Mark 7

Koyapa enigiko enagako bomagi kaga lu enelepi'ehina ka'ani

Mt 15:1-9

1To mone yupahi Felosi bona'magi to Yelusale hepatogati mono babafimagi hiti ete Yesuhi pana'alobo'amagi enayahi nagamilugu okala mehise nose'na nenago bu ge'ahabe. Ya'ma bu gete enipagu sibina hu'ehibe.

3Enali Felosi bona'magi to Yuta bona'magi asaga'i, koyapa bona'amagihi hapa'anilo mege'i melete enayahi nagamilugu okala hilete yalo nose'na nenana yabe. To enayahi nagamilugu melise nehite'ani nose'na mo nesibe. 4To ana huto maketi hepatogati nose'na ana'ina lilete'ani yata'a enugufa'ani nagami felelete alihi nenabe. To fato fato hapa'ani koyapa bona'animagi hi'ahana suhi ya'ma silaga'i ana hite nehana yabe. Masu'ani somo'ani kopa lape'ani koha'ani asaga'i nagamitu ifepa afepa ite mine'ahana yabe.

5Enali Felosi bona'magi to mono ka babafimagi hapa'ani ya huto ni'igo, Yesuhi pana'alobo'amagi ya hite enayahi okala mehise nenago, bu enegete Yesuhi ma lite loka he'ahana: Akae. Kaika pana'aloboka henabe lite afotigihi hapa'ani nehe'mite, enayahi okala mehise nenabe? 6Ya lago, ai ma lu epi'ehina: Lenali soya kalo bona'i nehabe. Aisaiyau koyapa Hu'mamofihi ka'a lenali kumu ma'naka luto koyo'ehina yabe. Ai ma luto koyo'ehina:

  • Ya'ma bona'magi enabagaguti
  • nofokehi nelinaya,
  • aku'i komopa'aniguti agoya hi menenimibe.
7
  • To nani kumu yege filata nehanagi,
  • aku'i bona'magihi ka'ani mono'i yabe lite,
  • soya ka lite li epilata nehanamo ni'ibe.
  • 8Aisaiyau lenali kumu ma'naka luto ya luto go'ehina yabe. Lenali Hu'mamofihi ka'a nehe'mite bona'magihi ka'ani kehelite mege'i melelata nehabe, Yesu ya luto lu epi'ehina.

    9To ya luloto ka mone hiti ma lu epi'ehina: Lenali ma suhi hite Hu'mamofihi kaga'a nehe'mibe. Ma suhi hite Hu'mamofihi lenemegesa hi emite lenali hapatinimofihi liyafa nehana yabe. 10Moseu koyapa keya ka lu'ehina ka'a ma luto koyo'ehina:Kai afokafinogo itokafinogo kaba hu etototo minobo. To, ana huto ka mone hiti ma koyo'ehina:Ya'ma afo'afinogo ito'afinogo gumi'i etahalina bomofihi ai'i ho fililana'mu yabe. Moseu ya loe ka koyo'ehinamo ni'ibe. 11Ya huto ni'inaya to lenali aku'i ma lite nelabe: Bo mone'mofihi afo'afitoga ito'afitoga lu etimibe: Ke, mana efaha'ni Hu'mamofihi efaha'a yabe, luto molo'ohube. Ya melutita letumutita'mu yabe. Ana ka luto lulata bomomu'i lenali bati bo nohibe lite nekehelibe. 12Lenali ana bouba afo'afugo ito'afugo bati huto he'mi etoto'ehina yabe lite nelana soya ka nelabe. Lenali ya hite Hu'mamofihi ka'a le'mo sibina nehabe. 13Lenali hapatinimu'i kaga litetini Hu'mamofihi ka'a nehe'mite soya ka lu epilata nehana ni'ibe. To luna lana fato fato'na ana suhi hite nehana yabe. Yesu ya luto ka epeki'ehina yabe.

    Bona'magihi enele'mo kolo notana nasana'mu

    Mt 15:10-20

    14To Yesu yalo asaga bona'magihi aku kehe igo ago ma luto lu epi'ehina: Ka lu lepilunagi asaga'i kehelilo. 15Ana'ina asaga'i bomofihi komopa'agu limilina'a meha'a le'mo sibina mehilibe. Aku'i ai'a komopa'aguti tilina'a ya'ma meha'a le'mo sibina hilina'mu yabe. 16Lenegekesatini nina bona'i ka kehelilo.

