Revelation of John 14

Bona'i 144 tauseni enubuto bi'ehina enali nama

Ya nehago nani nubu bu golago buto bu go'ohuna ya'ma sipisipi nala'a Yelusale hepatoga Yiona kosagu ho ti'ehigo bu go'ohuna. Bu nogogo ai'a bona'i 144 tauseni ana kosagu li gehesa hite mine'ahana enogobisalo ya'ma ai'a gi'a fayahi to afo'afihi gi'a fayahi kayago mino'ehina. To kokulumatogati nogo'a keheli'ohuna ya'ma nagami'i lisahi sipi ito sasa lu'ehina to ko'i kogolikohi ito mino'ehina. Ya nohigo kaga'a kehelugo bona'i asaga'magihi gita legi huto nogo nomalanamofihi nasana sipi'atu gita nogo mololata nohina ya suhi huto nogo malago keheli'ohuna. Ya nehago sekele mamu'a hiti kefa hisamofihi maha'aga ya'ma kene'i amuya'a hiti loebe loebe to olopa kaba bona'i luga'amagi enali enubulo yuhufa nama mone lite mine'ahana. Ana nama ya'ma bona'magita keheliluta babeyafa huto memino'ehina. Bona'i 144 tauseni ya'ma noto noto bona'i luga'a enalitogati Hu'mau mina fi'ehina'a enubuto bi'ehina ya'amagi enalisigo kehelilana'a huto ni'ibe. Enali ya'ma anatoga mebi'ahana komopa'animofihi hapa'a bati huto neheya kola bona'i ya suhi mine'ahana. Enali ya'ma sipisipi nala'a nohinaga mege'i melete bilata nehana enali noto noto bona'i luga'a enalitogati enubuto bi'ehinamagi Hu'mamofihi maha'aga to sipisipi nala'amofihi maha'aga neminana'asigo hapi fito enele'mo mele mele nehabe. Enali ya'ma enabagalugati faga meluse enali'anigo ana'ina li sibina hilana'a ya'ma enalitoga meni'ibe.

Agelo loegi monegi enali ka

Agelo mone ya'ma ifo muyaluga ilege hoto nobigo bu go'ohuna ya'ma noto noto bona'magi ka lamana'a amuya moloto minoba minoba nohina ka'a metoga bona'i fato fato'i, to enugufa fato fato'i, ka'ani fato fato'i to naga'i fato fato'i lu huto hu epitomofa'na hu'ehina. Ai ya'ma sipi kaguti kehe ito lu epito lu'ehina: Lenali Hu'mamofihi lu koli fite kehelite ai'a gi'a liyafa hilo. Bona'i guna malalina kana'alo ya'ma hupamone nohibe. Kokulumagu to melugu to hege nagamilugu to ipi opoho nagami'i lolo hu'ehina bo, Hu'mau aitoga lenalapusa fi emite fokehi lite minalo.

Ya luto luloto nobigo megesaga agelo mone oto ma luto kehe ito lu'ehina: Akae. Bebiloni hepa'i sipi tele tulu bi'ehina. Hepa'i afo'agi enali noto noto bona'i bai nagami'i nelata hana'mu enogo'na helata nehana'mu yamofihi lolo hite moko fise'na enogo'na bilata hana'mu ekesa bai nagami'i ya suhi nelata hana'mu yabe luto tele tulu bi'ehina.

Ya luloto nobigo mege'i agelo lalu'afu mone nooto ka sipi luto ma luto lu'ehina: Mone enali akafu yagakafa to fayaha'a hiti enalapusa fi emilana to enogobisalo ai omiha'a li malalana to enayanugu ai omiha'a fayahi minalinamagihi 10 enali ekesa bai nagami tegi huto Hu'mamofihi ita bise'na'a ni'ina fa'mene nagami'i hiti li sibi sibi mehuse ipakafa halina lapeluguti epinogo nalabe. Ya hilete hetofa agelo lamana'amagi to sipisipi nala'a enali enubulo hiti to kala efahi logogu lolenogo keligu li binogo limite nehite enagabu neginogo kehelite minalina'mu yabe. 11 To enagabu neginogo kehelite bi'ahana bona'i ya'amagi nebinogo loto lo su mehalube'mu hibe. To ya'ma lokiya'a tiloto mino lito buto foto'i mino moloto minalina'mu yabe. Ya hu'ehina'mu akafu yagakafa hiti to meha'a enalapusa fi emilata nehana bona'i enali nehana to gi'amofihi omiha'a lite nehana'a enali mone'na enagabu gise'na li he'mi epoloto mebilina'mu yabe. To enabasu bite to mino fulu hite mealana'mu yabe. Kana'amu kana'amu keke'i luse'nauba minomo limito ni'igo kehe lelite bite minalune'mu habe.

