Mark 12

Foipa bomagi bai naga'i foya kaba hi'ahanamofihi fono ka

Mt 21:33-46; Lk 20:9-19

To yalo, Yesu kaga lu epilube'mu nohuto fono ka ma luto lu epi'ehina: Bo moneuba naga'i foya kofoto to gegisa fi bego bego huto'a, to kaba bo minalana noho gito'a, to naga'i legeya'a li letite bai nagami'i lolo hilana keli mone kifiloto'a, yalo kaba bomagi enele'mo ho tiloto'a, fato kapogu buto mino'ehibe. To alihi legeya hoto uya'i lago, legeya'a mone ligilube luto kele kele pana'a mone ho lifigo bigo, enali luba sabo hite osahi emite kehe neigo, ai legeya meligise fa'mene o'ehina yabe. Ya hi etago, foya afo'afu kele kele pana'a mone hiti ho lifigo bigo, enali ana hite osahi emite lataha'a i loko hite golahi hilete bati mehina suhi hi ete'ahana yabe. To yalo kele kele pana'a mone hiti ho lifigo bigo ai'i he fili'ahana yabe. To yalo fato fato yupahi kele kele pana'a fato fato'i enoho lifigo bago enali mone'a osahi epite to mone'a enehe filite ya hi epele'ahana yabe. To yalo foya afo'afu ma lu'ehibe: Nani keto'ohuna pana'ni ho lifilenogo buto ka lu epilenogo ka kehelilabe. Ya luto ai'a pana'a, gi moneko pana'a yagi aimo ho lifigo bigo, enali foya kaba bomagi ana pana'i foto'i bu gete ma li'ahana: Oho. Foya molo lilina pana'a noabe. Lali ho fililototi foya'a laliti lilune. Ya lite'ani ana pana'i le'mete bite he fililete, foyaguti le'mete bite he'mi ete'ahana ya'ma lu'ehina kilihe'i yabe.

To ya hago foya afo'afu keheliloto henana hu epalalibe? Ai keheliloto buto ana foya kaba bomagihi asaga'i enoho fililoto'a, foya fato bomagi epinogo kaba hilabe. Yesu ya lu epi'ehina yabe. 10 To ai ma luto ka mone hiti lu epi'ehina: Lenali mono bukugu ya'ma leka meso'ahafiye? Ma luto koyo'ehina ni'ibe:

  • Lili'nalo bomagi ya'ma efapo
  • bati mehina efahi yabe,
  • lite he'mi'ahana.
11  Yatai ana efahuba hetofana huto hu'ehina. Sipi Bouba ai ya suhi li huto higo lali fokehi lito nominone . Lenali ana ka mekeheli'ahafiye? 12 Yesu ya ligo, enali sipi mono bomagi kehelite: Lali'i ka lemekito ana fono ka lu'ehina yabe lite kehelite Yesuhi naga'i emilube'mu hi'ahana aku'i asaga bona'magi kumu koli hite he'mite bifa hi'ahabe.

Takisi efahi he'mise hapa'amu Yesuhi loka he'ahana

Mt 22:15-22; Lk 20:20-26

13 Bite yalo Felosi bomagi luga'a to Heloti naga'i bomagi luga'a hiti enoho lifigo, 14 bite Yesuhi mi'i malalune'mu nehite aitoga ete ma li'ahana: Babafio. Kai lusiga lulata bo nohane. Kai Hu'mamofihi ka'a ma'naka luto lu lepise bo nohane. Bona kumu koli mehuse bo nohuto Hu'mamofihi ka'a lusiga luto lu epise bo nohatagihe. Mafi. Sipi kaba bo, gi'a Sisa aimofihi takisi efahi emiluta bati hu'ehifi bati mehu'ehibe? Ana efahi emilupi meemilune? Ya'ma Lomu gamanimofihi keya ka mege'i malalupi, he'milune? Kai lu limibo. 15 Ya nelago, Yesu enali ai'i fi taga hilune'mu enipa nehago kehelito'a ma luto lu epi'ehina: Lenali henabe lite nimi'i nemalabe? Efahi legeya'a mone ite ete nimitogo bu galube. 16 To ya ligo, enali efahi mone ite ete emilago, ai li saga nohuto ma luto enoloka ho'ehina: Mana efapolo kiyi'afihi meha'a hiti fayaha'a hiti ni'ibe? 17 Ya ligo, enali: Sipi kaba bo Sisahi meha'a yabe, lite lago ai ma lu epi'ehina: Ya. Ana, Sisahi nasana'a Sisahi emilo. To ana huto Hu'mamofihi nasana'a Hu'mamofihi emilo. Ya ligo, enali hetofa ka nona'a epi'ehinamofi hiti to ai kumu topa hete ka melise fa'mene mine'ahana yabe.

