Mark 14

Yuta kaba bona'magi Yesuhi naga'i emilune li'ahana

Mt 26:1-5; Lk 22:1-2; Yn 11:45-53

To yalo ana kanagu, sipi mono bomagi to mono ka enelepise bomagi hiti Yesuhi suguna huto naga'i emito ho fililune lite mine'ahabe. To ana kanagu, Yuta bona'magi asaga'i sipi mono yupapo hapi filune'mu hite minete: Loe yupahi su holenogo naga'i emilune lite kana mele'ahabe. Hena'mube? Ana loe yupahi, mono yupahi yagi, sipi nose'na loemo laita hilata nehana kana yabe. Mone nose'na kana Pasa yabe nelana, ya'ma koyapa Hu'mau enubuto bu'ehina yupa kumu yabe. To mone nose'na kana enali beleti nose'na'ani yisiti hiti lolo mehise fa'mene nenana ya'ma yupa kumu yabe. Ana sipi mono kana ma'asi hapi filune'mu nehago ya'ma sipi mono bomagi ma lite enegekesa keheli'ahabe: Lali ya'ma Yesuhi sipi nose'na kanagu ho fililenogomo, asaga bona'magi kehelite luba hilabe. Ya higo, ya'ma nose'na kana su holenogo ho fililune. Enali ya lite kehelite geba hi'ahabe.

A'i moneuba tu mesebe Yesuhi lata'alo heki eto'ehina

Mt 26:6-13; Yn 12:1-8

To Yesu Betani hepatoga buto mone bomofihi noha'agu tito mino'ehibe. Ya'ma koyapa hehe bomofihi, gi'a Simoni, ai'a noha'agu mino'ehibe. To anaga minoto nose'na nonago, a'i moneuba efaha kopo kofito aitoga o'ehina. Ana konugu mesebe nagami'i hetofana ni'igo, gi'a Nati yabe, sipi efapoloti mina fi'ehina'a ya'ma kofito oto li hokolo huto Yesuhi lataha'alo i heki eto'ehina yabe. To bona'magi mone'a bu gete enipagu logo bigo, ai lu emigo ai lu emigo hite ma li'ahana: Akae. Henabe luto ya huto i hekibe? Ana mesebeloti'i mina'a 300 kina lito buto musufalo bona'i epitita bati hutita'mu yabe. To ya huto lataha'alo fa'mene heki'ehina bati mehina supo hibe. Enali ya lite ana a'mofihi ka emeki'ahabe. To ya lago, Yesu ma lu epi'ehina: O'e. Ya ka he'milo. Henabe lite ka emeki'ahabe? Ka meemekilo. Ai bati suhi hu neto'ehina ni'ibe. Enali musufalo bona'i lenalitoga asaga yupahi mineba mineba nehanagi to lenali bati hite fato fato yupahi efahi epilana'mu yabe. To nani lenalitoga asaga yupahi minoba minoba mehilube. Ya'ma a'mouba nanimo nehe filite keli halana'mu luto yata'a mesebe nugufa'nilo folo neto'ehina ni'ibe. Bona'i keli halune'mu nehana suhi huto nugufa'nilo mesebe folo'ehina yabe. Ai'a so ki'ehina'a ahu neto'ehibe. To lusiga nolube. Alihi nani kumu ka lamana'a asaga melugu hepatoga bite kaga beto hite lu epilana nehite ya'ma a'uba hu neto'ehinamofihi ka'mu ana hite lu epilabe. Ai hu neto'ehinamofihi beto hite kaga lilabe.

Yutasiu Yesuhi fateha'amagihi enelepise ka molo'ehina

Mt 26:14-16; Lk 22:3-6

10 Ya noligo aposolo bo moneuba, Kelio naga'i nohina bo, gi'a Yutasi, ai anagati he'mito buto sipi mono bonaloga buto Yesu kumu gutunu ka lu epilube'mu bu'ehibe. 11 Buto Yesu nohinalo yamofihi lenelepilube luto lu epigo, enali fokehi lite: Efahi kimilutagihe, lite lu emite mele'ahana. Yalo ai Yutasiu Yesuhi enelepilina kapo'a sa sa hu'ehibe.

