Mark 10

Bouba liha'a le'mo he'milina ka Yesu lu'ehina

Mt 19:1-12; Lk 16:18

Yalo Yesu to pana'alobomagi anagati he'mite bite Yutia kapogu bite'ani to Yotani nagami muya beletoga ni'ina kapogu bi'ahabe. To anagu babu bona'magi Yesutoga ete li gehesa nehago ai mone yupahi hiti kaga lu epilata huto mino'ehibe. Ai hapa'a ya huto ni'ina yabe.

To Felosi bona'magi ai'i fi taga hi etalune'mu nehite ete ma lite loka he'ahana: Ma bose. Bo moneuba liha'a le'mo he'milina'a ya'ma bati hu'ehifi bati mehu'ehibe. Kai lu limibo. Ya lite lago ai ma luto lu epibe: Moseu hena ka luto koyo'ehina nekehelifiye? To enali ma lite lu emi'ahana: Moseu ma luto lu'ehina: Bo moneuba liha'a le'mo he'milube'mu nohuto ai yata'a fayahi mone goto emiloto yalo le'mo he'milina'mu yabe. Moseu ya luto koyo'ehina yabe. To ya lago, Yesu ma luto lu epi'ehina: Moseu lenali komopatini efahi fi'ehina bo nehago keheli'ohuto'a ana ka luto koyo'ehina yabe. To koyapa Hu'mau asaga'na hapi fito li huto hu'ehina kanagu ai ma lu'ehina:Bo hiti a'i hiti li huto hu'ehina yabe. To yalo ai ma luto lu'ehina:Bouba ito'afinogo afo'afinogo he'mi etototo liha'a nohinalo buto minalibe. To anaga bigo, etali li nupa hite minete kogunale lolo hite minala'ibe. Hu'mau ya luto lu molo'ehigo, ya'mu etali alobole loe bonate meminese moneko bona'i minala'ina ni'ibe. To ya higo, Hu'mau le'mo nupa hu'ehina alobole, lenali bona'magi loko mehi etatalo. Yesu ka'anilo ya luto lu'ehina.

10 To alihi nonugu tite neminete, pana'alobomagi ana kaga'mu loka he'ahabe. 11 To ai ma luto lu epi'ehina: Bouba liha'a le'mo he'miloto to fato a'i lilina bouba, ai gumina nofalabe. 12 To ana huto, a'uba baha'a he'meto fato bolo bilina a'uba, ai ana huto gumina nofalabe. Ya'ma suhi sigimi hilata nehana yabe.

Yesu yagapana'i lusa gi epolo'ehina

Mt 19:13-15; Lk 18:15-17

13 To yalo, bona'magi yagapana'ani aitoga enele'mete ete Yesu bako hu epoloto enunu kito lusa gi epalalibe lite enele'mete neago, pana'alobo'amagi ka epekite lu laga hi'ahabe. 14 To ya hago, Yesu bu enogoto keheliloto pana'alobo'a sipi ka epekito ma lu epi'ehina: O'e. Ya mehilo. Lagaso yagapana'magi nanitoga bati hite alana'mu yabe. Lu laga mehilo. Yagapana'i suhi hite nemina bona'magi Hu'mamofihi kapogu tilana'mu yabe. Lusiga lu nolepube. 15 Bo moneubafi moneuba lagaso yagapana'mofihi suhi huto Hu'mamofitoga agoya hu emilina bouba, ai Hu'mamofihi kapogu tilina'mu yabe. To bo moneubafi moneuba lagaso yagapana'mofihi suhi huto Hu'mamofitoga agoya hu meemilina bouba, ai Hu'mamofihi kapogu metilina'mu yabe. 16 Yesu ya luloto, yagapana'magi enunu kito yapo enugufalo li moloto bebe sana ka lu epito mino'ehina.

Yogo fe'nohi babu luto li nupa hu'ehina bomofihi ka'a

Mt 19:16-30; Lk 18:18-30

17 To alihi Yesu kapo malalube'mu nohigo, bo moneuba hololu luto oto aitoga lahupa nohi fito ma luto loka ho'ehina: Oho afo'nigabe. Bati bo nohane. Nani hena'ni hulenogo'ni nemehuba minoba minoba hilibe? Lu nimibo. 18 Ya ligo, Yesu ma luto lu emi'ehina: Kai nani kumu henabe luto bati bo nohane luto nolane? Asaga bona'magi bati bo menehana yabe. Hu'mau ai'asigo bati bo nohina yabe. 19 To Moseu keya ka lu'ehina ka'a asaga'i kai keheli'ahata ni'ibe. Mone:Kai bona'i ho mefilibo,nolibe. To mone:A'i gumina mefolobo,nolibe. To mone:Gumina melibo,nolibe. To mone:Ka foya nelinogo kai faga faga melubo.To mone:Soya ka luto fe'nohi melibo. To mone:Itokafinogo afokafinogo kaga'atiti keheli etimibo. Ya'ma keya ka kai akeheli'ahata ni'ibe. 20 To ya ligo, ana bouba ma luto lu emi'ehina: Oho, afo'nigabe. Ya'ma keya ka asaga'i lagaso'asi minona kanaguti kehelito mege'i mololata nohuna yabe. 21 Ya ligo, Yesu ai'i bu goto minoto ginaga nofigo ma luto lu emi'ehina: Kaika hapaka moneko'isi mehu'ahatana ni'ibe. Kai buto fe'nohakaloti'i mina'a lilotoka ito buto enumuhi menina bona'magihi epiletogomo Hu'mau kokulumaga kemetahanaka yege yege'na molo ketalina'mu yabe. To ya'ma hulotoka oto nemege'i molobo. 22 Ya ligo, ana bouba keheliloto li pisigito mino'ehibe. Hena'mube? Ai'a fe'noha'a babu luto ni'igo kehelito komopa'a keta higo li pisigiloto nohinagati bufa hu'ehina yabe.

