Mark 5

Foipa felemagi bomofihi komopagu ti'ehinamofihi Yesu le'mo bati hu'ehina

Mt 8:28-34; Lk 8:26-39

1To enali nagami muya beletoga, Gatala bona'magihi kapo'anigu nehetite, to Yesu botiguti nolimigo ana'asi bo moneuba foipa fele ekesa igo negi no'ehina bouba kene mala mala hepatogati oto aitoga o'ehina yabe. 3Ana bouba kene mala mala hepatoga minolata hu'ehina yabe. To bona'magi fa'mene naga'motu to seni naga'motu ana bomofihi sa gi ule'ale hago, ai li hepulu tulata huto mino'ehina yabe. 4Fato fato yupapogu, seni nagatu sa gilago ai ana naga'i li hepulu tuto'a to gi yaha'alo gi'ahana naga'i li pa solata hu'ehina yabe. Ana bouba lopi fito minago enali le'mo fulu mehi'ahana yabe. 5Ai asaga yupapo folugu'i fuligahi hiti kene mala mala hepatoga hiti to kosalo hiti minoto'a, efapotu gufa'a laga hulata to sipi nogo moloto ahi ahi lulata huto mino'ehina yabe.

6Ana bouba Yesu foto'i noago, bu goto hololu luto buto aitoga lahupa nohi fito minoto'a sipi nogo moloto hekele luto ma lu emi'ehina: Oho Yesuo, Hu'ma sipi kibinamofihi pana'a nohane. Henana hu netalube'mu noane? Oho, menohobo. Hu'mamofihi gi'a hoto koloka nohobe. Menohobo. 8Yesu ana felemofihi: Ma bomofitogati he'mi etobo, luto lu emi'ehigo ai ya lu emi'ehinagihe. 9To ya ligo Yesu: Kigika ho nimibo ligo ai: Nigi'ni Yege yege'nao yabe, luto'a, lali yege yege fele nohutagihe, luto lu emi'ehibe. 10To ya luloto Yesuhi buka tito: Ke. Fele'nimagi mana kapoguti nele'mo mehe'mibo luto amuya moloto loka ho'ehibe.

11To kosalo lebato'isi, babu yagamagi lomi kifite nenago felemagi bu gete: 12Ke. Yagamagitoga loho lifitogo buto enali hiti minalune, lite Yesuhi loka he'ahabe. 13To ya lago, Yesu: O'yo. Anaga bilo, ligo foipa felemagi ana bomofitogati he'mi etete'ani bite yagamagihi komopa'anigu tite falago, ana yaga, 2000 magi hololu lite nemebite yaba'mogu limite nagamilugu felete fili'ahana yabe.

14Ya hilago, yaga kaba bona'magi sipi koli hite me'me hite bite hepatoga bona'i to kifigu bona'i hiti asaga'i ana ka beto hite lu epite mine'ahana yabe. 15Yalo asaga bona'magi ete bu galune lite ete Yesutoga nehetite, to ana negi bo ekesa hokolo higo kata bito legeso huto meto nominago bu gelete enelesa'ani lu'ehibe. 16To enali bu ge'ahana bona'magi bite ana negi bo'mu to yagamagi kumu kaga beto hilago, 17asaga bona'magi ete Yesuhi ma lu emi'ahana: Kai abufa hubo. Hepatiloti he'mito bubo lite ka liba liba hi'ahabe.

18To ya lago, Yesu enalitogati he'mito buto botigu notigo, ana negi bouba oto: Kai hiti bilu'ibe, luto buka tito loka ho'ehina. 19To Yesu ma lu emi'ehina: O'e. Kai hepakaloga buto bonaka lu epibo. Sipi Bo, Hu'mau keke'i nolu ketoto kele'mo bati hu'ehinamofihi asaga'i buto lu epibo. Hu'mau amuya'a hiti bouba kehe'mo'ehina ka ya'ma beto huto lu epibo. 20Ya ligo ai keheliloto buto Tekapoli hepatoga asaga'i bego bego huto, Yesu hu eto'ehinamofihi asaga'i ya'ma ka beto huba huba higo, silaga bona'magi yege fite topa he'ahana yabe.