Bona'i fili'ahanaguti ho tilana hapa'amu Yesuhi loka he'ahana

Mt 22:23-33; Lk 20:27-40

18 To yalo Satusi bomagi, enali bona'i fili su helete alihi aku'i ho metilabe lite nelana bomagi, enali aitoga ete ma lite loka he'ahana: 19 Babafio. Moseu ma luto koyo'ehina keheli'ohune:Bo mone yagapana'i meketose fililenogomo liha'a gona'auba lilibe. Gona'auba liha'a liloto yagapana'i ketolenogo ya huto go'afihi biha'a huto hilabe. Moseu ya luto koyo'ehina keheli'ohune. 20 To mafi. Koguna 7 mine'ahabe. To yege bouba ai liha'a lito to yagapana'i meketose fililago, ai megesa'alo bouba ana a'i li'ehibe. 21 To ai ana huto yagapana'i meketose fililago, ai'a gona'auba li'ehibe. 22 To ya huto buto ya'ma kohona silaga'i ana suhi huto ana a'i lite yagapana'i meketese fililago, yalo alihi ana a'uba ana huto fili'ehina yabe. 23 To ya higo, alihi fili'ahanaguti ho tilana yupahi kiyi'afihi liha'a lolo hilina ni'ibe? Ya'ma kogunamagi asaga'i ana a'i li'ahana ni'ibe.

24 Ya lago, Yesu ka'anilo ma luto lu epi'ehina: Ya. Lenali ya hite keheli fetaga nehabe. Lenali Hu'mamofihi ka'a hiti hapa'a hiti mekeheli'ahabe. To Hu'mau amuya'a hiti bo nohigo, lenali menekehelibe. 25 To bona'magi alihi fili'ahanaguti ho tilana kanagu ana'i kata mehilana'mu yabe. To ana'i melilana'mu yabe. Ana kanagu kokulumalo agelomagihi suhi hite minalana'mu yabe. 26 To fili'ahanaguti ho tilana kaga'mu Moseu koyo'ehina ka mone bu mege'ahafiye? Moseu ya'ma i kulu tito lo'ehina yafa bu go'ehina yupahi, Hu'mau hena ka lu emi'ehina ni'ibe? Ai ma luto lu emi'ehibe:Nani Abalahahi kibina bo'a Isakahi kibina bo'a Yakopuhi kibina bo'a nohube, luto lu emi'ehina yabe. 27 Ana ka'amofihi hapa'a ma huto ni'ibe. Hu'mau ai enubu hiti nehana bona'magihi kibina bo'ani nohina keheli'ohune. To ya higo, enali koyapa bona'magi, Abalaha yagi, Isaka yagi Yakopu yagi enali fenene mehise nehabe enali mineme bite nehana yabe, luto nolina ka ya'ma ni'ibe. To lenaliya ya'ma keheli fetaga nehana yabe. Yesu ya luto lu epi'ehina yabe.

Kohe toto yata'a keya ka mone ti'ehina

Mt 22:34-40; Lk 10:25-28

28 To enali Yesuhi kaga ya'ma loka nehago, to Yesu ka'anilo kaga bati huto lu noepigo, mono ka enelepise bo moneuba anaga minoto kehelito oto Yesuhi ma luto loka ho'ehina: Keya ka asaga'i ni'igo, to hiya'a hofa toto be ligi'ehina ka ni'ibe? Lu nimibo. 29 Ya ligo, Yesu ma luto lu emi'ehina: Yata'a ya'ma hofa to'ehina ka ma ni'ibe.Isilaeli naga'i kehelilo. Kibina bo Hu'mau moneko'na nohuto ai'asigo kibina bo nohibe. 30 To kai kibina boka, Hu'mamofihi kemehi emito, keheli emito minalane. Kipakatu kemehakatu komopakatu kugufakatu amuya moloto aimomu'i keheli emito minobo. Yata'a ya'ma ni'igo to analo ya'ma ka mone ma ni'ibe: 31 Kai bonaka kumu kiginaga fito minobo. Kaika kugufaka kaba nohata suhi huto bonakamofihi kaba hu etobo. Ya'ma keya ka loemoya, asaga kamofihi be ligi'ehina yabe. 32 Ya ligo, mono ka enelepise bouba ma luto lu emi'ehina: Oho. Afo'nigabe. Ma'naka nolane. Hu'mau moneko'na nohibe luto lusiga nolane. To ai'asigo kibina bo nohibe luto lusiga nolane. 33 To lali bona'mofita ai kumu lipatitu lemehatitu komopatitu lugufatitu amuya moloto lebesito keheli emiluta bati ka nolane. To bonati'mu liginaga fito lugufati kaba nohuto suhi huto kaba hu epalaluta bati ka nolane. To bona moneuba ya'ma keya ka loemofitoga keheli emilata yauba silaga'namofihi Hu'mamofitoga noemutana to salamana go emutana silaga'i be ligi'ehina yabe. Kai ma'naka nolane. 34 To ya'ma bouba ya huto keheli bati huto kaga lu emigo, Yesu kehelise ma lu emi'ehina: Kai Hu'mamofihi kapo'alo lebato'isi tilube'mu nohane. To ya ligo, bona'magi enali enelesa'ani noligo kaga loka mehese mine'ahana yabe.

