Mark 6

Nasalete hepatoga bona'magi Yesuhi enemegesa hi emi'ahana

Mt 13:53-58; Lk 4:16-30

To Yesu ana kapoguti he'mito buto kapo'aga nehetigo pana'alobo hiti bite neheti'ahabe. To fuli yupapogu Yesu mono nonugu tito nominoto kaga hapi fito lu epito nohigo, enali kehelite otopa hete ma li'ahana: Akae. Ya'ma ka kiyi'afu lu emigo nolibe? To keheli fe luse'namo hiyagati kehelito nohibe? To ai mana hepato bo nohinaya ya'ma topa hose foya lise'namofihi amuya'a hiya'agati li'ehibe? Ai nohi gise lili'nalo bo nohina, ai fa'mene Maliahi pana'a nohina yabe. To Yemesigi Yosesegi Yutasigi Simonigi enogo'anifu nohibe. To etali'agi mana hepatiga nehana yabe. Ai hepatilo bo nohinaya ya'ma ka nolina'a hiya'agati keheli'ehibe? Ya lite ai kumu enipagu sibina hite mine'ahana. Ya hago Yesu ma luto lu epi'ehina: Ana, lenali hapatini ya huto ni'ibe. Hu'mamofihi ka'a lu huto huto bo mone'mofi kumu asaga bona'magi fokehi nelibe. Ya huto ni'inaya aku'i ai'a bona'a hiti hepa'alo bona'magi hiti to ai lalameha'a hiti enali fokehi menelibe. Hapa'a ya huto ni'ibe. To lenali ya hapa'amu mege'i melelata nehabe. Yesu ya lu epi'ehibe. To enali enipa sibina higo, Yesu anaga topa hose foya melise nohuto epesi'ehina bona'i loe'asi yatu bako huto'a enele'mo bati hu'ehibe. Enali aitoga keheli amuya memelese komopa'ani ule'ale higo, Yesu topa hoto enali kumu ipagu gabu'i gi'ehina yabe. To anagati he'mito buto lebato hepatoga asaga'i bego bego huto buto ka lu enelepimofa'na hu'ehina yabe.

Yesu aposolo bo'a 12 ka lamana'amu enoho lifi'ehina

Mt 10:5-15; Lk 9:1-6

To yalo Yesu pana'alobo 12 magi kehe igo ago'a ma luto lu epi'ehina: Nani yatai lenoho lifinogo'ni bite bona'magi komopa'aniguti foipa fele enele'me he'milabe. Lenali loemo loemo hite bilo. To ya hite loemale'ita bitetiti ma hiliyo. Nose'natiti efa gutiti to ana'ina fato fato'na melise fa'mene biliyo. Letayanugu fatusa anasi lite bila'ibe. To letigigusagu'na bitetiti, to letugupisalo naku'i moneko moneko biliyo. Loemo loemo bila'ina'a meni'ibe. Ya hite bilo, luto lu epi'ehina. 10 To ka mone hiti ma luto lu epi'ehina: Bite hepa'i moneto nehetite bo nohi tite kala'ina nopogu kelata hite minaliyo. Fato fato nopogu mekaliyo. Ya hite minetetiti alihi ana hepa'mo minala'ina'a kana su henogo ana nonuguti he'mite biliyo. 11 To mone hepato nehetila'inamo to enali letebe metigise to kagatiti mekehelise minenogomo letali ana hepatogati he'milu'ibe'mu nehitemo letigigusaloti me'ani kele li he'miliyo. Ya hinogo enali bu gete: Hu'mau ka lemeki'ehina yabe lite kehelilabe. Yesu ya luto lu epi'ehina yabe. 12 Ya ligo, enali loemo loemo hite bifa hi'ahabe. Asaga hepatoga bite: Komopatini i gelehe hite foipanatini li he'milo, lite kaga lu epi'ahana yabe. 13 To foipa fele bona'magihi komopa'aniguti le'me he'mite, to epesi'ehina bona'magihi enugufalo ueli nagami'i folo epelete enele'mo bati hi'ahana yabe. Enali ya hite babu bona'i enele'mo bati hi'ahana yabe.

