Luke 9

Yesu pana'alobo'a 12 magi nehana lili'nalo enoho lifi'ehina

Mt 10:5-15; Mk 6:7-13

1Yesu pana'alobo'a nayahi luga luga su hoto nigigusagati loemo heleko malago neminana kehe ito enele'mo nupa huloto ai gi'alo foipa felefi to enebesise'nafi li he'milabe luto enele'mo ho ti'ehina'a hiti to sipi amuya molo epoloto'a epi'ehina. 2Ya huloto ai Hu'mamofihi kapo'a kumu bite ka lu yege nehete enebesise'na li he'mi he'mi hilabe luto enoho lifi'ehina yabe. 3Yesu ma luto lu epi'ehina: Lenali kapo nemeletemo lenayanuga ana'ina melise fa'mene bilo. Fatusa osahifi sisaku gutinifi nose'natinifi efahatinifi to guketetini mone li fakene hite melise fa'mene lenayapako bilo. 4To enali lenebe tigilago nohi moneluga tilete analo nose'na nelata fatoga bila ela mehise ana nonugago nehite ana hepa'i he'mite fatoga bilune'muko bilata hilo. 5To hepa'i mone luga nehe netinogomo nonuga lenele'mo menemelenogomo enubulo lenemegesatini epite he'milata hilo. 6Ya luto Yesu pana'alobo'a lu epololago enali asaga hepato hepato bula ola hite ka lamana'a lu yege hete lu epimofa'na nehite epesina bona'i enele'mo ye komofa'na hite asaga kapoga bula ola hi'ahana yabe.

Helotiu kaga Yesuto li keheli'ehina

Mt 14:1-12; Mk 6:14-29

7Heloti Galili kapo kibina bo ai asaga'na huto hinamofihi kaga'a akehelito nohigo luga'a bona'magi Yoniu nagami folo epolose bo fili'ehinati aku'i ho ti'ehibe lago ai ekesagu pisili bito loe lae hu'ehina. 8Luga'a bona'magi koyapa bo Elaiyau huto nohibe nelago to luga'a bona'magi koyapa mono ka leli'ali hu'ehina bo aku'i ho ti'ehibe lila hite kaga lu samahi ti'ahana. 9Ya nelago Helotiu ma luto lu'ehina: Nani koyapa'i Yonihi lubaha'a laga huto lataha'a li'ohunamo yagi ai ya'ma bo kiyi'afu nohigo kaga'a fato fato'i babu lito nokehelube? Ya luto luloto ai Yesu kumu mapahi fito sa sa huba huba huto mino'ehina.

Yesu 5,000 bona'i nose'na epi'ehina

10Yesuhi aposolo panana'a aku'i ete li nupa hi su helete asaga'na enali hi'ahana Yesuhi lu emi'ahana. Ai asaga'i pana'alobo'a enele'moto luga'a fato bona'i nohe'mi epoloto enaligo Betesaita hepato bi'ahana. 11Yege yege bona'i Yesu ya huto nobibe lana'a kehelilete mege'i lifite bi'ahana. Ai enebe tigito Hu'mamofihi kapo kumu'i kaga lu epito epesi'ehina bona'i enele'mo ye ko'ehina yabe.

12Utehi yege limi falalube'mu nohigo Yesuhi 12 pana'alobo'amagi aitoga ete ma luto lu emi'ahana: Ma hepa'mo ka me'i ni'inagi kai asaga bona'i enoho lifitogo hepa'i ninalo bila ela hite nose'na'ani sa sa hite nelete kalabe. 13Ya nelago Yesu ma luto lu epi'ehina: Lenalitini nose'na epilo, lu'ehina. Enali ma lite li'ahana: Lali beleti nose'na loegi loegi monegi hiti faya'i loe hiti anasi li'ohune. Kai kekesa nokehelita asaga ya'ma babu bona'magihi nose'na sa sa huto mina filoto ito oto epilupihe? 14Babu bona 5,000 analo mine'ahana Yesu pana'alobo'a ma luto lu epi'ehina: Lenali ana bona lu epinogo li nupa hila hila hite 50 50 melugu mineno, luto lu epi'ehina. 15Yesuhi pana'alobo'amagi ana kaga ana bona'i lu epilete enele'mo melugu malago mine'ahana. 16Ya nehago Yesu beleti nose'na loegi loegi monegi hiti faya'i loemo liloto kokulumatoga bu go saga huloto Hu'mamofihi fokehi holoto ana nose'na li tobo sito pana'alobo'a epigo enali lite bite ana bona'i bite muyaga epila maga epila hi'ahana. 17Enali asaga'i ana nose'na nelete enumu'i hulago limo koko hina'a Yesuhi panana'amagi li nupa hite safe nayahi luga luga su hoto nigigusagati loemo heleko malago li gu i'ahana yabe.