Yesu pana'alobo'a hiti Pasa nose'na nalune'mu hi'ahana

Mt 26:17-25; Lk 22:7-14, 21-23; Yn 13:21-30

12 To ana kanagu, sipi nose'na beleti nose'na yisiti hiti lolo mehise nalana yupahi utehi hapi filune'mu nehago sipisipi yaga nala'a Pasa mono yupapo kumu luto helata nehana kanagu, Yesuhi pana'alobo'amagi ma lu emi'ahana: Lali Pasa nose'na hiyaga buto nalune? Hiya nonugu nose'na li nupa huto laita hu ketalune? 13 Ya lago, Yesu pana'alobo'a loemofihi ma lu etimito etoho lifi'ehina: Olopa hepatoga tite to bo moneuba nagami kohi kofito nobinogo letali bu geletetiti bite mege'i biliyo. 14 To ai tilina nonugu nehetite noho bo ma lite lu emiliyo: Afotifu pana'alobo'ni hiti Pasa nose'na naluta nohi hiya'a ni'ibe luto nolibe. Ya lite lu emiliyo. 15 To ai ifo nonugu letele'moto tilibe. Anagu sipi nohi mone ai'a ale'mo bati hu'ehinana letelepilibe. Ana nonugu letali Pasa nose'nati li nupa hite le'mo bati hiliyo. 16 Ya ligo, ana loe bomale'i aitogati he'mite bite olopa hepatoga tite to Yesu lu etimi'ehinana yamofihi asaga'i bu gelete nohi tite anagu Pasa nose'na le'mo bati hi'aha'ibe.

17 To utehi noligo Yesugi pana'alobo 12 magi enigi'a aposolo bomagi enali hiti ana nonugu ti'ahabe. 18 To nose'na nete nehago Yesu ma luto lu epi'ehina: Lusiga nolube. Lenali nani hiti nose'na nenana bona'i lenali folagahatiniguti bo moneuba fatehatimagihi nani kumu gutunu ka lu epilina'mu yabe. 19 Ya ligo, enali enipagu keta higo, hapi fite mone'isi mone'isi: Nanifiye ligo, nanifiye ligo ya lite loka he'ahabe. 20 To ai ma lu epi'ehina: Lenali folagahatiniguti, aposolo bo moneuba ana hilibe. Nani hiti moneko lapelugu lifito nonana bo yabe, Yesu ya luto lu'ehibe. 21 To ka mone hiti ma luto lu epi'ehina: Nani Kokulumaguti limi'ohuna Bomofita noho fililabe ya'ma nani kumu mono kagu koyapa keye'ahana ka nanitoga ahuto hilibe. To Kokulumaguti limi'ohuna Bo kumu gutunu ka fatehatimagihi lu epilina bomofihi Hu'mau gumi'i gofa huto halina'mu yabe. Akae. Ana bomofihi ito'afu meketatita bati hutita'mu yabe. Hu'mau gofana huto halina'mu yabe. Yesu ya luto lu epi'ehina yabe.

Sipi Bomofihi yupala nose'na

Mt 26:26-30; Lk 22:15-20; 1 Koliti 11:23-25

22 To nose'na nenago, Yesu beleti nose'na lito bebe sana ka luto yalo i gofa huto epito ma lu epi'ehina: Lite nalo. Ya'mana nani nugufa'ni yabe. 23 To yalo bai nagami kohi lito, Hu'mamofitoga foke ka luto'a yalo li epilago, enali asaga'i ne'ahana yabe. To nenago, Yesu ma luto lu epi'ehina: 24 Ya'ma nagami'i golaha'ni yabe. Hu'mau bona'magi kumu luto kaga lu molo'ehinalo'i golaha'ni limi su halibe. Ya'ma Hu'mamofitoga lu mu tifise'na'amu yabe luto golaha'ni li huto hu molo'ohube. Yege yege bona kumu luto limi su halina'mu yabe. 25 To lusiga lu nolepube. Nani yatai bai nagami'i nonobe. Aku'i asaga yupahi menalube. To alihi Hu'mamofihi kapo'a huto aku'i yalo yuhufasi naluna'mu yabe luto Yesu ya lu'ehibe. 26 Ya ligo, enali mono nama mone lilete yalo nonuguti he'mite bite Oliba kosaga tite mine'ahabe.

