Luke 4

Satau Yesuhi fi taga hu eto'ehina

Mt 4:1-11; Mk 1:12-13

1Sikalafu'uba Yesutoga bai tago Yota nagami'i he'mito nobigo Sikalafu'uba bona'i menehana ka melugu le'moto bu'ehina. 2Yesu ya'ma ka melugu 40 yegegu su hago nohigo Satau Yesutoga fi taga hu eto'ehina. Ya higo Yesu ana kanagu nose'na menose mo sito mino'ehina. To asaga ya'mana kanamo su hago Yesuhi kau'na ho'ehina.

3To kau'na nohago Satau Yesutoga nehetito ma luto lu emi'ehina: To kai Hu'mamofihi pana'a nohutomo ma efahi lu emitogo nose'na lolo hino. 4Yesu Sataha kalo nona'a ma luto lu emi'ehina: Mono kauba ma nolibe.Bona'magi nose'na nenana suhi anasi minalana'a meni'ibe. Hu'mamofihi ka'a kehelite minalana'a huto ni'ibe.

5To Satau Yesuhi ifo'alo le'moto tito mele'isi asaga hepa'mo bona'magihi naga'i lepi'ehina. 6To Satau Yesuhi ma luto lu emi'ehina: Ya'ma bu nogata hepato bona'magihi sipi bo'ani kele'mo ho tinogo kigika sipi hilibe. To ya'mana yaga foya asaga'i kimiluna'mu yabe. To asaga ya'mana nanitoga o'ehinana ninaya bo mone'mofihi emilube liluna emiluna'mu yabe. 7To kai yatai kalapusa nohi fito nigi'ni liyafa hilata ya'ma ya huletogo asaga'na kai'naka lolo hilube. 8To Yesu ana kalo ma luto ka emeki'ehina: Mono kalugu ma huto ni'ibe.Kai Sipi Bo Hu'mamofihi gi'a liyafa hubo. To aigo ka kehelise emibo.

9To yaloti he'mito Yelusale mono nohi lataha'alo Satau Yesuhi le'moto tiloto ma luto lu emi'ehina: Kai Hu'mamofihi pana'a nohutomo malo ho ti'ohuto lehe kolago melugu limibo. 10To mono kagu mone ma luto ni'ibe.Hu'mau ai agelo'a enoho lifinogo limite kaba hu bati hi ketalana'mu yabe. 11To enali kayato linogo efahuba kigigusagu mefilina'mu yabe. 12Yesu ka'alo ma luto lu emi'ehina: Kaga ma huto ni'ibe.Kai Sipi Boka Hu'mamofihi fi taga mehu etobo. Ai Sipi Bokafu nohibe. 13To Satau asaga kaga luto mi'i molo su holoto he'mito buto fato kana geba huto mino'ehina.

Yesu Galili hepato lili'na hapi fi'ehina

Mt 4:12-17; Mk 1:14-15

14Yesu Galili hepatoga i gelehe huto nobigo Hetofa Sikalafu'mofihi amuyana'auba ai hiti bu'ehina yabe. To ai hu'ehinanamofihi kaga'a asaga hepatoga bu baga i'ehina. 15Yesu asaga boana'i mono noha'anigu kaga lu epilata higo enali fokehi hete'ani gi'a liyafa hi'ahana yabe.

Nasalete bona'magi Yesuhi enemegesa hu emi'ahana

Mt 13:53-58; Mk 6:1-6

16Yesu Nasalete bu'ehina. Koyapa'i ai yagapana'i nohuto ya'mana hepato nohuto hofa toto olopa hu'ehina. To ai fuli kanagu asaga hulata nohina'a hapa'a huto mono nonugu Hu'mamofihi ka'a lu epilube'mu ti'ehina. 17To enali mono lu huto huto bo Aisaiyahi buku'a ite ete emi'ahana. Ya nehago ai aho tito ana buku fokoloto ka mone ma luto ni'ina'mu sa huto leka so'ehina:

18
  • Sipi Bomofihi meha'a nani hiti ni'ibe.
  • Ai ka lamana'a feno'ha'ani menina bonatoga
  • leli'ali hubo luto
  • nele'mo ho ti'ehina yabe.
  • Ai kaga ya'ma luto lubo luto
  • noho lifi'ehina yabe.
  • Lenali naga'i li'ahana bona'i
  • he'mite fa'mene bilo.
  • Lenali lenubu metepu i'ehina bona'i
  • lenubutini i fana talibe.
  • To lenali sipi ketana li'ahana bona'i
  • bati hite minalabe.
19
  • To bona'a kosaba'i
  • enele'mo malalina kana'a
  • lu yege hobo luto ya lu'ehina yabe.
  • 20Yesu ana buku aku'i li kefigito kaba bomofihi emiloto melugu mino'ehina. Asaga bona'i mono nonugu mine'ahana Yesunogo bulu'i he'ahana. 21To ai kaga luto lu epi'ehina: Ya'ma mono ka lenali keheli'ahago leka so'ohuna yatai huto nohibe nolube. 22To enali gi'a liyafa hilete kaga hetofana baga'aguti lina'mu enekesa yigi babu li'ahana. Ya hilete'ani enali li'ahana: Ma bose, ya'mana pana'iba Yosefehe pana'mo nohifi fato pana'i nohibe? 23To ya nelago Yesu lu epi'ehina: Nani ma'naka luto lu nolepube. Lenali fono ka mone ma lite nanitoga lilana'mu yabe: Lusa bo kaika kugufaka le'mo bati hubo. To kai koyapa'i Kapaneami hepato hu'ahatana lali keheli'ohutana yatai ana huto hepakalo ana suhi hubo lite li netalana'mu yabe. 24To ai ya luto lu noepito lu'ehina: Nani lusiga luto lu nolepube. To mono ka lu yege hose bomofihi hepa'alo bona'magi ka'a keheli meemilana'mu yabe. 25To nani lusiga lu nolepube. Koyapa'i Hu'mamofihi ka'a lu yege hose boti Elaiyaha kana'agu keto ana'i Isilaeli kapogu babu lite mine'ahana yabe. Ya'mana kanagu sopohi hekini melose to ko'i hiti meigo asaga'na hosopa igo yege yege bona'i kau'na sipi hete kufu loebe monebe to ikahi nayahi mone kegi'a leke hago asaga hepatoga mine'ahana. 26Ya hu'ehinaya Hu'mau ai Elaiyahi ho lifigo Isilaeli anatoga mone mebu'ehina. Ai fato melugu Salefate, Saitoni kapogu nina hepato keto a'i mone baha'a fililago nohinalo bu'ehina. 27To ana huto mono bo Elaisaha kana'alo enehepuhi nolana bona'i babu lite Isilaeli kapogu mine'ahana yabe. To ya hite mine'ahanaya mone folagaha'aniguti bo mone le'mo bati mehu'ehina. To Neamani ai Silia melugu bo yagi aigo le'mo bati hu'ehina yabe luto Yesu lu epi'ehina. 28To asaga bona'i mono nonugu mine'ahana ana ka'a kehelilete enitaluga lusina huto logo bi'ehina. 29Enali enitaluga logo bigo ho tite Yesuhi yato lite hepaluguti fegutoga le'mo he'mi'ahana. Ya mana hepa'ani kosagu mino'ehina. Ya hu'ehigo ya'mana kosa beletoga le'mete bite yabalugu he'mi etelago limilune'mu hi'ahana. 30To ya hite, lusina hite halune'mu hanamoya ai fa'mene folagaha'anigu kapo moloto abufa hu'ehina.

