Mark 15

Yesuhi sipi gamani bomofihi bulo le'mete bi'ahana

Mt 27:1-2, 11-14; Lk 25:1-5; Yn 18:28-38

Etehi folugu'i sipi mono bomagi hiti mono ka enelepise bomagi hiti olopa bomagi hiti mono kanisole bomagi hiti asaga'i tutuma'i hite mine'ahabe. Tutuma'i hite Yesuhi yaha'alo seni naga ite le'mete bite gamani koti kaba bomofihi, gi'a Pailati, ai nohinalo le'mete bi'ahabe. To Pailatiu Yesu ma luto loka ho'ehina: Kai Yuta bona'magihi kigihiti bo'ani nohapiye? To Yesu: A'nolane, luto lu emi'ehina. To sipi mono nohi kaba bomagi fato fato ka lite bugu ka li'ahabe. Ya lago, ya'mu Pailatiu mone hiti loka hoto ma lu'ehibe: Kai kaga meluse minalapiye? Enali yege yege ka lite kubugu ka nelanagi ka'anilo nona'a lu meepilapiye? To Yesu enali ka'ani bebe mesago, kehelito'a ka meluse fa'mene minago Pailatiu topa hoto mino'ehibe.

Pailatiu ka'ani kehelito Yesuhi fililibe luto lu'ehina

Mt 27:15-26; Lk 23:13-25; Yn 18:39-19:16

To ana sipi Pasa nose'na kanagu Pailatihi hapa'a ma hulata huto mino'ehina. Ana kanagu kalabusi bo mone enali Yuta bona'magi gi halana bo mone'mofihi kalabusi nonuguti le'mo he'milata huto hu'ehina hapa'a ya'ma ni'ibe. To ana kanagu kalabusi nonugu bo mone, gi'a Balabasi yabe luto mino'ehibe. Ai luba hi'ahana yupahi bo mone'mofihi ho fili'ehina bo yabe. To ya'ma kanagu, asaga bona'magi Pailatitoga ete me lite loka he'ahana: Kai mana kanagu hulata hu'ahata hapaka hu letobo. To ya lago, ai ma luto lu epi'ehina: Nani ya'ma Yesuhi lenali Yuta bona'magita kibina botinimofihi le'mo he'mi etalufihe? Lu nimilo. 10 Ai ya'ma mono bomagi Yesu kumu siko nehite naga'i emi'ahana kehelito'a ya luto enoloka ho'ehinagihe. 11 To ya luto enoloka hago, enali sipi mono bomagi ya'ma anaga li nupa hite nehana bona'i asaga'i enele'mo topa hago, to sipi mono bomagi amuya melete lu epi'ahana: Yesuhi ana'a hiligi lu emilo. Balabasihi gulu ho etobo, lu emilo. Ya nelago ya'ma li nupa nehanamagi asaga'i kehe ite Pailatihi ma lite lu emi'ahana: Yesuhi ana'a hiligi. Balabasihi gulu ho etetogo bino. Ai kalabusi nonuguti fa'mene limilina'mu yabe. 12 Ya nelago Pailatiu mone hiti ma luto enoloka ho'ehina: Ya'ma bo'mu, lenali Yuta bona gihiti bo yabe lite gi nehana bomofihi henana hu etalube? 13 Ya ligo, enali hekele lite: Ho filibo. Malipu yafalo ho filibo, lite lago, 14 Pailatiu: Henabe lutobe? Ai hiya foipa suhi hu'ehibe, luto ligo enali sipi nogo bela ka lite: Ho filibo, lite li'ahana yabe. 15 Ya lago, Pailatiu komopa'ani le'mo fulu hilube luto Balabasihi le'mo he'mi eto'ehina yabe. To yalo Yesu kumu kaga ligo, gimi bo'amagi naga osatu heba heba hi'ahabe. To le'mete bite malipu yafalo halo luto lu epilago, gimi bomagi le'mete bi'ahabe.

