Mark 11

Yesu sipi bo legi huto Yelusale hepalugu ti'ehina

Mt 21:1-11; Lk 19:28-40; Yn 12:12-19

To enali Yelusale hepa'i lebato bite Oliba kosalo tite, hepa'i mone gi'a Betani, bege ligite bite mone hepatoga gi'a Betefasi, anaga neheti'ahabe. To Yesu pana'alobo'a loemo ho lifilube'mu nohuto ma luto lu etimi'ehina: Letali miya ni'ina hepatoga bite tilete bihu kasiha'asilo toki yaga naga i'ahana gulu hete nanitoga le'mete aliyo. Ana toki yaga kosaba yaga yagi, bona'i megesalo meti'ahana ni'ibe. Ana toki yagamo le'mete aliyo. To bo moneubafi moneuba: Henabe lite neli'ibe luto letoloka nehenogomo letali ma lite li epiliyo: Kibina bouba kehe noinagihe. To aku alihi le'oho lifinogo le'moto alu'ina'mu yabe. Letali ya lite li epiliyo. To enali mele'isi kehelite ana toki yaga nanitoga ho lifilabe. Yesu ya ligo, etali kehelilete bite ana hepalugu tite, to kugumalugu nohi kasito toki yaga mone naga i'ahago, bu gete gulu hete le'mete neba'igo anaga neminana bomagi bu gete: Henabe lite toki yaga gulu hete le'mete neba'ibe, lite lago, etali Yesu lu etimi'ehina ka nona'a lu epi'igo enali kehelite: Ana, le'mete biliyo, lite li'ahana yabe. Bite toki yaga Yesu nohinalo le'mete ba'igo enali megesa'alo naku'ani lu malago Yesu analo tito minoto kapogu bu'ehibe. To babu bona'i mone'amagi naku'ani kapogu li malago, to mone'amagi kifiguti yafa haya hetigite lite ete kapomolo tili tele hilete li melela melela hite mine'ahana. To kohe tete bi'ahana bona'magi to mege'i bi'ahana bona'magi hiti bite kanipo fite ma lite fokehi li'ahana: Bogiyo. Fokehi lilo. Hu'mamofitogati kibina boti noabe. Ai kumu fokehi lilo. Oho. Afotifi Tebitihi naga'i noabe. Kibina bo ho tito minalina kana ahuto hibe. Anana'mu fokehi lilo. Hu'mamofi kumu fokehi gofa lilo.

11 Ya lite nelago, Yesu Yelusale hepatoga nehetito tito buto sipi mono nonugu ti'ehibe. Tito ana nonugu ni'inanamofihi asaga'i bu go beloloto to sinihi gigo, ai i behe huto anaguti he'mito buto pana'alobo'a 12 magi hiti bite Betani hepatoga nehetite mine'ahabe.

Yesu sifehi yafa gumi'i ho'ehina

Mt 21:18-19

12 Kelete etepo, Betani hepatogati he'mite nebago Yesu kau'na hago, 13 to sifehi yafa mone haya'a hesi'ehigo foto'i bu goto: Legeya ho'ehilibe, luto anaga bu'ehibe. Buto bu goto to legeya'a halina yupahi meo'ehigo ya'mu legeya meho'ehina haya'a anasi ni'igo bu go'ehina yabe. 14 Bu goto ma lu'ehina: Abo. Ma yafa yale. Bona'magi alihi kanagu legeya'aka ligite menalabe. To ya noligo pana'alobo'amagi ka'a keheli'ahana yabe.

Yesu sipi mono nonugu ti'ehina

Mt 21:12-17; Lk 19:45-48; Yn 2:13-22

15 To bite alihi Yelusale hepatoga nehetigo, Yesu sipi mono nonugu tiloto bu goto ipaluga logo bigo ma hu'ehina. Mono nonugu bisinisi melete mina'a lilata hite neminana bona'magihi ana nonuguti enele'mo tufago bi'ahabe. To efahi senisi hila bona'magihi hita'ani li gelehe hu he'migo, efaha'ani tili tele hu'ehibe. To namaloti'i mina'a lilata hite neminana bona'magihi nebelusa'ani li gelehe hu he'mi'ehibe. 16 To mono nonugu koko kapo'ani nemalana bona'magi lu laga huto kapo hekini lo'ehibe. 17 To asaga bona'i ma luto kaga lu epi'ehina: Hu'mamofihi kagu henabe luto koyo'ehina ni'ibe? Ma luto koyo'ehina:Nani noha'nigu asaga bona'i noto noto bona'i enali nunumu hite minalabe. Ya'mu nunumu nopo yabe lite gi halabe.

