Luke 21

Keto a'uba Hu'mamofihi efaha'a emi'ehina

Mk 12:41-44

Sipi mono nonugu fe'noho bona'magi efaha lapelugu nemalana Yesu minoto bu enogo'ehina yabe. Ya nehago fe'noha'a menina keto a'i mone baha'a fililago nominana a'uba nesi safa efaha'a loemo lapelugu he'mi malana Yesu bu go'ehina. Ya huloto Yesu ma luto lu epi'ehina: Nani ma'naka luto lu nolepube. Ma keto a'i baha'a fililago fe'noha'a menina a'i nominana ai asaga boana'i enohoto efaha lapelugu nohe'mibe. Enali ya'ma bona'i luga'a enali fe'noha'ani babu lito nina nesi'asi Hu'mamofitoga neemibe. Ya hu'ehina ya'ma keto a'i ai fe'noha'a ma'naka luto menina aitoga nina efaha'a asaga'i he'mi su nohabe. To aitoga nose'na'a lito nalina efaha'a lusiga luto noha'a luga meni'ibe, luto Yesu lu epi'ehina yabe.

Sipi mono nohi sibina hilina'mu yabe luto Yesu lu'ehina

Mt 24:1-2; Mk 13:1-2

Bona'i luga'amagi sipi mono nopofi kumu ma lite kaga li'ahana: Enali ya'ma mono nohi hetofa efatu'i li hekelete to Hu'mamofitoga mone'na boana'magi mele'ahanana'mu hiti kaga nelago Yesu ma luto lu epi'ehina: Asaga'na yatai lenali bu neganana alihi kana'a mone huto hilina yupahi ma asaga efahi ilala kete ibe gofa hibe hite meluguko limi su halana'mu yabe, luto Yesu lu'ehina yabe.

Keta huse'na babu luto huto hilina yabe luto Yesu lu'ehina

Mt 24:3-14; Mk 13:3-13

Enali ma lite Yesuhi loka he'ahana: Tisa, hiya yupahi ya'mana huto hilina ni'ibe? Henana yata'a huto hinogo bu goloto ya'manana kai lu'ahatana anasi yatai huto hilube'mu nohibe luto keheliluta ni'ibe?

Ya lago Yesu lu epi'ehina: Lenali kaba hu bati hilo. Mone lenimi'i mele lalabe'mu nolube. Babu bona'i nani nigi'ni hete ma lite lilana'mu yabe: Nani'ni ya'mana bomo nohube. To ma lite lilana'mu yabe: Kana'a anasi yatai lebato huto nohibe. Ya nelinogomo lenali ana bona'i bite enemege'i memalalo. To aliha'a sipi luba nehabe lite nelinogomo lenali lenuluhayaguti fiki fiki hinogo koli mehilo. Lubana hena asaga'na yata'a fato fato'i huto hu su holenogo alihi anana me'me huto mehilina'mu. 10 Yesu ma luto ka mone lu epi'ehina: Mone bo naga'magi ho tite mone bo naga'i hiti luba hilina'mu yabe. To mone gihiti bomofihi bo'a hiti fato gihiti bomofihi bo'a hiti luba li huto hite hilana'mu yabe. 11 Sipi imima'i melugu lilina'mu yabe. To mone kegi'a sipi kau'na helenogo enebesise'na babu lito huto hilina'mu yabe. To kokulumalugu babeyafana sipi sipi, fato fato'i huto huloto lenele'mo lenelesa fato'na huto lilina'mu yabe.

12 Ya hu'ehina ya'mana asaga'na huto mehu'ehinogo yata'a lenegene mane hite lenele'mo sibina hilana'mu yabe. Enali mono nonugu lenele'mo melete naga'i lepilana'mu yabe. Enali nani nigi'ni li melugu malalune lite lenele'mo gihiti bo enubulo hiti gamani bona enubulo hiti bite ka foya lilana'mu yabe. 13 Ya'ma lenali kapotini hokolo hinogo ka'ni lu yege halana kana'a huto hilina'mu yabe. 14 Ya hu'ehinagi lenali ya'ma ka foyalo kaga mone ete nelilete nogo lu epiluta kaga yabe lite kaga lenekesagu li gehe lite loloba hite meminalo. 15 Nani'ni kaga hetofa'a lenabagalo mololoto'ni to ka kehelise'na hetofa'a lepiluna'mu yabe. To asaga fatehatinimagi nani lepilina kaga li gofa mehila to lisi'ani luga mebilana'mu yabe. 16 Itokafugo afokafugo to kogonamu tamuka to kalalukagi hiti enali asaga'i fatehaka lolo hilana'mu yabe. Ya hilete monepi monepi lenoho fililana'mu yabe. 17 To asaga bona'magi sipi lenipakafa halana'mu yabe. Hena'mugope lenali nani nigi'ni lu yege homofa'na hilana'mu lite yabe. 18 Ya hu'ehina Hu'mamofihi bulo okatiniguti moneko'isi mone fenene mehilina'mu yabe. 19 Lenali amuya melete kehelise ule'ale hite mino bati hite nehite aku'i lenali mino bati huse hepatini lilabe.