Gimi bomagi Yesuhi kiya yokolo ka li ete'ahana

Mt 27:27-31; Yn 19:2-3

16 Gimi bo'amagi Yesuhi le'mete bite ya'ma sipi kaba bomofihi nopo, Gamani Nohi yabe, ana nonugu le'mete bi'ahabe. To enali enalalu'ani mone luga'amagihi kehe igo ago li nupa hi'ahana. 17 Yalo Yesuhi okoho naku'i hepi etete to lataha'alo ufeha'a hiti naga'i hesete kofi etete, 18 to hapi fite be tigite: Oho. Yuta bona'magihi enikibina bo, lite me'na me'na bi'ahabe. 19 To lataha'a osatu heba heba hite, to libi'na hete aitoga lipite nehite me'na me'na bi'ahabe. 20 To yokolo'na hi su helago, ana okoho naku'i li he'mi etete yalo ai'a kata'a hepi etete fegutoga le'mete bite malipu yafalo ho fililune'mu le'mete bi'ahabe.

Yesuhi malipu yafalo ho fili'ahana

Mt 27:32-44; Lk 23:26-43; Yn 19:17-27

21 To le'mete nebago bo moneuba Sailini naga'i nohina bo gi'a Simoni, Alekasatahi to Lufusihi afo'atitifu yagi, ai ana kapolo kifiguti noago enali bu gete le'me kefefe hite naga'i emite Yesuhi malipu yafa'a gupisalo li malago ai kofito bu'ehibe. 22 Kofito bigo enali Yesuhi le'mete bite Gologota kosalo neheti'ahana. Ana hepa'i gi'a mone lali kaguti, Lataha Felisa'a hepa'i yabe luto gi ho'ohuna yabe. 23 Anaga nehetite Yesuhi bai nagami'i hiti to mone yafa nogoya'a hiti, gi'a mila yabe, yana emilune'mu hana'a mo si'ehibe. 24 To yalo, Yesuhi malipu yafalo nili hete he'ahana yabe. To gu kata'a kiyi'afu lilibe lite, li gehe lite melete kati supo hite li'ahana yabe. 25 To ya'ma malipu yafalo he'ahana kana etehi folugu'i bona'i foyaga nebana kanagu yabe. 26 To bo moneuba Yesuhi he'ahanamomu'i fayahi go'ehinamofihi ana yafa ifo'alo li mele'ahana ya'ma ni'ibe. Yuta Bona'magihi Gihiti Bo'ani Yabe, luto ya'ma fayahi go'ehina. 27 To Yesuhi hiti guminalo bo loemo ana hite malipu yafalo etehe'ahabe. Mone hete lamaga'aga yafa fite to mone hete soga'aga yafa fite etehe'ahana yabe. 28 Ya hite etahago mono ka koyapa koyo'ehina ka ya'ma huto hu'ehibe. Ana kaga ma lu'ehina:Ai hiti foipa bole hiti enehe'ahabe.

29 To anaga kapo melete bi'ahana bona'magi enali bu gete, enayahi koke ite Yesuhi kiya hi etete ma li'ahabe: Ahe. Kubuyaka hino. Kai sipi mono nohi tele biloto aku'i loeyagi moneyagi yegegu gilube lu'ahata bo yale. 30 Kai malipu yafaloti limito kugufaka le'mo bati huto minobo. 31 To sipi mono kaba bomagi hiti mono ka enelepise bomagi hiti enali ana hite kanipo fite kiya hi etete ai lu emigo ai lu emigo nehite ma lite li'ahana: Ya'ma bouba fato fato bona'i enubuto bi'ehinaya aku'i ai'a gufa'a le'mo bati hilina meni'ibe. 32 Ai Mesia bo Isilaeli naga'magihi gihiti bo'ani nohifi? Ana, malipu yafaloti limilenogo, lali bu goloto aitoga kehelito agoya hu emilune. Enali mono bomagi ya lite li'ahabe. To ai hiti malipulo etehe'ahana bomale'i ana hite Yesuhi huli ka lu emi'aha'ina yabe.

