Mark 13

Sipi mono nohi tele bilana ka Yesu lu epi'ehina

Mt 24:1-2; Lk 21:5-6

To Yesu sipi mono nonuguti he'mito nolimigo, kolo pana'a moneuba ma luto lu emi'ehina: Oho. Babafio. Bu gobo. Ya'ma nohi fela nopo yabe. Sipi efaha nohi ni'ibe. To Yesu ma luto lu emi'ehina: Ya'ma sipi mono nohi bu nogapiye? Bu go bati hubo. Alihi kanagu, ana efaha nohi asaga'i i tobo silenogo, ana efahi asaga'i limo ito mone'isi mone'isi melugu minalibe.

Sipi keta hina nasana fato fato'i huto hilina ka

Mt 24:3-14; Lk 21:7-19

To alihi, pana'alobo hiti ana hepatogati he'mite bite mone kosalo, gi'a Oliba, ana kosalo tilete to miya ya'ma sipi mono nohi bu gete nehago Pitagi Yemesigi Yonigi Atulugi suguna hite ma lite loka he'ahana: Ya'ma sipi efaha nohi i tobo silina kana huto hilina'a lali hiya'a huto kehelilune? Ya'ma luna lana asaga'i hiya kanagu huto hilibe. Lu hokolo hu letobo.

To ya lago ai ma luto hapi fito lu epi'ehina: Nani yatai lipoti lu nolepube. Lenali kaba hilo. Bona'magi bahane hete lenele'mo keheli fetaga hilune'mu nehinogomo, keheli bati hilo. Ya'ma alihi kanagu fato fato bona'magi babu lite lenalitoga melugu huto hilete ete to faga lite nani nigi'ni hete: Nani Mesia bo nohube, lenubuto bise linogofi, nani Mesia bo lenehe'mose nohube linogo, ya hite faga lite lu epite'ani yalo babu bona'magihi enele'mo keheli fetaga hilana'mu yabe. Lenali ya'mu kaba hi bati hilo. Bo moneubafi moneuba lenimi'i molo lalibe, luto nolube. To alihi kanagu hiti, noto noto hepatoga luba hilenogo to luba ka nelinogo lenali kehelite koli mehilo. Ya'ma ma'naka luto huto hilina'mu yabe. To ya'ma kana huto nohinogo me'i su halina kana huto hilube'mu menohibe. Yata'a fato fato naga'magi fato fato naga'i hiti luba hilabe. To mone gihiti bomofihi naga'amagi ho tite mone fato kibinamofihi naga'a hiti luba hilabe. To fato fato hepatoga imima'i lilibe. To fato fato hepatoga nose'na fenene hinogo sipi kau'na enahalina'mu yabe. To ya'mana asaga'i huto hulenogo, lenali ma lite kehelilabe. Luna lana keta hina nasana asaga'i gofana hilina kana yuhufasi hapi filube'mu nohibe lite kehelilabe.

To ya'ma huto nohinogo lenalitini kaba hi bati hilo. Boana'magi alihi lenali'i kefefe hite bite mono nonugu lenele'mete bite ka foya lilete osahi lepilabe. Nani kumu lite lenele'mete bite gamani bona enubulo to enikibina bona enubulo lenele'mete bite ka foya li lepalalabe. To ya hinogo lenali nani kumu ka lamana'a lu epilabe. 10 Yata'a kohe toto lenali nani'ni hetofa ka lamana'ni asaga noto noto kapogu lu yege hete lu epinogo yalo alihi me'i asaga baga ito su halina kana huto hilibe. 11 To enali naga'i lepite lenele'mete bite ka foya li lepalana yupahi lenali koli mehilo. To kaga lilana ka lenegekesa keheli keheli hite meminalo. Hena'mube? Hu'mau, ana kanagu lenehe'menogo kaga lilabe. Ai lu lepilina ka ya'ma lu epilo. Lenaligo kaga lilana meni'ibe. Sikalafu'uba lenali hiti moneka nehite fatehatinimagihi kaga li epilabe. 12 To ana huto, ya'ma kanagu gonamu tamu'a mone'amagi ai ho filinogo ai ho filinogo hite minalabe. To bona'i mone'amagi yagapana'ani enehe fililabe. To panala'i pana'magi mone'a ana hite ito'anigi afo'anigi enehe fililabe. Ana kanagu ya hite minalabe. 13 To asaga bona'magi nani kumu lite enipagu sibina nohinogo sipi ka lepekilabe. Ya hi lepalanaya aku'i nanitoga kosele'i mehose ule'ale huto minalina bomofi, kana'a su holenogo, Hu'mau le'malina'mu yabe. Yesu ya luto lu epi'ehibe.

Foipana napa'a laga mehina huto hilina ka

Mt 24:15-28; Lk 21:20-24

14 To Yesu mone ka hiti ma luto lu epi'ehina: To alihi, sipi mono nonugu foipa suhi napauba hepa'i nohi li sibina gofana hulata nohinamofihi lenali bu galana'mu yabe. To ya'ma koyapa fayapo leka salata bomofita kehelibo. Ya'ma mono nonugu foipa suhi li huto hilenogo, lenali bu gelete yalo lenali Yutia kapogu nemina bona'i me'me hite kosaga tite minalo. 15 To nohupitalo nominata bomaka fe'nohi lilube luto nohakagu metise kana su halinagi fa'mene mele'isi bubo. 16 To ana huto foyagu kai gu kata lilube luto i behe huto hepatoga mebuse fa'mene bubo. 17 Ke. Ana kanagu yagapana'ani hiti nehana a'magi kumu keke'i li epalalo. To yagapana'i yuhufasi kete'ahana a'magi kumu leniginaga fi epilo. 18 To ya'ma foipa nasana huto hilina kanamu'i lenali ma lite nunumu hilo. Ya'ma kufuga kana huto hu lalibe lite Hu'mamofihi loka halo. 19 Hena'mube? Ya'ma kanagu gumi'i gofana huto hofa toto tilina'mu yabe. Koyapa kanagu gumi'i ya huto meti'ehina ni'ibe. Hu'mau me'i hiti to asaga'na li huto hu'ehina kanaguti buto buto yatai kanagu nehetito, ya'ma ya huto gofana huto gumi'i hose'na meti'ehina ni'ibe. To ana huto foto'i aliha'a hiti, ya huto gofana huto sipi gumi'i hose'na metilina'mu yabe. Ya'ma moneko kanagu gumi'i gofana huto sipi huto tilina kana ni'ibe. 20 Ya higo, Sipi Bouba ana kana le'mo tupa mehutita asaga bona'magi filitine. To Hu'mau ai'a enele'mo'ehina bona'magi kumu luto kana ale'mo nesi hu'ehina yabe.