Nagami folo epolo'ehina bo, Yonihi, ho fili'ahana

Mt 14:1-12; Lk 9:7-9

14 To yalo asaga bona'magi Yesu kumu kaga liba liba hago, gihiti bo mone, gi'a Heloti, ai ya'ma kaga keheli'ehibe. To bona'magi mone'a Yesu kumu: Ai Yoniu nagami folose bouba fili'ehinaguti aho notibe. Ya'ma Yesu ai ana bo nohuto, amuya hiti nohuto'a ya'ma yege fise'na legi huto nominanagihe, lite li'ahabe. 15 To mone'amagi: Ai koyapa bo Elaiyau aku'i huto nohibe, lite li'ahabe. To mone'amagi: Ai Hu'mamofihi ka'a lu huto huto bo nohibe, lite, ya'ma koyapa emasana ka lu huto huto bo mino'ehina legi nohibe lite li'ahabe.

16 To mone gihiti bo, Helotiu ya'ma kaga'ani lilata nehanaga keheliloto ma lu'ehina: Ahi. Ai Yoni nagami folose bo nohibe. Yonihi nani lataha'a laga hu he'mi eto'ohuna bouba fili'ehinaguti aho ti'ehinagihe. Helotiu ya luto keheli'ehibe. To hena'mube? 17 Koyapa'i Helotiu mone'amagihi enoho lifigo bite Yonihi lite naga'i emite le'mete bite kalabusi nonugu he'mi ete'ahana yabe. To henabe lutobe? Ai Helotiu, go'afihi Filipihi liha'a, gi'a Helotiasi, ya'ma a'i gumina folo'ehigo, Yoniu: Ya'ma kogokafihi liha'a li'ahata ya bebe meso'ehina yabe, luto lu emigo Helotiu Yonihi kalabusi emi'ehina yabe. 19 To ana a'uba, Helotiasiu ai Yoni kumu ipa'agu sibina higo halube'mu nohuto mino'ehina yabe. Ai ya huto minago, to Helotiu ai Yoni kumu koli nohuto kaba hu eto'ehibe. Yoni ai hetofa bo nohuto to hapa'a bati hu'ehigo, Helotiu ai koli nohuto kaba hu eto'ehina yabe. To Yoniu hetofa kaga lu emigo, Helotiu komopa'agu keheli keheli nohuto minoto ka'a kehelilata'a laga'a besi'ehina. Ai Yonihi ka'a kehelito ekesa keheli keheli huto minoto'a hena'ni hilube luto kehelito mino'ehina. Ya huto minoto ai Yonihi kaba hu etago Helotiasiu ho mefilise mino'ehina yabe.