Ya luto koyo'ehina ni'inagi, aku lenaliya ana nonugu efahi gumina nelina yabe. Ya nehago guminalo nohi alolo hu'ehina yabe, Yesu ya luto ka epeki'ehina.

18 To ya higo, olopa mono bomagi to mono ka negana enali ya hu'ehina'mu'i kehelite yalo Yesuhi he fililana kapo'a sa sa hi'ahabe. To silaga bona'magi Yesuhi kaga'amu fokehi lite nehago yamofihi enali ai kumu koli hite ho mefilise fa'mene mine'ahana.

19 To utehi noligo, Yesugi ana olopa hepatogati he'mite bite kifi hepaluga ke'ahabe.

Sifehi yafa hosopa i'ehinamofihi hapa'a

Mt 21:20-22

20 To etehi folugu'i neete sifehi yafa haya'a hiti lufusa'a hiti asaga'i lo hosopa ito lo i pigi'ehigo bu ge'ahabe. 21 To Pitau bu goto Yesuhi ka'a beto huto ma lu'ehina: Oho. Afo'nigabe. Bu gobo. Sifehi yafamo kai gumi'i ho'ahatogo alo i pigi'ehina yabe. 22 Ya ligo Yesu ma luto lu epi'ehina: O'yo, Hu'ma amuya bo nohinamofitoga keheli ule'ale hite minalo. 23 Lusiga lu nolepube. Lenali bo moneubafi moneuba mana kosamofihi ka emekito: Managati he'mito buto sipi nagamilugu folobo, luto noluto to komopa'agu ekesa loe lae mehuse ma'naka luto huto hilibe luto keheli ule'ale hinogo, Hu'mau ka'a kehelito anana hu etalina'mu yabe. 24 Ya'mu nani kaga lu nolepunagi keheli'ehilo. Kai Hu'mamofitoga nunumu huto ana'ina loka nohotoka, to komopakagu: Hu netalibe luto lama'naka keheli ule'ale huto ya huletogo Hu'mau ai lolo hu ketalina'mu yabe. 25 To numuna hilube'mu nohutoka to bo moneuba koyapa sibina mone hu keto'ehina'a ni'inogomo kai ya'ma hu'ehinana komopakaguti li he'miloto komopaka fulu hino. Ya nohutoka numuna hilane. Kai ya huletogo kokulumalo Afokafu Hu'mau ana huto kaika foipanaka he'mi ketoto kaitoga komopa'a fulu hilina'mu yabe. 26 To kai bona'magihi foipana hi kete'ahanana komopakaguti mehe'miletogo Hu'mau kokulumalo Afokafu ana huto kaika foipanaka ya'ma mehe'mi ketalina'mu yabe. To kaitoga komopa'a fulu mehilina'mu yabe.

Kiyi'afu koho lifi'ehina ni'ibe lite Yesuhi loka he'ahana

Mt 21:23-27; Lk 20:1-8

27 To Yelusale hepatoga mone yupahi hiti neheti'ahana. To Yesu sipi mono nopogu humofa'na nohigo sipi mono nohi kaba bomagi hiti to mono ka negana bomagi hiti, 28 enali aitoga ete ma lite loka he'ahana: Kiyi'afu sipi bo nohane luto koho lifigo oto ya'ma hulata nohane? Kiyi'afu lu kimi'ehigo ya suhi lulata nohane? Lu limibo. 29 Ya lago ai ma luto lu epi'ehina: Nani ana huto lenoloka halube. Lenali lenoloka haluna'a yata'a ka nona'a lu nimilenogo nani alihi noho lifi'ehina bomofihi gi'a ho lepilube. 30 Mafi. Yonihi, kiyi'afu ho lifigo oto nagami folo epolo'ehibe? Kokulumalo bouba ho lifigo oto nagami folo'ehifi, melugu bona'magi ho lifigo oto ya hu'ehibe? Lenali ya noluna kagalo lu nimilo. 31 Ya luto ligo enali musi musi ka lite ai loka hago ai loka hago hite ma li'ahana: Henabe kaga lu emilune? Lali: Kokulumalo bouba ho lifi'ehibe, luto lu emilenogo ai: Ya ya, henabe lite agoya hi meemi'ahabe? luto loloka halibe. 32 To lali: Melugu bona'magi ho lifi'ahabe luto lilupiye? to asaga boana'magi Yoni kumu hetofa bo, lu huto huto bo yabe, lite nekeheligo ya'mu enali koli nehite Yesutoga bite ma lu emi'ahana: Lali mekeheli'ohune. 33 Ya lite ka'alo lu emigo ai: Nani ana huto noho lifi'ehina bomofihi gi'a ho melepiluna'mu yabe, luto lu epi'ehina yabe.

Copyright information for `BEF