Revelation of John 17

Mokolo a'mofihi ka'a

Ya hulago agelomagi 7 lape'i 7 li'ahana enalitogati moneuba nanitoga oto ma luto nelepi'ehina: Mokolo a'mofi tegi huto ni'ina hepa'i napa'alo nagami'i loe lae huto ni'ina suhi huto foipana'a henetilube'mu hibe. Ya nehinogo Hu'mau osahi epilina'mu oto kelepinogo'ni bu galata'mu yabe. Noto noto bona'i enikibina bo hiti ya'ma a'i hiti moko lilata hi'ahana. To noto noto bona'i yamagi enali ana a'mofitogati ya'ma bai nagami tegi huto mokona'a mikili helago komopa'ani sibina hulata nohina.

Sikalafu'uba limito komopa'nigu fololago agelo bu galane luto lu nimi'ehina'auba nele'moto ka meto foto'i bu'ehina. Anaga a'i mone bu go'ohube. Ai akafu yagakafa safa'na mone'mofihi megesalo mino'ehina. Akafu yagakafamofihi suhi huto gufa'alo gi'a babu luto mino'ehina. Ya'ma Hu'mamofihi lube sibina sabana lulata hu'ehina ka'a fato suhi fato suhi huto fayahi koyo'ehina. To ana akafu yagakafamofihi lataha'alo 7 to komu'a 10 mino'ehina. To a'i ai gukete ya'ma safa'na to okofuhu gukete i kolo bito mino'ehina. To sekele mamu'a ya'ma goli efahi mina'a tito ni'ina nasana to hetofa efahi pesesu'i hiti lito li bati huto i kolo bi'ehina. Yanugu masu mone golitu lolo hi'ahana liloto mino'ehina ya'ma moko lise'namofihi kolo tanana'a to foipa nasanamofihi bai toloto mino'ehina. Gobisalo ya'ma suguna gi'a ma lite fayahi keye malago mino'ehina: Bebiloni hepa'i napa'a ya'ma noto noto moko lise'namofihi to foipa hapa'amofihi ito'afihi nani ya'ma nohube luto ligo keye'ahana. To ana a'i ai Hu'mamofihi pa sose bona'a to Yesutoga i ke'mete mine'ahana'mu yabe luto enoho fili'ahana bona'i enalitogati golahi noba noba higo komopa'a sibi huto ni'igo bu go'ohube.

Bu goloto'ni nabaga nelesa ligo topa ho'ohuna.
Ya nohugo agelouba ma luto noloka ho'ehina: Henana'mu kabaga aka huto topa nohane? Nani a'mofihi hapa'a to akafu yagakafa he'mu ki'ehina yamofihi hapa'a to suguna kamofihi hapa'a ya'ma akafu nasanamofihi lataha'a 7 to komu'a 10 yamofihi hapa'a yata'isi ya'ma lu huto huto lu kimilugi kehelibo. Kai akafu yagakafamo bu go'ahata ya'ma koyapa'i bu hiti mino'ehina yatai ya'ma menohibe. Alihi ma'isi ya'ma keliguti ho tito tiloto buto minoto ho fililina'mu yabe. Ya'ma metoga bona'i enali bu gelete topa hete minalabe. Enigi'ani melugu huto mehu'ehina'aga ema amuya bame tame hite nehana bona'magihi enigi'ani keye'ahana bukugu keyete memele'ahana bona'magihi ya suhi topa halune'mu habe. Hena'mube? Ya'ma akafu yagakafa koyapa'i mino'ehinamo yatai menohibe. Aku'i minoto ya'ma i gelehe huto alube'mu hibe.

Ya'ma hapa'a kekesa keheli bati huto keheliya ibo. Ana hapa'amofihi kehelilata suhi huto ya'ma ni'ibe. Lataha'a 7 enali kosa 7 ya'ma a'uba si'a fito nominana kosa ni'ibe. To kosa 7 ya'ma enigihiti bo 7 nehabe. 10 Enalitogati enigihiti bo 5 enali limite fa'mene hi'ahana. Mone'i ya'ma yatai kaba nohibe. Mone'i ya'ma minoto huto hilube'mu hibe. Ai huto huloto kana'a hupamone'isi minalibe luto lu eto'ehinamo ni'ibe. 11 Akafu yagakafa koyapa'i mino'ehina yatai kanagu ya'ma menohibe. Ai ya'ma enigihiti bo 7 enalitoga hepito minalube'mu hibe. Ya hulenogo napa'ani 8 lolo hilune'mu habe. Ya hilenogo ai minoto enele'mo bati hulata nasanagu ya'ma bufa huto ho fililube'mu hibe.

12 Komu'a 10 bu go'ahata ya'ma enigihiti bo 10 enali nehabe. To enali kaba hise'na'ani ya'ma yatai kanagu hapi mefi'ahanamo ni'ibe. Enigihiti bo foya'ani ya'ma hapi fite akafu yagakafa hiti kana'a hupamone'isi lilune'mu habe. 13 Enali komopa'ani kehelise'na'ani moneko hulenogo akafu yagakafamofihi kele kele'i hi etete amuya'ani ya'ma ai yanugu malalune'mu habe. 14 Ya nehite Hu'mamofihi sipisipi nala'amofihi luba hi etete minalune'mu habe. Ya nehinogo sipisipi nala'auba to ai'a naga'a hiti enali ya'ma amuya molo lito buto enifitu falube'mu hibe. Ya nohinogo ai ya'ma enigihiti bomagihi enogo'anifu to kibina bomagihi enogo'anifu nohinagihe. Ai kehe i'ehina bo hiti to elesa molo epi'ehina bo hiti to aitoga i ke'mete mine'ahana bo hiti enali ya'ma akafu yagakafamofihi naga'amofihi hiti luba hi etete enebe ligilune'mu habe.

15 Ya luto luloto agelouba ma luto molo emito lu nimi'ehina: Nagami'i napa'a ya'ma mokolo a'uba ai megesaga nohina'a bu go'ahata ya'ma noto noto bomagihi babeyafa'a fato fato'i to li gehesa fato fato'i to naga'i fato fato'i enogo fato fato'i ni'ibe. 16 To komu'a 10 bu go'ahatamo enigihiti bo 10 enali to akafu yagakafa ai hiti ya'ma mokolo a'i aitoga ipakafa hete li felu henogo gukete'a sekele mamu'a li kisite gufa yapako nehinogo meme'a nelenogo luga'a ya'ma logouba lalube'mu hibe. 17 Ya hulenogo ya'ma fa'mene minalina'mu yabe. Hu'mau komopa'ani le'mo babahi hulenogo enali kaga'a ya'ma keheliya ilete komopa'ani hepito moneko nehinogo amuya'ani ya'ma akafu yagakafamofihi yanugu mele su helenogo ai kele kele bo'a minalune'mu habe. Ya nehinogo Hu'mamofihi ka'a ya'ma amuya moloto huto hu bai telenogo enali su halina'mu yabe.

18 To kai mokolo a'i mone bu go'ahatamo ya'ma hepa'i sipi'a lolo nohibe. Ana hepa'i yauba ya'ma noto noto enigihiti bomagihi hepa'i lataha'a lolo hilenogo kele kele'i hi etete minalabe luto yamofihi amuya li'ehinamo ni'ibe.

Copyright information for `BEF