Pitau Yesu kumu'i Kilisitou nohibe luto lu'ehina

Mt 16:13-19; Mk 8:27-29

18Mone yupahi Yesu ai'asigo nunumu huto nohigo pana'alobo'a aitoga e'ahana. Asaga bona'magi nani kumu'i hena hibe lite li'ahabe? Yesu enoloka ho'ehina. 19Ya ligo enali luga'amagi: Yoniu nagami folo epolose bo nohibe lite nelago luga'amagi Elaiyau nohibe lite nelago to luga'amagi koyapa'i lu huto huto bona'i fili'ehina aku'i meluguti ho ti'ehibe lite li'ahana yabe. 20Ai pana'alobo'a enoloka ho'ehina: Lenali nani kumu'i kiyi'afu nohibe lite lenekesa nekehelibe? Yesu ya luto enoloka hago Pitau ma luto ka'alo lu'ehina: Kai Hu'mau koho lifi'ehina pana'a Mesia nohane lu'ehina.

Yesu gabu ginogo fililina kaga lu'ehina

Mt 16:20-28; Mk 8:30-9:1

21Yesu suguna ka panana'a amuya ka ma luto lu epi'ehina: Bo mone'mofihi lenali mana kaga lu meemilo. 22Kokulumaguti limi'ehina Bo sipi gabu'i gilenogo enali olopa bona'i to sipi mono noto kaba bona'i to keya ka babafi bona'i enali enemegesa hu nimite nani'i nehelenogo fili'ohunagati aku'i loegi monegi yupahi minoloto Hu'mau nele'mo ho tilibe luto Yesu lu epi'ehina.

23To ai ma luto lu epi'ehina: Bo moneuba nani hiti alube lutomo ai'amu'i ekesa yigi fatoga mololoto malipu yafa'a asaga yupahi nani ana huse'na suhi li saga huba huba nohuto nemege'i meleno. 24To bo moneuba ai'a komopa'a li tokolo huto lu ule'ale huto minalina aliha'a mino bati huse hepato mebuse meha'a minigilina'mu yabe. To bo moneuba nani kumu luto komopa'a nanitoga molo nimito minalina aliha'a meha'a he'milina meminigise mino kosaba'na huto hilina'mu yabe. 25To bo moneuba lili'na amuya moloto liloto yogo foya bo huto minoto asaga'na melugu ninana ai li su holoto minoto ai'a komopa'a li sibina huto meha'a minigilenogo aliha'a ana yogo fe'noha'auba li buto bito he'malina ya'mana asaganauba hena huto he'malina ni'ibe? 26To bo moneuba nani kumu to kaga'ni enelepise'namo'mu lesa linogo to megesa hu niminogo aliha'a Kokulumaguti limi'ohuna Bo hiti Hu'ma hiti agelo'amagi hiti ya'ma fana mehenaguti alana yupahi ana bomofihi nemegesa hu noemito minalube. 27Lenekesu ka'ni meheno. Yatai nani lu nolepube, luga ma ho tite nehana mefilise nehite Hu'mamofihi kapo'a huto hilina enali yata'a bu gelete fililana'mu yabe.

