Matthew 21

Yesu sipi bo lolo huto Yelusale hepalugu ti'ehina

Mk 11:1-11; Lk 19:28-40; Jo 12:12-19

Enali Yelusale'i o leba telete Betefasi hepa kegi'a Oliba kosagu neheti'ahana. Ya hilete Yesu aposolo pana'a loemo ma luto lu etototo etoho lifi'ehina. Letali hepa'i monelugu nehetilete ana hepalugu toki yaga naga i'ehinogo nala'a hiti nehinogo bu gala'ina'mu yabe. Letali ana yaga naga'a gulu fete etele'mete nanitoga aliyo. To bo moneuba kaga mone nolinogomo ma lite lu emiliyo: Sipi Bouba lili'na lilube'mu yabe li'inogo ai hololu luto letiminogo ana yagale yete aliyo.

Ya'manana huto hilinaya koyapa'i kaga lu huto huto bouba kaga mone ma luto lu'ehinalo pa salina'mu yabe:

  • Lenali Yelusale hepatoga neminana bona'i
  • ma lite lu epilo:
  • Bu galo, lenalitoga kibina botini noabe.
  • Ai koyone bo,
  • ai toki yaga gupisalo minoto noabe.
  • Ai toki yaga ikele'amofihi gupisalo
  • minoto noabe.

To loe aposolo bomale'i kohe toga bite Yesu lu etimi'ehina suhi li'aha'ina yabe. Etali toki yaga lalamehi etele'mete a'igo enali kefe'ani toba hete ana toki yaga gupisalo mele'ahane. Ya hago Yesu ana toki yaga gupisalo tito minoto bu'ehina. Ya nehago babu boana'magi gukete'ani toba hete kapogu molo helele tete nebago to luga'a bona'magi yafa yaha'a yegete kapogu melete bi'ahana. To enali kohe toga bana bona'i hiti to alihi bana bona'i hiti ma lite kehe napa i'ahana: Tebitihi Pana'a yege filo. Sipi Bomofihi gi'alo ma noana bomofihi Hu'mau lusana emilibe. Hu'mamofihi lenegelo bi emilo. Ya lite babu boana'magi kehe napa ite li'ahana yabe.

10 Yesu Yelusale hepalugu notigo ana hepalugu boana'i bu gelete henana huto nohifi lite ho ti baga ite ete li yege yege hilete li'ahana: Ya'ma bo kuyu'afube li'ahana? 11 To babu boana'i Yesu hiti kapo melete banamagi ma lite li'ahana: Ai kaga lu yege hose bomo Yesu Nasalete hepato Galili kegi'a bomo nohibe.

Yesu mono nonuga ti'ehina

Mk 11:15-19; Lk 19:45-48; Yn 2:13-22

12 Yesu mono nonuga tiloto babu bona'magi bisinisi melete ana'ina'ani salimi hila to mina fila hite nehana ya'ma bona'i hesi'ehina. To hitalo efahi senisi hila to hitalo minete nama salimi hila nehanana libe behe hube huto li fulugu felege nobito enele'mo tili tele hu'ehina. 13 To ai kaga ma luto lu epi'ehina: Mono bukugu Hu'mau ma luto kaga koyo'ehina:Nani noha'ni numuna noha'ni yabe lite gi'a nehabe.Ya hu'ehina lenali ana nohi guminalo bomagihi suguna hepa'ani li lolo nehabe.

14 Ya luloto Yesu mono nonuga nohigo enubu pisi lu'ehina bona'i luga'a hiti to enalapusa sibina hu'ehina bona'i luga'a hiti enali Yesutoga ago enele'mo bati hu'ehina yabe. 15 Ya huto Yesu hetofana li huto nohina'mu lite yagapana'i mono nonugu nehanamagi sipi kehe ilete: Tebitihi Pana'a yege filo li'ahana, ya nelago mono bo hiti to keya kamofihi tisa bo hiti enali bu gelete enitaluga logo bi'ehina yabe. 16 Ya higo enali bu gelete Yesuhi ma lite lu emi'ahana: Ma nelana kagaba keheli'ahapihe? Ya lago Yesu lu epi'ehina: Nani keheli'ohube. Mono ka mone ma luto nina lenali leka mese'ahana ni'ifihe?Kai lagaso yagapana'i hiti to yagapana ikiliha'a hiti enali Hu'mamofitoga enegelo bi emilabe. 17 Ya luto lu epiloto ai enalitogati he'miloto Betani hepatoga buto ana folugu'i mino'ehina yabe.

