Matthew 18

Kuyu'afu ai sipi bo minalibe

Mk 9:33-37; Lk 9:46-48

1Yana kana'alo Yesuhi koko pana'a aitoga nehetilete ma lite loka he'ahana: Luga'a enebe ligito kuyu'afu sipi bo kokuluma kapolo kaba hilina ni'ibe? 2Ya lite loka hago Yesu pana'i lagaso'a mone kehe igo ago folagaha'anigu le'mo ho ti'ehina. 3Ya huloto ma luto lu epi'ehina: Nani ma'naka luto lu nolepube. Lenali komopatini i gelehe hilete pana'i lagaso'a legi mehilana lenali kokuluma kapo'alo mebilana'mu yabe. Ma'naka luto lu nolepube. 4To bo moneuba mino laba huto minoloto ma lagaso pana suhi huto minalina, ya'mana bouba luga'a bo enohoto kokuluma kapolo minalina'mu yabe. 5To bo moneuba nani nigi'nimu ekesa keheliloto yagapana'i ya'ma'a enele'mo bati huto enehe'malina, ai'ya nani'i nehe'malina'mu yabe.

Mi'mi huse'nauba foipana li huto nohibe

Mk 9:42-48; Lk 17:1-2

6Ya hu'ehina bo moneuba yagapana'i ya'ma huse'a nehilana folagaha'aniguti komopa'ani nanitoga melete minalune'mu hilana enele'mo nanitogati he'miletemo'mu ya'ma bo lubaha'agu sipi efa kosahi naga i etelete le'mete bite hege nagami folagaha'agu he'mi meleno. 7To ma melugu bomagi bona'i luga'a foipanagu enelepite bilata nehana boya sipi keta epesilina'mu yabe. Ma'naka luto ya'manana huto hilina'mu yabe. To anana li huto hilina boya sipi keta besilina'mu yabe.

8To kigi kayahakauba foipana li huto nohinogomo kai laga huto he'milago bubo. To kayahi mone kegi'a hiti kigigusa mone kegi'a hitigo minolenogo bati huto minoba minoba hepato bilata'mu yabe. To kigi kayahi luga luga hiti ni'inogo nohuto logo loba loba huto mesobose hepatoga bilata bati mehu'ehibe. 9To kubukauba foipana li huto nohinogomo kai li kutu hoto he'milago bubo. To mone kegi'a kubusigo ni'inogo minoba minoba hepatoga bilata bati huto ni'ibe. To kubuka luga luga bati huto ni'inogo nohuto logo loba loba huto mesobose hepato bilata bati mehu'ehibe. Ya luto Yesu koko pana'a lu epi'ehina yabe.

Minigi'ehina sipisipi yagamofihi bame ka'a

Lk 15:3-7

10Lenali ya'ma yagapana'i fa'menena nehabe lite li lalabe. Lenali kaba hu bati hilo. Nani ma'naka luto lu nolepube. Kokulumalugu nani Afo'nifihi bu'alo enali agelo'ani kaba hu epelete neminabe. 11Hena'mugope Kokulumaguti limi'ehina Bouba minigi'ahana sipisipi yaga enele'mo huto hilube luto limi'ehina'mu yabe.

12Lenali hena hibe lite nekehelibe? To bo mone'mofihi sipisipi yaga'a 100 nehilanaguti moneko'isi minigilina hena hilina ni'ibe? Ai sipisipi yaga'a 99 analo he'mi epelenogo kosagu kifi'na laga hite nete nehinogo moneko sipisipi yaga'a minigi'ehina sa sa hilina'mu yabe. 13Nani ma'naka luto lu lepilube. Ai sa sa huto ana sipisipi yaga le'mo huto hulotomo ana moneko yaga'mu luto sipi gelo biloto nu kito bilina'mu yabe. To 99 sipisipi yaga silaga'i fenene mehi'ahanamagi kumu luto gelo mebilina'mu yabe. 14Ya'mana suhi luto kokulumalugu Afotinifu nohinauba ma yagapana'i nehana folagaha'aniguti mone meminigilibe luto lulata nohibe.

Bonaka moneuba foipana hu'ehilina le'mo bati huse'mofihi hapa'a

15To bonaka moneuba kaga foipa'a lu keto'ehinogomo kai bitogo letalititisigo nehitetiti ana foipana'a lepibo. Letali letugufatitigu fala kite ya'mana kaga lu koguna iliyo. To kagaka keheli kiminogomo kalalukafihi ale'mo fulu hu'ahane. 16To kagaka keheli mekiminogomo kai mone'isifi loefi bona'i enele'mo'ohuto moneka bilo. Ya hitogo lugufa bomagi enali kaga mono kagu nina'a hite lu huto hilana'mu yabe. 17To ana bomagihi kaga'anilo keheli meepinogomo mono nonugu asaga mono boana'i lu huto huto lu epibo. To asaga boana'magi kaga'ani keheli meepinogomo bonoho bona'ifi takisi nelina bomagihi suhi luto nohane luto keheli emibo.

