Revelation of John 15

Agelo 7 enali to gumi'i hose'na nasana 7 lite mine'ahana

Ya nehago kokulumagu huto hu'ehina topa hose'na hiti huto higo bu go'ohuna. Agelo 7 enali gumi'i hose nasana lite mine'ahana. Ana gumi'i hose nasana su halina nasana ya'ma molo emito huto nohigo Hu'mamofihi ita bise'na melugu minomo oto alina'mu aku'i ana kana'a su halina'mu yabe luto lu eto'ehina.

To hefu nagami'i mone'ya bu go'ohuna. Ya'ma gapo gapotu lolo hi'ahana suhi huto logo guluya meha'a hiti li sibi sibi hite lolo hi'ahana legi huto ni'igo bu go'ohuna. To akafu yagakafa hiti meha'a hiti to ai'a omiha'a gi'amofihi napa'amo ya'ma amuya melete enebe ligi'ahana'a enali gapo gapotu hefu nagami'i lolo hi'ahanamofihi beletoga'aga Hu'mamofihi gita suhi huto ilata nehana enayanugu lite mine'ahana bu go'ohuna. Enali Hu'mamofihi agoya pana'a Mosehi to sipisipi nala'amofihi nama'a ma lite li'ahana: Amuya bo enebe ligi'ahata, Hu'ma, Sipi Botio, kai lolo huto moloto hu'ahata ya'ma tito mino'ehina. To lamana'a nasana lilata nohane. Noto noto bona'magihi enali gihiti bo'ani nohane. Kai kapoka ya'ma lamana'a to legeya'a lamana'a ni'inagihe. Sipi Bo, kai kumu ki'afu koli mehilina'mu yabe? Kigika sipinamo kumu ki'afu liyafa mehilina'mu yabe? Kai monekomaka pa solata nohane. Ya hu'ehina'mu noto noto bona'i kaitoga ete enalapusa fi kimilune'mu habe. Kai bati huto lelito oto moloto lito hu'ahata ya'ma yege yege bona'i asaga'magi bu galana'mu yabe.

Ya lite lilago nani nubu bu golago buto bu go'ohuna. Kokulumagu sipi mono nohi kafe'a hokolo hu'ehigo pa sose hasagu Hu'mamofihi bulo mino'ehina bu go'ohube. Hokolo nohigo agelo 7 enali gumi'i hose nasana 7 lite mine'ahana, enali sipi mono nonuguti limi'ahana. Enali koholi gukete gulu gulu hina'a lite hekele'ahana to hapi fina'aga sahi golitu lolo hi'ahana ya'ma lite enumupa bi'ahana. To kene'i amuya'a hiti loebe loebe enalitogati moneuba agelo 7 ya'ma lape'i 7 golitu lolo hi'ahana ya'ma epi su holago yamofihi li'ahana. Lape'i komopa'agu ya'ma Hu'ma minomo buto minoba minoba bomofihi ita bise'na bai toto mino'ehina. To sipi mono nopofihi komopa'agu ya'ma Hu'mamofihi fana meha'a hiti amuya'a hiti lokiya'a hiti bai toloto molo mino'ehina. To agelo 7 enali gumi'i hose nasana 7 mele'isi li huto hu su mehe'ahago sipi mono nonugu tilatamofihi kapo'a ya'ma molo hekini le'ahana.

Copyright information for `BEF