    17To ya luloto yalo asaga bona'i he'mi epoloto buto nonugu tito nominago ai'a pana'alobomagi ana fono ka'mu ma lite loka he'ahabe: Suguna ka lu epi'ahatana lu hokolo hu letobo. 18To ai ma lu epi'ehina: Lenali hiti ana hite lenegekesa meni'igo neminafiye? To mekeheli'ahafiye? Mafi. Bomofihi komopa'agu limilina'auba hiya huto meha'a le'mo sibina hilibe? 19Ai anana nolenogomo kupa'agu limito yalo ipa'agu limiloto bu su nohabe. Hiya'a huto meha'a le'mo sibina hilibe? Ya mehilibe. To Yesu ya ligo lali asaga nose'na bati huto naluta'mu yabe. 20To Yesu ka mone hiti ma luto lu'ehibe: Bomofihi komopa'aguti notina'a ya'manauba meha'a le'mo sibina hulata nohibe. 21Bomofihi komopa'aguti ekesa noyiginana asaga'i notina yabe. Moko lise'na, bauna ise'na, bona'i ho filise'na, a'i gumina folose'na, to komopaka hosopa ito ana'ina'mu nani'ni babu luto lilube lulata ya'ma, to foipana fato fato'i huse'na ya'ma yabe. To, bahane hose'na, kolota kolota hapa'a huse'na, siko huse'na, megeka luse'na, kugufaka limo titi huse'na, to keheli sibina huse'na, 23ya'mana asaga'i bomofihi komopa'agu ekesa kehelilata nohina yabe. Ya'manauba komopa'aguti tito meha'a le'mo sibina hilina'mu yabe.

    A'uba Yesutoga keheli ule'ale hu'ehina

    Mt 15:21-28

    24Yesu ya luloto, ana hepatogati he'mito buto Taiya hepa'i to Saitoni hepa'i ni'ina kapogu buto'a, nonugu tito suguna huto mino'ehibe. Ya huto suguna huto nonugu folo'ehigo yalo bona'magi kehelilago,

    25to a'i mone pa'amofihi komopa'agu foipa fele ti'ehina pa'i ya'ma ito'afu Yesuhi kaga nelago kehelito aitoga buto gigusa'alo lipito mino'ehina yabe. 26Ana a'mo Giliki ka nolina to Silia metogati Fonisia naga'i nohina a'i yabe. Ai Yesutoga lipito minoto, amuya moloto ma luto loka hoba hoba huto mino'ehina: Oho. Pa'nimofihi komopa'agu foipa fele tito nohina kai le'mo he'mi etobo. 27Ya ligo, Yesu fi taga hu etoto ma luto lu emi'ehina: Mafi. Yagapana'magi nose'na yata'a nelenogo kalamagi alihi nenabe. Yagapana'magihi nose'na'ani be silito kalamagihi epiloto'ni bati supo hilufihe? 28To ya ligo ana a'uba ma luto lu'ehibe: Afo'nigabe, ma'naka nolataya aku'i kalamagi hita kapoluga minete nose'na letuha'a limo i'ehina'a nelata nehana yabe. 29Ya ligo, Yesu ma lu emi'ehina: Ma a'ise, kai komopakaguti keheli bati huto ya'ma kaga lu huto hatalo pakamofihi komopa'aguti foipa fele le'mo he'mi'ohube. Kipakagu bati hinogo hepakaga bubo. 30Ya ligo ana a'uba hepa'aga buto nehetito pa'a bati huto nebelusalo nokago bu go'ehina. Foipa fele he'mi etoto bufa hu'ehigo ya'ma pa'i bati huto nohigo bu go'ehina yabe.

    Ekesa hekini lo'ehina bomofihi Yesu le'mo bati hu'ehina

    31To yalo, Yesu Taiya hepatogati he'mito buto Saitoni hepa'i folaganugu buto muya beletoga Tekapoli kapo bege ligito buto Galili nagamito neheti'ehina.

    32Ya higo bona'magi mone ekesa hekini lo'ehina to kaga lu bati mehina bo aitoga le'mete bite ma lite Yesuhi loka hete buka ti'ahabe: Oho, ma bose. Kai kayapotu bako huletogo ya'ma bomo bati hilina'mu yabe. Enali ya lite loka he'ahabe. 33Ya lago, Yesu ana bomo enalitogati le'moto buto yaha'a ekesa kapogu luga luga bito, to libi'na hoto ana bomofihi kenetufa'alo folo etoto, 34yalo kokulumagu bu go saga huto'a: Ke, luloto to ai'a ka'aguti Efata luto, lali kaguti: Hokolo hubo, luto lu'ehina. 35Ya ligo ana'asi ana bomofihi ekesa'a hokolo higo to kenetufa naga'i i hepulu tulago kaga lu bati huto lu'ehina yabe. 36Ya higo, Yesu asaga bona'magihi ma luto lipoti epi'ehina: Lenali fato bona'magihi ya'ma hu'ohunana lu meepilo. Ai ya luto lu laga huto lu epi'ehibe. Yesu luto lu epiba epiba huto hulago, enali aku'i bite fato fato bona'i lu epiba epiba hi'ahana yabe. 37To asaga bona'magi lusi topa nehete enegelo bite ma li'ahabe: Bogiyo. Ya'ma Yesu ai asaga'na keheli bati nohina yabe. Ai ekesa hekini lo'ehina bomofihi le'mo bati higo, kaga nokehelibe. To kaga meluse mino'ehina bomofihi le'mo bati higo, kaga lu bati huto nolibe. Enali ya lite yege fi'ahana yabe.

    Copyright information for `BEF