21 To yalo mone yupahi Helotiasiu ya'ma Yonihi nona'a emilinamofihi geba huto ho fililina kapo'a bu go'ehibe. Ana yupahi Helotiu sipi nose'na laita huto yege yege bona'i kehe igo e'ahabe. Ya'ma koyapa Helotihi ito'afu ai'a keto'ehinamofi kumu beto hilana'mu li gehesa hi'ahana yupapo yabe. Kanisole bo hiti gimi bo hiti to Galili kapoguti sipi bomagi hiti e'ahabe. 22 To ete nose'na ne'ahana yupahi Helotiasihi pa'auba Helotitoga buto enubulo melekehi igo, Helotigi ana melekepo laga'ani epesi'ehina yabe. Helotiu ai sipi laga besigo ana pa'mofi kumu ma luto lu emi'ehina: Oho. Ya'ma melekehi italo henana kimilube? Mone kebesilinana kimilunagi kai lu nimibo. 23 To kai kapokaga me'i mone luga'a nimibo luto noloka holetogomo, nani o'e meluse kimilunagihe. Henanaka lilane? 24 Helotiu yahi tito ana ka lu emi'ehina yabe. To ya ligo ana palala'uba aitogati he'mito buto ito'afu nohinalo buto: Henana'mu loka halube luto ligo ito'afu ma luto lu emi'ehina: Ya'ma Yoni, nagami folose bomofihi lataha'a nimibo luto loka hobo. 25 Ya ligo palala'uba ana'asi i behe huto buto Helotitoga hololu luto buto ma luto lu emi'ehina: Kai yatai, ma'asi, Yoniu nagami folose bomofihi lataha'a ho gitigito lapelugu li moloto ito oto nimibo. 26 Ya ligo Helotiu sipi ginaga fi'ehibe. Aku'i ai yahi tito lu emi'ehina ka'a asaga bona'magi kehelite aimo bu gete neminago, enali kumu lesa'a lu'ehibe. 27 Lesa'a ligo gimi bo'a mone ho lifi'ehina yabe: Kai buto Yonihi hoto lataha'a ho gitigiloto ito obo, luto lu emigo ana bouba buto Yoni kalabusi nonugu nohinaga tito lataha'a ho gitigito'a lapelugu li moloto ito oto palala'i emilago ai ito buto ito'afihi emi'ehina yabe. 29 To Yonihi pana'alobomagi ya'ma kehelilete bite gufa'a lite yafa bite keli he'ahana yabe. Helotiu ai koyapa ya huto Yonihi ho fili'ehina yabe. Ya hu'ehinaya ai alihi Yesu kumu kaga keheliloto'a: Ya'ma Yoniu fili'ehinaguti aho notibe luto keheli'ehina yabe.

Yesu li huto hu'ehina nose'na babu boana'i 5000 epi'ehina

Mt 14:13-21; Lk 9:10-17; Yn 6:1-14

30 To Yesuhi pana'alobomagi enoho lifi'ehinagati aitoga aku'i ete'ani enali hi'ahana ka hiti to lu epi'ahana ka hiti beto hite lu emi'ahabe. 31 To ya ka lilago Yesu ma lu epi'ehina: Lenali mana hepatogati he'mite ete nani hiti butoti bona'i menehanaga bite lenabasu bite minalabe, luto lu'ehibe. Ana hepatoga bona'magi babu lite bila ela hite nehago enali pana'alobomagi mine'ahanagihe. Ya hite minago Yesu: Bite lenabasu bite minalabe, luto lu epi'ehina yabe. 32 To enaligo bite suguna hilete bite botigu tite yu hepatoga bilune'mu nehabe.

33 To nebago yege yege bona'magi bu enegete kehelite nohi hepa'anigati he'mite hololu lite melugu kohe tete bite Yesugi pana'alobomagi bilana hepatoga enebege ligite yata'a neheti'ahabe. 34 To Yesu alihi anaga nehetito enali li gehesa nehanamo bu enogoto keke'i lu epolo'ehina yabe. Enali sipisipi yagamagi, kaba bo'ani meminana suhi lite nehago bu goto keke'i lu epolo'ehina yabe. Ya huto'a kaga lu enelepiba enelepiba huto mino'ehibe. 35 Ya huto minago sinihi gigo, pana'alobomagi aitoga neete me lite lu emi'ahana: Ya'ma hepato yu hepa'i ni'igo to sinihi nogigo, to enali nose'na'ani melise e'ahago kau'na enahabe. 36 Kai enoho lifitogo bite asaga bego bego hu'ehina hepatogati bite nose'na mina fite nalabe. 37 Ya lago Yesu: Lenali nehanaya, lenalitini nose'na epilo, luto lu epi'ehina. Ya ligo enali ma lu emi'ahana: Kai kekesa kehelito lali buto 200 kinaloti'i nose'na mina fito ito oto epilupiye? 38 Ya lite lago, Yesu: Lenalitoga beleti nose'na henaki ni'ibe? Bite bu gete kehelilo, luto lu epi'ehina yago enali bite kehelilete ete ma lu emi'ahana: Beleti nose'na'a loe yagi loe yagi mone yagi ni'ito, to faya'i loe'asi hiti ni'ibe.