Yesu nemuya yafa ka emekigo hosopa i'ehina

Mk 11:12-14, 20-24

18 Yesu Betani hepatogati etehi i behe huto Yelusale hepato noago kapogu kau'na ho'ehina. 19 Ya higo ai nemuya yafa kapo beleha'alo nina bu goloto buto legeya'a ni'ifi luto bu gana haya'ago ni'igo ana yafamofihi ma luto lu eto'ehina: Kai alihi yupahi legeyaka huto mehilibe. Ya ligo ana'asilo mele'isi ana nemuya yafa haya'a hiti to lufusa'a hiti logo bi su ho'ehina yabe. 20 Ya higo Yesuhi koko pana'amagi topa helete ma lite li'ahana: Hena suhi luto nemuya yafa mele'isi logo nobibe? 21 Ya lago Yesu ka'anilo nona'a ma luto lu epi'ehina: Lenali lenekesu meheno. Lenali komopatini nanitoga melelete lenali loe lae komopatini meminalina nani ma nemuya yafamofihi hu'ohuna suhi hilana'mu yabe. To lenali ya'ma sunogo mehilana'mu yabe. Ma kosamofihi ma lite lu emilana'mu yabe. Ma kosa ho tito hege nagamilugu limibo lilana lenabaga liyafa huto limilina'mu yabe. 22 Lenali komopatini Hu'mamofitoga melelete ana'ina mone kumu'i nunumu hilana ana nunumutinilo nona'a lilana'mu yabe, luto Yesu lu epi'ehina yabe.

Kiya'afitogati kibina bo li'ahane lite Yesuhi loka he'ahana

Mk 11:27-33; Lk 20:1-8

23 Yesu mono nonuga aku'i oto tito minoto boana'i kaga enelepito mino'ehina. Ya nohigo enali mono bo hiti to Isilaeli hepato enikibina bo hiti enali Yesutoga elete ma lite loka he'ahana: Hiya'agati lito o'ahata suhi li huto nohane? Ya'mana suhi kuyu'afu kelepi'ehina suhi nohane? 24 Ya lite loka hago Yesu ka'anilo nona'a lu epi'ehina: Nani ana huto kaga mone'ya lenoloka halube. To lenali kaga lenoloka haluna kaga lu niminogomo nani ana huto kagatinilo nona'a hiya'agati lito o'ohuna suhi li huto nohufi lu lepilube. 25 Ya yagi Yoni bona'i nagami'i folo epolo'ehina, ya'mana nagami'i folo epolose'na hiya'agati o'ehibe? Hu'mamofitogati o'ehifi to ma melugu bomagitogati o'ehibe? Ya luto enoloka hago enali ya'mana kaga kehelilete musi musi ka lite ma lite li'ahana: Hu'mamofitogati'na yabe liluta ai ma luto lilina'mu yabe. Hena hu'ehigo lenali Yonihi komopatinigu li menemalabe lilina'mu yabe. 26 To ma melugu bona'magihina yabe liluta ya asaga boana kumu'i lelesa nolibe. Hena'mugope enali asaga'i Yoni kumu kaga lu yege nohana bo nohibe lite komopa'ani neeminamo yabe li'ahana. 27 Ya lite lilete enali Yesuhi ma lite lu emi'ahana: Lali mekeheli'ohune. Ya lago Yesu lu epi'ehina: Hiya'agati lito o'ohuna suhi nani li huto nohufi nani ana huto hapa'a lu melepilube.

Kogunale loemale'i bame ka'atiti

28 Ya hu'ehina ma kaga lenali hena hibe lite lenekesa nekehelibe? Bo mone'mofihi pana'a loemo mine'aha'ina yabe. Mone yupahi pana'a yege'a nohinaga buloto ma luto kaga lu emi'ehina: Pana'ni, kai yatai foyagu buto lili'na libo. 29 To pana'auba baga li gofa hoto lu'ehina: Nani ya lili'na meliluna'mu yabe. Ya luto luloto alihi minoto komopa'a i gelehe huloto foyaga bu'ehina yabe. 30 Afo'atitifu mone pana'amofihi ana luto lu emi'ehina yabe. Ya higo mone pana'auba afo'atitifihi lu emi'ehina: Afo'niga nani foyagu buto lili'na liluna'mu yabe. Ya luto faga o'yo luloto ana foya'anigu lili'na buto meli'ehina yabe. 31 Yalo lenali lu nimilo luto Yesu lu'ehina: Ya'ma loe pana'male'i kuyu'afu afo'atitifu lu etimina kagalo mege'i molo'ehibe? Ya ligo enali Yesuhi lu emi'ahana: Yege pana'auba yabe lite, ya lago Yesu ma luto lu epi'ehina: Nani lusiga luto lu nolepube, takisi efahi nelina bo hiti to mokolo ana'i hiti enali kohe tete Hu'mamofihi kapo'agu nebabe. 32 Hena'mube? Yoniu lenalitoga oloto ai mino bati huto minosemofihi hapa hapa'a lenelepi'ehina lenali ai kaga'a keheli meemi'ahabe. Ya hago enali takisi efahi lise bo hiti to mokolo ana'i hiti enali Yonihi kaga'a aliyafa hi'ahabe. Lenali ya'manana huto hina abu ge'ahanaya lenali alihi komopatini i gelehe hite li latahatinigu memele'ahabe, luto Yesu lu epi'ehina yabe.