Yesu ya'ma Pitau bahane halina ka'mu lu'ehina

Mt 26:31-35; Lk 22:31-34; Yn 13:36-38

27 To anaga Yesu ma luto lu epi'ehina: Lenali asaga'i he'mi netete koli felefa hilabe. Mono kagu Hu'mau koyapa kaga ma ligo keye'ahana: Nani kaba bomofihi holenogo, enali sipisipi yaga'a tili tele hite bilabe. Ya'ma ka lu'ehina'a nanitoga ahuto hilibe. Lenali he'mi netete ya hite tili tele hilana'mu yabe. 28 To alihi Hu'mau fili'ohunaguti nele'mo ho tilenogo, nani kohe toto buto Galili kapogu buloto aku'i li gehesa hilune. 29 Ya ligo, Pitau ma lu emi'ehina: O'e. Enali asaga'i he'mi ketete fele su nehenogo nanigo minalube. 30 Ya ligo, Yesu ka'alo ma luto lu emi'ehina: Nani lusiga lu nokumube. Kai yatai folugu'i kokole loe yupahi nogo memolo'ehinogo kai nani kumu: Ana bo mekeheli'ohube, luto bahane hoto loeyagi moneyagi yupahi bahane hoto lu epilane. Yesu Pitahi ya lu emi'ehibe. 31 Ya ligo, Pitau amuya moloto ma luto lu emi'ehina: O'e. Nani kai kumu bahane hoto lu meepilube. Kai hiti nehe fililune'mu nehinogo, ana huto bahane hoto lu meepilube. To nani ana huto nehe fililana bati huto yabe nolube. To pana'alobo'amagi asaga'i ana hite ya'ma lite li'ahana yabe.

Yesu Gesemani foyagu nunumu hu'ehina

Mt 26:36-46; Lk 22:39-46

32 Yalo bite mone hepatoga, gi'a Gesemani bite nehetite, Yesu pana'lobomagihi ma luto lu epi'ehina: Nani Hu'mamofihi ka lu emito nunumu hu emilube'mu nohunagi, lenali maga minete meto minalo. 33 Ya luto ai Pitagi Yemesigi Yonigi, enaligo enele'moto nobigo, komopa'agu sipi keta higo ipa'agu gabu'i gofa gigo ma luto lu epi'ehina: 34 Ke. Nemehuba sipi keta higo, nipagu gabu'i gofa gigo fililube'mu nohube. Lenali maga minete, kaba hite minalo. 35 Ya luto yalo nesi'asi buloto melugu kana fu tito koloto nunumu huto Hu'mamofitoga ya'ma gupisalo gabu'i gise'namofihi kana'a aku'i huto mehilifi to huto hilifi ya luto loe lugufa ekesa kehelito loka ho'ehibe. 36 To ma luto nunumu huto lu'ehina: Oho. Apaobe. Afo'nigase. Kai amuyaka hiti bo nohane. Kai asaga'na hilatana mone keta mehu keto'ehina ni'ibe. To ya'ma hu netalube'mu nohataya he'milapiye? Kai keheli'ahane. Ya'ma nani foya'ni meni'ibe. Kaika so ki'ahatanamofihi hu netobo. Afo'nigabe.

37 Ya luloto, i behe huto oto pana'alobo'amagi enubu'i nekago, oto bu goto Pitatoga ma luto lu emi'ehina: Akae. Simonio. Kubu'i nokapiye? Kai hupamone kanagu bati huto kaba hu netalata'a mehu'ahapihe? 38 Yalo enalitoga ma luto lu epi'ehina: Lenali kaba hite minalo. Ya'ma Satau fi taga hu lepololenogo lenali foipana hilafi mehilabe. Lenali foipana hi lalagi luto kaba hite minete nunumu hilo. Lenemehuba ule'ale huto minalube'mu nohinagi aku'i lenugufa lapa mebi'ehina ni'ibe. Ya'mu kaba hi bati hite minete nunumu hite minalo.