Yesuhi gufa'a i gelehe huto fato suhi hu'ehina

Mt 17:1-8; Mk 9:2-8

28Asaga kaga lu epiloto salele mone minoto Yesu ai Pitahi Yonihi to Yemesigihi enele'moto numuna hilune lite kosagu ti'ahana. 29Yesu nunumu huto nohigo okaba'a fato suhi huto huto huloto gukete'a koholi logo huloto gulu gulu luto fi besa lo'ehina. 30Mele'isi analo bo loemale'i Yesu hiti kaga beto hi'ahana. Ana bole etali Moseugo Elaiyaugo neha'ibe. 31Etali kokulumamofihi fana meha'a hiti nehetilete Yesu Yelusale hepalugu Hu'mau lu eto'ehina kapolo moloto fililinamofihi ka'a lugo keheligo hi'ahana. 32To Pitagi lalu'afugi kosele'ani enehete enubu'i nokoto kalune'mu nehabe. Kelete'ani ho tite gili hite Yesuhi fana to'ehinana to koyapa bomale'i ho ti'aha'ina bu ge'ahabe. 33To bomale'i Yesutogati he'mite bila'igo Pitau Yesu ma lu emi'ehibe: Tisao, lali mana bu go'ohunanaga bati huto nominone. Lali yege nopo loegi monegi gilune. Kai'naka mone to Mosehi mone Elaiyahi mone ya huto gilune, Pitau luto ai lesa nohuto'a ekesa mekeheli'ehina. 34Ya noligo enalitoga sopohi gilago samapagu pana'alobomagi minete sipi koli hi'ahana. 35Yalo'i sopopoguti nogo'a moloto ma lu'ehibe: Ya'ma bo nani'ni pana'ni nohibe. Nigi moneko pana'ni le'mo ho ti'ohuna pana'ni ka'a kehelilo. 36Ya luto lu su ho'ehigo Yesu ai'asigo fa'mene nohinagi bu ge'ahabe. Pana'alobomagi bu ge'ahanana asaga'i suguna hite fato bona'i kaga mone meepise nehite mine'ahabe.

Yesu pana'i mone foipa feleuba komopa'agu ni'ina li he'mi'ehina

Mt 17:14-18; Mk 9:14-27

37Mone kanagu enali kosa he'mite nelimigo babu bona'i li nupa hite ete Yesuhi kapogu bu ge'ahana. 38To bo moneuba ana bona'magi folagaha'aniguti kehe ito ma lu'ehina: Tisao, kai yege pana'ni bu gobo. Nani moneko pana'ni nohibe. 39To foipa fele moneuba ana pana'i nu nokigo ai sipi kehe ilata nohibe. Ya nohigo ana foipa feleuba ana pana'i nu kito melugu le'mo ho kago melugu afoya tibibi huto nokago bagalugati gele yau yau huto libi'na limilata nohina yabe. Ya nohigo ana pana'mofihi gufa'a hetito sibina huto mele'isi mehe'mi etose'na nohibe. 40To nani koko pananaka le'mo bati hu etalo luto enoloka honamo enali le'mo bati mehilana'a hi'ahabe. 41Yesu ka'alo lu'ehina: Akae. Lenali yatai kanalo boana'ise, lenali ka kehelise'natini meminabe to komopatini bebe soto meminolata hibe. Henaki yupahi lenali hiti nani minoto keheli sibinanatini kofeli'ali nohube? Panaka le'moto maga obo. 42Ya noligo ana pana'a noago ana foipa feleuba le'mo ho kago melugu koloto kesepu kesepu noigo Yesu ana foipa felemo ka emekito ana pana'i le'mo bati huloto afo'afihi ana pana'i emi'ehina. 43To asaga boana'i Hu'mamofihi sipi amuya'a bu gelete enali hetofa suhi hibe lilete enegelo bi'ahabe.

Yesu fililina ka'a mone hiti lu epi'ehina

Mt 17:22-23; Mk 9:30-32

Boana'magi enali sipi amuya'amu enegelo nebigo Yesu pana'alobo'a ma luto lu epi'ehina:
44Ma'asi ka mone lu lepilube'mu nohuna lenekesu meheno. Alihi bona'magi Kokulumaguti limi'ehina Bomofihi le'mete bite naga'i emilago Hu'mau keheliloto lu laga mehilibe. 45Ya lina enali ana ka hapa'a mekeheli'ahana yabe. Ana kamofihi hapa'a fala kito ni'igo enali keheli hokolo mehite aku'i loka halupi hena hilupi lite loe lae hite enelesa lu'ehina yabe.

Kiyi'afu ai sipi bo nohibe?