12 Ya'ma kana'alo Hu'ma keya ka lu'ehina kehelilete to Yesuhi hapa'a kumu ule'ale kehelite lite nehana bona'i Hu'mamofihi pa sose bona'a enali ya'ma amuya melete minalafa.

13 Ya hulago kokulumaguti nogo moneuba ma luto limigo keheli'ohuna: Kai kaga ya'ma fayahi akoyobo. Ya'ma kana yupahi ifo'aga Sipi Bomofitoga foya'a lilete ise gite fililana'a enali komopa'anigu lamana'a kehelilana enali kumu bati hi epalalina'mu yabe. Ya luto ligo Sikalafu'uba ai ka nona'a ma luto emi'ehina: Lama'naka. Enali ya'ma sipi foya'animofihi molo legege hite melete enabasu bite mino fulu hilana'mu yabe. Ya hilete nebinogo minete lite hi'ahanamofihi lamana'a enemege'i moloto bilina'mu yabe.

Metoga foyamofihi legeya'a guna malalinamofihi ka'a

14 Nani bu go'ohugo sopohi hapa'a koholi huto nohigo bu go'ohube. To sopohi gupisalo mone mino'ehina ai meha'a bona suhi huto to layaha'aga ya'ma enigihiti bomagihi kakili'ani golitu lolo hi'ahana ya'ma biloto mino'ehina. To yaha'aluga ya'ma emita'i sage boge'a mone lito mino'ehina. 15 Ya nohigo kokulumagu sipi mono nonuguti agelo moneuba limito sopohi gupisalo mino'ehina bomofihi ya'ma luto kehe sipi ito lu emi'ehina: Kai emitakatu foyakamofihi legeya'a laga huto molobo. Metoga foyamofihi legeya'a alo'i huto hu su ho'ehibe. Laga huto li malalata kana'a alo'i hupamone nohibe. 16 Ya luto lulago sopohi gupisa'alo minalinauba emita'a li yofo huto oto iloto melugu lamana'a laga huto li gehesa huto munu munu hu'ehina.

17 Ya nohigo agelo moneuba kokulumagu sipi mono nonuguti heleko limiloto ai'a ana huto emita'i sage boge'a liloto mino'ehina.

18 Lelito noago lalu'afu moneuba ai kokulumatoga sipi mono nopomofihi mamufa gilata hitalo nohinagati o'ehina. Ai logomofihi kaba'auba lalu'afihi emita'i sage boge'a aliloto mino'ehina ai ya'ma ka sipi luto lu emi'ehina: Legeya'a uya'i lo su ho'ehina'mu ni'inaya kai emitaka sage boge'atu metoga bai nagami'mofihi legeya'a laga hu su hobo. 19 Ya luto lulago agelo lalu'afu ya'ma emita'i lito kete boloka biloto melugu bai legeya'a laga hu su ho'ehina. Laga hu su nohago Hu'mamofihi sipi ipakafa hose'namofito he'mi moloto i sala kolata kefahi ya suhi huto komopa'agu malago limi su ho'ehina. 20 Ya hilago nohi hepa'i mone kegi'a fegutoga molo emite i sala kalatamo anaguti golapo nagami'i limito mino'ehina. Anaguti limito hefuhi malago bona'mofihi gi'nalo tito i bilimo i'ehina to hefuhi malalinamofihi yatama'a ya'ma 320 kilomita ya suhi huto mino lito buto ni'igo bu go'ohuna yabe.

Copyright information for `BEF