23 Ya higo, Yesu bu goto bona'i bu go beloloto pana'alobomagihi ma luto lu epi'ehina: Ke. Yogo fe'noho bona'magi Hu'mamofihi kapogu tilana keta gofa nohibe. 24 Ya ligo, pana'alobomagi ka'amu'i topa hete: Abo. Keta hina ka nolibe lite ai lu eminogo ai lu eminogo hite nehago Yesu ka mone hiti ma luto lu epi'ehina: Pana'alobo'nise. Enali yogo fe'nohi enemetahana'ani ni'ina bona'magi Hu'mamofihi kapogu tilana keta gofa nohibe. 25 Kameli yagauba neka hokolo kapo'agu kikipa ho'ehina'a fa'mene bati huto bilifiye? O'e. Amuya moloto fito foloto bilina'mu yabe. To ana huto fe'noha'a silaga'i ni'ina bouba Hu'mamofihi kapogu tilina keta gofa hu'ehina yabe. 26 Ya ligo enali lusina hite topa hete ma lite lu emi'ahana: Yahi, hiya bona'magi Hu'mamofihi kapogu tilabe? Kiyi'afu bati hinogo Hu'mau buto bilina ni'ibe? 27 Ya lago Yesu enali enamapahi fito ma luto lu epi'ehina: Bona'magi lolo mehilana'a huto ni'ibe. To Hu'mau ai bati nohuto enehe'malina'a huto ni'ibe. Ma melugu bona'magi lolo hilana'a keta hilina asaga'namofihi enali lolo mehilana'mu yabe. Hu'mau ai amuya'a hiti bouba keta'a hiti'namofihi lolo hilina'mu yabe.

28 Ya ligo Pitau: Laliya nasana asaga'nati he'mitoti kemege'i moloto o'ohuta yabe, luto noligo Yesu ma luto lu'ehina: 29 O'yo, to lusiga lu nolepunagi kehelilo. Bo moneubafi moneuba nani kumu luto to ka lamana'amofi kumu luto nasana'a he'milina bouba fa'mene minalifihe? O'e. Nani kumu to ka'nimu luto hepa'agati to me'agati he'mito, to gonamu tamu'amagi etali'agi afo'agi ito'agi he'mi epalalina bouba ai yatai ma melugu nohuto'a, to bona'magi kalana'i nehi etago nohuto'a ai asaga'na lilibe. Hepa'a hiti, me'a hiti, gonamu tamu'a hiti etali'agi hiti ito'agi hiti yagapana'a hiti yege yege'na lilibe. Yatai ma melugu nohuto lilina'mu yabe. To alihi yupahi, kokulumagu mino kosaba huse'na liloto to minoba minoba hilina'mu yabe. 31 To yatai sipi bo nehana'amagi mone'a aku'i alihi fa'mene bo minalabe. To yatai fa'mene bo nehana'amagi mone'a enali alihi sipi bo minalabe. Yesu ya luto lu epi'ehina yabe.

Yesu fililinamofihi ka'a mone hiti lu'ehina

Mt 20:17-19; Lk 18:31-34

32 To alihi, enali Yelusale hepatoga bilune'mu nehite kapo melete'ani to Yesu kohe toto nobigo pana'alobo'amagi enuluhaya bigo kapo nebago to enali enemege'i melete nebana boana'magi koli hite bi'ahabe. 33 To Yesu pana'alobo'a 12 magihi enele'moto buto'a, bona'magi alihi hi etalana ka hapi fito lu epito ma lu epi'ehina: Bu galo. Lali Yelusale hepatoga notubune. To anaga sipi mono bomagi to mono ka negana bomagi hiti enali Kokulumaguti limi'ehina Bomofihi ka foya li etelete fisa ilana'mu yabe. Ya hilete le'mete bite fegutoga bona'magitoga he'mi etalana'mu yabe. 34 To enali kiya hi etete to gufa'alo libi'na hetete osahi emite yalo ho fililabe. Filifa huloto loeyagi moneyagi yege yupahi keligu minoloto, yalo aku'i ho tilina'mu yabe, luto Yesu ai'a kumu ya luto lu epi'ehina yabe.

