Matthew 10

Aposolo pana'magi enigi'ani

Mk 3:13-19; Lk 6:12-16

To Yesu aposolo panana'a nayaha'ni su hago nigigusaga loemo leheko malago enele'mo nupa huloto foipa felefi to bona'i enugufagu enebesila to ketana nina li he'mi epalalabe luto amuyana epi'ehina yabe. Nayaha'ni su hago nigigusaga loemo leheko malago aposolo pana'magihi enigi'ani li keheli'ehina ma luto ni'ibe. Yata'a Simoni fato gi'a Pita, to Atulu ai gona'a yabe. To Yemesi Sepetihi pana'a ai Yoni gona'a hiti yabe. To Filipi hiti to Batolomu hiti yabe. To Tomasi hiti Matiu hiti etali takisi efahi lilata bole yabe. To Yemesi ai Alifiasihi pana'a yabe, to Tatiasi yabe. To Simoni ai fato gi'a Seloti yabe. To Yutasi fato gi'a Isikelioti, ai Yesuhi mi'i moloto fateha'amagihi epi'ehina yabe.

Yesu 12 aposolo pana'a lili'na enelepi'ehina

Mk 6:7-13; Lk 9:1-5

Yesu nayaha'ni su hago nigigusaga loemo leheko malago koko panana enoho lifiloto ma kaga lu epi'ehina: Lenali fegutoga bona nagatoga bite ise megilo. To lenali Samalia bona'magi hepatoga mebilo. Lenali Isilaeli nagalugu sipisipi yaga fenene hite nehanalo bilo. Lenali bite kaga ma lite lu epilo: Kokulumamofihi kapo'a anasi a'o leba notabe. Lenali enebesise bona'i enele'mo ye kalo, to fili'ahana bona'i enele'mo ho tilo, to sipi enehepuhi lo'ehilina bona'i ana enehepuha'ani li gololo ti epalalo, to foipa fele li he'mi epalalo. Lenali mina melise nelinagi ana hite mina'a melise lu nolepuna suhi hi epalalo. Lenali efa gutini luga li gu meise bilo. 10 Lenali sisaku gutinifi, guketetini loefi, lenigigusagu sutinifi to fatusatinifi melise lenayapako bilo. To lenali enele'malana bona'magi nose'na lepilana'mu yabe luto Yesu lu epi'ehina yabe.

11 To lenali tauni hepa'i ninalofi to lagaso hepa'i ninalo nehetiletemo lenali ana hepato bona'i hapa'ani bu go bati hiletebe. Hiya bo bati bo nohifi to hiya bo bati mehina bo nohifi lite enogo kehelilete hapa'a bati hu'ehilina bo be geletemo lenali ana bo hiti nehite fato hepatoga bilune'muko ho tite bilo. 12 To lenali nohi moneluga tiletemo ana nonuga nehilana bona'i lenipagu fuluna mineno lite lu epilete tilo. 13 To ya'mana nonuga bona'i bati bona'mo nehinogomo lenali enebe tigite fulunatini epilo. To hapa'ani bebe mesana bona'mo nehinogomo lenali fulunatini aku'i i behe huto lenalitiniloga alina'mu yabe. 14 To hepa'i monetotifi to nohi monelugutifi lenebe metiginogomofi to kagatini keheli melepinogomo lenali lenigigusagati mumusopa li tili nehite ana hepa'i he'mite fato hepatoga bilo. 15 Nani ma'naka luto lu nolepube. Hu'mau ana boana'i kaga'ani loko hu epalalina yupapogu Hu'mau Sotomu hepa'i hiti to Gomola hepa'i hiti nesi'a enahalibe. To lenele'mo bati mehilana hepa'iya Hu'mau sipi enoho su halina'mu yabe, luto Yesu lu epi'ehina yabe.

