehana ya suhi huto menohinogomo ya'ma bo ai Hu'mamofihi Kapo'alugu lusiga luto metilina'mu yabe, Yesu lu'ehina.

Yogo fe'noho bo

Mt 19:16-30; Mk 10:17-31

18 Yuta bo moneuba ma luto Yesuhi loka ho'ehina: Tisao, hetofa bo yale, nani hena huloto'ni minoba minoba hepato bilube? 19 Ya ligo Yesu ma luto lu emi'ehina: Kai hena hibe luto hetofa bo yabe luto lu'ahane? Asaga bona'i bati bona'i menehabe, Hu'ma ai moneko'isi hetofa bo nohibe. 20 Kai keya ka keheli'ahane:Kai bo alobole etele'mo loko huto a'i gumina mefolobo. Kai bona'i mone ho mefilibo. Kai gumina melibo. Kai faga melubo. Kai itokafinogo afokafinogo etabaga liyafa huto agoya hu etimibo. 21 Ana bouba Yesuhi ma luto lu emi'ehina: Nani lagaso'asi nohuto'ni ana keya ka mege'i molomo molomo noona yatai hiti ana huto mege'i mololata nohube. 22 Yesu kaga'a keheliloto ma luto ana bo lu emi'ehina: Kai mone'nasi hilata ni'ibe. Kai asaga yogo fe'nohaka bona'i epi su nohoto to efahaka fe'noha'ani menilina bona'i noepito huletogo kokulumaluguti bati'naka lilata'mu yabe. Ya huloto nani'i nemege'i molobo, Yesu lu emi'ehina. 23 Ya ligo ana Yuta bo ai ana kaga'a keheliloto fe'noho bo nohina'mu ekesa asaga nasana'ni musufalo bona'i meepiluna yana yigito ipagu nunu gigo ginaga fi'ehina yabe.

24 Yesu ana bo bu gana yogo fe'noha'amu luto ginaga nofigo ma luto lu epi'ehina: Bona'i enali yogo fe'noha'ani babu lito nina bona'i Hu'mamofihi Kapo'alo bilune'mu hilana keta epesinogo metilana'mu yabe. 25 Neka'mofihi kapo'alo kameli yagauba folo hokolo huto tilina keta besilina'mu yagi to Hu'mamofihi Kapo'alo yogo fe'noha'a babu lito ni'ina bouba sipi keta besilina'mu yabe. 26 Bona'i enali ana kaga kehelinamagi ma lite Yesuhi loka he'ahana: Ya latago Hu'mamofihi Kapo'alo minoba minoba hepa'iba kuyu'afu analo tilube'mu bati hilina ni'ibe? 27 Yesu ka'anilo nona'a lu'ehina: Ana'ina bona'magi lolo mehilana Hu'mau ai le'mo huto hilina'mu yabe.

28 Pitau lu'ehina: Bu gobo. Lali hepati he'miloto kai'i kemege'i o'ohuta yabe. 29 Nani lusiga luto lu nolepube, luto Yesu lu'ehina. Asaga bona'i Hu'mamofihi Kapo'amu lilete noha'ani liha'ani enogona'ani to ito'anigi afo'anigi to yagapana'anigi he'mi epelelete alana alihi Hu'mau babu lito bati'na'anilo ma'asi kanalo epilina'mu yagi, to alihi kana'a alube'mu hilina yupahi enali hetofa hepa'i minoba minoba huse'i nina ya'ma lilina'mu yabe, luto Yesu lu epi'ehina yabe.

Yesu fililoto aku'i ho tilina kaga loegi monegi yupahi lu'ehina

Mt 20:17-19; Mk 10:32-34

31 Yesu yahi luga luga su hago gigusaga loemo leke ho malago aposolo panana'a enele'moloto ma luto lu epi'ehina: Kehelilo. Yatai Yelusale hepato tilune. Ya hulenogoti lu huto huto bona'magi koyapa'i asaga kaga Kokulumaguti limi'ehina Bomofi kumu lime lime ti'ahana yatai nose'na'a huto hilibe. 32 Enali fegutoga bona'magi enayanugu epilana'mu yabe. Ya hilenogo enali kaga bati mehina'a li etelete le'mo sibina hilete okabaluga libi'na he etalana'mu yabe. 33 To enali nagatu'i biyigi etelete yafalo nili henogo fililoto aku'i loegi monegi yegegu su holenogo ho tilina'mu yabe. 34 Yesu ya luto lu epina kaga enali aposolo panana'amagi hapa'a mekeheli'ahana yabe. Yesu lina kaga hapa'auba enalitoga fala ki epolo'ehigo ana kaga lu epina enali keheli bati mehi'ahana yabe.

Yesu bu'a sibina hu'ehina bo le'mo bati hu'ehina

Mt 20:29-34; Mk 10:46-52

35 Yesu Yeliko hepa lebato noago musufalo bo mone bu'a pisi lu'ehina bouba kapo beleha'aga nohuto kapolo bila ela hana bona'magi efahifi nose'nafi mone'a nimilo, luto kehe ilata nohigo bu go'ehina. 36 Babu boana'i kapo melete bila ela nehago ana bu'a pisi lina bouba keheliloto enoloka ho'ehina: Lenali hena nehabe? 37 To enali ma lite lu emi'ahana: Yesu Nasalete hepalo bo kapo moloto noabe. 38 Ya lite nelago ai mele'isi kehe ito ma luto lu'ehina: Ke, Yesuo. Sipi boti Tebitihi Pana'ase. Kai kiginaga fi nimibo. 39 Ya noligo bona'i analo minanamagi ka emekite: Kaga meluse fa'mene minobo li'ahana. Ya nelago ana bouba aku'i ai sipi kehe ito lu'ehina: Tebitihi Pana'ase. Kai kiginaga fi nimibo. 40 Ya ligo Yesu kapo moloto nobinati ho tiloto: Ana bo le'mete alo lu'ehina. Ana bo Yesu nohinalo olago Yesu: Hena hu ketalube? luto loka ho'ehina. 41 Ya higo ana bouba lu'ehina: Sipi bo, nani nubu'ni pisi lu'ehina nele'mo bati hitogo aku bu galube lu'ehina yabe. 42 Ya ligo Yesu ma luto lu emi'ehina: Kai nanitoga komopaka nimi'ahata ya'mu kubuka yatai i gili hinogo bu gobo. 43 Yesu ya luto noligo ana'asi ka'a mege'i moloto ana bomofihi bu'a i gili mele'isi hu'ehina yabe. Ya hulago ana bouba Yesuhi mege'i moloto nobuto Hu'mamofihi gelo bi emi'ehina yabe. To babu bona'magi anana huto hina bu gelete Hu'mamofihi ana hite fokehi hete gi'a li saga hi'ahana yabe.

Copyright information for `BEF