Mt 18:1-5; Mk 9:33-37

46Yesuhi koko pana'amagi enali'aniguti kiyi'afu sipi nohibe lite lilete kenasabo bi'ahana. 47Yesu kaga nelana akeheliloto ai yagapana'i mone metoga le'mo ho tiloto 48ma luto lu epi'ehina: Bo moneuba ma lagaso yagapana'i nani kumu he'malina ai nani'i nehe'malina'mu yabe. To bo moneuba nani'i nehe'malina ai nani'i noho lifigo limi'ohuna bo he'malina'mu yabe. Bo mone folagahatiniguti nesi bo laba huto nohilina ai sipi bo nohibe.

Bo moneuba fatehatini lolo mehilinaya lenali lenalalutinifu yabe

Mk 9:38-40

49Yoniu lu'ehina: Kaba Bo, bo moneuba kai kigi hoto foipa fele li he'mi he'mi nohigo bu goloto ai lali nagaluguti menohigo ya mehubo luto lu laga hu eto'ohune. 50Ya ligo Yesu lu'ehina: Lenali lilina'a laga mehi etalo, ai fatehatini legi huto menohina ai lenali lenalalutinifu yabe.

Samalia bona'i luga'amagi Yesu hepatigu metilibe li'ahana

51Hu'mau Yesuhi le'malina kana'a leba tago Yesu Yelusale hepato kapo moloto bilube luto ekesa kehelite mino'ehina. 52Ai bona'i lugufa kohe tete kaga lite Samalia kegi'amofihi hepato mone bite anana anana li loloba nehi etenogo ai alihi bilube luto enoho lifi'ehina. 53Ya hinamo Samalia hepato bona'momagi enali Yelusale hepato bilube'mu nohibe lana akehelilete enali Yesu hepatigu mealibe lite be metigi'ahana yabe. 54Yesuhi koko pana'a Yemesiugo Yoniugo ya'ma hana hapa'ani bu gelete etali Yesuhi loka he'aha'ina: Sipi Bo, kai kekesa nokehelita kokulumalugu logomu'i kehe inogo ma bona'i oto enoloboto su halina bati huto ni'ifihe? 55Ya lite ha'igo Yesu i gelehe huto: O'e, luto ka etemeki'ehina. 56Ya hulago enali ana hepa'i he'mite fato hepato bi'ahana.

Bo mone Yesuhi mege'i malalube'mu hu'ehina

Mt 8:19-22

57Kapo melete nebago bo moneuba Yesuhi ma luto lu emi'ehina: Bula ola hilataga nani kemege'i lefelili hilube lu'ehina. 58Yesu ma luto lu'ehina: Ya hilapi? Nani lipoti nokumube. Lopi kalamagi mehi kapolugu minago namamagi yafagu noha'ani minago hu'ehinaya Kokulumaguti limi'ehina Bouba basu bito ko fulu hilina hepa'a meni'ibe. 59Yesu mone bomofihi: Nemege'i molobo luto lu emi'ehina. Ya ligo ana bouba ma luto lu'ehina: Sibi Bo, yata'a nani buto afo'nifu fililenogo keli ho etoloto'ni yabe. 60Yesu ma luto lu'ehina: Kai he'mitogo filise bona'i suhi hite komopa'ani menimise'namagi fili'ehina bona'i keli halabe. Kai buto Hu'mamofihi kapo'a kumu lu yege homofa'na hubo, luto Yesu ana bo lu emi'ehina yabe.

61To bo mone fatouba ma lu'ehina: Kemege'i malalunamoya negeba hu'ehitogo yata'a nani buto lalameha'ni nayahi epito soso hu epelenogo'ni yabe, luto Yesuhi lu emi'ehina. 62Yesu ma luto ana bo lu eto'ehina: Bo moneuba ke'muya kifilube'mu golaga'aga minoloto to megesa'aga bu go bu go hilina ke'muya kifilina'a bati mehilibe. To ana huto bo moneuba nemege'i malalube'mu minoloto koyapa minose hapa'amu ekesa yigi yigi hilina bo ya'ma ai Hu'mamofihi kapo'alo tilina bati mehilina'mu yabe.

Copyright information for `BEF