39 Ya lago yalo Yesu ma luto lu epi'ehina: Ana lenali asaga bona'magihi enele'mo nupa hinogo meto mineno. 40 Ya ligo, yege yege bona'i kifina ni'inalo minela minela hite meto mine'ahabe. Mone 100 bona'i li nupa hite minela hi'ahabe. To mone'a 50 bona'i li nupa hite minela hi'ahabe. 41 Ya hite meto mine'ahago, Yesu ana beleti nose'na loe yagi loe yagi mone yagi to ana faya'i loemo hiti lito'a, kokulumaga bu go saga nohuto Hu'mamofitoga fokehi lu emito beleti nose'na li gofa huto pana'alobo noepigo enali lite bite gabu ite epi'ahabe. To faya'i ana huto li gofa huto epigo enali lite bite epi'ahabe. 42 To enali yege yege bona'i nose'na nenete enumu higo he'milete mine'ahabe. 43 To ya hago, fakene hu'ehina nose'na, beleti letuha'a hiti faya'i hiti sulu sulu'ya 12 agu'i he gigite li'ahabe. 44 Enali ana nose'na ne'ahana bona'i babu lite, bomagi 5000 ne'ahana yabe.

Yesu hefuhi nagami ifo'alo kapo molo'ehina

Mt 14:22-33; Yn 6:15-21

45 To yalo Yesu ana'asi pana'alobo'a amuya ka lu epito ma lu'ehina: Lenali nani kohe tete bite botigu tite nagami muya beletoga Betesaita hepatoga lofotula hilutagi bilo. 46 To enali nebago Yesu asaga boana'i enebe tigito: Hepatiniga abilo ligo bi su he'ahabe. To bi su helago, ai nunumu hilube'mu buto bohupogu tito Hu'mamofihi ka lu emito mino'ehibe. 47 To sinihi gilago, pana'alobo'amagi botigu nagamito folaganugu neminago, to aigo melugu minoto'a bu enogo'ehibe. 48 To sipi abafahuba noligo enali osatu boti kefefe nehite lusi foya neligo Yesu bu enogoto, folugu'i kokole nogo nomalago buto nagami ifo'alo kapo moloto enalitoga bu'ehibe. Buto to enebege ligilube'mu i pebisa nohago enali asaga'i bu gete koli gofa hi'ahabe. 49 Ai nagami ifo'alo kapo nomalago bu gete: Felemo yabe, lite enegekesa kehelite enonogo'ani ahi sipi lite koli habe. To ai ana'asi kaga luto: Nani yabe. Koli mehilo, luto lu epi'ehina. 51 To ya luloto enalitoga botigu tito nohigo, ana'asi abafahi li lege no'ehibe. To pana'alobo'amagi enegekesa keheli keheli hite otopa he'ahabe. 52 Enali koyapa Yesu beleti nose'na le'mo babu lu'ehigo enegekesa hokolo mehigo ai Hu'mamofihi pana'a nohibe lite mekeheli'ahabe. To ya'ma kana ana huto mekehelise nehite enegekesa keheli keheli hite yege fi'ahabe.

Genesalete hepatoga bona'i epesi'ehina'amagihi Yesu enele'mo ye ko'ehina

Mt 14:34-36

53 To, nagami muya beletoga bite Genesalete hepatoga nehetite boti nagami nekisa'alo neheti'ahabe. 54 Yalo botiguti he'mite limite nehago asaga bona'magi ana'asi: Yesu yabe, lite okaba'a kehelite bite hololu lite bite asaga hepatoga bite epesi'ehina bona'i ukogu ke epelete yafa bite Yesuhi nohinalo enele'mete bi'ahabe. 56 To Yesu fato fato hepatoga asaga'i lagaso hepatogafi sipi hepatogafi kifi hepatogafi nehetigo, enali epesi'ehina bona'i aitoga enele'mete maketi hepa'i ke epalago Yesuhi buka tiba tiba hite mine'ahana. Ai kata'a nekisa'asi bako hulenogo fa hu lepalalinagihe lite enegekesa kehelite ukimi ukimi hite loka he'ahabe. To kata'a bako hi'ahana bona'magi epesi'ehinana fa hu epoloto enugufa'ani ye ko'ehina yabe.

Copyright information for `BEF