Yesu afili'ehina

Mt 27:45-56; Lk 23:44-49; Yn 19:28-30

33 To fuligahi lulago, asaga hepatoga metepu ito minoto minomo buto utehi 3 kiloki yalo yege aku'i lo'ehina yabe. 34 To ana kanagu Yesu sipi nogo moloto hekele luto ka'aguti ma lu'ehina: Eloi Eloi, lema sabakatani. Ya'ma lali kaguti ma lu'ehina: Oho. Hu'mao, afo'nigabe, afo'nigabe. Henabe luto he'mi neto'ahane? 35 Ya ligo, anaga neminana bona'i mone'amagi ka'a kehelite ma li'ahana: Akae. Ai ya'ma koyapa bo Elaiya, ai kumu kehe noibe. 36 To bo moneuba kehelito hololu luto buto lututuhi lito buto ekesa bai nagamilugu li moloto yalo lito oto eminogo'ni nalibe luto, lito oto yatama osatu li saga huto noemito ma lu'ehina: Bu galo. Ya'ma Elaiyau oto yafaloti le'mo he'mi etalifi bu galune. 37 To Yesu sipi nogo moloto ana'asi sikalafu'i molo su hoto fili'ehibe.

38 To nofiligo, ka'meya sipi mono nonugu kata hasamo ifo'agati hapi fito limito i bololo i su ho'ehina yabe. 39 To Yesu sipi nogo moloto sikalafu'i molo su hoto filigo, gimi kaba bo moneuba Yesuhi hapa'a bu goto kehelito ma luto lu'ehina: Ma'naka. Ya'ma bo Hu'mamofihi pana'a ma'naka luto nohibe. 40 To ana'i mone'amagi foto'i nehite bu gete mine'ahabe. Mone gi'a Malia, ai Magatala a'i yabe. To mone ana huto gi'a Malia, ai Yosese hiti to lagaso Yemesi hiti ito'atitifu yabe. To mone gi'a Salome yabe. 41 Ya'ma ana'magi koyapa'i Yesuhi Galili kapogu mino'ehigo mege'i melelata hite to nose'na emilata hite mine'ahana yabe. To fato ana'magi babu luto Yesuhi mege'i bite Yelusale hepatoga e'ahana ana'magi ana hite bu gete mine'ahana yabe.

Yesuhi keli he'ahana

Mt 27:57-61; Lk 23:50-56; Yn 19:38-42

42 To utehi noligo, ana kanagu fuli yupahi hapi filube'mu nohigo, fuli yupahi nalana nose'na le'mo bati hilata kana ni'igo, bo moneuba. 43 Alimatia naga'i nohina bo, gi'a Yosefe, ai olopa mono kanisole bo nohuto, ai Hu'mamofihi kapo'a alina kana geba huto minolata nohina bo nohuto, ai lesa'a meligo buto Pailatihi nohinaga tito: Yesuhi gufa'a li nimilapiye, luto loka ho'ehibe. 44 Loka hago, Pailatiu: Akae. Afili'ehifiye luto ekesa yigito'a gimi bo'a mone kehe igo ago: Afili'ehifiye luto loka hago, ai: O'yo, luto lu emi'ehibe. 45 To gimi bouba: Afili labata hu'ehibe luto lu emigo, Pailatiu Yosefehi: Gufa'a bati huto lito bubo, luto lu emi'ehina. 46 To ya ligo, Yosefeu buto yuhufa koli kata hetofana'a mina filoto lito buto Yesuhi gufa'a yafaloti ho kutu foto ana katamotu sa gito kofiloto buto keli halube luto, buto efaha kosagu kifi'ahana muli'mogu li molo'ehina yabe. To ana muli'mofihi kasiha'alo mone sipi efahi fela'a li behe behe huto hekini lo'ehina yabe. 47 To ya nohigo, ya'ma Magatala ai'i gi'a Malia, ai to Yosesehi ito'afu, gi'a ana huto Malia, ana a'male'i Yesuhi gufa'a keli ho'ehina hepa'i bu gete keheli'aha'ina yabe.

Copyright information for `BEF