    Yesu bo mone'mofihi komopa'agu foipa fele nohinana li he'mi eto'ehina

    Mk 1:21-28

    31Yesu Kapaneami hepato Galili kegi'a limi'ehina ya huto fuli kanagu boana'i kaga enelepi'ehina. 32To enali kaga enelepise'na'amu kehelilete topa hete ho ti'ahana. Hena'mube? To Yesuhi ka'a amuya'a hiti ni'igo yabe. 33To mono nonugu bo mone mino'ehina aitoga komopa'agu laga mehina foipa felemo mino'ehina. Ai nogo'auba ka mone sipi kehe ito lu'ehina: 34Oho, Yesuo, Nasalete bo. Kai hena hu letalube'mu noane? Nekesa noyuguna kai lali'i lele'mo sibina hilube'mu noapiye? Kai nani akeheli'ohuna bomo nohane. Kai Hu'mamofihi fana mehe bo'amo nohane. 35Ya ligo Yesu ana foipa felemofihi ka emekito lu emi'ehina: Kai kaga nolata kabaga li sumu kito ya'ma bo he'mi etobo. To asaga enubu'anilo ya'mana foipa fele komopa'agu nohinana ana boti he'mi etoto nobuto le'mo felu hago buto ko'ehina mone gufa'a le'mo sibina hula ya hula mehu'ehina. 36To asaga bona'i ananalo yege fite minana bu gelete enelesa'ani ligo ai lu emigo ai lu emigo hite li'ahana yabe: Ya'ma henamofihi kaga nolibe? Ai foipa felemofihi enikibina bomagifi to lusi amuya bomagi nelana'a huto ka tugo'i ho nolifigo bomofihi gufa'aguti heleko limito nobibe lite li'ahana. 37To Yesu li huto hinanamofihi kaga'a leli'ali yana kegi'a hago sipi hu'ehina yabe.

    Yesu Pitahi liha'amofihi ito'afihi le'mo bati hu'ehina

    Mt 8:14-17; Mk 1:29-34

    38Yesu ya'mana sipi mono nohi he'miloto Simonihi nonuga ti'ehina. Simonihi liha'amofihi ito'afihi gufa'a mukoho akoho gofana lito nohigo lalu'afu Yesu he'malibe lite kehe i'ahana. 39Yesu ai ana a'mo ko'ehinalo buto ho tiloto ana nobesinanamofihi ka emeki'ehina yabe. Ya higo ana nobesinana he'mi etoto nobigo analo mele'isi ana a'uba ho tiloto nose'na le'mo lele huto epila epila hu'ehina yabe.

    40To yege alimi falalube'mu nohigo babu bona'i enalalu'anigihi fato fato'na enebesi'ehina enele'mete Yesu nohinalo elago ai moneko moneko'isi enugufalo yahi ligo enebesise'na aku'i felele hu epolo'ehina yabe. 41To foipa felemagi babu boana'magitoga mine'ahanana Yesu enele'mo he'mi su ho'ehina. Ya nohigo ana foipa felemagi sipi ka kehe ite li'ahana: Kai Hu'mamofihi pana'a yabe. To ya nelago Yesu ka epekigo enali aku'i kaga melise bi'ahana. To hena'mube? Enali Yesu Hu'mau le'mo ho ti'ehina bo yabe lite akeheli'ahana yabe.

    Yesu hepa'i mone'aloga lili'na lito humofa'na hu'ehina

    Mk 1:35-39

    42Etehi folugu'i ana hepa'i he'miloto bona'i menehana hepa'i mone ni'inalo bu'ehina. Ya hulago boana'i enali ai kumu'i sa sa hite bi'ahana. To ya hite enali fatoga he'mi epoloto mebilibe lite le'mo mele'ahana yabe. 43Ya nehago ai lu epi'ehina: Nani ana huto Hu'mamofihi kapo'a kumu ka lamana'a fato hepa'molo hiti buto lu epilunamo ni'ibe. To lenaligo mone menehabe. Hu'mau ai ya'mana foya libo luto noho lifi'ehina yabe. 44Ya luto kaga lu epiloto ai Yutia kapogu buto mono nonugu tito ka lamana'a lu yege hoto mino'ehina yabe.

    Copyright information for `BEF