21 To ana kanagu, bona'i mone'amagi ma lite lilabe: Bu galo. Mesia bouba maga nehetito lubuto bilibe lite lilabe. To mone'amagi: Bu galo. Meyaga nehetito lehe'malibe lite lilabe. To ya'ma ka li lepelenogo lenali ka'ani mekehelilo. 22 Akili ka lilabe. To ana kanagu faga faga kaga lu huto huto bomagi hiti to faga mono ka luse bomagi hiti ma lite lilabe: Nani Mesia bo yabe, lite faga lite lilabe. To enali fato fato suhi hite topa hese suhi hite hilete ya'ma Hu'mau enele'mo'ehina bona'magihi keheli sibina hu epalalune lite babeyafa hite enimi'i malalana'mu yabe. 23 Ya hilanagi to lenali kaba hi bati hilo. Nani ya'ma huto hilina nasana'mu asaga'i lipoti alepi'ohuna yabe. Ya'mu kaba hu bati hilo.

Kokulumaguti limi'ehina Bouba aku'i alina kana'amu yabe

Mt 24:29-31; Lk 21:25-28

24 To Yesu mone ka hiti ma luto lu epi'ehina: To ya'ma gumi'i gofana huto tilina kana su holenogo yege fenene higo sinihi gilibe. To ikahi hiti besa besa meloto li sabalibe. 25 To kokulumaguti sonofi'i yege yege'na limilibe. To kokulumagu nasana asaga'i li gusili gusili hilina'mu yabe. 26 To yalo, Kokulumaguti limi'ehina Bouba amuya hiti nohuto to fana meha'a sipi besa nolago, ai sopohi hite aku'i kokulumaguti nolimigo, bu galabe. 27 To ai agelomagihi enoho lifilenogo, bite ai'a bita hu'ehina bona'i asaga'i noto noto hepa'i fato fato'i anagati asaga melugu hepatogati me'i nekisalo ni'ina hepatogati silaga'i enele'mete elenogo li gehesa hilabe. Yesu ya lu'ehina yabe.

Sifehe yafauba bona'i guna isemofihi hapa'a lepilata nohibe

Mt 24:32-35; Lk 21:29-33

28 To mone ka hiti ma lu epi'ehina: Mafi. Sifehe yafa hapa'a lepilugi, kehelilo. Hapa'a ma huto ni'ibe. Ana yafamo yaha'alo moko'a biloto to haya'a yuhufasi nohesigo, lenali bu gete: Kotaga lilibe lite nekehelibe. 29 To ana huto ya'ma ma'asi lu lepi'ohunana huto hulenogo, lenali: Kokulumaguti Sipi Botiuba aku'i alina yupahi ma'asi huto hilibe lite, ma'asi leke ho malalube'mu hibe, lite kehelilabe. Nani lusiga nolepunagihe. 30 Ya'ma yatai nehana bona'magihi kana'ani su mehenogo, ana kana hapi filina'mu yabe. Nani ka'ni fenene huto mefilise ya'ma huto hilina ni'ibe. 31 Kokuluma hiti me'i hiti alihi fenene huto su halina'mu yabe. To nani ka'ni lusiga yagi mefilise huto hilina'mu yabe. Yesu ya luto lu epi'ehibe.

Yesu alina kana'amofihi bona'i mekeheli'ahana

Mt 24:36-44

32 To Yesu mone ka hiti ma luto lu epi'ehina: Ya'ma huto hilina kana asaga bona'magi menekehelibe. Kokulumaga agelomagi enali hiti menekehelibe. To nani Hu'mamofihi pana'amofita menokehelube. Afo'nifu, Hu'mau ai'asigoko keheli'ehina yabe. 33 To ya huto ni'inaya, lenali bu gete minalo. To lenegekesa keheli bati hite minalo. Ana kana huto hilina'a lenali ana hite menekehelibe. Ya hu'ehinagi be go bati hite minalo. 34 Ma huto anana huto hilibe. Bo moneuba hepato he'mito fatoga bilube'mu nohuto'a lili'na bona'magihi lili'na'ani'mu lu epito to bihu kasito minoto kaba nohina bomofihi lu emilina: Kaba huto minobo, luto bufa hilibe. Ya suhi lenali ana hite kaba hite minalo. 35 Hepa afo'afu hiya kanagu alibe lite lenali menekehelibe. Utehi alifi, folugu'i alifi, kokole nogo nomelenogo alifi, go'i nolinogo alifi, ya'ma menekehelibe. 36 To lenubu'i ke'ehinogo ai mele'isi noenogomo henatini hilabe? To ya higo bu gefe lite minalo. 37 Nani ya'ma lu nolepuna ka asaga bona'magihi ana huto lu noepube. Bu go bati hite kaba hite minalo.

Copyright information for `BEF