Yemesiugo Yoniugo etali kaba bole minalu'ibe'mu li'aha'ina

Mt 20:20-28

35 To Yesu ya ka noligo, Sepetihi pana'amale'i Yemesigi Yonigi aitoga ete ma lite lu emi'aha'ina: Afoti'agase. Le'ali yatai koloka halu'ina'a kai o'e meluse le'emibo. 36 To ai: Henana hu letetalube? Henana noloka hala'ibe, luto lu etimigo, 37 etali ma lu emi'aha'ina: Alihi Hu'mau sipi bo kele'mo ho tilenogo le'ali sogakalo lamagakalo luga luga minalu'ina bati hilifiye? 38 Ya nela'igo Yesu ma lu etimi'ehina: Letali noloka ha'inamofihi mekeheli'aha'ibe. Nani ekesa'a nagami'i naluna legitana huto hu netalina ni'igi letaliba ana konugutiba bati hite nala'ina ni'ifiye? To nani alihi nugupisalo keta hina nasana kofiluna'a letugupisalo tilenogo letaliba bati hite kofila'ina ni'ifiye? Ya ligo, etali: Le'ali bati huto kofilu'ibe lite li'aha'ina. 39 Ya la'igo Yesu ma luto lu etimi'ehina: Ma'naka. Letali ya'ma nagami konuguti nala'ina'mu yabe. To ana nani nugupisalo alihi tilina'a letali ana hite kofila'ina'mu yabe. 40 To ya'ma lamaga'nigago soga'nigago minala'inamofihi ya'ma nani foya'ni meni'ibe. Afo'nifu, Hu'mau ai le'mo bati hu etoto'ehina bomale'i luga luga'ni minala'ibe. Yesu ya lu etimi'ehina yabe.

41 To fato pana'alobo'a 10 magi ya'ma ka kehelite Yemesihi Yonihi sipi ka etemekilune'mu nehago, 42 Yesu enali kehe igo ago ma luto lu epi'ehina: Lenali fato bona'magihi hapa'ani keheli'ahana yabe. Enali kibina bo'animagi kaba bo'animagi hutu hata hite enugufa limo titi hite ka epekiba epekiba hite neminana yabe. 43 To lenali ana suhi hite meminalabe. Lenalitoga sipi botini lolo hilina bouba ai lili'na bonatini nohilibe. 44 To kibina botini lolo hilina bouba ai kele kele panatini nohilibe. Lenali hapatini ya huto minalibe. 45 To Kokulumaguti limi'ehina Bo ai henabe luto melugu noabe? Ai asaga bona'magi kele kele'i hi eminogo kibina bo'ani minalube luto o'ehifiye? O'e. Ai kele kele'i hu epalalube luto to enehe'malube luto o'ehina yabe. To bona'magi ai'i he fililenogo gufa'aloti'i silaga bona'i foipanaguti mina fito pa so epalalube luto o'ehina yabe. Yesu ya luto lu epi'ehina yabe.

Bu pisi lu'ehina bo Batimeusi Yesu le'mo bati hu'ehina

Mt 20:29-34; Lk 18:35-43

46 To enali bite Yeliko hepatoga nehetite mine'ahabe. To ana hepatogati, Yesu pana'alobo'amagi hiti babu bona'magi hiti he'mite bite nebago bu pisi lu'ehina bouba gi'a Batimeusi, Timeusihi pana'a yagi, ana bouba me kapo beletoga'a minoto bona'i ukimi ukimi huto mino'ehibe. 47 Ya huto minoto'a bona'magi: Ya'ma Nasalete hepalo bo Yesu noabe lite nelago, ai keheliloto ma luto kehe iba iba huto mino'ehina: Akae. Akae. Yesuo. Kai Tebitihi naga'i yale. Keke'i lu netobo. 48 Ya ligo, asaga bona'magi: He'mibo. Lege'nobo, lite ka emekigo ai aku'i sipi nogo moloto amuya moloto ma luto kehe iba iba hu'ehina: Oho. Tebitihi naga'i yale. Keke'i lu netobo. 49 Ya luto luba luba higo, Yesu keheliloto'a kapogu he'mito buto: Ana bo eno, luto lu epigo enali bu pisi lu'ehina bomofihi kehe ite ma li'ahana: Ma bo yale. Kofokehi lubo. Kai kumu kehe noinagi ho tito aitoga bubo. 50 Ya lago, ana bouba gutalafa'a he'miloto topa hoto hololu luto Yesutoga buto neheti'ehina. 51 Ya higo, Yesu ma luto loka ho'ehina: Nani henana hu ketalube? To bu pisi lu'ehina bouba ma luto lu emi'ehina: Oho. Babafio. Nubu'ni li bati hu netoletogo aku'i bu goto minalube. 52 To Yesu ma lu emi'ehina: Kai nanitoga keheli ule'ale nohatalo'i kele'mo bati nohunagihe. Ya hugo hepakaga bati huto bubo. Ya ligo, ana'asi bu'a bati higo bu goto Yesuhi mege'i moloto kapo molo'ehina yabe.

Copyright information for `BEF