Mark 2

Yesu keni bo mone'mofihi le'mo ye ko'ehina

Mt 9:1-8; Lk 5:17-26

Kana nesi'asi su holago Yesu Kapaneami hepatoga nehetito nonuga ti'ehibe. Ya higo asaga bona'magi: Noha'agu tito nohibe, lite keheli'ahabe. To ai nonugu minoto Hu'mamofihi kagamo lu noepigo, babu bona'magi anaga bite li gehesa nehite kasiha'alo ikini ikini hite minago kapo mone hokolo mehu'ehina. Ya huto ni'igo, loegi loegi bomagi keni bo mone aitoga le'mete alune'mu nehite ago, to kasito bona'i mino kikipa he'ahago aitoga lebato'isi mebise nehite tite nohupitalo li hokolo hi'ahabe. Ai nohinalo li hokolo hite'ani to ana hokolo kapoguti keni bomofihi nebelusalo nokago le'mo he'mi etago limoto ko'ehibe. Enali Yesu le'mo bati hilibe lite enegekesa kehelite le'me he'mi'ahabe. To Yesu ya'ma enegekesa keheli'ahanana komopa'atu keheliloto keni bomofihi ma luto lu emi'ehina: Pana'ni, nani foipanaka ali nohe'mi ketobe. To ya ligo, enali mono ka negana bona'magi anaga nehanaloti kehelite ma lite enegekesa yigi'ahabe. Ya'ma bo henabe luto ya nolibe? Ya'ma foipana li he'mi epololata kiyi'afu nohibe? Hu'mau aigo ya hulata bo nohina ni'ibe. To ai ya'ma bouba Hu'mamofi kumu megeka nolibe. To Yesu ana'asi ya'ma enegekesa neyiginana komopa'atu keheliloto ma luto lu epi'ehibe: Lenali henabe lite ya'ma lenegekesa neyigibe? Keta mehuse supo hiya'a ni'ibe? Nani keni bomofihi foipanaka li nohe'mi ketobe, luto lu emi'ohuna ya'ma keta hu'ehina suhi hu'ohufiye? O'e. To ho tito nebelusaka kofito bubo luto lu emutita ya'ma keta hinaga lutita'mu ni'ifiye? 10 To nani Kokulumaguti limi'ohuna Bo nohuna, amuya'ni hiti bo nohuto'ni melugu bona'magihi foipana'ani pa so epololata bo nohunagihe. To lenali ya'ma kehelilabe luto lenelepilube. 11 Ya luloto ai keni bomofihi ma luto lu emi'ehina: Kehelibo. Lu nokumube nolugi kai ho tito nebelusaka kofito bufa hubo. 12 To ya ligo ana bouba ana'asi ho tito nebelusa'a kofito bufa hu'ehigo, enali asaga'i yege fite topa hete Hu'mamofi kumu fokehi lite ma li'ahana: Akae. Lali koyapa bu mego'ohuta suhi yatai li huto hibe.

Yesu takisi bo Libaihi kehe i'ehina

Mt 9:9-13; Lk 5:27-32

13 To Yesu mone kanagu ana huto nagami beletoga buto nohigo to asaga bona'magi aitoga bite li gehesa nehago ai kaga lu epito mino'ehibe. 14 To anagati he'mito buto Alifiasihi pana'a Libai takisi nonugu nohigo bu goto ma lu emi'ehina: Ma bo yale. Kai nemege'i obo. To ya ligo, ai ho tito mege'i bu'ehina yabe.

15 To alihi babu bona'magi Yesuhi mege'i nebite ai hiti pana'alobomagi hiti to takisi bomagi hiti foipa bomagi hiti babu lite Libaihi noha'agu nose'na nete nehago enali Felosi bomagi to mono ka negana bomagi hiti enali ete bu ge'ahabe. Ai Yesu takisi bomagi hiti foipa bomagi hiti nose'na nenago enali bu gete pana'alobomagihi ma lite enoloka he'ahana. Ai ya'ma takisi bomagi hiti foipa bomagi hiti henabe luto nenabe? 17 To Yesu, ya'ma nelana ka kehelito ma luto lu epi'ehina: Bati hite neminana bona'magi lusa bo kehe neifiye? O'e. Epesi'ehina bona'magi kehe neibe. To nani ana huto bati hite neminana bona'magi kumu menoobe. Nani foipa bona'magihi kehe ito enele'mo bati hilube luto ao'ohuna yabe.

