Matthew 14

Yoni nagami folo epolose bo afili'ehina

Mk 6:14-29; Lk 3:19-20, 9:7-9

Yata'a sipi kibina bo Helotiu ya'mana kanalo Yesuhi kaga'a keheli'ehina yabe. Ya huloto ai lili'nalo bo'a lu epi'ehina: Ya'ma bo ai Yoniu nagami folo epolose bo yabe. Kene keliguti aku'i ho ti'ehibe. Ya hu'ehigo ya'ma asaga amuyana ai yato huto nohibe.

Ai ya'ma huto ni'ibe. Koyapa'i Helotiu Yonihi yato seni nagatu naga'i etoloto nagalugu he'mi eto'ehina yabe. Helotiasiu ai Filipihi liha'a Helotihi ai etali'afihi hapa'amu lite ya hi ete'ahana yabe. Yata'a Yoniu nagami folo epolose Heloti kumu'i bati mehina suhi luto ma a'i li'ahane luto lu emi'ehina yabe. Ya noligo Helotiu Yonihi lubaha'a laga hilube'mu hinaya asaga boana'magi enubulo koli huto he'mi eto'ehina yabe. Hena'mugope enali Yoniu lu yege hose bo nohibe lite lilata nehana'mu yabe.

Mone yupahi Helotihi ito'afu keto'ehina kana'alo bona'i luga'a ete li gehesa hite nose'na gete nete mine'ahana yabe. Ya nehago Helotiasihi pa'auba folagaha'anigu melekehi ito bula ola hu'ehina yabe. Ya higo Helotihi laga'a gofa besi'ehina yabe. Ya higo ai ana pa'i lu emi'ehina: Nani asaga bona'magi enubulo ma'naka luto nolu ketobe. Kai ana'ina mone lilube luto gi halatana kimiluna'mu yabe. Ya ligo ana pa'mofihi ito'afu ekesa bi'ehina kaga lu'ehina: Kai lape'i monelugu Yonihi nagami folo epolose bomofihi lataha'a mololoto malo nimibo. Ya luto ligo Helotihi gufagu keta besi'ehina yabe. Ya hinaya ai asaga bona'i li nupa hite minete nose'na nana bona enubugu ma'naka luto lu emi'ehina yabe. Ya'mu luto ai lu'ehina: Anana li emilo. 10 Yoni naga nonugu nohinalo bona'i luga'a Helotiu enoho lifigo bite lubaha'a laga hi'ahana yabe. 11 Ya hite lape'i monelugu Yonihi lataha'a melete ite ete ana yafa'amofihi emi'ahana yabe. Ai ana lape lito ito'afu nohinaga bu'ehina yabe. 12 Ya hago Yonihi koko pana'magi ete gufa'a lite bite keli he ete'ahana yabe. Enali akeli he etelete Yesuhi bite lu emi'ahana yabe.

Yesu 5000 bona'i nose'na epi'ehina

Mk6:30-44; Lk 9:10-17; Yn 6:1-14

13 Yesu ana kaga keheliloto ana hepa'i nohe'mito boti lito bona'i menehana hepalugu bu'ehina yabe. Ai'asi bu'ehina yabe. Ya hu'ehigo enali boana'magi kehelilete hepa'ani nehe'mite mege'i lifite bi'ahana yabe. 14 Alihi Yesu nagami beletoga keheto buloto babu boana'i nehago bu enogo'ehina yabe. Ya hago ai ginaga fi epiloto enebesi'ehina bona'ani enele'mo bati hu'ehina yabe.