Mesia kumu Yesu Felosi bona'i enoloka ho'ehina

Mt 22:41-46; Lk 20:41-44

35 To Yesu sipi mono nonugu minoto ka lu noepito ma luto enoloka ho'ehina: Enali mono ka lu enelepise bona'magi henabe lite Kilisito bo Tebitihi pana'a nohibe lite nelabe? 36 Koyapa'a Tebitiu Hetofa Sikalafu'uba lu emi'ehina ka ya'ma luto ma lu'ehina:

  • Sipi Bo Hu'mau nani Sipi Bo'ni
  • ma lu emi'ehina:
  • Kai lamaga'nilo minotoka,
  • to nani fatehakamagihi enoho su holenogo
  • melugu minelenogo
  • kai kigigusakatu enemegesa'anilo
  • kifita ilane.

37 Ya luto lu'ehigo Tebitiu ana ka luloto Kilisito kumu: Nani kibina bo'ni yabe, luto ya'ma gi ho'ehina. Ya hu'ehigo enali henabe lite Kilisito Tebitihi yagapana'a anasi nohibe, lite nelabe? Yesu ya ligo asaga boana'magi ka'amofihi keheliba keheliba hite ai kumu fokehi li'ahabe.

Keya kaga enelepise bomagihi Yesu lu kuguma hu epolo'ehina

Mt 23:1-36; Lk 20:45-47

38 To yalo Yesu kaga luto lipoti epiloto ma lu'ehina: Lenali mono ka lu enelepise bomagi kumu kaba hu bati hilo lu nolepube. Enali yatama kata lusi hetofa kata hepite maketi hepaluga hutu hata hite humofa'na hite nehago bona'magi enalitoga lipite enebe netigibe. 39 To enali mono nonugu tite'ani olopa bomagihi hetofa nebelusalo tite neminabe. To sipi nose'na nalana yupahi ho tite yafege gelete mine'ahana. 40 To enali keto a'magihi fe'noha'ani be nesilite gumina lilata nehana. To asaga bona'magi kehelite lofokehi lilabe lite ya'mu yatama yatama kaga lite nunumu hite mine'ahana yamofihi hapa'ani ya huto ni'ibe. Ni'inaya alihi Hu'mau ka foya lilina kanagu enali'ani'mu fagalo bona'i nehabe lilina, to osahi sipi'a mone hiti epilina'mu yabe.

Keto a'i moneuba efaha'a lagaso'a mono nonugu he'mi'ehina

Lk 21:1-4

41 To Yesu sipi mono nonugu minoto efahi nehe'mina hepa'mo bu goto minago babu bona'magi ete efaha'ani nehe'migo bu go'ehina. Yaga foya bomagi efaha'ani babu luto anagu he'mi'ahana. 42 Yalo keto a'i moneuba oto efaha'a loe toea anagu he'migo Yesu bu go'ehina. 43 Ya bu goto pana'alobo kehe igo ago ma luto lu epi'ehina: Lusiga lu nolepube. Ya'ma keto a'uba he'mi'ehina efaha'a yauba asaga bona'i he'mi'ahana'amagihi enebe ligi'ehina yabe. 44 Enali efaha'ani silaga'i ni'inaloti mone'a lite ete he'mi'ahabe. To ai muhi menina a'i nohuto efaha'a asaga'i ni'ina to nose'na mina fito nalube luto molo'ehina efaha'a ya'ma ahe'mi su ho'ehinagihe. Yana'mu ai'a hapa'a bati hu'ehinauba enebe ligi'ehibe, luto Yesu ya luto lu'ehina yabe.

Copyright information for `BEF