Foipa bomagi bai naga'i foya kaba hi'ahanamofihi bame ka'a

Mk 12:1-12; Lk 20:9-19

33 Ma bame ka mone'ya aku'i kehelilo, luto Yesu lu epi'ehina. Bo mone'mofihi sipi foya ni'igo ana foya'agu bai naga'i hekololoto gegisa hu bego hu'ehina. Ya huloto yatama nohi ana foyagu giloto bai nagami'a letise'na mone lolo hu'ehina yabe. Yalo ai ana foya bisinisi malalube'mu hina bomofihi yanuga bi'ehina. Ya huto emiloto ai ana foya afo'afu bonohi foto kapoga bu'ehina yabe. 34 Alihi nose'na'a li nupa huse kana'a o leba tolago ai lili'nalo pana'a enoho lifigo bai naga'i foyagu lili'na nelina bo nehanalo bi'ahana. Ai nose'na luga'a nimilabe luto enoho lifigo bi'ahana yabe. 35 Ya higo enali ana foyagu lili'na nelina bomagi koko pana'a enele'mete bilete mone'amofihi osahi nehete mone'amofihi ho fala nekite to mone'amofihi efa kosatu he'mibe molobe hite i yopo hi'ahana yabe. 36 Ya hago foya afo'afu koko pana'a mone'a hiti aku'i enoho lifi'ehina yabe. Ai babu luto enoho lifi'ehina yabe. Ya higo enali foyagu lili'na nelina bomagi ana suhi hite enegene mane ilete yata'a hi'ahana suhi hi epele'ahana yabe. 37 To alihi ai'a pana'a ho lifigo enalitoga limi'ehina. Ya nohigo afo'afu ma luto lu'ehina: Enali pana'nimofihi kaga'a keheli emilana'mu yabe. 38 Ya higo enali foyagu lili'na nelina bomagi ana pana'a bu gelete ma lite musi musi ka li'ahana: Ya'ma bouba ai afo'afihi fe'noha'a li su halina'mu yabe. Lenali ho tilo, lali mana pana'a ho fililototi ya'mana foya'a laliti lilune. 39 Ya lilete enali ana foyaguti le'mo fegutoga melelete ho fili'ahabe.

40 Yalo lenali henabe lite nekehelibe luto Yesu enoloka ho'ehina: Alihi foya afo'afu oloto foyagu lili'na nelina naga'i hena hu epalalina ni'ibe? 41 Ya luto Yesu enoloka hago enali ma lite lu emi'ahana: Ai oto ya'ma foipa bona'i enele'mo asaga'i sibina hu epoloto enahalina'mu yabe. Ya huloto ai ana foya'a lito fato bo epinogo kaba nehite kana nose'na'a huto nohinogo enali lite bite foya afo'afihi ai'a luga'a emilana'mu yabe. 42 Ya lite lago Yesu ma luto lu epi'ehina: Mono bukugu kaga mone ma luto nina lenali mekeheli'ahafihe?

  • Lili'nalo bomagi ya'ma efahi
  • bati mehina efahi yabe lite li he'mi'ahana.
  • Yatai ya'mana efahuba nohi nekisa'a
  • li tokolo hu'ehibe.
  • Sipi Bouba ai ya'mana suhi li huto higo
  • lali bu gota laga gofa hibe.
43 Ya'mu luto nani lu nolepube. Hu'mau ai kapo'a lenalitogati lenebe silito fato boana'magi enali bati lili'na ma melugu lite nehilanamagihi epilina'mu yabe. 44 To mone bouba ai ana efapo gupisalo heleko malalina ai ibe laga hube huto gufa'a nesi nesi hilina'mu yabe. To ya'mana efahuba bo mone'mofihi limo ito i lilika ilinaya ana bo gufa'a mumusopa lolo hilina'mu yabe.

45 Enali mono bo hiti to Felosi bo hiti Yesu lu'ehina bame ka kehelilete lalitoga lu moloto nolibe lite akeheli'ahana. 46 Ya hilete enali yato lilune'mu nehana. To Yesu kumu lu yege hose bo nohifi boana'magi lite nehite Felosi bomagi enali kumu koli hi'ahana yabe.

Copyright information for `BEF