Luke 22

Yutasiu kaba bomagihi enayanugu Yesu malalina ka molo'ehina

Mt 26:1-5, 14-16; Mk 14:1-2, 10:11; Yn 11:45-53

1Ana'inatu mone yeye mebise beleti nose'na lolo hite nelata nehana ai Pasa yabe lite lolo hite fuli kanalo nelatana ya'ma o leba to'ehina. 2To enali mono bona'i to kaga keheli bati hi'ahana bona'i enali boana'magihi koli hilete ma lite li'ahana: Lali hena hulototi Yesuhi ho fala kilune?

3To Yutasi Isikelioti yabe lite gi helata hana bomofitoga Satau nehetito komopa'agu ti'ehina. Ai aposolo bo 12 ya'ma nagaluguti yabe. 4Ya higo Yutasiu sipi mono bo to mono noto kaba gimi negina bona'i enalitoga Yesuhi enayanuga bilinamofihi gutunu ka lu epilube'mu bu'ehina yabe. 5Ya ligo enali enegelo bilete fokehi kaga lu bati hilete efahi kimiluta'mu yabe li'ahana. 6To Yutasiu bati huto yabe, luto ka'anilo lu'ehina. To ai Yesuhi mi'i moloto le'moto oto enayanugu malalinamofihi kapo'a sa sa hu'ehina. Ai boana'i babu lite Yesu hiti meminalana yupahi yabe luto ana kana geba huto mino'ehina yabe.

Aposolo pana'i loemale'i Pasa nose'na li loloba hi'aha'ina

Mt 26:17-25; Mk 14:12-21; Yn 13:21-30

7Pasa nose'na nose kana o leba tago sipisipi yaga nala'a hiti ya'ma keye lilune'mu nehana. 8Yesu Pitanogo Yoninogo etele'mo kohe toloto bite letali Pasa nose'na li loloba nehi'inogo buto nalune luto etoho lifi'ehina yabe. 9Etali Yesuhi loka helete ma lite li'aha'ina: Hiya'alo buto ana nose'na li loloba hilu'ibe? 10Ai ma luto lu etimi'ehina: Letali Yelusale hepalugu neti'inogo bo moneuba nagami sipi somo kofito nobuto letofo talina'mu yabe. Letali ana bo mege'i lifite bitetiti ai nonuga notinogomo ana nonuga tiliyo. 11Ya hilete nohi afo'afihi ma lite lu emiliyo: Tisauba kai kumu ma luto lu'ehibe koko pana'ni hiti Pasa nose'na naluta nohiba hiya'a ni'ibe? luto lu'ehibe lite lu emiliyo. 12To ai sipi hasa mone ifolo hita hiti to sia hiti ni'ilina letelepinogo letali anaga asaga Pasa nose'na li loloba hiliyo. 13Yalo etali bilete asaga Yesu kaga lu etimi'ehina suhi huto huto higo etali Pasa nose'na li nupa hi'aha'ina yabe.

Yesu aposolo pana'a gufa'a epi'ehina

Mt 26:26-30; Mk 14:22-26; 1 Kol 11:23-25

14Kana'a o leba tolago Yesu hepa'anilo hepa'anilo lito hitalo siato minolago analo aposolo pana'a hiti mino bego hite mine'ahana. 15To Yesu ma luto lu epi'ehina: Nani ma Pasa nose'na lenali hiti moneko kumu yata'a no kohe tolototi laga'ni nobesigo nani alihi nagabu foya li kofilube. 16Nani lusiga ma'naka luto lu nolepube, nani aku'i mone hiti Pasa nose'na lenali hiti menose nohinogo ananamofihi nose'na legeya'a li huto Hu'mamofihi Kapo'alo hilina'mu yabe. 17To ai masu mone lito Hu'mamofihi fokehi holoto ma luto lu'ehina: Lenali ya'mana lilete lenalitini guna ilo. 18Nani lu nolepube, yatai hiti to alihi hiti nani bai nagami'mofihi pana'a menose nohinogo'ni alihi Hu'mamofihi Kapo'a alina'mu yabe. 19To ai beleti lito Hu'mamofihi fokehi ho emiloto li gofa holoto enali'i epiloto ma luto lu epi'ehina: Ya'mana nani nugufa'ni yabe. Lenali kumu nugufa'ni he'mito fililuna'mu yabe luto nolepube. Lenali ya'mana suhi hilete nelata nehite nani kumu'i lenekesu meheno. 20Alihi enali ne su helete ai bai nagami'i lito ana suhi huloto ma luto lu'ehina: Ya'ma bai nagami'i nolepunaya nani golaha'nilo lenali kumu kaga lu molo'ehina yabe luto Hu'mau lu mu tifise'namo yuhufasi ni'ibe.