Nose'na mo silata nehanamofihi ka'a

Mt 9:14-17; Lk 5:33-39

18 To ana kanagu Yoni, nagami folo epolose bo ai hiti to pana'alobomagi hiti to Felosi bomagi hiti enali nunumu hilune'mu nehite nose'na mo site li pisigilete mine'ahabe. Ya hilata nehago bona'magi Yesutoga ete ma lite loka he'ahabe: Ya'ma Yonihi pana'alobomagi to Felosi bomagi hiti nose'na mo site li pisigilata nehabe. Ya hago to kaika pana'aloboka henabe lite nose'na mo site li pisigilete meneminabe? 19 Ya lago, Yesu ma luto lu epi'ehina: Mone pana'mofihi liha'a mina filune'mu nehana yupahi ana pana'uba falu'agi hiti nose'na mo site li pisigilete neminafihe? Lali Yuta bona hapati ya huto ni'ifihe? O'e. 20 To alihi yupahi ana pana'uba enehe'mito buto liha'a hiti minala'ina kanagu, falu'agi keke'i li etete li pisigilete minalana'mu yabe.

21 To, katamo tafa loto pekene hulenogo enali yuhufa katatu li bati hilune lite nehe metibe. Ya hatita aku'i yuhufana nesi notago tafana'a hilune lite menehetibe. Ya hatita aku'i yuhufana nesi notago tafana'a heti'ehina kapolo i lala bitita'mu yabe. 22 To ana huto, bai nagami'i yuhufana lolo hilete tafa kopogu heki menebibe. Ya hatita, alihi bai nagami'uba hofa toto bilito kohi fi polo huto sibina hulago, nagami'i limi su hatita'mu yabe. Yuhufa bai nagami'i yuhufa kopogu heki nebina yabe. Yesu ya luto ka'anilo nona'a lu epi'ehina yabe.

Fuli yupahi fa'mene mine'ahanamofihi ka'a

Mt 12:1-8; Lk 6:1-5

23 To alihi mone fuli yupahi Yesu pana'alobo hiti foya kapogu nebite, pana'alobomagi hapi fite nose'na legeya'a nesi'asi ligite nenete bi'ahabe. Ana nose'na laisi tegina ni'ina nose'na ligite ne'ahabe. 24 To ya nehago, Felosi bomagi bu enegete ma lu emi'ahana: Bu gobo. Fuli yupahi lu laga hu'ehina supo kai pana'aloboka henabe lite nehabe? 25 Ya lago ai ma lu epi'ehina: Lenali mono kalugu bu mege'ahafiye? Koyapasana Abiata sipi mono bo mino'ehina kanagu ya'ma sipi bouba Tebitiu kau'na gofa nohago buto Hu'mamofihi nonugu tito anagati Beleti nose'na lito no'ehibe. Nonoto to ai hiti nehana bomagi epilago ne'ahana yabe. Ana mono beleti nose'na Lepise Beleti yabe, lite gi nehana ya'ma nose'namofihi fa'mene bomagita nalana lu laga hi'ahana yabe. Mono bomagi anasi nalabe lite mele'ahana ni'ibe. To ana beleti nose'na Tebitiu kau'na gofa nohago lito no'ehina ka mekeheli'ahafiye? Mono kalugu bu mege'ahafiye? 27 To mone hiti ma luto lu epi'ehina: Hu'mau fuli yupahi hena'mu le'mo huto hu'ehibe? Bona'mu le'mo buto hu'ehina yabe. Lenali bona'mo fuli yupapomu'i lenele'mo huto mehu'ehina ni'ibe. 28 To ya higo nani Kokulumaguti limi'ohuna Bomofita nani fuli yupahi kaba bo nominobe. Yesu ya luto lu epi'ehina yabe.

Copyright information for `BEF