Keta huse'na fato fato'mofihi huto hilina'mu yabe

16 Lenali kehelilo. Nani lenali'i sipisipi yaga legi huto lopi kalamagihi folagaha'anigu lenoho lufube. Ya hu'ehinagi lenali ka keheliya ise osifa legi hite ana'ina lolo hilune'mu nehitemo yata'a lenekesa yigi fe liletebe. To lenali lufu namamofihi hapa'a agoya'a nina suhi lite minalo. 17 Lenali kaba hu bati hilo. Enali bona'i luga'amagi naga'i lepelete ka foya li lepelete enali li nupa hite minelata nehana nonugu lenele'mo melete naga osatu lenibi yigilana'mu yabe. 18 Enali nani kumu lite lenali'i gamani bona'i hiti to enikibina bona enubulo lenele'mo yegelo melete ka foya li lepalalana'mu yabe. To mono ka ana gamani bona'i hiti to fegutoga bona'i hiti lu epilana'mu lite ya hi lepalana'mu yabe, luto Yesu lu epi'ehina yabe. 19 To ka foyagu lenele'mete nebinogomo lenali kaga lilana'mu henabe lilune lite lenekesa yigi to hiya'a huto kaga lilupi lite lenekesa yigi babu melilo. To ana kana'a noenogomo kaga lilana lenabagalo alina'mu yabe. 20 Ana kaga lilanaya lenalitini melilana'mu yabe, to kokulumaguti Afotinifu ana kaga lenelepilenogo ana kaga lenali lu epilana'mu yabe, luto Yesu lu epi'ehina yabe.

21 Bomagi enali enogo'anigihi ka foyagu enele'me melete enoho fililana'mu yabe. To afo'afu pana'amofihi ana suhi luto ho fililina'mu yabe. To panana'animagi afo'anigihi ana hite fateha'ani enele'mo lolo hite enoho fililana'mu yabe. 22 To anaga bona'magi lenipakafa halana'mu yabe. Hena'mugope lenali nani yagapana'ni minana'mu lite yabe. Ya hu'ehina to bo moneuba amuya moloto minomo buto bona'i guna ise kana'alo minalina Hu'mau aku'i le'menogo ana bo ai Hu'mamofihi pana'a minalina'mu yabe. 23 To mone hepatoti lenehenogomo lenali ana hepa'i he'mite hololu lite fato hepatoga bilo. Nani ma'naka luto lu nolepube. Lenali asaga Isilaeli hepalugu bite lili'na li baga mei'ehinogo nani aku'i aluna'mu yabe, luto Yesu lu epi'ehina yabe.

24 To sukulu pana'i moneuba tisa bo'amofihi mone be ligito meminolata nohibe. To koko pana'uba kaba bo'amofihi be ligito meminolata nohibe. 25 To sukulu pana'uba tisa bo'a lolo hilina bati huto ni'ibe. To koko pana'uba sipi bo'a lolo huto minalina bati huto ni'ibe. Nani afotinifita enali foipa felemofihi gi'a Bielesebulu nanitoga mele'ahana suhi hite lenali'i ana hite babu lite foipa lenigi halana'mu yabe, luto Yesu lu epi'ehina yabe.

Bouba Hu'mamofihi aisigo koli hu emino

Lk 12:2-7

26 Ya hu'ehinagi lenali bona'i koli mehi epalalo. Asaga'na fenene huto ninana alihi huto hi su halana'mu yabe. To asaga'na ifi toto fala kito ninana kugumatogago huto hinogo enali bona'magi bu galana'mu yabe. 27 Kaga nani sininugu lu nolepuna lenali yegelo lu epilo. To kaga fulu huto lenalitinigo lu nolepuna lenali nohi lataha'alo ho ti'ehite lu yege he epilo. 28 Ma melugu lenugufa'a lenoho fililafa to lenemehatini hiti lenoho mefililana bona kumu'i koli mehilo. Lenali Hu'mau ai lenugufatini hiti to lenemehatini hiti loe sana sana sipi logo kapogu lenoho fililina bomofihi ai kumuko'i koli hi etete minalo. 29 Enali nama lagaso'asi loemo moneko toealoti mina filata nehabe. Ya hu'ehina Afotinifihi laga'a mebesilina to nama lagaso'a mone'mofihi suhi luto melugu'i limo meilina'mu yabe. 30 To lenali'iya latahatinigu nina okatiniya aleka so su ho'ehibe. 31 Ya hu'ehinagi lenali koli mehilo. Lenaliya lagaso nama babu lite nehanamagihi mina'ani enebe ligite nehabe, luto Yesu lu epi'ehina yabe.