Yesu sipi mono bomofihi pa'a hiti to yatama kanagu besi'ehina a'mo hiti etele'mo ye ko'ehina

Mt 9:18-26; Lk 8:40-56

21To Yesu botigu tito nagami muya beletoga aku'i nehetito'a nagami nekisa'alo nohigo, babu bona'magi aitoga li gehesa hi'ahabe. 22Ya nehago, mono nohi kaba bo moneuba, gi'a Yailusi ai Yesuhi bu nogoto oto aitoga lipito minoto amuya moloto ma luto loka ho'ehina: Oho. Lagaso pa'ni sibina nobesigo ma'asi fililube'mu nohibe. Kai buloto kayahi gufa'alo li keheli etetogo mefilise ye koto fulu besilina'mu yabe. 24Ya ligo, Yesu kehelito ai hiti bi'aha'ibe. To neba'igo yege yege bona'magi etali hiti hetegete nebago ikini ikini hu'ehibe.

25To ai'i moneuba sopaluga buba buba hu'ehina a'mouba anaga nobina yabe. Ana a'uba 12 foya kanagu ya huto minoto, 26efaha'a asaga lusa bomagihi epi su hago to enali luna lana asaga'i hi etete le'mo bati mehi ete'ahanaya ai gabu'i nogigo minoto lusina nobesigo mone gofana huto minomo buto mino'ehina yabe. 27Ana a'uba enali Yesuhi kaga nelago, kehelito buto komopa'agu ekesa kehelito ma lu'ehina: 29Nani kata'a anasi bako hulenogo nebesise'na fa hu netalina'mu yabe. Ya luto buto asaga bona'magi nebana hiti buto'a Yesuhi mege'i bu'ehibe. 30To kata'a bako higo Yesu ana'asi amuya'a bu su ho'ehina komopa'atu kehelito i behe huto bona'magihi enoloka ho'ehina: Kiyi'afu kata'nilo bako hu'ehibe? 31Ya ligo, pana'alobomagi ma lu emi'ahana: Akae. Silaga bona'magi kaitoga ikini ikini hite nehago bu go'ahane. To kai, kiyi'afu bako he neto'ehibe luto nolataya henabe lutobe? 32Ya lago ai bu go beloloto bako hu neto'ehina bona'i bu galube luto bu go belolo'ehibe. 33Ya nohigo ana gufa'a le'mo bati hu'ehina a'uba ai ekesa nokehelito koli nohuto to afoya foya noito oto, aitoga lipito asaga ka lu hokolo huto lu emi'ehina. 34Ya ligo Yesu kehelito ma luto lu emi'ehina: Oho, pa'nimaka. Kai nanitoga keheli ule'ale hu'ahata yanauba kugufaka le'mo bati hibe. Kebesi'ehinana yatai fa hu keto'ehinagihe. Kelesaka melinogo fulu huto bubo.

35To Yesu ya noluto nohigo, Yailusihi noha'agati bona'i luga'amagi ete ma kaga li'ahana: Pakamo afili su ho'ehina yabe. Ma babafi bo le'mo he'mibo. Ai yatai li mekehe'malina'mu yabe. 36To Yesu kehelito enali ka'ani he'mito to anaga bilube'mu nohuto'a ai mono nohi kaba bomofihi ma luto lu emi'ehina: Kai koli mehubo. Nanitoga keheli ule'ale huto minobo. 37To ya luloto Pitagi Yemesigi to Yemesihi gona'a Yonigi enaligo enele'moto buto mono nohi kaba bomofihi noha'aga neheti'ahabe. 38Nehetigo, anagu bona'magi li nupa hite: Akae, akae, lite yibi nama hite nehago Yesu bu goto nonugu tito ma luto lu epi'ehina: 39Lenali henabe lite sipi nogo melete yibi hafili nehabe? Ya'ma pa'i mefilise nohuto fa'mene bu'i nokabe. 40Ya ligo enali: Faga yabe lite, kiya hi etago ai enali nonuguti enele'mo he'mito'a ana pa'mofihi ito'afu hiti afo'afu hiti to ai hiti e'ahana pana'alobomagi hiti enele'moto buto ana pa'i ko'ehinalo hasagu ti'ahana. 41To ana pa'mofihi yaha'a lito ka'aguti Taliya kumi luto, lali kaguti ma lu'ehibe: Pa'nise, ho tibo luto'ni lu nokumube. 42Ya ligo, ana'asi mele'isi ana pa'mouba ko'ehinagati ho tito humofa'na higo, enali sipi enelesa'ani lite yege fi'ahabe. Ana pa'mofihi foya kana'a 12 yabe. 43To ho tito humofa'na nohigo Yesu: Ma pa'mofihi nose'na mone'a lite ete emilo, luto'a yalo amuya ka lu laga huto ma luto ka epeki'ehina: Lenali ya'ma asaga bona'magihi ka lu meepilo. Yesu ya luto lu epi'ehina yabe.

Copyright information for `BEF