15 Utehe kana nohigo Yesuhi koko pana'a aitoga elete ma lite lu emi'ahana: Ma hepatoga bona'i menehabe, to sinihi agilina'a nohibe. Ya nohinagi kai boana'i enoho lifitogo enali abino. Enali hepatoga bila ela hite nose'na'ani sa sa hite nalabe. 16 Ya lago Yesu lu epi'ehina: Hena hibe lite enali bilabe? Lenalitini nose'na epilo. 17 Ya ligo enali lu emi'ahana: Maga lali nose'na babu lito meli'ohune. Lali loegi loegi monegi beleti nose'na hiti to faya'i loe hitisi ma li'ohune. 18 Ya lago Yesu lu epi'ehina: Lenali ana nose'na ite ete nimilo. 19 To ana boana'i kifi'nalo melugu minalo luto lu epi'ehina. Ya luloto ai loegi loegi monegi beleti hiti to loe faya'i hiti liloto kokulumalugu bu golago tiloto nunumu huto fokehi li'ehina. To ai beleti li pata putu siloto koko pana'a epigo enali asaga boana'i lite bite epimofa'na hi'ahana yabe. 20 To enali asaga'i ana beleti nelago enumu'i hu'ehina. Ya higo enali nelete he'mina nose'na letuha'a li nupa hite safe 12 agu li bai te'ahana yabe. 21 Bo ana nose'na ne'ahana maki'aya 5000 yabe. To enali ana'i yagapana'i leka mese'ahana yabe.

Yesu hefuhu nagamilugu kapo molo'ehina

Mk 6:45-52; Yn 6:15-21

22 Yesu koko pana'amagihi lenali botigu tilete kohe tete bite nagami hefuhi mula beletoga nehilo lu'ehina. Ya hiloto ai'a asaga boana'i enoho lifinogo hepa'aniga bilabe'mu hu'ehina. 23 Ai boana'i enoho lifigo hepa'aniga a'nebago bohupo'i mone ninalo tito nunumu hilube'mu ti'ehina. Utehe kana'alo ai'asigo ana kosalo mino'ehina. 24 To boti nagami hefuhi folagaha'agu abulago sipi habafahi enubulogati oto nagami'i li galafu tuto botigu he'mi molo he'mi molo nohuto boti nagamilugu li kose'na hu'ehina yabe. 25 Etehi folugu'i go metepu'a hiti Yesu nagami hefuhi mupa'alo kapo moloto koko pana'a nehanalo o'ehina. 26 Koko pana'amagi Yesu nagami mupa'alo kapo moloto noago be gelete topa hete afoya foya ilete felemo noabe lite koli hi'ahana yabe. Enali sipi koli fato'mofihi hilete kehe sipi i'ahana. 27 Ya hago hololu luto Yesu enali kehe i'ehina: Lenali amuya malalo. Nani'ni nohube. Nani'ni nohube. Lenali koli mehilo. 28 To Pitau lu emi'ehina: Sipi Bo'ni. Ma'naka luto kaikamo nohutomo nani'i kehe itogo nani nagami'i mupa'alo kapo moloto kaitoga bilube luto lu'ehina yabe. 29 Ya ligo Yesu lu emi'ehina: Obo. Ya ligo Pitau botiguti leheko limiloto nagami mupa'alo li hapi fito kapo moloto Yesu nohinalo bu'ehina. 30 Ya hina ai aku'i habafahi bu goloto koli hu'ehina, ya huloto nagamilugu hapi fito limi'ehina. Ya nohuto'a ai kehe sipi iloto lu'ehina: Sipi Bo. Kai nehe'mobo. 31 Ya noligo Yesu hololu luto Pitahi yato liloto lu emi'ehina: Kai kaga'ni li pili meko'ahane. Kai hena hibe luto loe lae kekesa nokeheline? 32 Etali loe sana sana botigu tite nemina'igo habafahi felele hu'ehina yabe. 33 To bona'i enali botigu minanamagi Yesuhi fokehi helete ma lite li'ahana: Ma'naka luto kai Hu'mamofihi Pana'a nohane.

Genesalete hepato enebesi'ehina bona'i babu lito Yesu enele'mo bati hu'ehina

Mk 6:53-56

34 To nagami'i mula beletoga heleke melete bilete Genesalete hepa kegi'a bi'ahana. 35 Ya hago ana hepato bona'magi Yesu okaba'a be ge'ahana. Ya hilete enebesi'ehina bonatoga enoho lifigo bite enebesina bona'i Yesutoga enele'mete eba eba hi'ahana. 36 Ya hilete enali Yesuhi buka tilete ma lite li'ahana: Ke, kai kaga melitogo enebesise bona'magi guketeka nekisa'alo meko hilana bati huto ni'ifihe? To enali ana bona'i Yesuhi gukete'alo meko hana bona'i bati hi su he'ahana yabe.

Copyright information for `BEF