Yesuhi gi'a bona'i lu episemofihi hapa'a

Lk 12:8-9

32 Bo moneuba Yesuhi pana'i nohube luto lu yege homofa'na hilina nani alihi ana huto Afo'nifu kokulumalugu nohinamofihi bulo'i gi'a lu yege haluna'mu yabe luto Yesu lu epi'ehina yabe. 33 To mone bouba Yesuhi pana'a menohube luto nigi'ni li fala kito minalina nani ana huto ai gi'a Afo'nifu kokulumalugu nohina bomofihi bulo li fala kiluna'mu yabe, luto Yesu lu epi'ehina yabe.

Yesu luba li huto hilube'mu o'ehina

Lk 12:51-53; 14:26-27

34 Ma melugu luba mehilo luto lenele'mo baba ilube'mu o'ehibe lite nani kumu'i melilo. Nani luba bona'i lenele'mo baba ilube'mu meo'ohunaya kosa kosa emita'i lito ma melugu limi'ohube. 35 Nani fatehena li huto hilube luto limi'ohube. Bouba afo'afihi le'mo fateha'a lolo hilina'mu yabe, pa'animagi ito'anigihi fateha'ani enele'mo lolo hilana'mu yabe, to a'uba baha'amofihi ito'afihi fateha'a le'mo lolo hilina'mu yabe. 36 Bomofihi fateha'a mana'iya ai lalameha'a minalana'mu yabe, luto Yesu lu epi'ehina yabe.

37 Bo moneuba ito'afinogo afo'afinogo etele'mo bati nohuto nani'i nele'mo bati mehilina bo ai nani'i nalalu'nifu legi huto meminalina'mu yabe. To bo moneuba liha'a yagapana'a enele'mo bati huloto nani'i nele'mo bati mehilina bo ai nani'i nalalu'nifu legi huto meminalina'mu yabe. 38 To bo moneuba malipu yafa'a lito kofiloto nemege'i memalalinauba ai nani nalalu'nifu lolo mehilina'mu yabe. 39 Bo moneuba gufa'a le'mo bati huto minalina ai meha'a he'mi mana hilina'mu yabe. To mone bouba nani kumu luto gufa'a he'mi yakalesa hilinauba ai meha'a li buto bilina'mu yabe, luto Yesu lu'ehina yabe.

Bouba mina bati'a lilina

Mk 9:41

40 Bo moneubafi moneuba lenebe tigilinaya nani'i nebe tigilina'mu yabe. To nani'i nebe tigilina bona'iya ai noho lifigo limi'ohuna bomofihi be tigilina'mu yabe. 41 To bo moneuba Hu'mamofihi ka'a leli'ali nohina bo noago bu goloto he'malube luto ekesa kehelito noha'aluga le'moto buto nose'na emito kaba hu etalina ai ya'mana bouba lu huto huto bomofihi suhi lito mina'a lilina'mu yabe. To bo mone hapa'a bebe sana bo noenogo bu goloto ana bo he'malube luto luloto le'moto buto noha'agu kaba bati'a hu etalina bo ai mina'a bati huto hapa'a bebe sana bouba lilina'a huto lilina'mu yabe. 42 To bo moneuba fatoga boana'i neago bu enogoloto'a: Akae, ma boana'i Yesuhi naga'amo nehanago enehe'malube luto ekesa kehelito yatipa nagami'i konugu hefito epi fulu hilina boya ma'naka luto lu lepube. Ai ana bouba mina'a liba liba hilina'mu yabe, luto Yesu lu epi'ehina yabe.

Copyright information for `BEF