Mark 16

Yesu fili'ehinaguti ho ti'ehina

Mt 28:1-8; Lk 24:1-12; Yn 20:1-10

Fuli yupahi su holago, Malia Magatala a'i to Malia Yemesihi ito'afu to Salome, enaligo Yesuhi gufa'alo mesebe falalune lite bite hetofa mesebe mina fi'ahabe. To etehi go'i noligo bite muli'i ni'inaga nebite ai lu emigo ai lu emigo hite ma li'ahana: Ya'ma muli baga'aga ni'inalo efahi fela efapo ni'igo, kiyi'afu li behe behe hu he'mi letalibe? To anaga nehetilete bu gago ana sipi efahi baga'agati ali behe hi he'mi'ahago bu gete: Akae, lite topa he'ahana. To mulilugu tite bu gete, muli'mofihi kasihi lamaga'aga neheya kola bo mone koholi kata yatamana hepi'ehina bouba meto nohigo bu gete lusi koli hi'ahabe. To ai ma luto lu epi'ehina: Koli mehilo. Lenali Nasalete bo, Yesu, malipu yafalo fili'ehina bomofihi sa nehana keheli'ohube. Ai maga menohibe. Aho ti'ehinagihe. Bu galo. Ya'ma mele'ahana hepa'i bu galo. Menohibe. To lenali abilo. Bite Pitagi to pana'alobomagihi asaga'i ma lite lu epilo: Yesu koyapa lu lepi'ehinana yamofihi ahu'ehibe. Ai kohe toto Galili kapogu a'nobinagihe. Lenali ya lite lu epilo. Ya ligo, enali kehelite enelesa'ani ligo, sipi koli hite'ani ana muli'moguti tite hololu bite koli felefa hi'ahabe. Sipi koli hite'ani asaga bona'i ka lu meepise fa'mene mine'ahana yabe.

Yesu Malia Magatala a'i aitoga huto hu'ehina

Mt 28:9-10; Yn 20:11-18

To Yesu, fuli yupahi su holago, etehi folugu'i fili'ehinaguti ho ti'ehina yupahi ai yata'a Malia Magatala a'mofihi bulo huto hu'ehibe. 10 Ana a'i Yesu koyapa foipa fele 7 he'mi eto'ehina a'i yabe. Yesu ana a'mofihi bulo yata'a huto higo, ai buto Yesuhi mege'i melelata hi'ahana bona'magi yibi gofana hite nehanaga buto nehetito lu epi'ehina: 11 Yesu huto nohigo bu go'ohube luto lu epigo, enali: Faga yabe lite enipagu hu'ehibe.

Yesu pana'i loemale'itititoga huto hu'ehina

Lk 24:13-35

12 To yalo pana'i loemale'i kifigu bilu'ibe'mu kapo nemala'igo Yesu huto huse fato'i etubulo huto hu'ehibe. 13 Ya higo, etali kehelilete i behe hite bite pana'alobo asaga'i ya'ma lu epi'igo, enali: Faga yabe lite enipagu hu'ehibe.

Yesu pana'alobomagihi enubulo huto hu'ehina

Mt 28:16-20; Lk 24:36-49; Yn 20:19-23; Aposo 1:6-8

14 To alihi, aposolo bomagi 11 magi li nupa hite nose'na nenago, Yesu enubulo huto huloto ka epekibe. Hena'mube? Enali, bona'i mone'amagi Yesu fili'ehinaguti ho ti'ehigo bu gete ka lu epigo, enali: Faga yabe, lite enipagu higo komopa'ani ule'ale higo Yesu ya'mu ka epeki'ehibe. 15 To ai ma luto lu epi'ehina: Lenali asaga melugu hepatoga bite bona'magihi hetofa ka'ni ya'ma ka lamana'a lu epilo. 16 To bo moneubafi moneuba ana ka kehelito agoya hu nimito nagami falalina bo, ai'i buto bilunagihe. To bo moneubafi moneuba kehelito agoya hu menimilina bomofihi nani gumi'i hoto le'mo he'milunagihe. 17 To agoya hu nimilana bona'magi enali ya'ma topa hese foya suhi lilabe. Enali nigi'ni hete foipa felemagihi bona komopa'aniguti enele'mo he'milabe. To enali fato fato bona'magihi ka'aniguti kaga lilabe. 18 To enali osifa'i enayahi lilana to nalisa nagami'i nalanafi ya hilana mefililabe. To enali epesi'ehina bona'magihi enugufalo enayahi melenogo fa hu epalalibe. Hu'mamofihi amuyana'a enalitoga minenogo ya'ma topa hose foya suhi lilabe.

Hu'mau Yesuhi kokulumalugu le'moto ti'ehina

Lk 24:50-53; Aposo 1:9-11

19 To Sipi Bo Yesu ai ana kaga lu epi su holoto'a yalo kokulumalugu tito folofa hu'ehibe. Anaga tito Hu'mamofihi yahi lamaga'aga mino moloto mino'ehina yabe. 20 To enali bu gelete, bite asaga hepatoga biba biba nehite Yesuhi hetofa kaga'a lu yege helata mine'ahabe. To Sipi Bouba enehe'moto enalitoga minago, enali sipi lili'na amuya'a hiti topa hose suhi lite hi'ahabe. To yana'mu bona'magi ya'ma bu gete enali: Lusiga nelabe lite keheli'ahana yabe.

Copyright information for `BEF