21Ya hu'ehinaya lenali bu galo. Ma nohuta hita folagahatigu lalalutifu moneuba nani'i nimi'i moloto fateha'nimagihi enayanugu bilina bo nohibe. 22Kokulumaguti limi'ehina Bo Hu'mau lu'ehina mege'i moloto fililina'mu yabe. Ya hu'ehinaya ai fatehe bomagihi enayanugu nele'moto buto malalina bomofi buya hilina'mu yabe. 23Yesu ya luto lu epilago to enali ai loka hago ai loka hago hilete ma lite li'ahana: Kiyi'afu ya'mana suhi hilina ni'ibe?

Sipi gi'a hilina'mu kiyi'afu enebe tigilibe?

24Yesuhi koko panana'aguti kiyi'afu sipi bo nohilibe lilete kenasabo bi lumala hi'ahana. 25Ya nehago Yesu ma luto lu epi'ehina: Kibina bo ma melugu nehanamagi enalitoga amuyana ni'igo bona'ani kaba nehi epalabe to kaba bona'i enaliya Bona'magi Enalalu'anigi yabe, luto enigi'ani ni'ibe. 26Ya hu'ehinagi lenali ya'mana suhi mehilo. To bo mone folagahatiniguti nani sipi'a nohube luloto ai yagapana'i lagaso'a legita huto mineno, to kaba bo ai koko pana tegi huto mineno. 27To butinilo kiyi'afu kaba bo nohibe ai mino laba huto nose'na nonanaubafi to ai koko kako humo emilata nohinaubabe? Ai mino laba huto nose'na nolata nohinauba kaba bo nohibe. Ya hu'ehina nani folagahatinigu nohuna ya koko bo legi huto lenehe'malube luto nohube.

28Asaga yupahi nanitoga fi taga huse'na nehetilata hinalo nani'i mehe'mi netose lenali nani hiti minelata hi'ahabe. 29To Afo'nifu ai Kapo'a nani'i nimi'ehina ana suhi huto Kapo'a nani lenali'i nolepube. 30To Kapo'nilo lenali nose'na nete to nagami nete hita'nilo hilabe. To lenali gihiti bomagihi kefa hisalo minelete ma melugu nayahi luga luga su hoto nigigusagati loemo heleko malago ya'ma Isilaeli naga'i nehana enali kaga'anilo kaba hilete nehite ya huto kaga latagi lite keheli epalalana'mu yabe, luto Yesu aposolo pana'a lu epi'ehina.

Yesu Pita kumu nigi'ni ifi talane luto lu emi'ehina

Mt 26:31-35; Mk 14:27-31; Yn 13:36-38

31Simonio. Simonio. Kai kehelibo. Satau lenali kumu enimi'i malalube luto higo Hu'mau lu laga mehu etobe. Ai lenali'i lenele'malube luto uiti legeya'a hiti noha'a hiti li gelehe huba huba huto kehe noibe ya'ma tegi huto lenebe ligilube'mu nohinagihe, luto Yesu lu'ehina. 32Ya hu'ehina nani afo'nifihi loka hoto kaitoga kehe'malibe luto ahu'ohube to kai nanitoga komopaka moloto nominatana mehe'mibo. To alihi komopaka i gelehe huto olotomo yalo kaikago'i kai to kogonakamagihi enele'mo amuya molobo. 33To Pitau ma luto lu emi'ehina: Sipi Bo, nani kai hiti buto nagalugu moneka bilu'ibe luto loloba huto nohube. To kai hiti moneka fililu'ibe luto loloba huto nohube. 34Ya ligo Yesu Pitahi lu emi'ehina: Pitao, nani ma'naka luto lu nokumube. Yatai folugu'i kokole nogo memolo'ehinogo loegi monegi yupahi nani nigi'ni li fala kito ai'i mekeheli'ohuna bo'mu kaga nelabe luto lilata'mu yabe.

