Luke 2

Malia ai Yesuhi keto'ehina

Mt 1:18-25

Ya'mana yupahi Sisa Ogasitasi ai Lomu gihiti bouba asaga boanatoga enigi'ani liloto leka salube luto kaga mololoto lenigi lilube lu'ehina. Ya'mana enigi lise kana yata'a Sailiniasi ai gamani bouba Silia melugu bona'magihi kaba bo'ani mino'ehina. Asaga boana'i enigi'ani lilune'mu nehite hepa'anilo bila bila hi'ahana.

Yosefe ai Tebitihi nagaluguti o'ehina. Ya higo ai Nasalete hepato Galili kegi'ati he'mito gihiti bo Tebiti ana hepato ito'afu keto'ehina'a ya'ma Yutia melugu bu'ehina. Ana hepa'i gi'a Betelehe yabe. Ai gi'a hiti to a'i gi'a lilube'mu Malia nole'moto bi'aha'ina. Ya'ma a'mo Yosefeu alihi liha'a lilina a'i yabe. To Malia ai yagapana'mu hiti hu'ehigo bi'aha'ina. Betelehe hepato bite neha'igo Maliau yagapana'i ketalina kana'a leba tago hu'ehina. To ai yagapana'i yege'a pana'i ketoto'a katatu sa gi etoloto bulumaka yagamagi nose'na nenana sepeke'nagu ko eto'ehina. To etali ya'ma yagamagihi noha'anigu mine'aha'ina. To hena'mugope, bona'i kose nohi bai to su ho'ehinagi anagu meti'aha'ina yabe.

Agelomagi to sipisipi yaga kaba bo'animagi yabe

To ya'mana yupahi ana hepato sipisipi yaga kabalo bo enali fegutoga yaga kaba hite sininugu mine'ahana. To Hu'mamofihi agelo'a ana yaga kabalo bo nehanalo Sipi Bomofihi fana mehena'a hiti nehetigo enali ana sipisipi yaga kabalo bo lusina hite koli hi'ahana. 10 Ya hite koli nehago agelouba ma luto lu epi'ehina: Koli mehite kehelilo. Nani hetofa kaga lenalitoga ito noo lepolona ya'mana kagauba asaga boana'i enele'mo sipi enofokehi halina'mu yabe. 11 Yatai sininugu Tebitihi hepalugu a'i moneuba pana'i mone keto'ehibe. Ai ya'mana bouba lali'i lele'mo kosaba huto lenubuto bilina'mu yabe. Ai sipi bo Yesu Kilisito yabe. 12 To bu galana'aya ma huto hilinamo ni'ibe. Lenali pana'i mone katatu sa gite bulumakamagi nose'na nenana sepeke'nagu ko etago nohinogo bu galana'mu yabe.

13 Kaga agelouba lu epi su nohago ana baga'a hiti babu agelomagi kokulumaluguti ete'ani Hu'mamofitoga fokehi hete nama ma lite li'ahana: 14 Ifo muyagu Hu'mamofihi gi'a le'mo saga hite mineno. To melugu bona'magi kumu Hu'mau ipa'agu ai laga besinana enalitoga fuluna hu noepalabe.

15 To agelomagi he'mi epelete kokulumalugu nebagomo enali ma lite ai lu emigo ai lu emigo hite li'ahana: Ho tilo. Betelehe hepato butoti ya'mana huto hinana Sipi Bouba lu limi'ehinana ya'ma bu galune li'ahana. 16 To enali ho tite hololu lite bite Malianogo Yosefenogo neha'inalo henetite bu gelete to pana'i bulumaka nose'na sepeke'nagu ko'ehigo bu ge'ahana. 17 Enali ana pana'i bu gelete Malianogo Yosefenogo agelouba ya'mana pana kumu lu epi'ehinana kaga lu etimi'ahana. 18 To asaga bona'i sipisipi yaga kabalo bomagi lana ka akeheli su helete ana pana kumu topa hete enekesa yigi babu li'ahana. 19 To ya hu'ehinamoya Maliau asaga ka ipa'agu li mololoto ekesa yigito legeso huto mino'ehina. 20 To sipisipi yaga kabalo bomagi i gelehe hite he'mite bite Hu'mamofihi gi'a liyafa hite fokehi he'ahana. Enali asaga'na agelouba lu epinana huto su hana bu gete'ani sipi enofokehi he'ahana yabe.

