Matthew 15

Tatatigihina enelepise'na

Mk 7:1-13

1To Felosi bona'i luga'a hiti keya kamu'i tisa bona'i luga'a hiti Yelusale hepatogati ete Yesu nohinalo nehetilete ma lite loka he'ahana: 2Kai koko panakamagi hena hibe lite tatatigi limi'ahana ka'ani mege'i menemalabe? Enali nose'na nalune'mu nehitemo enayahi sese mehise fa'mene nelata nehabe. 3Ya lago Yesu kaga'anilo lu epi'ehina: Lenali kagatinisigo mege'i nemelete hena hibe lite Hu'mamofihi keya kaga'a mege'i menemalabe? 4Mono ka bukugu Hu'mau ma luto lu'ehina yabe:Itokafinogo afokafinogo enele'mo bati huto etemege'i molobo. To mone kene'uba ito'afinogo afo'afinogo kaga foipa'a lu etatalina ho fililina'mu yabe. 5Ya hu'ehina lenali ma lite lilata nehabe: To bo moneuba ito'afinogo afo'afinogo etehe'malina efahi ni'inamo meetimilube, to nani Hu'mamofihi emilube lu'ohuna yabe lulata nohibe. 6Ya luloto ai ito'afinogo afo'afinogo etele'mo bati mehulata nohibe. Lenali ya'mana suhi li huto nehitemo Hu'mamofihi keya ka'a li gofa nehete lenali hapatinimofinogo li saga hilata nehabe. 7Lenali fagalo bona'i. Koyapa'i lu huto huto bo mone Aisaiyau lenali kumu luto fayahi ma luto go'ehibe:

8
  • Ya'ma kana'alo
  • boana'magi nigi'ni enabaga'anitu'i
  • li saga nehite
  • to aku'i komopa'ani nanitoga memelese
  • foto'i melete minelata nehabe.
9 Enali fa'mene bona'magihi kaga lu epimofa'na nehite: Ya'ma kaga Hu'mamofihi kaga'a yabe lilata nehite. Enali nani nigi'ni fa'menena'mu helata nehabe luto lu'ehina yabe.

Bomofihi le'mo kolo notanana

Mk 7:14-23

10To asaga boana'i Yesu kehe i nupa huloto ma luto lu epi'ehina: Kaga mone lu lepilunagi lenali lenekesatu'i kehelilete keheli fiya ilo. 11To bomofihi komopa'agu tilata nohinanauba ana bo le'mo kolo tolata menohibe. To bomofihi ai komopa'aguti fegutoga heleko limilata nohinanauba bo le'mo kolo tolata nohibe.

12Ya'mana kana'alo Yesuhi koko pana'a aitoga ete ma lite lu emi'ahana: Felosi bona'magi kagaka kehelilete kipakafa nehabe. Ya nehana kai ya'manana akeheli'ahapihe? 13Ya lago Yesu ka'anilo lu epi'ehina: Afo'nifu kokulumalugu nohinamofihi foya'a samahi tito ni'ibe. Asaga kifina Afo'nifu kokulumalugu nohinauba foya'agu mehekolo'ehina kifina nina hapa'a hiti li su ti he'mi su halina'mu yabe. 14To lenali he'mi epelenogo enali mineno. Enali enubu pisi lina bona'i nehite enali ana hite enubu'ani pisi lu'ehina bona'i fato'amagihi kapo enelepilune'mu nehabe. Ya hu'ehinaya bu'a pisi lu'ehina bouba fato bo ana huto bu'a pisi lu'ehina bo kapo lepilube'mu hilinaya etali loe sana sana ho kete keli kapogu limila'ibe. 15Ya ligo Pitau Yesuhi ka'alo lu'ehina: Kai ya'mana bame kamofihi hapa'a lu hokolo hitogo kehelilune. 16Ya ligo Yesu lu epi'ehina: Lenali hiti kaga keheli fe melilana'a hite nehafihe? 17Lenali keheli bati menehafihe? Ana'ina'a bomofihi bagagu tilata nohinana gupa'agu tito minoloto aku'i gufa'aguti heleko limilata nohibe. 18Ya hu'ehina ana'ina bomofihi baga'agu ni'inati fegutoga heleko limilata nohinaya komopa'aguti huto huloto tilata nohibe. Ai ya'mananauba bomofihi komopa'a li kolo tolata nohibe. 19Ana'ina enipaguti tilata nohinana ma huto ni'ibe. Foipa enekesa yigise'na, bona'i enoho filise'na, bo alobo loko huse'na, moko lise'na, gumina huse'na, faga faga luse'na, to bona'i enipakafa hoto enemegeka luse'na yabe. 20Asaga ya'manauba bomofihi le'mo kolo tuba ilata nohibe. Ya hu'ehina bo moneuba yahi okala mehuse nose'na lito nolata nohina ya'mananauba bomofihi le'mo kolo tuba meilata nohibe.