39 To Yesu ya luloto mone hiti buto Hu'mamofitoga nunumu huto ya'ma koyapa lu emi'ehina ka ana huto aku'i lu emi'ehina yabe. 40 To yalo i behe huto oto bu enagago, enali ana hite enubu'i kefa hi'ahabe. Enubu kolo kolo higo, kefa hi'ahabe. To ai kaga lu epinamo, enali ka melise mine'ahana. Hena'mube? Enubuya higo, henabe ka lu emilune lite, enegekesa yigite legese hite ka melise fa'mene mine'ahana yabe.

41 To ai mone kana hiti buloto oloto bu enogoto ma luto lu epi'ehina: Lenali ana hite lenabasu bite ke fa nehafiye? Yatai anasi yabe. Kana'ni ao'ehibe. Bo moneuba nani Kokulumaguti limi'ohuna Bomofita kumu gutunu ka lu epilago, ya'ma fatehatimagi, foipa bona'magi naga'i nimilune'mu nealabe. Bu galo. 42 Nani kumu naga'i fatehatimagihi enelepilata bouba a'noabe. Ho tilo. Lali aitoga bilune.

Fateha'amagi Yesuhi naga'i emi'ahana

Mt 26:47-56; Lk 22:47-53; Yn 18:3-12

43 Yesu ya noligo, ana'asi aposolo bo moneuba, gi'a Yutasi, ai hiti babu bona'magi hiti muki osahi to emita osahi kofite neabe. Enali sipi mono bomagi to mono ka enelepise bomagi hiti to olopa mono bomagi hiti enoho lifilago ete neheti'ahana yabe. 44 To Yutasiu koyapa ma luto alu epi'ehina: Buga. Ya'ma nani soso hu etaluna bomofihi lenali bu gete naga'i emite li pili kete le'mete bilo.

45 To Yutasiu yalo Yesutoga ana'asi oto be tigito: Afo'nigabe luto soso hu eto'ehina yabe. 46 Ya higo, enali me'me hite bite naga'i emi'ahabe. 47 To ya hago, anaga minana bo moneuba emita'i li saga huto'a sipi mono kaba bomofihi koko pana'amofihi ekesa'a i gitigito laga hu he'mi'ehibe. 48 Ya higo, Yesu ma lu epi'ehina: Lenali yatai henabe lite osahi hiti emita'i hiti nanitoga kofite neabe? Nani guminalo bo nohufihe? 49 To nani asaga yupahi sipi mono nonugu lenali nehanalo minoto kaga lu lepilata huto minonamo ni'inaya to lenali naga'i menimi'ahanaya yatai henabe lite emita'i hiti osahi hiti lite neabe? Ana, ya'ma mono kagu koyo'ehinanauba yatai nanitoga huto hilina'mu yabe. 50 Ya ligo, pana'alobo'amagi asaga'i aitogati he'mite koli fele'ahabe.

51 To anaga neheya kola bo moneuba gu kata mehepise koholi kata anasi hepi'ehina bouba Yesuhi mege'i nobigo, enali ai hiti naga'i emilune lite nu nekigo, 52 ai mele'isi kata'a enayanugu heto nomoloto gufayapago koli folofa hu'ehina yabe.

Mono kanisole bomagi enubulo Yesuhi ka foyagu mele'ahana

Mt 26:57-68; Lk 22:54-55, 63-71; Yn 18:13-14, 19-24

53 To enali Yesuhi le'mete bite sipi olopa mono bologa le'mete bi'ahabe. To anaga sipi mono bomagi asaga'i to olopa bomagi hiti to mono ka enelepise bomagi hiti li nupa hite mine'ahabe. 54 Yesu anaga le'mete nebago Pitau foto'i minoto mege'i buto sipi olopa mono bomofihi kuguma'alugu tito gimi bo'amagi hiti meto minoto logo lota huto mino'ehina yabe. 55 To sipi mono bomagi to mono kanisolemagi asaga'i ka foya li'ahabe. Ka foya lite, to Yesuhi ho filune lite ai kumu mukulu filina bo sa sa hi'ahabe. Aku'i ho filise ka lilata bo mone huto mehu'ehina. 56 Fato fato bomagi Yesu kumu faga lite megeka li'ahago aku'i moneko ka legege hite meli'ahabe. Fato fato ka li'ahabe.