Yesuhi gi'a mele'ahana

21 Alihi nayahi mone kegi'a su hoto mone kegi'ati loegi monegi heleko malago kana minelete ana pana'mofihi gufa'a laga nehite gi Yesu lite mele'ahana. Koyapa'i ai ito'afihi ipa'agu huto mehu'ehigo agelouba yamana gi ho'ehina yabe.

Simioniugo Anaugo Yesuhi mono nonugu nohigo bu ge'aha'ina

22 Ito'afinogo afo'afinogo pana'anogo mono nagamitu okala hi etatalana kana'a hu'ehina ana legitana koyapa'i Moseu keya kaga molo'ehina suhi lite hi'aha'ina. Ya'mu ito'afugo afo'afugo ana pana'i le'mete bite Yelusale hepato Sipi Bomofihi emilu'ibe'mu bi'aha'ina yabe. 23 Manana Sipi Bomofihi keya kaga'alo fayanugu ge'ahana: Asaga yege pana'i huto hinamo Sipi Bomofitoga le'mete bite lepilata hilo. Etali ya'ma kagamofihi keheli emi'aha'ibe. 24 Etali ana hite Hu'mamofihi fokehi hete lokiya fi emilu'ibe'mu hiti bi'aha'ina. To Sipi Bomofihi keya kagauba lu'ehina'a huto: Loemo yata'a kigopafi to loemo kigopa gapa'a hiti Hu'ma kumu keye lite emilo luto ge'ahana.

25 To yalo bo mone Yelusale hepato mino'ehina gi'a Simioni yabe. To aiya bati huse bo to Hu'mamofihi agoya hu emise bo yabe. Ai Isilaeli bona'magi enubuto bilina bo'mu geba huto mino'ehina. To Sikalafu'i hiti Simionitoga mino'ehina yabe. 26 Sikalafu'uba Simionitoga alu emi'ehina mefilise nohitogo Hu'mau le'mo ho ti'ehina bo, ya'ma Mesiau huto hilibe lu'ehina bu goloto fililata'mu yabe. 27 To Simionihi Sikalafu'uba le'mo kapo malago sipi mono nonugu tito'a Malianogo Yosefenogo to ana pana'i Yesuhi keya kagauba lu'ehina suhi hu etalu'ibe'mu neha'igo bu enogo'ehina. 28 Simioniu ai ana pana'i yahi komopa'alo le'mo mololoto'a Hu'mamofitoga fokehi hoto ma luto lu'ehina: 29 Oho. Sipi Bo. Yatai ya'ma lili'nalo panaka he'mi etetogo fulunagu bino. Ya hitogo nipa'ni koyapa'i kaga lu molo'ahata'a huto fuluna nebesilibe. 30 To nani nubu'niuba ana'ina lubuto bilatana lolo hatamoya bu nogabe. 31 Ya'manana kai asaga noto noto boana'magi enubulo le'mo lele hu'ahane. 32 Ai libi'mo moneuba fegutoga bonatoga metepunagu nehilana bonatoga enele'mo besa lalibe. To ai Isilaeli boanaka enigi'a le'mo sipi hilina'mu yabe.

Simioniu ya luto lu'ehina yabe.

33 Etali Yesuhi ito'afugo afo'afugo Simioniu Yesu kumu lina kalo etegekesa yigi babu li'aha'ina. 34 Simioniu lusa gi etimito ma luto pana'mofihi ito'afitogo Malia lu emi'ehina: Kehelibo. Ma pana'i ai babu Isilaeli bona'i luga'a enele'mo melugu malalina'mu yabe. To ai ana huto babu bona'i luga'a enele'mo ho tilina'mu yabe. To ai Hu'mamofitogati mone babeyafa'a legi huto huto minalina'mu yabe. Analo'i babu bona'magi ka sibina'a li etalana'mu yabe. 35 Ya hinogo babu bona'magi enekesa yigise'na'ani huto'i minalibe. To mone kosa kosa emitauba ana legitana lutumopakagu fi fulu tilibe.