A'uba Yesutoga komopa'a molo'ehina

Mk 7:24-30

21To Yesu ana hepa'i he'miloto Taiya hiti to Saitoni hepa kegi'a bu'ehina yabe. 22Kena a'i mone ana kegi'a nominana a'uba Yesutoga o'ehina. Tebitihi pana'abe. Ai ya luto kehe i'ehina. Kai kiginaga fi nimibo. Foipa feleuba pa'nimofihi le'mo sibina nohinagi nehe'mobo. 23Ya ligo Yesu kaga meluse mino'ehina. To enali Yesuhi koko pana'a aitoga elete ma lite lu emi'ahana: Ma a'auba lemege lemege nohuto kaga luba luba nohina kai ho lifitogo bufa hino. 24Ya lago Yesu lu emi'ehina: Isilaeli sipisipi yaga fenene hi'ahanalo'mu luto Hu'mau noho lifigo maga limi'ohuna yabe. 25Ya ligo ana a'uba Yesuhi gigusagu oto okabagati lipito koloto lu'ehina: Ke. Sipi Bo, kai nehe'mobo. 26To Yesu ana a'mofihi ka'alo lu emi'ehina: Yagapana'magihi nose'na lito kalamagihi he'mi epiluta bati mehu'ehibe. 27Ya ligo ana a'uba Yesuhi lu emi'ehina: Sipi Bo, ya ma'naka nolane. Ya nohataya kalamagi afo'anigi nose'na nenago letuha'a hitamofihi me'agu limo ilata nohina enali kehelite nelata nehabe. 28Ya ligo Yesu ai a'mofihi lu emi'ehina: Akae, ma a'i yale. Kaga keheli fe luse'naka sipina ni'ibe. Ana'ina lolo hu netalane luto nolatanaya huto hu kimilina'mu yabe. Ya ligo ana'asilo ana a'mofihi pa'a ka'muya hepalugu nohigo bati hu eto'ehina yabe.

Enebesise bona'i Yesu babu lito enele'mo bati hu'ehina

29Yesu ana hepa'i he'miloto Galili hefuhi beletoga kapo moloto tubu'ehina. Ai kosa bohupo'isi mone ninalo tito mino'ehina. 30Ya nohigo babu boana'i enali li nupa hite ai nohinalo e'ahana. To enigigusa sibina hina bona'i, enubu pisi lu'ehina bona'i, felisa'ani kuyugu hu'ehina bona'i, enabaga hekini lo'ehina bona'i to fato fato epesi'ehina bona'i enali babu lite Yesutoga enele'mete e'ahana yabe. Enali enele'mete ete Yesuhi gigusa'agu malago ai asaga'i enele'mo bati hu su ho'ehina yabe. 31Ya higo asaga boana'i enali enekesa yigi babu li'ahana yabe. Hena'mugope negi bona'i aku'i kaga lila, felisa'ani kuyugu hina bona'i bati hu epolola, enigi'ani sibina hu'ehina bona'i kapo melela, to enali enubu'ani pisi lu'ehina bona'i enubu'ani i gili hula hinana be gelete'ani yabe. Ya hilete enali Isilaeli bona'magihi Hu'ma'anifu ai kumu fokehi hete gi'a li saga hi'ahana yabe.

Yesu 4000 bona'i nose'na epi'ehina

Mk 8:1-10

32Yesu koko panana'a kehe i nupa huloto ma luto lu epi'ehina: Ma bona kumu'i nani niginaga nofibe. Hena'mugope enali loegi monegi yupahi nani hiti mine'ahana yatai nose'na nalana'a meni'ibe. Nani nose'na meepise enoho lifinogo'ni bilana enali kapoga nebinogo enubu neta neta bilenogo ho kete kela ya hila hilabe'mu nolube. 33Koko pana'amagi Yesuhi loka he'ahana: Ya'ma ka me hepatoti lali babu nose'na hiya'agati liloto ya'ma babu boana'i epilune? 34Ya lago Yesu enoloka ho'ehina: Lenali henaki'a beleti nose'na li'ahabe? Enali lu emi'ahana: Sebeni'a beleti hiti to faya'i lagaso meso'a loesi hiti li'ohune. 35Ya lago Yesu asaga boana'i melugu minalo ligo enali melugu mine'ahana. 36To ai sebeni'a beleti hiti to faya'i lagaso meso'a loesi hiti yanuga liloto Hu'mamofitoga nunumu huto fokehi holoto gofa gofa holoto koko pana'a epi'ehina. Ya higo koko pana'amagi enali leli'ali hite asaga boana'i epi'ahana yabe. 37Asaga bona'i ana nose'na nelago enumu hu'ehina yabe. Ya higo Yesuhi koko pana'amagi letuha'a li nupa nupa hite sipi sepeke'na 7 agu li bai te'ahana yabe. 38To asaga bo ana nose'na ne'ahanaya 4000 bomagi ne'ahana yabe. To ana'i yagapana'i hiti leka mesone.

39To silaga boana'i Yesu enoho lifigo nebago ai boti monelugu tiloto Magatani hepa kegi'a bu'ehina yabe.

Copyright information for `BEF