Lu laga hu eto'ehina

18Ma'naka luto lu nolepube. Lenali asaga'na ma melugu ninanamofi kumu lu laga hilana Hu'mau kokulumalugu ana suhi huto lu laga hu epalalina'mu yabe. To asaga'na ma melugu bati huto lilina'a Hu'ma kokulumalugu ana huto bati huto yabe lilibe.

19Ma'naka mone'a hiti luto lu lepilube. Ma melugu bona'magita folagahatiniguti bo loemale'i ana'ina monekoto komopa'atiti li hepilete anana lilu'ibe lite nunumu hila'ina, yalo Afo'nifu Hu'ma kokulumalugu nohinauba anana etimilina'mu yabe. 20To bo loefi to loegi monegifi nani nigi'nimu enekesa kehelilete moneko hepato li nupa hite minalana ya'mana hepato nani folagaha'anigu enali hiti minaluna'mu yabe.

Koko pana'i foipana'a li mehe'misemofihi bame ka'a

21To Pitau Yesutoga oloto ma luto loka ho'ehina: Sipi Bo henaki yupahi nalalu'nifu ka foipa lu netolenogo le'mo fulu hilube? Sebeni'a yupahifi? 22Ya ligo Yesu ma luto lu emi'ehina: Nani sebeni'a yupahi yabe luto lu mekimi'ohube. Sebeni'a teni yupahi babu yupahi kalalukafihi le'mo fulu hubo luto lu'ohube. 23Ya hu'ehina gihiti bo moneuba lili'nalo pana'a hiti tina hi'ahana li eto hilune'mu nehana suhi luto kokuluma kapoya ni'ibe. 24Ai hapi fito tina hu ete'ahana li eto hilube'mu nohigo bo mone samahi tito tola efahi li'ehina bo le'mete e'ahana yabe. 25Ya hago ana bo ai tina'alo he'milina efaha'a memino'ehina yabe. Ya higo ana bo hiti fe'noha'a hiti liha'a yagapana'a hiti fato bonatoga noepito efahi lilube lu'ehina. Ya hinogo tina hu'ehina efaha'ni he'mi'ehina okane'a baga ilibe. 26Ya ligo ana koko pana'auba ana gihiti bo'amofihi gigusagu lipiloto melugu bu goloto ma luto gihiti bo'amofihi lu emi'ehina: Kai kiginaga fi nimito negeba hu'ohubo. Nani asaga tina'ni pa so su haluna'mu yabe. 27To aku'i ana gihiti bouba koko pana'amofi kumu ginaga figo tina hu eto'ehina ana'a hilibe noluto ana koko pana'a he'mi eto'ehina yabe.

28Ya higo ya'mana bouba heleko limito buto lili'na moneka neli'ina bo mone'mofihi tina huto tola efaha'a nesi'a emi'ehina bo bu goto lubaha'alo lito li geka geka huloto mele'isi tinaka pa sobo lu emi'ehina. 29Ya ligo moneka lili'na neli'ina bouba melugu li piloto buka tito lu'ehina: Kai kiginaga fi nimito nesi'a negeba hu'ohubo. Nani tina'ni alihi pa saluna'mu yabe. 30Ya lina ana bomofihi ginaga mefi'ehina. Ya higo ana bo le'moto buto naga foyagu molo'ehina yabe. To ai anaga nohuto tina'a pa so su halibe luto hu'ehina yabe. 31To ya higo enali moneko lili'na nelina bomagi ana suhi hinamofihi hapa'a be gelete ipakafa he'ahana yabe. To enali asaga kaga bite kaba bo'animofihi lu emi'ahana yabe. 32Ya lago gihiti bo'aniuba ya'mana koko pana'a kehe iloto ma luto lu emi'ehina: Kai hapaka bati mehina lili'nalo bo yabe. Kai yata'a nanito yibi hanogo tinaka pa mesalata ana'a hilibe luto lu keto'ohuna yabe. 33Nani yata'a kiginaga fi kimito he'mi keto'ohuna yabe. To hena hu'ehigo kai moneka lili'na neli'ina bo kiginaga fi meemi'ahane? 34Ya luloto ana kaba bo'amofihi gufagu logo bigo asaga tina'a pa solotogo yabe luto naga'i emi'ehina yabe. 35To Yesu kaga'a ma luto lu su ho'ehina: To lenali komopatinigu lenalalutinigihi foipana'ani li pa meso epolo baga meilana kokulumalugu Afo'nifu nohinauba ana huto lenali foipanatini li mehe'mi lepalalina'mu yabe.

Copyright information for `BEF