36 To Hu'mamofihi ka'a leli'ali a'i mone mino'ehina, gi'a Ana. Ai afo'afihi gi'a Fanueli, ya'ma bo Ase nagaluguti o'ehina. To Ana aiya litana'i koyapa'i bo lito baha'a hiti nayahi mone kegi'a su hago mone kegi'ati loemo heleko malago kufu mine'aha'ina. 37 Alihi baha'a fililago ai fa'mene mino'ehina. To yatai kufu'a 84 nominabe ya nohuto'a sipi mono nohi hepato menohe'mina litana'i yabe. To ai nose'namofihi mo sito to nunumu huto minoto Hu'mamofihi yege fito to mono lili'na'a fuliga hiti folugu'i hiti lito minolata hu'ehina. 38 To yana kana'agu ai enali nehanalo henetito'a Hu'mamofihi fokehi ho'ehina. To ai ya'mana pana'mofihi huto hu'ehina kaga'a asaga bona'i Hu'ma kumu'i Yelusale hepa'i oto aku'i lilina'mu geba hi'ahana bona'i lu epi'ehina: Ma pana'uba lali hepati, Yelusale ya'ma le'mo bati hilina'mu yabe.

Yosefe ai aku'i Nasalete bu'ehina

39 Etali asaga'na Sipi Bomofihi keya ka'auba lu'ehina'a hi su helete i behe hite Galili melugu hepa'ani Nasalete bi'aha'ina. 40 To ana pana'i olopa hoto amuya bo minoto'a kehelise'na'a hetofana babu luto minago Hu'ma lusa gise'nauba ai hiti minolata hu'ehina.

Neheya bo Yesu mono nonugu ti'ehina

41 Asaga kufu kanagu Yesuhi ito'afugo afo'afugo bona'i Yelusale hepato li nupa hilata hanalo bilata hi'aha'ina. Koyapa'i Hu'mau lubuto bu'ehina'a kumu Pasa yabe nelana ya'ma sipi nose'na nalata, yana'mu bi'aha'ina. 42 Yesuhi kufu'a 12 ni'inamo enali ananalo bilata ya'ma asaga kufu kana Yelusale hepato mono nose'na nalune'mu hite moneko kumu bi'ahana. 43 Ya'mana sipi nose'na nalatamofihi kana su hago enali i behe hite hepa'aniga bilune'mu kapo melete hapi fi'ahana. To ana pana'i Yesu, ai Yelusale mino'ehina. Ito'afugo afo'afugo ya huto Yelusale minabe'a mekeheli'aha'ina. 44 Etali ma lite etegekesa yigi aha'ina: Ai luga'a bona'i hiti alihi noabe lite ya'ma yupahi mone'a kapo mele'ahana. To alihi etali hapi fite bona'atitimagihi folagaha'anigu sa sa hi'aha'ina. 45 Etali bu megete'atiti aku'i Yelusale sa sa hite bi'aha'ina. 46 To kana loegi monegimogu sipi mono nonugu tite babafi bona'i hiti kaga'anilo keheli minoto enoloka hoto nohigo le'mo huto hi'aha'ina. 47 Asaga kaga kehelina bona'magi Yesu kehelise'na'amu to enali loka hana kaga lu epina'amu topa hete enekesa yigi babu lite mine'ahana. 48 Etali ito'afugo afo'afugo Yesuhi mono nonugu nohigo bu gelete topa hete ligo ito'afu kehe ito lu'ehina: Pana'ni kai henabe luto ya'ma suhi nohane? To kai ya hanogo le'ali le'elesati'a ligo kai kumu'i higo sa sa nohu'ibe luto ligo, 49 ai kaga'atitilo lu'ehina: Letali henabe lite nani kumu'i sa sa neha'ibe? Letali mekeheli'aha'ifiye? Nani afo'nifihi nonugu ai kumu nohilunamo ni'ibe. 50 To etali ya'mana kaga Yesu lu'ehinamofihi hapa'a keheli bebe mese'aha'ina yabe.

51 Ya hilete aku'i he'mito ago etali le'mete moneka Nasalete hepato bi'ahana. To kaga'atiti etabaga liyafa huto mino'ehina yabe. To ito'afu asaga ya'mana kaga komopa'agu li moloto ai mino'ehina. 52 To Yesu sipi bo hulago kehelise'na'a hetofana huto minago melugu bona'i hiti to Hu'ma hiti enali bu gana hapa'a bati huto mino'ehina yabe.

Copyright information for `BEF