Yelusale hepa'i sibina hilibe luto Yesu lu'ehina

Mt 24:15-21; Mk 13:14-19

20 To alihi gimi bomagi ete Yelusale hepa'i li bego nehinogo lenali bu gelete ma lite kehelilo. Yelusale hepa'i li sibina huse kana'a yatai huto nohibe lite lilo. 21 Ya'mana yupahi Yutia hepato nehana bona'i koli hite kosagago ti su halo. To Yelusale bona'i lenali hepatini he'mite legete fato hepatogago bi su halo. To lenali fegutoga nehana bona'i ana nohi hepa gegisagu metilo. 22 Ya'mana yupahiya Hu'mau bona'i osahi epilina to li sibina hilina'mu yabe. Ya hulenogo asaga kaga mono bukugu ninamofihi mana'a huto hilina'mu yabe. 23 Ke. Enali ana'i yatai yagapana'ani hiti hi'ahanafi to yagapana'ani amihi neepina ana'ise. Ana kanagu sipi ketana ma melugu huto hulenogo Hu'mamofihi ipagu logo bise'na'auba asaga boana'i sa sa hilina'mu yabe. 24 Sipi emitauba enohoto nalina'mu yabe. Fateha'animagi naga'i epite enele'mete bite fato bona folagaha'anigu he'mi epalalana'mu. To fatoga bona'magi enigi'aniuba Yelusale hepa'i ilenogo aku'i fato bona'magi enehete enele'mo nehe'mite enali'ani minalana'mu yabe. Enali Hu'mau molo'ehina kanagu minete to kana su holenogo he'milabe.

Kokulumaguti limi'ehina Bouba aku alihi alina

Mt 24:29-31; Mk 13:24-27

25 Ikato yegelo to sonofito fato fato lu huse lu huse'na huto hilina'mu yabe. To melugu asaga bona'magi enipa'anigu koli hulenogo hege nagamiluguti sipi nogo moloto bililina'mu yabe. 26 Asaga boana'magi melugu ana'ina mone huto hilube'mu nohibe lite enekesa yigi fato fato hite minete sipi enelesa luto enubu'ani metepu ito loe loe hilina'mu yabe. Hena'mugope kokulumalugu sonofi'i hiti ifo muya hiti asaga'i mopo hu baga ilana'mu yabe. 27 Ya hulenogo analo Kokulumaguti limi'ehina Bo aku huto hilina'mu yabe. Soponugu lusi sipi amuya'a hiti fana mehena'aguti a'alina'mu yabe. 28 Ya'manana hapi fito huto hilube'mu nohinogomo lenali ho tilete latahatini li saga hilo. To Hu'mau lenele'malube'mu hilina kana'a huto hilina'mu yabe.

Nemuya yafa bame ka'a

29 Yalo Yesu ma bame ka lu epi'ehina: Lenali nemuya yafamo hiti to asaga yafa luga'a minelata nehanalo lenekesa yigi malalo. 30 Haya'ani helililoto nohesigomo yege anasi lalina kana'a o leba notabe lilata nehabe. 31 Ana suhi luto asaga'na huto nohinogomo Hu'ma bona'a enele'malina kana'a o leba notabe lite lilo, luto Yesu lu epi'ehina yabe. 32 Lenali ma kaga lenekesagu li malalo. Enali yatai boana'i mefilise nehinogo asaga'na huto hilina'mu yabe. 33 Kokuluma'i hiti me'i hiti su hoto fenene huto bilinaya nani kaga'ni su hoto fenene huto mebilina mino lito buto minalina'mu yabe, luto Yesu lu'ehina yabe.

Yesuhi koko pana'a kaba hu bati hilana

34 Ya hu'ehina lenali kaba hu bati hilo. Lenali asaga yupahi amuya nagami'i nelete negi nagi ne lalabe. Lenali lenugufalo'namu'i lenekesa yigiba yigiba mehilo. Ya'mana suhi lenalitoga huto nohinogomo yalo Sipi Bomofihi Kana'a hololu luto analo mele'isi lenalitoga nehetilina'mu yabe. 35 Asaga kapoga me'i tina'a limina'aga mino baga ite nehana boanatoga ya'mana kana'a huto hu baga ilina'mu yabe. 36 Lenali kana'amu kana'amu ute etehi asaga yupahi kaba hu bati hite minalo. Lenali asaga yupahi Hu'mamofitoga nunumu foya liba liba hinogo ai amuya lepilibe. Ya hinogo asaga'na huto hilinamofihi lenali li lenemegesaga nemelete Kokulumaguti limi'ehina Bo ai okabalo ho tilana'mu yabe luto lu'ehina.

37 To asaga yupahi Yesu sipi mono nonugu boana'i mono kaga lu enelepi'ehina. Ya huloto folugu'a Oliba kosagu tito kolata hu'ehina yabe. 38 To asaga etehi folugu'i asaga boana'i Yesuhi ai ka'a kehelilune lite sipi mono nonugu elata hi'ahana yabe.

Copyright information for `BEF