Yesu pana'alobo'a lipoti lu epi'ehina

35To Yesu lu epi'ehina: Yata'a lenoho lifi'ohuna yupahi efahatinifi gutinifi to lenigigu'natinifi melise bilo, luto lu lepuna yupahi lenali luga'a meni'ibe lite sa sa hi'ahafi ya mehi'ahabe? To enali li'ahana: O'e ya mehu'ohune. 36To yatai kehelilo, luto Yesu lu epi'ehina: Mone bouba gu'afi to efaha'a ni'inogomo yatai li pili keno. To bo moneuba sipi emita'a meni'inogomo bufalo'na hetito buto bona'i epinogo efatoti mina filenogo ai sipi emita'a alino. 37Hena'mube? Mono bukugu kaga ma luto ni'ibe:Enali foipa bo hiti le'mo malalabe. To nani lu nolepube lu'ehina. Ya'mana kagauba nanitoga huto hilina'mu yabe. Asaga fayahi keye'ahana ya'ma kaga monolugu nani kumu'i ninalo yatai mana'a huto hilube'mu nohibe. 38Ya luto lu noepigo enali ma lite li'ahana: Sipi Bo, kai bu gobo. Lali sipi emita'i loemo ma molo'ohune. To ai: Anasi yagi he'milo, luto lu epi'ehina.

Yesu Gesemane foyagu nunumu hu'ehina

Mt 26:36-46; Mk 14:32-42

39To Yesu fegutoga limiloto asaga yupahi hulata nohina suhi huto Oliba kosagu ti'ehina. Ya nohigo aposolo panana'a mege'i lifite bi'ahana. 40Ai ana kosalo nehetiloto ma luto lu epi'ehina: Lenali nunumu hite nehinogo lenalitoga fi taga hu lepolose'na huto mehilibe. 41To Yesu analo enali'i he'mi epololoto ai'asigo bo moneuba efahi he'mi nomalana legege'alo bu mololoto lapusa nohifito lipito minoloto ma luto nunumu hu'ehina: 42Afo'niga kehelitomo ya'ma nagabu gise'na nanitoga ni'ina li he'mi netobo. Kaikamo kekesa kehelito bati huto yabe lutomo anana li he'mi netobo. To kai o'e litogomo nani ana nagabu gise foya li kofilube. 43To agelo bo mone aitoga nehetiloto le'mo amuya molo'ehina. 44Yesuhi sipi keta besilago mone'a hiti nunumu hu'ehina. Ya nohigo golaha gobi holoto melugu limo i'ehina yabe.

45Ai nunumu ahu su holoto tito koko pana'a nehanaga bu'ehina. Enali sipi keta epesilago enubu'i ke fili'ahago bu enogo'ehina. 46To ai ma luto lu epi'ehina: Lenali hena hibe lite lenubu'i kelete nehabe? Lenali ho tite lenubuna hete mine fe lite nunumu hilenogo lenimi'i molose'nauba lenalitoga huto mehilibe.

Yutasiu Yesuhi fatehe bomagihi enayanugu molo'ehina

Mt 26:47-56; Mk 14:43-50; Yn 18:3-11

47Yesu kaga noluto babu bona'magi neago Yutasiu, aposolo nagaluguti moneuba kohe to epalago e'ahana. Ai Yesuhi nu kiloto ya'ma bo yabe luto enelepilube'mu Yesu nohinalo o leba to'ehina. 48Ya higo Yesu lu emi'ehina: Kai ya'ma nunu nokitanasiuba Kokulumaguti limi'ehina Bomofihi fatehe bomagihi enayanugu nele'mo nomalapihe? 49Enali aposolo pana'amagi ana huto nohinana bu gelete ma lite lu emi'ahana: Sipi Bo, sipi emitati ma li'ohutatu'i enahaluta bati hutofihe? 50Ya nelite moneuba emitatu'i lito sipi mono kaba bo'animofihi koko pana'a inaya igeka higo lamaga'aga ekesa i hesi he'mi'ehina yabe. 51Ya higo Yesu bu goloto ma luto lu emi'ehina: Ya'ma suhi anasi yagi lenali yatai he'milo. Ya luloto ana bomofihi gufalo meko higo ana ekesa'a aku'i bati hu'ehina yabe.

52To sipi mono bona'i to mono noto kaba gimi negina bona'i to olopa bona'i enali Yesuhi le'malune lite ana bona'i ma luto Yesu lu epi'ehina: Lenali emita'i nelite osahi nelite hite neanaba lenali lubalo bo le'malune'mu nehafihe? 53Nani asaga yupahi lenali hiti sipi mono nonugu minolata hu'ohuna lenali nani naga'i menimi'ahana yabe. Ya hi'ahana yatai lenali kanatini huto nohigo metepunamofihi amuya'a hiti yabe, Yesu ya luto lu'ehina.