57 To mone'amagi ho tite faga lite ma li'ahabe: 58 Lali ya'ma bomofi kumu kaga noligo keheli'ohuta yabe. Ai ma lulata lu'ehina: Ya'ma sipi mono nohi bona'magi gi'ahana nohi nani tele biloto'ni aku'i loeyagi moneyagi yege yupahi bona'magi megilana nohi mele'isi gilube. Ya noligo, keheli'ohuta yabe. 59 Enali ya lite aku'i ana hite moneko ka melise sibi sibi ka lite li'ahana.

60 To yalo, sipi olopa mono bouba folagato ho tito Yesuhi ma luto loka ho'ehina: Kai ka meluse minalapiye? Kai kumu kifisa neinaya henabe ka aku'i lilane? Ya ligo, Yesu enali ka'ani gusunupa'a meni'igo kehelito ka meluse fa'mene mino'ehibe. 61 Ya higo, sipi olopa mono bouba, mone hiti loka hoto ma lu'ehibe: Kai hetofa bo Hu'mamofihi pana'a, Mesia bo nohapiye? 62 Ya ligo, Yesu ma luto lu'ehina: Nani ana bo nohube. To alihi yupahi nani Kokulumaguti limi'ohuna Bomofita Hu'mamofihi lamaga'alo minenogo'ni bu galane. To aku kokulumaguti sopohi hiti noliminogo'ni bu galane. 63 Ya ligo, ana sipi mono bouba komopa'agu logo bigo, gu kata'a li botala ito'a Yesuhi ka emekiloto ma lu epi'ehina: Anasi nolibe. Lali henabe luto fato bona'i enoloka halune? 64 Ai'a baga'aluguti Hu'mamofihi megeka noligo keheli'ohune. Henana hu etalune? Lenali kehelite lu nimilo.

65 Ya ligo enali asaga'i: Ho fililune lite moneko ka li'ahana. Yalo bona'i mone'amagi Yesuhi libi'na hete'ani to bu'a ifi tete enaya osatu hoto ma li'ahana: Oho, kiyi'afu koho'ehibe. Lu hokolo hubo. To ya nelago gimi bomagi ana hite enaya osatu he'ahabe.

Pitau Yesuhi bahane ho eto'ehina

Mt 26:69-75; Lk 22:56-62; Yn 18:15-18, 25-27

66 Ya nehago Pitau afetoga kugumalugu minoto logo lota huto nominago ana sipi mono bomofihi kele kele pa'a moneuba oto bu goto gili gili huto nohuto'a ma lu emi'ehina: Kai ya'ma Yesu Nasalete naga'i nohina bo hiti mine'aha'ibe. 68 Ya ligo Pitau bahane hoto amuya moloto ma luto lu'ehina: O'e. Kai nolataka menokehelube. Ya luto bihu kasito buto mino'ehibe. To kokole nogo molo'ehina. 69 To ana kele kele pa'uba bu goto anaga neminana bona'magihi lu epi'ehina: Bu galo. Ka'meya bo Yesuhi pana'a nohibe. 70 Ya luto ligo Pitau ana huto: O'e, luto bahane ho'ehina. To kana nesi'asi bu su holago logo lota huto minana bo moneuba Pitahi ma luto lu emi'ehina: Ma'naka. Kai pana'a nohutoka ya'ma faga melubo'ma. Galili naga'i nohata keheli'ohuna yabe. 71 Ya noligo Pitau huli ka luto to yahi tito amuya moloto ma lu epi'ehina: O'e. Nani ana bomofi kumu lenali kaga lu nimilata nehana ya'ma mekeheli'ohube. 72 Ya ligo ana'asi kokole nogo mone hiti molo'ehina yabe. To Pitau Yesu lu emi'ehina ka beto hu'ehina. Yesu koyapa'i lu emi'ehina: Kokole loe yupahi nogo memolo'ehigo nani kumu loeyagi moneyagi yupahi bahane halane. Pitau ana ka'amofihi kehelito beto huto'a yibi hafili gofa hu'ehina yabe.

Copyright information for `BEF