Pitau Yesuhi nani mekeheli'ohube luto bahane ho'ehina

Mt 26:57-58, 69-75; Mk 14:53-54, 66-72; Yn 18:12-18, 25-27

54Ai ya luto alulago enali yato lite bilete le'mete mono bomagihi kaba bo'animofihi nonuga le'mete ti'ahana. Ye nehago Pitau ai enemege'i lifito fala kito bu'ehina. 55Logo mone ya'mana nohi gegisagu ge'ahana ya hilete enali mine'ahana. To Pitau ana bona'i hiti ana logo gete nehanalo mino'ehina yabe. 56To koko palala'i mone ana logolo minanauba Pitahi bu go bati bati hu'ehina. Ya'mana palala'uba amuya moloto bulu'i holoto yahi fisu ho emito ma luto lu'ehina: Ma bo ai Yesu hiti minolata nohina bo yabe. 57Ya ligo Pitau o'e luto luloto lu'ehina: Apa'niga. Nani ana bo mekeheli'ohuna bomofi kumu nolane. 58Nesi'asi mino ka nohigo bo moneuba Pitahi etafa huto bu goloto lu'ehina: Kai ya'ma bo Yesuhi naga'moguti nohane. Ya ligo Pitau bahane hoto lu emi'ehina: Nalalu'niga, nani fato bo nohube. 59Ya luloto nesi'a mino yatama nohigo fato bo moneuba amuya mololoto yahi Pitatoga fisu holoto ma luto lu'ehina: Lusiga luto ma boya Yesuhi koko pana'a nohibe. Ai ana huto Galili kapolo bo nohibe, lu'ehina. 60Ya ligo Pitau: O'e. Ma boya nani mekeheli'ohuna kaga nolane. Ya noligo loegi monegi yupahi bahane holoto luto mele'isi ana baga hiti kokole nogo molo'ehina. 61Ya nohigo Yesu i behe huto bu golago buto Pitahi bugu bu gago Pitau koyapa'i Yesu ma luto lu emi'ehina kaga ekesa hokolo hu'ehina: Ya'mana folugu'i kokole nogo memolo'ehinogo loebe monebe yupahi Yesuhi mekeheli'ohube luto bahane ho netalata'mu yabe. 62Ya huloto Pitau fegutoga limiloto ginaga fito lubaha'a hosopa igo ginaga sipi huto amuya moloto yibi hu'ehina yabe.

Enali Yesuhi osahi emi'ahana

Mt 26:67-68; Mk 14:65

63Enali Yesuhi yato lite kaba hu etete minana bomagi kiya yokolo hu emilete osahi he'ahana. 64Enali Yesuhi bulo alo nagatu gi pili kelete osahi helete ma lite loka he'ahana: Kiyi'afu osahi koho'ehifi kai lu limibo. 65Ya nehite enali kaga bati mehina'a hiti to huli ka hiti li ete'ahana yabe.

Enali Yesuhi kanisole bolo ka foya li ete'ahana

Mt 26:59-66; Mk 14:55-64; Yn 18:19-24

66Alihi yege tilago enali Isilaeli kaba bona'i to monoto sipi kaba bona'i to keya ka enelepise bona'i enali li gehesa hilete enali Yesuhi le'mete kanisole bo noha'anigu bilete ma lite li'ahana: 67Kai lu limibo. Kai Hu'mau le'mo ho ti'ehina bo, Mesia nohapi to fato bobe? To Yesu lu epi'ehina: Nani lu lepilunaya nani ka'ni keheli menimilana'mu yabe. 68To nani kaga mone lenoloka halunaya lenali ana ka'nilo nona'a lu hokolo hite lu menimilana'mu yabe. 69Ya hu'ehinaya yatai hiti to asaga yupahi alihi Kokulumaguti limi'ehina Bo ai Hu'ma asaga amuya aitogago nina Bomofihi yahi lamaga'aga minalina'mu yabe, Yesu lu'ehina. 70To enali: Ya hu'ehinaya kaiya Hu'mamofihi pana'a nohapihe? Ya lago Yesu lu epi'ehina: Lenali alu huto hite nelabe. 71Ya ligo enali li'ahana: Lali fato bo Yesuhi kaga'a keheli'ehina bo sa sa mehilune to lali yatai ma bomofihi baga'aguti a'noligo a'nokehelune.

Copyright information for `BEF